প্রধান মন্ত্রী শ্রী নরেন্দ্র মোদীনা কোবিদ-১৯গী ওইরিবা ফীভম অসিগী মতাংদা ভিদিও কনফরেন্সিংগী থোংদা রাজ্য অমসুং জিলাগী ওফিসিএলশিংগা ৱারী শাখ্রে।

ৱারী ৱাতাই শাবা অদুদা ওফিসিএলশিংনা প্রধান মন্ত্রীদা মহাক্কী লুচিং মখাদা কোবিদ-১৯গী মায়োক্তা লান্থেংনরিবা অসিগীদমক মহাকপু থাগৎপা ফোঙদোকখ্রে। ওফিসিএলশিংনা প্রধান মন্ত্রীদা মখোয়-মখোয়গী জিলাশিংদা কোবিদকী ফীভম ফগৎলকপগী মতাংদা পাউদমখ্রে। মখোয়না রিএল-তাইম মোনিতরিং অমসুং কেপাসিতী বিল্দিংদা তেক্নোলোজী শিজিন্নবগী এক্সপরিয়েন্স অদু সিয়র তৌখ্রে। মখোয়না মখোয়গী জিলাশিংদা মীয়াম্না শরুক য়াবা অমসুং এৱের্নেস পীবা হেনগৎহন্নবা লৌখৎখিবা খোঙথাংশিংগী মতাংদসু পাউদমখ্রে।

থৌরম অসিদা ৱা ঙাংলদুনা প্রধান মন্ত্রীনা মীপুম খুদিংমক্না লাইচৎ অসি থেংনবদা মপুং ফানা হোৎননবা হায়খ্রে। মহাক্না মখা তারদুনা হায় কোরোনাভাইরস অসিনা থবক অসি হেন্না দিমান্দ লৈহল্লি অমসুং শীংনবা হেলহল্লি। অনৌবা শীংনবশিং অসিগী মরক্তা অনৌবা লালোংশিং অমসুং পাম্বৈশিং মথৌ তাই। মহাক্না হায় হৌখিবা চহিদা লৈবাক অসিদা এক্তিব কেসশিং হন্থবা হৌরকখি। অদুবু লাইনা অসিনা লৈরিবা মখৈ খজিক্তং ওইরবসু শীংনবা অদুমক লৈখিনি হায়না মহাক্না চেকশিন ৱা থমখি।

প্রধান মন্ত্রীনা লাইচৎ অসি লান্থেংনরিবা রাজ্য অমসুং জিলাগী ওফিসিএলশিংগী থোইদোক-হেন্দোকপা থবক অসিবু থাগৎখ্রে অমসুং মহাক্না হায় মখোয়না ফীল্দদা থবক তৌবগী মখোয়গী এক্সপরিয়েন্স অমসুং ফীদবেক অদুনা পোলিসীশিং প্রেক্তিকেল ওইহনবা অমসুং কান্নবা ওইহনবদা মতেং পাংখি। মহাক্না মখা তারদুনা হায় রাজ্যশিং অমসুং থাক পুম্নমক্তা লৈরিবা তোঙান তোঙানবা স্তেকহোল্দরশিংগী পাউতাকশিং অদু শিজিন্নদুনা তীকা থাদোকপগী লালোং অসি কনখৎহল্লি।

প্রধান মন্ত্রীনা লোকেল এক্সপরিয়েন্সশিং শিজিন্নবগী মথৌ তাবা অমসুং লৈবাক অমা ওইনা অমত্তা ওইনা পুন্না থবক তৌবগী মথৌ তাবগী মতাংদা অকনবা ৱাফম থমখ্রে। মহাক্না কেসশিং হন্থরক্লবসু খুঙ্গংশিং কোরোনা ফ্রী ওইনা থম্বা অমসুং কোবিদকা চুনবা চৎনা-লোনচৎ ঙাক্না চৎপগী মতাংদা পাউজেল শন্দোক্নবা হায়খ্রে। মহাক্না ওফিসিএলশিংদা মখোয়গী লালোং অদু খুঙ্গং অমসুং অর্বানদা অখন্নবা মওংদা শিজিন্নবা অমসুং ভারতকী খুঙ্গং কোবিদ ফ্রী ওইহন্নবা খঙহনখ্রে।

প্রধান মন্ত্রীনা হায় লাইচৎ খুদিংমক্না ঐখোয়দা লেপ্পা লৈতনা ইন্নোভেসন পুথোকপগী অমসুং লাইচৎশিং লাকশিন্নবা ঐখোয়গী মওং-মতৌ হোংদোকপা মরু ওইবা হায়না ঐখোয়দা তাক্তুনা লাক্লি। লাইচৎ অসি লাকশিনবগী পাম্বৈশিং অমসুং লালোংশিং অসি দাইনামিক ওইগদবনি মরমদি ভাইরস অসি ম্যুতেসন তৌবা অমদি মওং-মতৌ হোংবা য়াম্না হৈ হায়না মহাক্না অকনবা ৱাফম থমখ্রে। মহাক্না হায় ভাইরসনা ম্যুতেসন তৌবনা নহাশিং অমসুং অঙাংশিংদা খুদোংথিনীংঙাই ওইরক্লি। তীকা থাদোকপগী থৌওং অসি কনখৎহনবা মথৌ তাই হায়না মহাক্না অকনবা ৱা থমখ্রে।

ৱেক্সিন ৱেস্তেজকী মতাংদা প্রধান মন্ত্রীনা হায় বেক্সিন অমা মাংহনবা হায়বা অসি মীওই অমগী মথৌ তাবা ঙাকশেল অদু পীবা ঙমদ্রে হায়বনি। মরম অসিনা মহাক্না বেক্সিন ৱেস্তেজ থিংনবা হায়খ্রে।

প্রধান মন্ত্রীনা পুন্সিং কল্লিঙৈদা প্রজাশিংগী পুন্সিশিংবু নুংঙাইনা লৈহনবা হায়বা অসি মরু ওইনা লৌগদবনি হায়নসু ফোঙদোকখ্রে। মহাক্না মখা তারদুনা হায় লায়রবশিংগী ওইনা লেম্না রসন পীবা, অতৈ তঙাই ফদবা সপ্লাইশিংগী খুদোংচাবশিং ফংহনগদবনি অমসুং কালাবজার তৌবা থিংগদবনি। মহাক্না হায় খোঙথাংশিং অসি লাঞ্জং অসি মাইপাকপদা অমসুং মাংদা চংশিনবদা তঙাই ফদে।

***