2010-11 ଚିନି ଋତୁଠାରୁ ଦେଶରେ ଆବଶ୍ୟକତାଠାରୁ ଅଧିକ ଆଖୁ ଉତ୍ପାଦିତ ହେଉଛି । କେବଳ 2016-17 ବର୍ଷରେ ମରୁଡି ଯୋଗୁଁ ଏହି ଉତ୍ପାଦନ କମ୍‍ ରହିଥିଲା । ଏବେ ଦେଶର ବିଭିନ୍ନ  ଅଞ୍ଚଳରେ ଉନ୍ନତ କିସମର ଆଖୁ ଚାଷ ହେଉଥିବାରୁ ଆଗାମୀ ଦିନରେ ଚିନି ଉତ୍ପାଦନ  ଆହୁରି ବଢିବ । ସ୍ୱାଭାବିକ ଚିନି ଋତୁଭାବେ ବିବେଚିତ ହେଉଥିବା ସମୟ ଅକ୍‍ଟୋବରରୁ ସେପ୍‍ଟେମ୍ବର ମଧ୍ୟରେ ଦେଶରେ 320 ଲକ୍ଷ ମେଟ୍ରିକ ଟନ ଚିନି ଉତ୍ପାଦିତ ହୋଇଥାଏ । ତେବେ ଭାରତର ବାର୍ଷିକ ଚିନି ଆବଶ୍ୟକତା ପ୍ରାୟ 260 ଲକ୍ଷ୍ୟ ମେଟ୍ରିକ ଟନ । ତେଣୁ ସ୍ୱାଭାବିକ ଚିନି ଋତୁରେ ଯେଉଁ 60 ଲକ୍ଷ ମେଟ୍ରିକ ଟନ ବଳକା ରହୁଛି ତାହା ଘରୋଇ ଚିନି ମିଲ୍‍ ଉପରେ ଚାପ ସୃଷ୍ଟି କରୁଛି । ବଜାରରେ ବଳକା ଚିନି ରହୁଥିବାରୁ ଏହାର ମୂଲ୍ୟ ମଧ୍ୟ ମାନ୍ଦା ରହୁଛି ।  ଏହି 60 ଲକ୍ଷ ମେଟ୍ରିକ ଟନ ଅତିରିକ୍ତ ଚିନି ବିକ୍ରି ହୋଇପାରୁନାହିଁ । ତେଣୁ ସେ ବାବଦରେ ଚାଷୀକୁ ସେମାନଙ୍କ ଆଖୁ  ବାବଦ ଦେୟ ପ୍ରଦାନ କରିବାରେ ଚିନିକଳ ମାଲିକମାନେ ଅସୁବିଧାର ସମ୍ମୁଖୀନ ହେଉଛନ୍ତି । ଆଖୁଚାଷୀମାନଙ୍କୁ ମିଲ୍‍ ମାଲିକମାନେ 19 ହଜାର କୋଟି ଟଙ୍କା ପ୍ରଦାନ କରିବାରେ ବିଫଳ ହେବାରୁ ଏକ ଗୁରୁତର ପରିସ୍ଥିତ ସୃଷ୍ଟି ହୋଇଛି । ଫଳରେ ଉଭୟ ଚିନିକଳ ମାଲିକ ଓ ଆଖୁଚାଷୀ ଆର୍ଥିକ ଚାପର ସମ୍ମୁଖୀନ ହେଉଛନ୍ତି । ଏହାର କୁପ୍ରଭାବ ଚିନି ଅର୍ଥନୀତି ଏବଂ ସାମଗ୍ରିକ ଅର୍ଥନୀତି ଉପରେ ପଡୁଛି । ଅତଏବ ଏହି ବଳକା ଚିନି ସମସ୍ୟାର ସମାଧାନ ପାଇଁ ଚିନିକଳ ମାଲିକମାନେ ସେଗୁଡିକୁ ବିଦେଶକୁ ରପ୍ତାନୀ କରୁଛନ୍ତି । ସେ ବାବଦରେ ମଧ୍ୟ କେନ୍ଦ୍ର ସରକାର ମିଲ୍‍ଗୁଡିକୁ ଚିନି ପରିବହନ ବାବଦରେ ଆର୍ଥିକ ସହାୟତା ଯୋଗାଉଛନ୍ତି । ଆହୁରି ମଧ୍ୟ ଭାରତ ଏକ ବିକାଶଶୀଳ ଦେଶ ହୋଇଥିବାରୁ ବିଶ୍ୱ ବାଣିଜ୍ୟ ପ୍ରତିଷ୍ଠାନ ନିୟମ ଅନୁସାରେ ବଳକା ଚିନିକୁ ସରକାର ଆର୍ଥିକ ପ୍ରୋତ୍ସାହନ ଦେଇ 2023 ପର୍ଯ୍ୟନ୍ତ ରପ୍ତାନୀ କରିପାରିବେ । ଏହା ପରେ ଭାରତକୁ ଏ ସୁଯୋଗ ଆଉ ମିଳିବ ନାହିଁ ।

