ফেব্রুৱারি ২২, ২০২১দা প্রধান মন্ত্রী শ্রী নরেন্দ্র মোদী অসাম অমসুং নোংচুপ বঙ্গালদা চৎকনি। অয়ুক পুং ১১:৩০ রোমদা তাবদা অসামগী ধেমাজিদা সিলাপাথারদা পাংথোকপা থৌরম অমদা থাও অমসুং গ্যাস সেক্তরগী মরুওইবা প্রোজেকশিং প্রধান মন্ত্রীনা মীয়ামদা কৎথোক্কনি। থৌরম অদুদা মহাক্না ইঞ্জিনিয়ারিং কোলেজশিং শঙ্গাগনি অমসুং উরেপ-উয়ুং তমগনি। নুংথিল পুং ৪:৩০ রোম তাবদা নোংচুপ বঙ্গালগী হুগ্লিদা প্রধান মন্ত্রীনা রেলৱেজ প্রোজেকশিং মীয়ামদা কৎথোক্কনি অমসুং শঙ্গাগনি।

অসামদা প্রধান মন্ত্রী

ইন্দিয়ান ওইলগী বোঙ্গাইগাওন রিফাইনরিগী ইন্দমেক্স য়ুনিত, দিব্রুগরগী মধুবন্দা ওইল ইন্দিয়া লিমিতেদকী সেকেন্দরি তেঙ্ক ফার্ম অমসুং তিনসুকিয়াগী মাকুমদা লৈবা হেবেদা খুঙ্গংদা গ্যাস কমপ্রেসর স্তেসন অমা প্রধান মন্ত্রীনা লৈবাক মীয়ামদা কৎথোক্কনি। মহাক্না ধেমাজি ইঞ্জিনিয়ারিং কোলেজশু শঙ্গাগনি অমসুং সৌলকুচি ইঞ্জিনিয়ারিং কোলেজগী উরেপ-উয়ুং তমগনি। হায়রিবা প্রোজেকশিং অসিনা ইনর্জি মরাং কাইনা ফংবা অমসুং নুংঙাই-য়াইফবা অমসুং মফম অদুগী নহারোলশিং থবক ফংনবগী খুদোংচাবশিং পীগনি। ভারতকী নোংপোক থংবা শরুক শেন-থুমগী ফিবম ফগৎনবা প্রধান মন্ত্রীগী পান্দম পুর্ভোদয়াগা ইরোইন্না হায়রিবা প্রোজেকশিং অসি পায়খৎপনি। থৌরম অদুদা অসামগী রাজ্যপাল অমসুং চীফ মিনিস্তর অমসুং পেত্রোলিয়ম অমসুং নেচরেল গ্যাসকী য়ুনিয়ন মিনিস্তর শরুক য়াগনি।

হেভি ফিদস্তোকশিংদগী এল.পি.জি অমসুং হায়-ওক্তেন গেসোলিন পুথোক্নবা ইন্দিয়ান ওইল-রিছর্স অমসুং দিবলপমেন্তনা পুথোকপা তেক্নোলোজি ইন্দিয়ান ওইলগী বোঙ্গাইগাওন রিফাইনরিগী ইন্দমেক্স য়ুনিতনা শীজিন্নরি। য়ুনিত অসিদা শুংদোক্ত্রিবা থাও রিফাইন তৌবা ২.৩৫ এম.এম.তি.পি.এ(মিল্লিয়ন মেত্রিক তন পর এন্নম)দগী ২.৭ এম.এম.তি.পি.এ(মিল্লিয়ন মেত্রিক তন পর এন্নম)দা হেনগৎহনগনি। য়ুনিত অসি থবক হৌরকপা মতমদা এল.পি.জি পুথোকপা ৫০ তি.এম.তি(থাউজন্দ মেত্রিক তন)দগী ২৫৭ তি.এম.তিদা হেনগৎকনি অমসুং পেত্রোল পুথোকপা ২১০ তি.এম.তিদগী ৫৩৩ তি.এম.তিদা হেনগৎহনগনি।

ওইল ইন্দিয়া লিমিতেদকী সেকেন্দরি তেঙ্ক ফার্ম শুংদোক্ত্রিবা থাউ কিলো লিতর ৪০,০০০ ফজনা থম্নবা শাখিবনি অমসুং শুংদোক্ত্রিবা থাউদগী ঈশিং শেংদোক্কগনি। লুপা কোতি ৪৯০গী প্রোজেক অসিদা নোংমদা কিলো লিতর ১০,০০০ কেপাসিতি লৈবা দিহায়দ্রেসন য়ুনিত অমা য়াওগনি।

তিনসুকিয়াগী মাকুমদা লৈবা হেবেদা খুঙ্গংদা গ্যাস কমপ্রেসর স্তেসন অসিনা লৈবাক অসিদা শুংদোক্ত্রিবা থাও পুথোকপা চহিদা মেত্রিক তন ১৬৫০০ রোম হেনগৎহনগনি। লুপা কোতি ১৩২ চঙনা শাবা স্তেসন অসিদা লো-প্রেসর বুস্তর কমপ্রেসর ৩ অমসুং হায়-প্রেসর বুস্তর কমপ্রেসর ৩ য়াওরি।

