খুরুমজরি! খুলুমখা! জয় মা ত্রিপুরা সুন্দরি!

থৌরম অসিদা ঐখোয়গা লোয়ননা ত্রিপুরাগী মুখ্য মন্ত্রী শ্রী বিপ্লব দেবজী, কেন্দ্রগী মন্ত্রী-মন্দলগী ঐহাক্কী মরুপ শ্রী গিরিরাজ সিংহজী অমসুং শ্রীমতি প্রতিমা ভৌমিকজী, ত্রিপুরাগী উপ মুখ্য মন্ত্রী শ্রী জিশনু দেব ভর্মজীনা শরুক য়ারি অমদি এম.পি.শিং. এলম.এল.এ.শিং অমসুং লোকেল বোদীশিং, পঞ্চায়ৎশিংগী মেম্বরশিং, অমসুং ঐহাক্কী হোৎনবা কনবা ইচিল-ইনাওশিং অমসুং নহা ওইরিবা মরুপশিং য়াওরি।

ত্রিপুরাগী ঐহাক্কী মরুপশিংগা ৱারী শাবনা ঐহাক্কী থাজবা অসি হেন্না হেনগৎলকখি। ঐহাক্না ৱারী শারুবা মীওইশিং অদুগা ৱারী শাবদা নুংঙাইবা পোকখি। চাউখৎ-থৌরাংগী মঙলান অসি, কনাগুম্বগী মশাগী য়ুমদা লৈজবা ইশাগী থাজবা অসি অমসুং ইকাই খুম্নবা ফংবা পুন্সি অমনা ত্রিপুরা অমসুং অপুনবা অৱাং-নোংপোকপু অচৌবা পনখৈ তম্নবা পুরগনি। লাক্কদৌরিবা মতমশিংদা অনৌবা থৌশিলগা লোয়ননা ত্রিপুরাদা চাইখৎ-থৌরাং পুরক্লগনি হায়না থাজৈ।

মরুপশিং,

ঐখোয়গী পুন্সিদা অচৌবা অহোংবা অমা হেক্তা লাকপা মতমদা নত্ত্রগা ঐখোয়না মাইপাকপা খরা ফংবা মতমদা মসিনা মহৌশানা ঐখোয়দা ইথিল অমসুং অনৌবা থৌনা অমা পীখি। অদুবু করিগুম্বা মতম শাংনা ঙাইরবা অমদি অমম্বগী চহি কয়া লৈরবা মতুংদা মাইপাকপা ঙম্বা অমসুং আশাগী অনৌবা মঙাল ফংবা ঙম্বা ওইরবদি আশাগী মঙাল অদু শরুক কয়া থোক্না হেনগৎলক্কনি। মসিগী আশা অসি লেপ্তনা হেনগৎলক্লি মরমদি ঐখোয়না বিপ্লব দেবজীগা লোয়ননা পুন্না থবক তৌনবগী খুদোংচাবা অমা ফংখি। ঙসি ঐখোয়গী ত্রিপুরা অমসুং অপুনবা অৱাং-নোংপোক্তা অসিগুম্বা অহোংবা অমা ফংলি।

ঙসি প্রধান মন্ত্রী আৱাজ য়োজনাগী মখাদা অহানবা ইনস্তোলমেন্ত পীখিবনা ত্রিপুরাগী মঙলানশিংদা অনৌবা ইনোৎ অমা হাপখ্রে। ঐহাক্না ত্রিপুরাগী মীয়াম পুম্নমক, অহানবা ইনস্তোলমেন্তগী কান্নবা ফংখিবা ইমুং লাখ অমগা মখাই অসিবু থমোয় শেংনা নুংঙাইবা ফোঙদোকচরি। ঐহাক্না মুখ্য মন্ত্রী বিপ্লব দেবজী অমসুং মহাক্কী সরকারনা লৈঙাক্কী পথাপ অমসুং অরিবা মওং-মতৌশিংদা অতেনবা মতমগী মনুংদা অহোংবা পুরকপা ঙমখিবগীদমকসু থাগৎপা ফোঙদোকচরি। বিপ্লব দেবজীগী মখাদা ত্রিপুরা পুম্বদা অসিগুম্বা থৌনা লিংজেল অসি উবা ফংলি।

