প্রধান মন্ত্রী, শ্রী নরেন্দ্র মোদীনা করাইকল জিলা অমসুং করাইকল জিলাগী (জে.আই.পি.এম.ই.আর.) করাই ন্যু কেম্পস – ফেস-Iদা লৈরিবা মেদিকেল কোলেজ বিল্দি ফাওবগী এন.ঐচ.৪৫-এগী লেন ৪ ওন্নবগী উরেপ উয়ুং তমখ্রে। মহাক্না সাগরমলা স্কীমগী মখাদা পুদুচেরীদা মাইনর পোর্তকী চাউখৎ-থৌরাংগী থবক অমসুং পুদুচেরীগী ইন্দিরা গান্ধী স্পোর্তস কম্প্লেক্সকী সিন্থেতিক এথ্লেতিক ত্রেক্কী উরেপ উয়ুং তমখ্রে।

শ্রী মোদীনা পুদুচেরীগী জৱাহর্লাল ইন্সতিত্যুত ওফ পোস্তগ্রেজ্যুৎ মেদিকেল এজুকেসন এন্দ রিসর্চ (জে.আই.পি.এম.ই.আর.)দা ব্লদ সেন্তর অমা অমসুং নুপী শান্নরোইশিংগী লোস্পেৎ, পুদুচেরীদা ফমুং ১০০ শাবা নুপীগী হোস্তেম অমা শঙ্গাখ্রে। মহাক্না অমুক হন্না শেমজিনখিবা হেরিতেজ মারী বিল্দিংসু শঙ্গাখ্রে।

প্রধান মন্ত্রীনা হায় পুদুচেরীগী লম অসি লৌশিং লৈবশিং, স্কোলরশিং অমসুং কবীশিং অমদি মহাকবী সুব্রমনিয়া ভারতি অমসুং শ্রী ওরোবিন্দোগুম্বা রিভোল্যুস্নরীশিংগীসু লৈফম ওইদুনা লাকখি। পুদুচেরী অসি দাইভর্সিতীগী খুদম অমনি হায়না থাগৎলদুনা মহাক্না হায় মফম অসিদা মীয়াম্না তোঙান তোঙানবা লোলশিং ঙাংলি, তোঙান তোঙানবা লাইনিং-লাইশোন চৎলি অদুবু অমত্তা ওইনা হিংমিন্নরি।

অমুক হন্না শেমগৎপা মারী বিল্দিং অসি শঙ্গাবদা প্রধান মন্ত্রীনা হায় বিল্দিং অসিনা প্রোমিনেদ বীচকী ফজবদা লৈতেং হাপ্লগনি অমসুং লমকোইবা কয়াগী পুক্নিং চিংশিনগনি।

প্রধান মন্ত্রীনা হায় এন.ঐচ. ৪৫-এগী লেন মরি ওনবা অসিনা করাইকল জিলা কোনশিনগনি অমসুং শেংলবা সনীস্বরম তেম্পল অসিগী লম্বী-থোং ফগৎহল্লগনি অমসুং বেসিলিকা ওফ আৱর লেদী ওফ গুদ হেল্থ অমসুং নাগোর দর্গা ফাওবগী ইন্তর-স্তেৎকী লম্বী-থোং লায়না ফাওনহল্লগনি। মহাক্না হায় সরকার অসিনা রুরেল অমসুং কোস্তেলগী লৈরিবা লম্বী-থোং অসি ফগৎহন্নবা খোঙথাং কয়া লৌখৎখ্রে অমসুং মসিদগী লৌউ-শিংউগী সেক্তরনা কান্নবা ফংলগনি। মহাক্না হায় মখোয়গী পোত্থোকনা মতিক চাবা কৈথেলশিংদা মতম চানা য়ৌহনবা সরকারগী থৌদাংনি অমসুং অফবা লম্বীনা পান্দম অসি ফংহনবদা মতেং ওইরগনি। মহাক্না মখা তারদুনা হায় লম্বী অসি লেন মরি ওনবনা লমদম অসিগী শেন্মীৎলোনগী থবক-থৌরমগী খোঙজেল য়াংখৎহল্লগনি অমসুং মফম অসিগী নহারোলশিংদা থবক্কী খুদোংচাবশিং পীরগনি।

প্রধান মন্ত্রীনা হায় হৌখিবা চহি তরেৎ অসিদা ভারতনা হকচাং ফনা অমসুং ইশা-ইউ ফগৎহন্নবা খোঙথাংশিং লৌখৎখি মরমদি শেন্মীৎলোন চাউখৎপা হায়বা অসি হকচাং ফবগা অনকপা মরী লৈনৈ। অদুনা হিরম অসিদা মহাক্না খেলো ইন্দিয়া স্কীমগী শরুক অমা ওইনা স্পোর্তস কম্প্লেক্সতা মিতর ৪০০ শাংবা সিন্থেতিক এথ্লেতিক ত্রেলকী উরেপ-উয়ুং তমখ্রে। মসিনা ভারতকী নহারোলশিংগী মরক্তা শান্ন-খোৎনবগী তেলেন্ত য়োখৎকনি। মহাক্না হায় পুদুচেরীদা অফবা স্পোর্তস ফেসিলিতীশিং লৈরকপগা লোইননা রাজ্য অসিগী নহারোলশিংনা জাতি অমদি মালেমগী স্পোর্তস মীৎশিংদা মীথোই-মীহেনবা ঙম্লগনি। মহাক্না হায় লোস্পেৎতা শাবা ফমুং ১০০ থাবা নুপীশিংগী হোস্তেল ঙসি শঙ্গাখিবা অসিনা সাইগী কোচশিংগী মখাদা ত্রেন তৌখিবা হোক্কী, ভোলীবোল, ৱেৎলিফ্তিং, কাবাদ্দি অমসুং হেন্দবোল শান্নরোইশিংগী লৈফম-চাফম পীরগনি।

