প্রধানমন্ত্রীগী লোইশঙ
প্রধান মন্ত্রীনা ২৮শুবা নেস্নেল হ্যুমেন রাইতস কম্মিসন (এন.ঐচ.আর.সি.) ফাউন্দেসন দে থৌরমদা শরুক য়াখ্রে
ভারতকী নিংতম ইহৌ অমদি মসিগী পুৱারি অসি মীওইবগী হকশিংগীদমক থৌনা পীনবগী অচৌবা সোর্চ অমা ওইখ্রে: প্রধান মন্ত্রী
মালেম পুম্বনা ঐখোয়গী বাপুবু মীওইবগী হকশিং অমদি মীওইবগী ভেল্যুশিংগী সিম্বোল অমা ওইনা উরি: প্রধান মন্ত্রী
মীওইবগী হকশিংগী কন্সেপ্ত অসি লাইরবগী ইকাই খুম্নবগা অচেৎপা মরী লৈনৈ: প্রধান মন্ত্রী
ত্রিপল তলাখকী মাইয়োক্তা লো অমা চৎনদুনা ঐখোয়না মু্স্লিম নুপীশিংদা অনৌবা হকশিং ফংহনখ্রে: প্রধান মন্ত্রী
চাওখৎলবা লৈবাক কয়া অমনা ফাওবা ফংবা ঙমদবা ফল অমা ওইনা, ভারতনা কেরিয়র ৱুমেনগীদমক চয়োল ২৬কী পেদ মেতর্নিতী লিব পীনবা লেপখ্রে:প্রধান মন্ত্রী
মীওইবগী হকশিং সেলেক্তিব ইন্তরপ্রিতেসন তৌরিবা অসিদগী চেকশিনগদবনি
মীওইবগী হকশিং অসি পোলিতিক্সকী প্রিজমদা য়েংলকপা অমসুং পোলিতিক্সকী তোংজবা নত্রগা মাংজবদা য়েংলক্লবা মতমদা হকশিং অসিবু খ্বাইদগী চাওনা অকায়বা পীরি: প্রধান মন্ত্রী
হকশিং অমসুং থৌদাংশিং অসি মীওইবগী চাওখৎ-থৌরাং অমদি মীওইবগী ইকাই খুম্ববু পুরিবা খোঙচৎকী লম্বী অনিনি: প্রধান মন্ত্রী
Posted On:
12 OCT 2021 12:53PM by PIB Imphal
প্রধান মন্ত্রী শ্রী নরেন্দ্র মোদীনা ঙসি ভিদিও কনফরেন্সিংগী খুৎথাংদা ২৮শুবা নেস্নেল হ্যুমেন রাইতস কম্মিসন(এন.ঐচ.আর.সি.) ফাউন্দেসন দে প্রোগ্রামদা শরুক য়াখি৷
থৌরম অদুদা ৱা ঙাংলদুনা, ভারতকী নিংতম-ইহৌ অমদি মহাক্কী পুৱারি অসি মীওইবগী হকশিং অমদি মীওইবগী হকশিংগী ভেল্যুশিংগীদমক থৌনা পীনবগী অচৌবা সোর্চ অমা ওইখ্রে হায়না প্রধান মন্ত্রীনা ফোংদোকখি৷“লৈবাক অমা ওইনা, সমাজ অমা ওইনা ঐখোয়না অরানবা ৱায়েল-নুংশিনদবা লৈরিবা অসি থিংখি৷ মালেম পুম্বদা অহানবা লাঞ্জাওনা হিংশাগী থবক চত্থবা মতম অমদা, ভারতনা 'হকশিং অমদি অহিংশা'গী লম্বী অদু মালেম পুম্বদা তাকখি৷ ভারত খক্ত নত্তনা মালেম পুম্বনা ঐখোয়গী বাপুবু মীওইশিংগী হকশিং অমসুং মীওইবগী ভেল্যশিংগী সিম্বোল অমা ওইনা উরি”,হায়না প্রধান মন্ত্রীনা মহাত্ম গান্ধীবু নিংশিংলদুনা ফোংদোকখি৷ থৌরম কয়া অমদা, মালেম অসিনা চমম্নবা মতম ফাওবদা, ভারতনা মীওইবগী হকশিংগীদমক অচেৎপা ফিরেপ অমগা লোইননা সেন্সিতিব ওইনা লৈখি হায়না মহাক্না মখাতাখি৷
