নেতাজি সুভাস চন্দ্র বোসকী ১২৫শু মপোক নুমিৎ থৌরম পাংথোকপা ওইনা জনুৱারি ২৩, ২০২১দা ‘পরাক্রম দিৱস’ থৌরমদা ৱা ঙাংনবা প্রধান মন্ত্রী শ্রী নরেন্দ্র মোদী কোলকাতাদা চৎকনি। লমগী পাতা লাখ ১.০৬ য়েন্থোক্নবা প্রধান মন্ত্রী অসামগী সিবসাগরগী জেরেঙ্গা পাথরদশু চৎকনি।

নোংচুপ বঙ্গালদা প্রধান মন্ত্রী

কোলকাতাগী ভিক্তোরিয়া মেমোরিএলদা পাংথোক্কদবা ‘পরাক্রম দিৱস’ হৌদোকপা থৌরমদা প্রধান মন্ত্রী শরুক য়াগনি। নেতাজিগী মাইথিবা পীবা ঙমদবা থৌনা অমসুং মশাগী ওইজবা থাদোক্তুনা লৈবাক্কীদমক পাংথোকখিবা থবকশিং অদু নিংশিংনবা অমসুং ইকায়খুম্নবা উৎনবা, মসিনা লৈবাক অসিগী মীয়ামদা মরুওইনা নহারোলশিংদা, নেতাজিনা পাংথোকখিবগুম অৱাবা তারকপা মতমদা থৌনা লৈনা থেংন্নবা অমসুং মখোয়দা মরৈবাক নুংশিবগী থৌনা অমা পোকহনবা ঙম্নবা চহি খুদিংগী মহাক্কী মপোক নুমিৎ জনুৱারি ২৩ অসি “পরাক্রম দিৱস” হায়না পাংথোক্নবা ভারত সরকারনা ৱারেপ লৌখ্রে।

থৌরম অদুদা নেতাজিগী মরমদা লেংদবা একজিবিসন অমা অমসুং প্রোজেক্সন মেপ্পিং সো অমা হৌদোক্কনি। প্রধান মন্ত্রীনা নিংশিং শেনয়েক অমা অমসুং পোস্তেচ স্তাম্প অমশু ফোঙগনি। নেতাজিদা য়ুম্ফম ওইবা “অমরা নুতন জৌবোনেরি দুত” হায়বা কলচরগী থৌরম অমা পাংথোক্কনি।

থৌরম অসিগী মমাঙদা, প্রধান মন্ত্রীনা কোলকাতাগী নেসনেল লাইব্রেরিদা পাংথোকপা “২১শুবা চহিচাদা নেতাজিগী ফিদমশিং হঙ্গৎনা য়েংবা” হায়বা মালেমগী মীফম অমা অমসুং আর্তিস্তশিংগী কেম্প অমদা চৎকনি। প্রধান মন্ত্রীনা কলাকারশিং অমসুং কনফরেন্সতা শরুক য়ারিবশিং ৱারি শানগনি।

অসামদা প্রধান মন্ত্রী

অসামগী সিবসাগরদা প্রধান মন্ত্রীনা লমগী পাতা লাখ ১.০৬ য়েন্থোক্কনি। রাজ্য অদুগী য়েলহৌমীশিংগী লমগী হকশিং ঙাক্নবগী তঙাইফদবা অদু য়েংদুনা অনৌবা লমগী থৌশিল অমা অসাম সরকারনা পায়খৎলে। মীয়ামগী মরক্তা পুক্নিং-ৱাখল লুম্না লৈনবা অসামগী য়েলহৌমীশিংদা পাতা পীবা অসি খ্বাইদগী মরুওইবা থবক অমা ওইনা পায়খৎলে। ২০১৬দা অসামদা লম লৈতবা ইমুং লাখ ৫.৭৫ লৈখি। মে ২০১৬দগী হৌনা সরকারনা লমগী পাতা লাখ ২.২৮ য়েন্থোকখ্রে। জনুৱারি ২৩গী থৌরম অসি থৌরাং অসিগী মখা চৎথরকপা খোঙথাংনি।

*****