ତେଣୁ ଅତିରିକ୍ତ ଚିନି ଓ ଆଖୁକୁ ବ୍ୟବହାର କରି ଇଥାନଲ ଉତ୍ପାଦନ ଉପରେ ଗୁରୁତ୍ୱ ଦିଆଯାଉଛି । ଏହିସବୁ ବଳକା ଚିନି ଏକ ଉପାର୍ଜନକ୍ଷମ ପନ୍ଥାରେ ବିନିଯୋଗ ହେଲେ ଦେଶରେ ଚିନିର ମୂଲ୍ୟ ଠିକ୍‍ ରହିବ । ଏହା ଫଳରେ ଚିନି ଭଣ୍ଡାର କରିବାର ସମସ୍ୟା ରହିବା ନାହିଁ କିମ୍ବା ଚାଷୀ ଓ ମିଲ୍‍ର କ୍ଷତିଗ୍ରସ୍ତ ହେବେ ନାହିଁ । ଚାହିଦା ଓ ଯୋଗାଣ ମଧ୍ୟରେ ଉତ୍ତମ ସମନ୍ୱୟ ରକ୍ଷା କରାଯାଇପାରିବ । ମିଲରମାନଙ୍କ ଚିନି ଠିକ୍‍ ସମୟରେ ବିକ୍ରି ହୋଇଗଲେ ଚାଷୀମାନେ ମଧ୍ୟ ଆଖୁ ବାବଦ ପଇସା ଉପଯୁକ୍ତ ସମୟରେ ପାଇପାରିବେ । ଏହାଦ୍ୱାରା ଚିନିଶିଳ୍ପ ଚାପମୁକ୍ତ ହୋଇ ସ୍ୱାଭାବିକଭାବେ କାର୍ଯ୍ୟ କରିବ ।

2022 ସୁଦ୍ଧା ପେଟ୍ରୋଲରେ 10 ଶତାଂଶ ଇନ୍ଧନଯୋଗ୍ୟ ଇଥାନଲ ମିଶାଇବାକୁ ସରକାର ଲକ୍ଷ୍ୟଧାର୍ଯ୍ୟ କରିଛନ୍ତି । ସେହିଭଳି ଏହି ଅନୁପାତକୁ 2026 ସୁଦ୍ଧା 15 ଶତାଂଶ ଏବଂ 2030 ସୁଦ୍ଧା 20 ଶତାଂଶକୁ ବଢାଇବାକୁ ଲକ୍ଷ୍ୟ ରଖାଯାଇଛି । ଚିନିଶିଳ୍ପକୁ ସମର୍ଥନ ଦେବା ସହ ଆଖୁଚାଷୀଙ୍କ ସ୍ୱାର୍ଥରକ୍ଷା ପାଇଁ ସରକାର ମଧ୍ୟ ଗୁଡ, ଦୋରୁଅ, ପାଣିଆଗୁଡ ଏବଂ ଚିନିରୁ ଇଥାନଲ ଉତ୍ପାଦନ କରିବାକୁ ଅନୁମତି ପ୍ରଦାନ କରିଛନ୍ତି । ଏହିସବୁ ଉତ୍ପାଦିତ ଇଥାନଲର ଲାଭଜନକ ବିକ୍ରୟ ମୂଲ୍ୟ ମଧ୍ୟ ସରକାର ଧାର୍ଯ୍ୟ କରିଛନ୍ତି । ଇଥାନଲ ଯୋଗାଣ ପାଇଁ ମଧ୍ୟ ସରକାର ଏକ ନୀତି ପ୍ରସ୍ତୁତ କରିଛନ୍ତି । ଚଳିତ ଋତୁରେ ଇଥାନଲର ସହାୟକ ମୂଲ୍ୟକୁ ବୃଦ୍ଧି କରାଯାଇଛି । ଉତ୍ତମ ଇନ୍ଧନ ମାନର ଅଧିକ ଇଥାନଲ ଉତ୍ପାଦନ ପାଇଁ ସରକାର ବିଭିନ୍ନ ଡିଷ୍ଟିଲାରୀକୁ ଏଫ୍‍ସିଆଇରେ ବଳକା ଥିବା ମକା ଓ ଚାଉଳକୁ ନେଇ ବ୍ୟବହାର କରିବାକୁ ଅନୁମତି ଦେଇଛନ୍ତି । ଏଥିପାଇଁ ମଧ୍ୟ ଇଥାନଲର ଲାଭଜନକ ମୂଲ୍ୟ ଘୋଷଣା କରାଯାଇଛି । ସରକାର 2030 ସୁଦ୍ଧା ପେଟ୍ରୋଲରେ 20 ଶତାଂଶ ଇଥାନଲ ମିଶାଇବାକୁ ଯେଉଁ ଲକ୍ଷ୍ୟ ରଖିଛନ୍ତି ତାହାର 5 ବର୍ଷ ପୂର୍ବରୁ ଏହି ଲକ୍ଷ୍ୟ ହାସଲ କରିବାକୁ ଯୋଜନା କରୁଛନ୍ତି । ତେବେ ଏବେ ଏହି ଲକ୍ଷ୍ୟ ପୂରଣ ପାଇଁ ଦେଶରେ ଯଥେଷ୍ଟ ଇଥାନଲ ଦକ୍ଷତା ନାହିଁ । ଏହି ଉତ୍ପାଦନ ଦକ୍ଷତା ବଢାଇବାକୁ ସରକାର ଉଦ୍ୟମ କରୁଛନ୍ତି । ସେହିଭଳି ଉତ୍ପାଦିତ ଇଥାନଲକୁ ଦେଶର ବିଭିନ୍ନ ତୈଳ କଂପାନୀ ସରକାରୀ ନୀତିନିୟମରେ ଉତ୍ପାଦକଙ୍କଠାରୁ କିଣୁଛନ୍ତି ।

