ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଦେଶର ମହିଳାମାନଙ୍କ ସଶକ୍ତିକରଣର ପରିକଳ୍ପନାକୁ ବ୍ୟାପକ ଭାବେ ବିସ୍ତାରିତ କରିବାର ଉଦ୍‌ଘୋଷଣା କରିଛନ୍ତି । ସେ କହିଛନ୍ତି ଯେ ବାସଗୃହ, ବିଜୁଳି, ଶୌଚାଳୟ, ରନ୍ଧନ ଗ୍ୟାସ୍‌, ସଡ଼କ, ହସ୍ପିଟାଲ ଏବଂ ବିଦ୍ୟାଳୟ ଭଳି ମୌଳିକ ସୁବିଧାର ଅଭାବ ଦେଶର ମହିଳା, ବିଶେଷ କରି ଗରିବ ମହିଳାମାନଙ୍କୁ ବ୍ୟାପକ ମାତ୍ରାରେ ପ୍ରଭାବିତ କରିଛି । ଆଜି ଯେତେବେଳେ ଆମେ ସ୍ୱାଧୀନତାର ୭୫ତମ ବର୍ଷ ପୂର୍ତ୍ତି ପାଳନ କରିବାକୁ ଯାଉଛୁ ସେତେବେଳେ ଏହିସବୁ ସମସ୍ୟା ଦଶନ୍ଧି ଦଶନ୍ଧି ପୂର୍ବରୁ ସମାଧାନ ହୋଇଯିବା ଉଚିତ ଥିଲା ବୋଲି ପ୍ରଧାନମନ୍ତ୍ରୀ ଦୃଢ଼ ମତ ପୋଷଣ କରିଛନ୍ତି । ଆଜି ଉତ୍ତରପ୍ରଦେଶର ମହୋବାଠାରେ ଉଜ୍ଜ୍ୱଳା ୨.୦ ଯୋଜନାର ଶୁଭାରମ୍ଭ ପ୍ରଧାନମନ୍ତ୍ରୀ ଭିଡ଼ିଓ କନଫରେନ୍ସିଂ ଜରିଆରେ କରିଛନ୍ତି ।

ପ୍ରଧାନମନ୍ତ୍ରୀ କହିଲେ ଯେ ଛାତରୁ ପାଣି ଗଳିବା, ବିଜୁଳିଶକ୍ତିର ଅଭାବ, ପରିବାରର ସଦସ୍ୟମାନଙ୍କ ଅସୁସ୍ଥତା, ଶୌଚ କାର୍ଯ୍ୟ ନିମନ୍ତେ ରାତି ଅନ୍ଧାର ପର୍ଯ୍ୟନ୍ତ ଅପେକ୍ଷା କରିବା, ବିଦ୍ୟାଳୟମାନଙ୍କରେ ଶୌଚାଳୟର ଅଭାବ ଆମର ମାତା ଓ କନ୍ୟାମାନଙ୍କୁ ପ୍ରତ୍ୟକ୍ଷ ଭାବେ ପ୍ରଭାବିତ କରିଆସୁଥିଲା ।

ପ୍ରଧାନମନ୍ତ୍ରୀ ଏକ ବ୍ୟକ୍ତିଗତ ମନ୍ତବ୍ୟ ଦେଇ କହିଥିଲେ ଯେ ଆମ ପିଢ଼ି ଏଭଳି ପିଢ଼ି ଯେଉଁମାନେ ମାଆମାନଙ୍କ ଧୂଆଁ ଓ ଖରାର କଷ୍ଟକୁ ସହ୍ୟ କରିବା ଦେଖିଛନ୍ତି ।