মরুপশিং,

চহি মি-মঙাগী মমাংদা ত্রিপুরাদা দিকেদ কয়া শোত্থদুনা লৈরুরবা সিস্তেম অমা লৈ অমসুং মফম অসিদা অহোংবা পুরকপা ওইথোক্তে হায়না মীয়াম্না হায়নরম্বা অদু ঐহাক্না নীংশিংলি। অদুবু ত্রিপুরানা অহোংবা অমা পুরক্কে খনখিবা মতমদা ত্রিপুরাগী চাউখৎ-থৌরাংদা অপনবা ওইরম্বা অরিবা থৌশিল অদু মপুং ফানা হোংহনখি। হৌজিক ত্রিপুরাবু লায়রবা ওইহন্নবা অমসুং ত্রিপুরাগী মীয়ামবু খুদোংচাবশিং ফংহনদনা থম্লিবা থৌশিলগী মফম লৈত্রে।

হৌজিক দবল ইঞ্জিন সরকার অসিনা মপুং ফানা অমসুং পুকচেল শেংনা ত্রিপুরাদা চাউখৎ-থৌরাং পুরক্নবা হোৎনরি। অগর্তলা অমসুং দিল্লী অনিমক্না হৌজিক পুন্না পোলসীশিং শেম্লি অমসুং ত্রিপুরাগী চাউখৎ-থৌরাংগীদমক কন্না হোৎনরি। হৌখিবা চহি মরি অসিদা ত্রিপুরাদা লৈবা খুঙ্গংশিংগী ইমুং ৫০,০০০ রোমদা পি.এম. আৱাজ য়োজনাগী মখাদা পক্কাগী য়ুমশিং শাখ্রে। অনৌবা য়ুম লাখ ১.৬০রোম এপ্রুব তৌখ্রে। এপ্রুব তৌখিবা য়ুমশিং অসিগী মনুংদা ঙসি ইমুং লাখ ১.৫ রোমদা অহানবগী ইনস্তোলমেন্ত পীথখ্রে। মসিসু অমুক্তা বত্তন অমা নম্লগা তৌখি!

ত্রিপুরাগী মসিগী থৌনা-লিংজেল অমসুং খোঙজেল অসি ঐখোয়না কোরোনাগী মায়োক্তা লান্থেংনবদা উবসু ফংখি। ত্রিপুরানা চহি ৪৫গী মথক্কী মীওই চাদা ১০০ ভেক্সিন কাপখিবগী অহানবা রেকোর্দ থমখি। অমসুং হৌজিক ত্রিপুরানা চহি ১৮গী মথক্কী মীওই পুম্বা চাদা ১০০%  য়ৌগদবা নকশিল্লক্লে।

মরুপশিং,

মমাংদা লৈবাক অসিগী অৱাং অমদি নোংচুপ থংবা ঐখোয়গী তুরেলশিংনা নোংপোক্তা য়ৌক্লমখি, অদুবু গঙ্গাগী চাউখৎ-থৌরাং অসিদি মফম অসিদা য়ৌরক্ত্রিঙৈ মমাংদা লেপখি। লৈবাক অসিগী অপুনবা চাউখৎ-থৌরাং অসি মচেৎ-মচেৎ ওইখি অমসুং মসি রাজনিতিগী ওইবা মীৎয়েংগী মখাদা য়েংখি। মরম অসিনা ঐখোয়গী অৱাং-নোংপোক্না য়েংশিনবীদে হায়না ফাওখি। ঙসি লৈবাক অসিগী চাউখৎ-থৌরাং অসি ‘এক ভারত, শ্রেস্থা ভারত’কী ৱাখল্লোনগা লোয়ননা মীৎয়েং থম্লি। চাউখৎ-থৌরাং অসি লৈবাক্কী অমত্তা ওইবগী ৱাখল্লোন অদুগা চপ মান্নৈ হায়না ঙসিদি লৌনরি।

মমাংদা পোলিসীশিং অসি দিল্লীগী থোং লোনশিনবা কা মনুংদা শেমখি অমসুং মখোয়গী মরক্তা অৱাং-নোংপোক য়াওহনদনবা হোৎনখি। মসিনা তোখাই তাহনখি। মরম অসিনা লৈবাক অসিনা হৌখিবা চহি তরেৎ অসিদা অনৌবা ৱাখল্লোন অমসুং থৌশিলগা লোয়ননা মাংদা চংশিল্লি। হৌজিক্তি পোলিসীশিং অসি দিল্লীগী মতুং ইন্না খক্তা শেমদ্রে অদুবু মসি রাজ্যশিংগী মথৌ তাবশিংগী মতুং ইন্না শেম্লে।