ধেমাজি ইঞ্জিনিয়ারিং কোলেজ অসি বিগাস ২৭৬গী লমদা লুপা কোতি ৪৫ রোম চঙনা শাবনি। মসি রাজ্য অসিগী তরেৎশুবা ইঞ্জিনিয়ারিং কোলেজনি অমসুং সিবিল, মেকানিকেল অমসুং কম্পুতর সাইন্সতা বি.তেক কোর্সশিং লৈগনি। উরেপ-উয়ুং তমগদৌরিবা সৌলকুচি ইঞ্জিনিয়ারিং কোলেজ বিগাস ১১৬গী লমদা লুপা কোতি ৫৫ রোম চঙনা শাগদবনি।

নোংচুপ বঙ্গালদা প্রধান মন্ত্রী

নাওপারাদগী দাক্ষিনেশ্বর ফাওবা শাংদোকপা মেত্রো রেলৱেজ প্রধান মন্ত্রীনা শঙ্গাগনি অমসুং পরিং অসিগী অহানবা ওইনা ত্রেন চেনবা লমথাগনি। কিলোমিতর ৪.১গী মখা তানা শাংদোকপা মতেক অসি কেন্দ্র সরকারগী শেন্থং মখাদা লুপা কোতি ৪৬৪ চঙনা শাবনি। মসিনা লম্বী চিনবা হন্থহনগনি অমসুং সহরগী চৎথোক-চৎশিন ফগৎহনগনি। লাইন অসিনা মালেমদা মমিং লৈরবা কালিঘাত অমসুং দাক্ষিনেশ্বরদা লৈবা কালি লাইশঙ অনিদা লমকোয়বা অমসুং লাইখুরম্বা লাকপা মীওই লাখ কয়া লাইনা য়ৌহনবা ঙম্লগনি। নৌনা শাবা স্তেসন অনি হায়বদি বারানগর অমসুং দাক্ষিনেশ্বরদা অনৌবা খুদোংচাবশিং লৈরে অমসুং মুরেলশিং, ফোতগ্রাফশিং, মীতমশিংগা লোয়ন্না নিংথিনা লৈতেংলে।

সাউথ ইস্তর্ন রেলৱেজগী কিলোমিতর ১৩২ শাংবা খারাগপুর-অদিত্যপুর থার্দ লাইন প্রোজেক্কী কিলোমিতর ৩০ শাংবা কালাইকুন্দা অমসুং ঝারগ্রাম অনিগী মরক্তা লৈবা অহুমশুবা লাইনশু প্রধান মন্ত্রীনা শঙ্গাগনি অমসুং মসি লুপা কোতি ১৩১২ চঙনা শাখিবনি। অনৌবা স্তেসন বিল্দিং ৪, অনৌবা ফুদ ওভর ব্রিজ ৬ অমসুং অনৌবা প্লেতফোর্ম ১১ শাদুনা অমসুং হান্নগী মচাক-মথুমশিং হন্না শেমজিন্দুনা কালাইকুন্দা অমসুং ঝারগ্রামগী মরক্তা স্তেসন মরি হন্না শেমগৎলে। মসিনা হাওরা-মুম্বাই ত্রঙ্ক রুত্তা মী পুবা অমসুং পোৎ-চৈ পুবা ত্রেনশিং ফজনা চেনবা ঙমহল্লগনি।

লুপা কোতি ২৪০ রোম চঙনা পায়খৎখিবা ইস্তর্ন রেলৱেজগী হাওরা-বন্দেল-অজিমগঞ্জ সেক্সনগী শরুক অমা ওইরিবা লেন অনি ওনখৎলবা অজিমগঞ্জ-খারগ্রাঘাত সেক্সন প্রধান মন্ত্রীনা লৈবাক মীয়ামদা কৎথোক্কনি।

হাওরা-বর্ধমান কোর্দ লাইনগী দানকুনি অমসুং বারুইপারা(কিলোমিতর ১১.২৮)গী মরক্তা মরিশুবা লাইন অমসুং হাওরা-বর্ধমান মেন লাইনগী রাসালপুর অমসুং মগ্রা(কিলোমিতর ৪২.৪২)গী মরক্তা অহুমশুবা লাইন প্রধান মন্ত্রীনা মীয়ামদা কৎথোক্কনি। রাসালপুর অমসুং মগ্রাগী মরক্তা অহুমশুবা লাইন লুপা কোতি ৭৫৯ চঙনা শাখিবনি অমসুং দানকুনি অমসুং বারুইপারাগী মরক্তা মরিশুবা লাইন লুপা কোতি ১৯৫ চঙনা পায়খৎখিবনি।

হায়রিবা প্রোজেকশিং অসিনা চৎথোক-চৎশিন হেন্না নুংঙাইহনগনি, মতম চঙহল্লোই অমসুং ত্রেনশিং অশোই-অঙাম থোক্তবা হেনগৎহনগনি অমসুং লমদম অসিগী শেন-থুমগী ফিবম ফগৎহনগনি।

*****