মীওইবগী হকশিংগী কন্সেপ্ত অসি লাইরবগী ইকাইখুম্নবগা অচেৎপা মরী লৈনৈ হায়না প্রধান মন্ত্রীনা ফোংদোকখি৷ লাইরবশিংগী মরক্তগী খ্বাইদগী লাইরবা অদুনা সরকারগী স্কিমশিংগী সেয়র চাং চপ মান্ননা ফংলক্তবা মতমদা হকশিংগী ৱাহং হংলকই হায়না মহাক্না ফোংদোকখি৷ লাইরববু ইকাই খুম্ননবা সরকারনা হোৎনৈ হায়নসু প্রধান মন্ত্রীনা শন্দোক্না ফোংদোকখি৷ লাইরবা মীওই অমনা ওপন দিফিকেসন তৌরম্বদগী মনিং-মখা তমহন্নবা লেত্রিনশিং ফংলবা মতমদা, মীওই অদু ইকাই-খুম্নবা ফংলে, মতৌ অসিগুম্না লাইরবা মীওই অমনা বেঙ্ক অমদা চংবগী হৈনদবা লৈরম্বা অদু জন ধন একাউন্ত অমা হাংহল্লক্লিবা অসিনা মহাকপু ইকাই–খুম্নবা উৎপনি হায়না মহাক্না ফোংদোকখি৷ মতৌ অসিগুম্না, রুপে কার্দ, উজ্জৱালা গ্যাস কন্নেক্সনশিং, অমদি নুপীশিংগীদমক পক্কা হাউসকী প্রোপর্তী রাইতশিংগুম্বা খোঙথাংশিং অসি মাইকৈ অসিদদি অচৌবা খোঙথাংশিং ওইরি৷
খোঙথাংশিংবু মখাতানা পল্লদুনা, হৌখিবা চহিশিংদা, তোঙান তোঙানবা সেক্সনশিংগী তোঙান তোঙানবা থাকশিংদা অরানবা ৱায়েল চত্থরিবা অসি থিংনবা সরকারনসু হোৎনখ্রে হায়না প্রধান মন্ত্রীনা ফোংদোকখি৷ “মু্স্লিম নুপীশিংনা ত্রিপল তলাখকী মাইয়োক্তা লো অমা চহি খুজিং কয়াদগী তান্দুনা লাক্লি৷ ত্রিপল তলাখকী মাইয়োক্তা লো অমা চৎনহন্দুনা ঐখোয়না মুস্লিম নুপীশিংদা অনৌবা হকশিং ফংহনখ্রে” হায়না প্রধান মন্ত্রীনা ফোংদোকখি৷ নুপীশিংগীদমক সেক্তর কয়া অমা হাংদোক্তুনা থমখ্রে অমদি মখোয়না অয়ুক-নুমিদাং নাইদনা অশোই-অঙাম য়াওদনা থবক তৌবা ঙম্লগনি৷ চাওখৎলবা লৈবাক কয়া অমনা ফাওবা ফংবা ঙমদবা ফল অমা ওইনা, ভারতনা কেরিয়র ৱুমেনগীদমক চয়োল ২৬কী পেদ মেতর্নিতী লিব পীনবা লেপখ্রে হায়না মহাক্না ফোংদোকখি৷ মতৌ অসিগুম্না, ত্রান্স-জেন্দরশিং, অঙাংশিং অমসুং নোমেদিক অমদি সেমি-নোমেদিক কম্ম্যুনিতীশিংগীদমক সরকারনা লৌখৎলিবা খোঙথাংশিং অদু প্রধান মন্ত্রীনা পুথোকখি৷
হৌখিবা পেরালিম্পিক্সতা পেরা-এথলেতশিংগী পুক্নিং থৌগৎনিংঙাই ওইরবা পর্ফোমেন্স অদুবু নিংশিংলদুনা, হৌখিবা চহিশিংদা দিব্যাঙ্গ জনগীদমক লোশিং চৎনহনখ্রে হায়না প্রধান মন্ত্রীনা ফোংদোকখি৷ মখোয়দা অনৌবা ফেসিলিতীশিং ফংহনখ্রে৷ বিল্দিংশিং শাবিরি, দিবাঙ্গবু কোইদনা লোইনরি অমদি দিবাঙ্গ লোনগী থাক ৱাংখৎহল্লি৷