খুদম অমা ওইনা লৌরবদা, প্রধান মন্ত্রীগী আৱাজ য়োজনা অসিনি। ত্রিপুরাগী ইমুং লাখ কয়াদা পক্কাগী য়ুমশিংগী মতাংদা লৈরম্বা কাংলোন খরানা অপনবা ওইহল্লম্মি। অদুবুসরকারনা ত্রিপুরাগী লৈরিবা মফমগী মওং মতৌ অসি খঙলদুনা মসিগী মতুং ইন্না কাংলোনশিং শেমদোক্তুনা মথৌ তাবা পোলিসীশিং শেমখি। মসিনা মরম ওইদুনা অনৌবা ইমুং কয়ানা স্কীম অসিগী কান্নবা ফংলি। হৈশিংবা হায়বা অসি চাউখৎ-থৌরাংদা য়াম্না মরু ওই।

মরুপশিং,

ঐহাক্না লৈবাক অসিদা হঞ্জিন-হঞ্জিন পি.এম. আৱাজ য়োজনাগী মপাঙ্গলগী মতাংদা হায়খ্রে। অমসুং ঐহাক্না ত্রিপুরা সুন্দরিনা থৌজালবীরিবা মফম অসিদা অমুক হন্না থমজগে। চহিচা কয়া নুপীশিংগী মমুংদা য়ুম নত্ত্রগা লমশিং অসি লৈবা য়াদে হায়না অরিবা ৱাখল্লোন অমা লৈরমখি। পি.এম. আৱাজ য়োজনানা ৱাখল্লোন অসিদা অহোংবা পুরক্নবা হোৎনখি। স্কীম অসিগী মখাদা শারিবা য়ুমশিং অসিগী মপু ইচে-ইচলশিং, ইচা নুপীশিং অমসুং ইমাশিংনা ওইরি। মখোয়না আইনগী মতুং ইন্না চে-চাং পাইদুনা মপু ওইরি। মসিগী মথক্তা ইচে-ইচল অমসুং ইচানুপীশিংনা গ্যাস কী কান্নবা, মৈ অমসুং ঈশিংগী কন্নেক্সনশিংদু পি.এম. আৱাজ য়োজনাগী মখাদা শাখিবা য়ুমশিংদা ফংহল্লি।

মরুপশিং,

ভারতকী চাউখৎ থৌরাংদা নুপীগী শক্তিনা অচৌবা থৌদাং অমা লৌরি। মসিগী নুপীগী শক্তি অসিগী অচৌবা খুদম অমদি নুপীগী সেল্ফ হেল্প গ্রুপশিং অসিনি। ঐখোয়না সেল্ফ হেল্পকী ইচে ইচলশিং অসি জন ধন একাউন্তশিংগী খুত্থাংদা বেঙ্কিং সিস্তেমগা শম্নহল্লি। মখোয়দা গরেন্তী য়াওদনা শেন্থংশিং পীবা অসিসু চাওনা হেলগৎহনখ্রে। মমাংদা সেল্ফ হেল্প গ্রুপ খুদিংমক্না গরেন্তী য়াওদনা লুপা লাখ ১০ ফাওবগী শেন্থংশিং ফংলম্মি, অদুবু হৌজিক্তি মসিগী শেমফম অসি লুপা লাখ ২০ শরুক অনি হেনগৎহল্লে।

ত্রিপুরা সরকারনা নু্পীশিংগী এম্পাৱর তৌনবা অঙম্বা থাক্তা হোৎনরিবা অসিদা ঐহাক অপেনবা ফাওই। মমাংদা মফম অসিদা লৈরম্বা সরকারগী চহি মঙাগী মনুংদা …. ঐহাক্না হায়রিবা অসি বিপ্লব দেবকী সরকারগী লাক্ত্রিঙৈগী মমাংগীনি….. ত্রিপুরাদা নুপী সেল্ফ হেল্প গ্রুপ ৪,০০০ খক্তা লৈরম্মি। অদুবু ২০১৮দা দবল ইঞ্জিন সরকার শেম্লবা মতুংদা অনৌবা সেল্ফ হেল্প গ্রুপ ২৬,০০০ হেন্না শেমখ্রে। মসিগী সেল্ফ হেল্প গ্রুপশিং অসিগা মরী লৈনরিবা নুপীশিং অসি লৌউ-শিংউ, ৱা অমসুং হেন্দলুমগী পোত্থোকশিং পুথোকপদা শিজিন্নরি। ত্রিপুরা সরকারনা মখোয়দা শেলগী তেংবাং পীরি অমসুং লেপ্পা লৈতনা এম্পাৱর তৌরি। 