ପ୍ରଧାନମନ୍ତ୍ରୀ ପ୍ରଶ୍ନ କରିଥିଲେ ଯେ ଯଦି ଆମର ସାମର୍ଥ୍ୟକୁ ଏହିସବୁ ମୌଳିକ ଆବଶ୍ୟକତା ସମାଧାନ ଦିଗରେ ଉଚିତ ଭାବେ ଉପଯୋଗ କରାନଯିବ, ତେବେ ଆମେ ସ୍ୱାଧୀନତାର ୧୦୦ ବର୍ଷ ଦିଗକୁ କିପରି ଅଗ୍ରସର ହୋଇପାରିବା ? ଯଦି ଆମେ ସଦାବେଳେ ଏଭଳି ମୌଳିକ ସମସ୍ୟାରେ ଘାଣ୍ଟି ହେଉଥିବା ତେବେ ଏକ ପରିବାର ହେଉ କି ଏକ ସମାଜ କିପରି ଭାବେ ଏହା ବଡ଼ କଥା ଚିନ୍ତା କରିପାରିବ ଓ ସେସବୁକୁ ହାସଲ କରିପାରିବ ? ଏକ ସ୍ୱପ୍ନକୁ ସାକାର କରିବାର ଅନୁଭବ ହିଁ ଏକ ସମାଜକୁ ତାର ସ୍ୱପ୍ନକୁ ସାକାର କରିବାର ସାମର୍ଥ୍ୟ ଯୋଗାଇଥାଏ । “ମନରେ ଆତ୍ମବିଶ୍ୱାସ ନରହିଲେ ଏକ ରାଷ୍ଟ୍ର କିପରି ଭାବେ ଆତ୍ମନିର୍ଭର ହୋଇପାରିବ ? ବୋଲି ପ୍ରଧାନମନ୍ତ୍ରୀ ସମସ୍ତଙ୍କୁ ପ୍ରଶ୍ନ କରିଥିଲେ ।

ଶ୍ରୀ ମୋଦୀ କହିଲେ ଯ ୨୦୧୪ ମମସିହାରେ ଆମେ ଆମ ନିଜକୁ ଏହି ପ୍ରଶ୍ନ ପଚାରିଥିଲୁ । ସେତେବେଳେ ଏହା ଖୁବ୍‌ ସ୍ପଷ୍ଟ ଥିଲା ଯେ ଏହିସବୁ ସମସ୍ୟାଗୁଡ଼ିକର ଏକ ନିର୍ଦ୍ଦିଷ୍ଟ ସମୟସୀମା ଭିତରେ ସମାଧାନ କରାଯିବା ଆବଶ୍ୟକ । ସେ କହିଲେ ଯେ ଆମର କନ୍ୟାମାନଙ୍କୁ ଘରର ଚାରିକାନ୍ଥ ଡେଇଁ ଏବଂ ରୋଷେଇଶାଳରୁ ବାହାରିବାକୁ ପଡ଼ିବ ଏବଂ ସେମାନଙ୍କୁ ଘର ତଥା ରୋଷେଇଶାଳର ସମସ୍ୟାର ପ୍ରଥମେ ସମାଧାନ କରିବା ସହିତ ରାଷ୍ଟ୍ର ନିର୍ମାଣରେ ମଧ୍ୟ ନିଜର ଯୋଗଦାନ ଦେବାକୁ ହେବ । ତେଣୁ, ଗତ ୬–୭ ବର୍ଷ ମଧ୍ୟରେ ସରକାର ଏହି ଭଳି ଅନେକ ମୌଳିକ ସମସ୍ୟାର ସମାଧାନ ମିଶନ ମୋଡ଼ରେ କରିବା ସକାଶେ କାର୍ଯ୍ୟ କରୁଛନ୍ତି । ଏହି ପରିପ୍ରେକ୍ଷୀରେ ସେ କେତେଗୁଡ଼ିଏ କାର୍ଯ୍ୟକ୍ରମ ସଂପର୍କରେ ତାଲିକା ପ୍ରଦାନ କରିଥିଲେ । ସେଗୁଡ଼ିକ ହେଲା-

