ଆସନ୍ତାକାଲି ଦେଶବ୍ୟାପୀ ଆରମ୍ଭ ହେଉଥିବା କୋଭିଡ୍‍ ଟିକାକରଣ କାର୍ଯ୍ୟକ୍ରମର ପ୍ରସ୍ତୁତି ସଂପର୍କରେ ଆଜି କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡ. ହର୍ଷବର୍ଦ୍ଧନ ସମୀକ୍ଷା କରିଛନ୍ତି । ଏହି ଅବସରରେ ସେ ସ୍ୱାସ୍ଥ୍ୟ ମନ୍ତ୍ରଣାଳୟର ସଦର କାର୍ଯ୍ୟାଳୟ ଦିଲ୍ଳୀର ନିର୍ମାଣ ଭବନ ପରିସରରେ ଖୋଲାଯାଇଥିବା ଉତ୍ସର୍ଗୀକୃତ କୋଭିଡ୍‍ ନିୟନ୍ତ୍ରଣକକ୍ଷ ପରିଦର୍ଶନ କରିଥିଲେ । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆସନ୍ତାକାଲି (1 ଜାନୁୟାରୀ 2011) ପୂର୍ବାହ୍ନ 10ଟା 30 ମିନିଟ ସମୟରେ ଏହି କୋଭିଡ୍‍ ଟିକାଦାନ କାର୍ଯ୍ୟକ୍ରମର ଶୁଭାରମ୍ଭ ଭିଡିଓ କନ୍‍ଫରେନ୍‍ସିଂ ବ୍ୟବସ୍ଥାରେ କରିବେ । ସମଗ୍ର ଦେଶରେ ଏହି ଟିକା ଆସନ୍ତାକାଲି ପ୍ରଦାନ କରାଯିବ । ସବୁ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଏଥିପାଇଁ ମୋଟ 3600 କେନ୍ଦ୍ର ଖୋଲାଯାଇଛି । ସବୁ କେନ୍ଦ୍ରକୁ ଭର୍ଚୁଆଲ ବ୍ୟବସ୍ଥା ଦ୍ୱାରା ସଂଯୋଗ କରାଯାଇଛି । ପ୍ରତ୍ୟେକ କେନ୍ଦ୍ରରେ କାଲି ପ୍ରାୟ 100 ଜଣ ଲୋକଙ୍କୁ ଟିକା ପ୍ରଦାନ କରାଯିବ । ଲୋକଙ୍କ ସ୍ୱାସ୍ଥ୍ୟଗତ ସ୍ଥିତି ଓ ବୟସକୁ ଦେଖି ପର୍ଯ୍ୟାୟକ୍ରମେ ଏହି ଟିକା ଦେବାକୁ ଯୋଜନା ପ୍ରସ୍ତୁତ କରାଯାଇଛି । ଆସନ୍ତାକାଲି ପ୍ରଥମ ପର୍ଯ୍ୟାୟରେ ସ୍ୱାସ୍ଥ୍ୟସେବା ଯୋଗାଉଥିବା ଉଭୟ ସରକାରୀ, ବେସରକାରୀ କର୍ମୀ ଓ କର୍ମଚାରୀ, ସମନ୍ୱିତ ଶିଶୁ ବିକାଶ ବିଭାଗର କର୍ମୀଙ୍କୁ ଏହି ଟିକା ଦିଆଯିବ । କୋଭିଡ୍‍ ନିୟନ୍ତ୍ରଣକକ୍ଷ ପରିଦର୍ଶନ କରିବା ଅବସରରେ ଟିକାକରଣ ବ୍ୟବସ୍ଥା ତଦାରଖ କରିବା ପାଇଁ ଉଦ୍ଦିଷ୍ଟ କୋ-ୱିନ୍‍ କିପରି କାମ କରୁଛି ତାହାର ବିଭିନ୍ନ ଦିଗ ସ୍ୱାସ୍ଥ୍ୟମନ୍ତ୍ରୀ ଟିକିନିଖି ଅନୁଧ୍ୟାନ କରିଥିଲେ । ଏହି କୋ-ୱିନ୍‍ ଏକ ଅନ୍‍ଲାଇନ ଡିଜିଟାଲ ପ୍ଲାଟଫର୍ମ ଏବଂ ଏହା କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ବିକଶିତ ହୋଇଛି । କରୋନା ଟିକାଦାନ କାର୍ଯ୍ୟକ୍ରମ ପାଇଁ ଏହାକୁ ନିୟନ୍ତ୍ରକଭାବେ ବ୍ୟବହାର କରାଯିବ । ଏଥିରେ ବିଭିନ୍ନ ସ୍ଥାନରେ ମହଜୁଦ ଥିବା ଟିକାର ପରିମାଣ, ଶୀତଳ ଭଣ୍ଡାରର ତାପମାତ୍ରା, ଟିକା ନେଉଥିବା ବା ନେବାକୁ ଥିବା ବ୍ୟକ୍ତିବିଶେଷଙ୍କୁ ଠାବ କରିବା ଆଦି ସବୁ ତଥ୍ୟ ନିଖୁଣଭାବେ ତତ୍କାଳ ଉପଲବ୍‍ଧ । ଏହି ଡିଜିଟାଲ ପ୍ଲାଟଫର୍ମ ମଧ୍ୟ ଟିକାଦାନ ସମୟରେ ଜାତୀୟ, ରାଜ୍ୟ ଓ ଜିଲାସ୍ତରରେ ପ୍ରୋଗ୍ରାମ ମ୍ୟାନେଜରମାନଙ୍କୁ ତଥ୍ୟାବଳୀ ଯୋଗାଇ ସାହାଯ୍ୟ କରିବ । କେଉଁ କେନ୍ଦ୍ରରେ କେତେବେଳେ କେତେ ଲୋକ ଟିକା ନେଲେ, କେତେ ଆସିଲେ ନାହିଁ, ଟିକା ନେଇଥିବା ଲୋକଙ୍କ ସ୍ୱାସ୍ଥ୍ୟଗତ ସ୍ଥିତି ଆଦି ସବୁ ତଥ୍ୟ ଏହା ଯୋଗାଇଦେବ ଓ ତାହାର ତଦାରଖ କରିବ । ଏହି ପ୍ଲାଟଫର୍ମରୁ ମଧ୍ୟ ଜାତୀୟ ଓ ପ୍ରାଦେଶିକ ପ୍ରଶାସକମାନେ ଟିକାକରଣ ସଂକ୍ରାନ୍ତ ସମସ୍ତ ତଥ୍ୟ ପାଇପାରିବେ । ଟିକା ନେବାକୁ ଥିବା ଲୋକଙ୍କ ସଂଖ୍ୟା, ସେମାନଙ୍କର ଲିଙ୍ଗ, ବୟସ ଏବଂ କାହାର ଯଦି ପୁରୁଣା ଗୁରୁତର ବ୍ୟାଧି ଥାଏ ଏଥିରୁ ସବୁ ତଥ୍ୟ ମିଳିବ । ଟିକାଦାନ ପରେ ଟିକା ଗ୍ରହୀତାଙ୍କ ସ୍ୱାସ୍ଥ୍ୟଗତ ସ୍ଥିତି, ଯଦି କାହାରି କିଛି ଅସୁବିଧା ଘଟିଥାଏ ସେ ସଂକ୍ରାନ୍ତ ତଥ୍ୟାବଳୀ ମଧ୍ୟ ଏହି ପ୍ଲାଟଫର୍ମରୁ ଉପଲବ୍‍ଧ ହୋଇପାରିବ । ପ୍ରତ୍ୟେକ ହିତାଧିକାରୀଙ୍କ ନାମ, ଗାଁ, ଜିଲା ଓ କେନ୍ଦ୍ର ଆଦି ଏଥିରେ ରହିବ । ଏହି କୋ-ୱିନ ପ୍ଲାଟର୍ଫମଟି ଅତ୍ୟାଧୁନିକ ଜ୍ଞାନକୌଶଳରେ ନିର୍ମିତ । ଭାରତରେ ପୂର୍ବରୁ ଚାଲିଆସୁଥିବା ସାର୍ବଜନୀନ ଟିକାକରଣ କାର୍ଯ୍ୟକ୍ରମରେ ଏହାକୁ ବ୍ୟବହାର କରାଯାଉଥିଲା । କୋଭିଡ୍‍ ଟିକାପାଇଁ ଏଥିରେ ସଫ୍‍ଟୱେୟାରରେ କେତେକ ପରିବର୍ତ୍ତନ କରାଯାଇଛି । ମନ୍ତ୍ରୀ ଶ୍ରୀ ହର୍ଷବର୍ଦ୍ଧନ କୋ-ୱିନ୍‍ରୁ ହିତାଧିକାରୀଙ୍କ ପାଇଁ ଉଦ୍ଦିଷ୍ଟ ପୀକରଣ ପୃଷ୍ଠା