লাইনা-লাইচৎকী মতমদা, লাইরবা, মতেং ফংদ্রবা অমদি অহল ওইরবা প্রজাশিংদা মখোয় মখোয়গী একাউন্তদা শেল-থুমগী ওইবা মতেং হকথেংননা ফংহনখ্রে হায়না শ্রী মোদীনা ফোংদোকখি৷ৱান নেসন-ৱান রেসন কার্দ চৎনরকপনা মরম ওইদুনা মাইগ্রেন্ত লেবররশিংদা কা-হেন্না খুদোং চাদবা লৈহন্দ্রে৷
লৈবাক অসিগী মিংচৎ শোকপা য়াবা মীওইবগী হকশিং শিজিন্নবা অমদি মীওইবগী হকশিং সেলেক্তিব ইন্তরপ্রিতেসন তৌরিবা অসিগী মাইয়োক্তা প্রধান মন্ত্রীনা চেকশিন-ৱা হায়খি৷ মীওই খরনা মশা খক্তগী খনবা অপাম্বশিংগী মতুং ইন্না মশা মশাগী এঙ্গলদগী মীওইবগী হকশিং ইন্তরপ্রিত তৌবা হৌখ্রে হায়না মহাক্না হায়খি৷ মীওইবগী হকশিং অসি পোলিতিক্স অমসুং লৈঙাক্কী ওইবা প্রোফিত নত্রগা লোসতগী য়েংলক্লবা মতমদা হকশিং অসিবু খ্বাইদগী চাওনা থুগাই হায়না মহাক্না ফোংদোকখি৷ “মসিগী সেলেক্তিব বিহেবিয়র অসি দেমোক্রেসীদসু চপ মান্ননা শোকহল্লি”,হায়না প্রধান মন্ত্রীনা চেকশিন ৱা হায়খি৷
মীওইবগী হকশিং হায়বসি হকশিং খক্তগা মরী লৈনবা নত্তে, ঐখোয়গী থৌদাংগসু মরী লৈনৈ হায়বসি ঐখোয়না মরু ওইনা খঙগদবনি হায়না প্রধান মন্ত্রীনা ফোংদোকখি৷ “হকশিং অমসুং থৌদাংশিং অসি মীওইবগী চাওখৎ-থৌরাং অমদি মীওইবগী ইকাই খুম্নববু পুরিবা খোঙচৎকী লম্বী অনিনি” হায়না ফোংদোক্লদুনা হকশিংগুম্না থৌদাংশিং অসি চাং মান্ননা মরু ওই অমদি মখোয় অসি অমা অমদা কমপ্লিমেন্ত ওইনবনা মখোয় অসি তোখায় তোখায়না খন্ন-নৈনরোইদবনি হায়না মহাক্না মখাতানা ফোংদোকখি৷
তুংগী মীরোনশিংগী মীওইবগী হকশিংবু পল্লদুনা, প্রধান মন্ত্রীনা ৱারোইশিন পীখি৷ ইন্তর্নেস্নেল সোলর এলাইন্স, রেনিৱেবল ইনর্জী গোলশিং অমসুং হাইদ্রোজেন মিসনগুম্বা খোঙথাংশিং অসিগা লোইননা, ভারতনা সস্তেনেবল লাইফ অমসুং ইকো-ফ্রেন্দলী গ্রোথ লৈহন্নবগী মাইকৈদা খোঙজেল য়াংনা চংশিল্লক্লি হায়না মহাক্না ফোংদোকখি৷
******
(Release ID: 1763374)
Visitor Counter : 194
Read this release in:
Kannada
,
English
,
Urdu
,
Hindi
,
Marathi
,
Bengali
,
Punjabi
,
Gujarati
,
Odia
,
Tamil
,
Telugu
,
Malayalam