• ସ୍ୱଚ୍ଛ ଭାରତ ମିଶନ ଅଧୀନରେ ଦେଶରେ କୋଟି କୋଟି ଶୌଚାଳୟ ନିର୍ମାଣ କରାଯାଇଛି ।
• ଗରିବ ଲୋକମାନଙ୍କୁ ୨ କୋଟିରୁ ଅଧିକ ବାସଗୃହ ଯୋଗାଇ ଦିଆଯାଇଛି ଏବଂ ସେମାନଙ୍କ ମଧ୍ୟରେ ଅଧିକତର ଗ୍ରାମାଞ୍ଚଳ ମହିଳାମାନଙ୍କ ନାମ ରହିଛି ।
• ୩ କୋଟି ପରିବାରଙ୍କୁ ସୌଭାଗ୍ୟ ଯୋଜନା ଅଧୀନରେ ବିଜୁଳି ଶକ୍ତି ଯୋଗାଇ ଦିଆଯାଇଛି ।
• ଆୟୁଷ୍ମାନ ଭାରତ ଜରିଆରେ ୫୦ କୋଟି ଲୋକଙ୍କୁ ୫ ଲକ୍ଷ ଟଙ୍କା ପର୍ଯ୍ୟନ୍ତ ମୂଲ୍ୟର ମେଡ଼ିକାଲ ଚିକିତ୍ସା ସୁବିଧା ଯୋଗାଇ ଦିଆଯାଉଛି ।
• ମାତୃ ବନ୍ଦନା ଯୋଜନା ଅଧୀନରେ ଗର୍ଭବତୀ ମହିଳାମାନଙ୍କୁ ଟିକାକରଣ ଏବଂ ପୌଷ୍ଟିକ ଆହାର ନିମନ୍ତେ ପ୍ରତ୍ୟକ୍ଷ ଭାବେ ଟଙ୍କା ଯୋଗାଇ ଦିଆଯାଉଛି ।
• କରୋନା ମହାମାରୀ କାଳରେ ଦେଶର ମହିଳାମାନଙ୍କ ଜମାଖାତାରେ ସରକାରଙ୍କ ପକ୍ଷରୁ ୩୦ ହଜାର କୋଟି ଟଙ୍କା ପୈଠ କରାଯାଇଛି ।
• ଆମର ଭଉଣୀମାନେ ଏବେ ଜଳ ଜୀବନ ମିଶନ ଅଧୀନରେ ପାଇପ ଯୋଗେ ପାନୀୟ ଜଳ ପାଇପାରୁଛନ୍ତି ।

ସେ କହିଲେ ଯେ ଏହିସବୁ ଯୋଜନା ଦେଶର ମହିଳାମାନଙ୍କ ଜୀବନରେ ବ୍ୟାପକ ପରିବର୍ତ୍ତନ ଆଣିଛ ।

ପ୍ରଧାନମନ୍ତ୍ରୀ କହିଲେ ଯେ ସ୍ୱାସ୍ଥ୍ୟ, ସୁବିଧା ଓ ଦେଶର ଭଉଣୀମାନଙ୍କୁ ସଶକ୍ତ କରାଯିବା ନିମନ୍ତେ ସରକାର ନେଇଥିବା ପ୍ରତିବଦ୍ଧତାକୁ ଉଜ୍ଜ୍ୱଳା ଯୋଜନାରୁ ପର୍ଯ୍ୟାପ୍ତ ପ୍ରୋତ୍ସାହନ ମିଳିଛି । ଏହି ଯୋଜନାର ପ୍ରଥମ ପର୍ଯ୍ୟାୟରେ ଗରିବ, ଦାଳିତ, ବଂଚିତ, ପଛୁଆବର୍ଗ ଓ ଆଦିବାସୀ ପରିବାରର ୮ କୋଟି ମହିଳାଙ୍କୁ ମାଗଣାରେ ଗ୍ୟାସ ସଂଯୋଗ ଯୋଗାଇ ଦିଆଯାଇଥିଲା । ସେ କହିଲେ ଯେ ଏଭଳି ମାଗଣା ଗ୍ୟାସ ସଂଯୋଗର ଉପକାର ବିଶେଷ ଭାବେ କରୋନା ମହାମାରୀ କାଳରେ ଅନୁଭୂତ ହୋଇଛି । କୋଟି କୋଟି ଗରିବ ପରିବାର ମାଗଣାରେ ଗ୍ୟାସ ସିଲିଣ୍ଡର ମାସ ମାସ ଧରି ପାଇପାରିଛନ୍ତି ଯେତେବେଳେ କି ସାରା ଦେଶରେ ବ୍ୟବସାୟ ବାଣିଜ୍ୟ ସଂପୂର୍ଣ୍ଣ ରୂପେ ଠପ୍‌ ହୋଇଯାଇଥିଲା ଏବଂ ଗମନାଗମନ ଉପରେ କଟକଣା ଜାରି ହୋଇଥିଲା । “କଳ୍ପନା କରନ୍ତୁ, ଯଦି ଉଜ୍ଜ୍ୱଳା ସେତେବେଳେ ନଥାନ୍ତା, ତେବେ ଗରିବ ପରିବାରର ସେହିସବୁ ଭଉଣୀମାନଙ୍କ ଅବସ୍ଥା କ’ଣ ହୋଇଥାନ୍ତା” ବୋଲି ପ୍ରଧାନମନ୍ତ୍ରୀ କହିଥିଲେ ।

******************

SS