ସମୀକ୍ଷା କରିଥିଲେ । ଏଥିରେ ଅଗ୍ରାଧିକାର ପାଇ ନ ଥିବା ବ୍ୟକ୍ତିବିଶେଷଙ୍କ ସଂପର୍କରେ ସେ ଅବଗତ ହୋଇଥିଲେ । ଏହି ସଫ୍‍ଟୱେୟାରକୁ ଇଲେକ୍‍ଟୋରାଲ ଡାଟାବେସ ସହିତ ସିଡିଂ କରି ହିତାଧିକାରୀଙ୍କୁ ଅବଗତ କରାଇବାକୁ ସେ ପ୍ରସ୍ତାବ ଦେଇଥିଲେ । ଟିକା ନେବା ପାଇଁ ପୀକରଣ କରିବାକୁ ହେଲେ କେଉଁ କେଉଁ ତଥ୍ୟାବଳୀ ଦେବାକୁ ପଡିବ ତାହାର ସୂଚନା ଦେବାକୁ ମଧ୍ୟ ସେ କହିଥିଲେ । ଏହି ଉତ୍ସର୍ଗୀକୃତ କୋଭିଡ୍‍ ନିୟନ୍ତ୍ରଣକକ୍ଷ ଦେଶବ୍ୟାପୀ ଟିକାଦାନ ସଂକ୍ରାନ୍ତ ସମସ୍ତ ତଥ୍ୟାବଳୀ ସଂଗ୍ରହ କରିବା ପରେ ସେଗୁଡିକର ଟିକିନିଖି ଅନୁଶୀଳନ କରାଯିବ । ମହାମାରୀ ସ୍ଥିତିର ମୂଲ୍ୟାୟନ କରିବାରେ ଏହା ସହାୟକ ହେବ। ଗତ କେଇମାସ ଧରି ଏହି ନିୟନ୍ତ୍ରଣକକ୍ଷରୁ କୋଭିଡ୍‍ ସଂକ୍ରାନ୍ତ ବିଭିନ୍ନ ତଥ୍ୟାବଳୀ ସଂଗ୍ରହ କରାଯିବା ସହ ମହାମାରୀର ସ୍ଥିତି ପର୍ଯ୍ୟବେକ୍ଷଣ କରାଯାଉଛି । କେନ୍ଦ୍ରମନ୍ତ୍ରୀ ମଧ୍ୟ ଆଜି ଯୋଗାଯୋଗ ନିୟନ୍ତ୍ରଣକକ୍ଷର କାର୍ଯ୍ୟ ସମୀକ୍ଷା କରିଥିଲେ । ଟିକା ଓ ଟିକାଦାନ ସଂପର୍କରେ ଯେଉଁସବୁ ଗୁଜବ ଓ ଅପପ୍ରଚାର ଚାଲିଛି ଏହି କକ୍ଷ ତାହାକୁ ପର୍ଯ୍ୟବେକ୍ଷଣ କରିବା ସହ ତାହା ଉପରେ ନଜର ରଖିଛି । କୋଭିଡ୍‍ ଟିକା ବିରୋଧରେ କେତେକ ନ୍ୟସ୍ତସ୍ୱାର୍ଥ ଗୋଷ୍ଠୀ ଚଳାଇଥିବା ଅପପ୍ରଚାର ଓ ଗୁଜବକୁ ଖଣ୍ଡନ କରିବା ପାଇଁ ପୂରାଦମ କାର୍ଯ୍ୟ କରିବାକୁ ସେ ପ୍ରଶାସନିକ କଳକୁ ନିର୍ଦେଶ ଦେଇଛନ୍ତି । ଡ. ହର୍ଷବର୍ଦ୍ଧନ କହିଛନ୍ତି ଯେ ଭାରତରେ ଏହି କୋଭିଡ ଟିକାଦାନ ପ୍ରକ୍ରିୟା ପୃଥିବୀର ସର୍ବବୃହତ୍‍ ଟିକାକରଣ ଅଭିଯାନରେ ପରିଣତ ହେବାକୁ ଯାଉଛି । ଦେଶୀ ଜ୍ଞାନକୌଶଳରେ ନିର୍ମିତ ଉଭୟ କୋଭିସିଲ୍ଡ ଓ କୋଭାକ୍‍ସିନ ଟିକା ନିରାପଦ ଏବଂ ପ୍ରଭାବଶାଳୀ ବୋଲି ପ୍ରମାଣିତ ହୋଇଛି । ସେ କହିଛନ୍ତି ଯେ ଏହି ଟିକା କରୋନା ମହାମାରୀ ରୋକିବାରେ ସଫଳ ହେବା ନେଇ ପରୀକ୍ଷାରୁ ଜଣାପଡିଛି ।

*****

TM /  SLP