শেল-থুম অমসুং কোর্পোরেৎ এফিয়র্সকী কেন্দ্র মন্ত্রী শ্রীমতি নির্মলা সিতারামন্না দিপার্তমেন্ত ওফ ৱাতর রিসোর্সস, রিভর দিভেলপমেন্ত অমসুং গঙ্গা রিজুভেনেসন বিভাগ অমসুং হকশেল অমসুং য়াইফ-য়ুম্বালগী মন্ত্রালয়গী সেক্রেতরীশিংগা লোয়ননা নেস্নেল ইনফ্রাস্ত্রকচর পাইপলাইন (এন.আই.পি.)গী থবক পাংথোকপগী ফিভমশিং য়েংশিনখ্রে। মীফম অদুগী পান্দমদি এন.আই.পি. প্রোজেক্তকী হৌজিক ওইরিবা ফিভম, হৌজিক ফাওবগী চঙখিবা চাদিং অমসুং প্রোজেক্ত অসিবু থবক ওইনা পাংথোক্নবা পায়খৎখিবা খোঙথাংশিংগী মতাংদা খন্ন-নৈনবনি। হন্দক্কী অসিনা শেল-থুম মন্ত্রালয়না এন.আই.পি. প্রোজেক্ত অসি খোঙজেল য়াঙনা হৌবা ঙম্নবগীদমক্তা তোঙান-তোঙানবা বিভাগ অমসুং মন্ত্রালয়গী মরক্তা পাংথোকখিবা অনিশুবা মীফম্নি।

লাইচৎ অসি লৈজরবসু, এন.আই.পি.না মশক থোকপা মওংদা প্রোজেক্ত অসি লোইশিনবা ঙম্লে হায়বগী ৱাফম অসি মীফম অসিদা ফোংদোক্নখি। এন.আই.পি. অসি প্রোজেক্ত ৬৮৩৫গা লোয়ননা হৌদোকখিবনি অমসুং হৌজিক্তি মসিগী অপুনবা প্রোজেক্ত মশিং ৭৩০০ হেন্না লৈরে। মন্ত্রালয় অমসুং বিভাগ কয়ানা প্রোজেক্ত অসিবু থবক ওইনা পাংথোকপা অমসুং চাদিং তৌবদা, মরু ওইনা এফ.ৱাই. ২১গী ক্যু.২দা, নীংথিনা থবক পাংথোকপগী ফিভম উৎখি। মসিগী মথক্তা, মন্ত্রালয় অমসুং বিভাগ অয়াম্বনা এফ.ৱাই. ২০দা তসেংনা তৌখিবা চাদিংদগী হেনগৎপা মশক থোকপা ইনফ্রাস্ত্রকচর ৱাংহনবগী পান্দম থম্নখি।

হঙ্গৎনা য়েংশিনবগী মীফম অসিদা, মন্ত্রালয়/বিভাগ অনি অসিনা চহিগী ওইবা ইনফ্রাস্ত্রকচরদা চাদিং তৌবগী পান্দম থম্বা অমসুং ফংখিবগী মথক্তা, মখোয়না পায়খৎখিবা তোঙান-তোঙানবা খোঙথাং কয়াগী মতাংদসু ৱাফম কয়া অমা খন্নখি। হকশেল অমসুং য়াইফ-য়ুম্বাল মন্ত্রালয়গী মখাদা পায়খৎখিবা লুপা করোর ৮০৯১৫গী শেনফমগী প্রোজেক্ত ২৪ অমসুং দিপার্তমেন্ত ওফ ৱাতর রিসোর্সস, আর.দি. অমসুং জি.আর.গী মখাদা পায়খৎখিবা লুপা করোর ২৭৯৬০৪গী শেনফমগী অচৌবা প্রোজেক্ত ১০গী মতাংদা অমসুং মখোয়বু থবক ওইনা পায়খৎপদা থেংনখিবা খুদোংচাদবশিংগী মতাংদসু খন্নবা য়াওখি।

মাই-পাকপগী ফিভম য়েংশিনবা মতমদা শ্রীমতি নির্মলা সিতারামন্না এন.আই.পি. অসি ভারত সরকারনা মসিগী মীয়ামদা মালেমগী থাক্তা লৈবা ইনফ্রাস্ত্রকচর ফংহন্নবা অমসুং পুন্সি-মহিংদা লাইহন্নবা পায়খৎখিবা খোঙথাং অমনি হায়খি। শেল-থুমগী মন্ত্রালয়না হায়রিবা মন্ত্রালয়/বিভাগ অনি অসিদা এন.আই.পি. প্রোজেক্তশিং অসিবু মতমগী মনুংদা লোইশিনবা ঙমদুনা ইনফ্রা-এক্সপেন্দিচরবু খুমাং চাউশিলহন্নবা অমসুং রাজ্য সরকারশিং অমসুং অতোপ্পা মন্ত্রালয়শিংগা খুৎশম্নদুনা পন্দুনা লৈবা খুদোংচাদবশিংগী অথুবা মতমদা ৱারোইশিন পুরক্নবা ৱাফমসু থমখি। মন্ত্রালয়/বিভাগশিং অসিদা কান্নগদবা শেল থাদগবা মীওইশিংগা খন্ন-নৈনদুনা শেল থাদবা য়াবা প্রোজেক্ত কয়া অমসু খুমাং চাউশিলহন্নবা হায়খি। মন্ত্রালয়শিং অসিদা প্রোজেক্তশিংবু মপুং ফানা ওনলাইন্দগী শেন্নবা য়ানবগীদমক্তা নেস্নেল ইনফ্রাস্ত্রকচর পাইপলাইনগী দেশবোর্দ অসিসু মতম চানা অপদেৎ তৌনবা ৱাফমসু থমখি।

*************