মরুপশিং,

অচৌবা অহোংবশিং পুরকপা অমসুং অতেনবা মতমদা অনৌবা সিস্তেমশিং শেমগৎপগী ঐহাক্না ত্রিপুরাবু থাগৎপা ফোঙদোকচরি। মমাংদদি কম্মিসন য়াওদনা করিমত্তা লেংলমদে, অদুবু ঙসিদি সরকারগী স্কিমশিংগী কান্নবশিং অসি দি.বি.তি.গী খুত্থাংদা অদোমগী একাউন্তদা হকথেংননা য়ৌহল্লে। মমাংদগী প্রজাশিংনা থবক খুদিংমক্কী সরকারগী ওফিসশিংদা কোইচেন চেল্লম্মি অদুবু হৌজিক্তি সরকার মশামক্না সর্ভিস অমসুং খুদোংচাবা খুদিংমক পীনবা অদোমগী মনাক্তা লাক্লে।

মমাংদি, সরকারগী কর্মাচারিশিংনা মতম চানা তোলোপ ফংলোইদরা হায়না মীপাইনরম্মি অদুবু হৌজিক্তি মখোয়না ৭শুবা পে কম্মিসনগী খুদোংচাবশিং ফংলে। মমাংদগী লৌমীশিংনা মখোয়গী মহৈ মরোংশিং কদাইদা য়োনগদগে হায়না মীপাইনরম্মি অদুবু ত্রিপুরাদা অহানবা ওইনা লৌমীশিংদগী এম.এস.পি.দা মহৈ মরোংশিং লৈশিল্লে। মসি চপ মান্নবা ত্রিপুরা,চপ মান্নবা মীয়াম অমসুং চপ মান্নবা তৌবা ঙম্বা অদুনি অদুবু মমাংদগী স্ত্রাইক তৌবগী চৎনবী লৈরম্বনা ইন্দস্ত্রীনা চংলকপা মীপাইরম্মী অদুবু হৌজিক্তি ত্রিপুরাগী এক্সপোর্ত অসি শরুক মঙা হেনগৎলে। 

মরুপশিং,

ত্রিপুরাদা লৈরিবা দবল ইঞ্জিনদগী কান্নবা ফংলিবা মীওই অয়াম্বনা লাইরবা, হন্থনা য়েংবীরবা, শোত্থরবা অমসুং অখন্ননা ঐখোয়গী ত্রাইবেল খুনাইগী ইচিল ইনাওশিংনি। ঐখোয়গী অৱাং নোংপোক অসি লৈবাক অসিগী খ্বাইদগী লিরবা অমসুং ইনাক খুল্লবা ত্রাইবেল কলচরশিংগী সেন্তরনি। নিংখা-তম্বগী পুৱারীদা অৱাং নোংপোক্কী ত্রাইবেল নিংতম লান্মীশিং অমসুং লৈবাক অসিগী ত্রাইবেল নিংতম লান্মীশিংনসু লৈবাক অসিগীদমক থৱাই কৎখি। মসিগী চৎনবী অসিবু ইকাই খুম্নবা উৎনবা লৈবাক অসিনা চোকথবা লৈতনা মসিগী লেগেসী অসি মাংদা পুনবা হোৎনরি।

লৈবাক অসিনা নিংখা-তম্বগী অমৃত মহোসবকী মনুংদা অতোপ্পা অচৌবা ৱারেপ অমসু লৌখ্রে। হৌজিক্তি নভেম্বর ১৫দা ভগৱান বিরসা মুন্দাগী মপোক কুওন অসি জনজাতীয় গৌরব দিবস হায়না লৈবাক শিনবা থুংনা অমসুং মতম চুপ্পগী ওইনা পালন তৌরগনি। মসিনা ত্রাইবেল হেরিতেজদা ইকাই খুম্নবা উৎপা নুমিৎ খক্তা নত্তনা ইং-তপ্পা খুনাই অমা শেম্নবসুনি। মসিনা লৈবাক অসিনা লৌখিবা ৱারেপকী সিম্বল অমসু ওইরগনি। ঐখোয়গী নিংতম ইহৌ পুম্বদা অগস্ত ১৫ অসি য়াম্না মরু-ওইবগুম, ঐখোয়গী দেমোক্রেতিক ভেল্যুশিংদা জনুৱারী ২৬ অসি য়াম্না মরু-ওইবগুম, রাম নবমী অসি ঐখোয়গী নাৎকী চৎনবীদা মরুওই অমসুং কৃষ্ণ অশ্তমী অসিসু ঐখোয়গী পুন্সিদা মরুওইরি; মহাত্ম গান্ধীগী মপোক নুমিৎ ওক্তোবর ২ অসি নন-ভাইওলেন্স দে হায়না পালন তৌরি, সর্দার ভলভভাই পতেলগী মপোক নুমিৎ ওক্তোবর ৩১ অসি লৈবাক অসিগী লিংজেল মান্নবগী মপাউগা মরী লৈনরি মসিগা চপ মান্ননা লৈবাক অসিগী চাউখৎ-থৌরাংদা অমসুং নুঙাই য়াইফবদা শরুক য়াদুনা লাক্লিবা অমসুং য়াবা পাম্লিবা ত্রাইবশিংগী থৌনা হাপ্নবা নভেম্বর ১৫ অসি জনজাতীয় গৌরব দিবস হায়না পালন তৌরগনি।      