প্রধান মন্ত্রীনা হায় হেল্থকিয়রনা লাক্কদৌরিবা চহিশিংদা মরু ওইবা থৌদাং অমা লৌরগনি। মীপুম খুদিংদা ক্বালিতী লৈবা হেল্থ কিয়র ফংহন্নবা পান্দমগা লোইননা জে.আই.পি.এম.ই.আর.দা ব্লদ সেন্তর অসি শঙ্গাখিবনি, মসিনা মতম শাংবা ঈ, ব্লদ প্রদক্তশিং স্তোর তৌদুনা থম্নবা অমসুং স্তেম সেলশিংগী বেঙ্কিংগী এদভান্স ওইরবা ফেসিলিতীশিং পীরগনি। মহাক্না মখা তারদুনা হায় ফেসিলিতী অসিনা রিসর্চ লেবোএতোরী অমা ওইনা অমদি ত্রান্সফ্যুজনগী হিরম পুম্নমক্তা পর্সনেল ত্রেনিং পীনবা ত্রেনিং সেন্তর ওইনা মথৌ তৌগনি।

প্রধান মন্ত্রীনা হায় ক্বালিতী লৈবা হেল্থকিয়র থৌগৎনবা ঐখোয়না ক্বালিতী লৈবা হেল্থ প্রোফেস্নেলশিং মথৌ তাই। করাইকল ন্যু কেম্পসকী মেদিকেল কোলেজ বিল্দিংগী ফেস-I প্রোজেক্ত অসি অকোইবদা অকাইবা পীদবা কম্প্লেক্স অমনি অমসুং এম.বি.বি.এস. মহৈরোইশিং তাকপী-তম্বীবদা মথৌ তাবা মোদর্ন তীচিং ফেসিলিতী পুম্নমক ফংহনগনি।

সাগরমলা স্কীমগী মখাদা পুদুচেরী পোর্তকী উরেপ উয়ুং তম্বদা প্রধান মন্ত্রীনা হায় মসিনা লোইরকপগা হীথংফম অসি সমুদ্রদা কুমদুনা ঙা ফাবগী থবক-থৌরমশিং তৌরিবা ঙামীশিংদা মেং ওইরগনি। মসিনা খ্বাইদগী মথৌ তারিবা চেন্নাইগা ফাওননবা সী কন্নেক্তিবিতী অদু ফংহল্লগনি। মসিনা পুদুচেরীগী ইন্দস্ত্রীশিংগী কার্গো পুথোক-পুশিন্নদা মতেং ওইরগনি অমসুং চেন্নাই পোর্ত্তা লোদ হন্থহল্লগনি। মসিনা সমুদ্র মপালদা লৈবা সহরশিংগী পেসেঞ্জরগী ত্রাফিককী ওইথোকশিং লৈহল্লগনি হায়না মহাক্না ফোঙদোকখ্রে।

প্রধান মন্ত্রীনা হায় তোঙান তোঙানবা স্কীমশিংগী মখাদা দাইরেক্ত বেনিফিৎ ত্রান্সফরনা বেনিফিসরীশিংদা মতেং পাংখ্রে। মহাক্না হায় মসিনা মীয়ামবু মখোয়গী ৱারেপশিং লৌবদা শক্তি পীখি। মহাক্না হা পুদুচেরীদা হ্যুমেন রিসোর্স মরাং কাইনা লৈ মরমদি মফম অসিদা সরকার অমসুং লনাইগী সেক্তর অনিমক্তা তোঙান তোঙানবা এজুকেস্নেল ইন্সতিত্যুসনশিং লৈ। মসিদা থবক অমদি খুদোংচাবশিং চাউনা পীবা ঙমগদবা ইন্দস্ত্রী অমসুং তুরিজমগী চাউখৎ-থৌরাংগী মতিক ময়াই চাউনা লৈ। প্রধান মন্ত্রীনা “পুচুচেরীগী মীয়াম তেলেন্ত লৈ। লম অসি ফজৈ। মফম অসিদা ঐহাক্না ঐহাক্কী লৈঙাক অসিদগী পুদুচেরী চাওখৎনবগীদমক পাংবা য়াবা মতেং খুদিংমক পাংগনি হায়বগী ইশামক্না থাজবা পীনবা  লাকখিবনি”, হায়না ফোঙদোক্লদুনা ৱারোল পীবা লোইশিনখি।

***