মরুপশিং,

মসিগী নিংখা-তম্বগী অমৃত মহোসব অসি অৱাং নোংপোক্কী তোঙান তোঙানবা কাংলুপ অমসুং চৎনবী য়াওদনা মপুং ফারোই। মরম অদুনা লৈবাক অসিনা ২০৪৭দা নিংখা-তম্বগী চহি চামা শুরকপদা অৱাং নোংপোক্না লৈবাক অসিগী চাওখৎ-থৌরাং অমসুং লুচিংদা চাওনা মতেং পাংলগনি।

ঙসিদি মাইকৈ খুদিংমক্তা, লম খুদিংমক্তা অৱাং নোংপোক্তা চাউখৎ-থৌরাংগী খোংজেল য়াংখৎলক্লি। মহৌশাগা তুরিজমগা মরী লৈনবা ওইথোকপা য়াবা কয়া লৈরি, সাউথ এসিয়াগা ভারতকা শম্নবা য়াবা লম্বেল কয়া লৈরি, ললোল ইতিক্কী অচৌবা খুদোংচাবা কয়ামরুম লৈরি অদুবু মসিগী ওইথোকপা য়াবা খুদিংমক মতমগা চুনবা ইনফ্রাস্ত্রকচর অমসুং অফবা লম্বী থোং লৈরবা মতুংদতা থবক্তা ওন্থোকপা ঙমগনি।

হৌখিবা চহি দিকেদ খরদা মাইকৈ অসিদা অহোবা কয়া লৈরম্বা অদু ঙসিদি লেপ্পা লৈতনা মেনশিল্লি। ঙসিদি রেল কন্নেক্তিবিতী অমসুং অনৌবা রেল লম্বীশিং অৱাং নোংপোক্তা শেমগৎলি। মসিগা মান্ননা মমাংদা য়ৌশিনবা ঙম্লরোই হায়না পানরম্বা মফমশিংদা অনৌবা হাইৱেশিং, অপাকপা লম্বী অমসুং থোঙশিং শেমগৎলি। ত্রিপুরা অসিদসু অনৌবা রেলৱে লাইনশিং অমসুং নেস্নেল হাইৱেশিংগী থবক কয়ামরুমসু পাইখৎলে। মসিগী মতমগা চুনরবা ইনফ্রাস্ত্রকচর অসিনা তুংলমচৎতা অৱাং নোংপোক্কী খুমাং চাওশিনবা অমসুং আইদেন্তিতীদা অনৌবা শক্লোন অমা পুরক্লগনি।  

অৱাং নোংপোক্তা পুরক্লিবা মসিগী ৱারেপশিং অমসুং অহোংবশিং অসিনা লৈবাক অসিবু অথুবা মতমদা অনৌবা পনখৈ অমদা পুরগনি। 

অপীকবা রাজ্য অমনা অসিগুম্বা খোঙথাং অসি লৌখৎলকপদা ঐঙোন্দা চাওথোকচবা অমসুং নুংঙাইবা পোকই। ঐহাক্না বেনিফিসরী খুদিংমক, ত্রিপুরাগী প্রজাশিং, অৱাং নোংপোক্কী নুংশিজরবা ইচিল-ইনাও খুদিংমকপু য়াইফ-মঙ্গোল পীজরি। পুম্নমকপু হন্না হন্না থাগৎপা ফোঙদোকচরি।   

হন্না হন্না থাগৎচরি!

*****