କେବଳ ଅଧିକ ଇଥାନଲ ଉତ୍ପାଦନ କରିଦେଲେ ଯଥେଷ୍ଟ ନୁହେଁ । ପେଟ୍ରୋଲରେ ମିଶିବା ପାଇଁ ଯେଉଁ ମାନର ଇଥାନଲ ଦରକାର ତାହାର ଉତ୍ପାଦନ ଉପରେ ଗୁରୁତ୍ୱ ଦେବାକୁ ପଡିବ । ଆଖୁରୁ କେବଳ ଏହା ସମ୍ଭବ ନୁହେଁ । ଏଥିପାଇଁ ପ୍ରଥମ ପିଢି ବା 1ଜି ଇଥାନଲର ଆବଶ୍ୟକତା ରହିଛି । କନ୍ଦମୂଳ ଜାତୀୟ ପଦାର୍ଥ, ବିଭିନ୍ନ ପ୍ରକାର ଶସ୍ୟରୁ ମଧ୍ୟ ଏହା ଉତ୍ପାଦିତ ହୋଇପାରିବ ।  ତାହାକୁ ଦୃଷ୍ଟିରେ ରଖି ଧାନଚାଉଳ, ଗହମ, ଜବ, ବିଭିନ୍ନ ପ୍ରକାର ଶସ୍ୟ ଓ ବାଜରା ଜୱାର ଆଦି ସହିତ ଆଖୁ ଓ କନ୍ଦମୂଳ ଜାତୀୟ ଫସଲ ଉତ୍ପାଦନକୁ ବଢାଇବାକୁ ହେବ ।

ଏଥିପାଇଁ ସରକାର ନିମ୍ନଲିଖିତ ନିଷ୍ପତ୍ତିମାନ ଗ୍ରହଣ କରିଛନ୍ତି ।

(1) ଇଥାନଲ ଉତ୍ପାଦନ ଦକ୍ଷତା ବୃଦ୍ଧି ପାଇଁ ସରକାର ନିମ୍ନଲିଖିତ ବର୍ଗ ଓ ଶ୍ରେଣୀକୁ ସୁଧ ରିଆତି ପ୍ରଦାନ କରିବାକୁ ସଂଶୋଧିତ ବ୍ୟବସ୍ଥାରେ ସୁବିଧା ଯୋଗାଇ ଦେଇଛନ୍ତି ।

(କ) ଶସ୍ୟଭିତ୍ତିକ ଡିଷ୍ଟିଲାରୀ ସ୍ଥାପନ ଓ ଏହିଭଳି ସୁରାସାର ଉତ୍ପାଦନ କାରଖାନାର ସଂପ୍ରସାରଣ ପାଇଁ ଋଣ ଉପରେ ସୁଧ ରିଆତି ମିଳିବ । ତେବେ ଯେଉଁ ଡିଷ୍ଟିଲାରୀଗୁଡିକ ଡ୍ରାଏ ମିଲିଂ ପ୍ରକ୍ରିୟାରେ ଇଥାନଲ ଉତ୍ପାଦନ କରୁଛନ୍ତି ସେମାନେ କେବଳ ଏହି ସୁଧ ରିଆତି ସୁବିଧା ପାଇବେ ।

(ଖ) ମୋଲାସେସଭିତ୍ତିକ ନୂଆ ଡିଷ୍ଟିଲାରୀ ସ୍ଥାପନ ବା ପୁରୁଣା ଡିଷ୍ଟିଲାରୀର ସଂପ୍ରସାରଣ ପାଇଁ ଏହି ଋଣଛାଡ ସୁବିଧା ମିଳିବ । କେନ୍ଦ୍ର ପରିବେଶ ନିୟନ୍ତ୍ରଣ ବୋର୍ଡର ନୀତିନିୟମ ଭିତ୍ତିରେ ଯେଉଁସବୁ ଉଦ୍ୟୋଗ ଏହି ଇଥାନଲ ଉତ୍ପାଦନ କରୁଛନ୍ତି ସେମାନେ ମଧ୍ୟ ଏହି ସୁବିଧା ପାଇପାରିବେ ।

(ଗ) ନୂଆ ଡୁଆଲଫିଡ୍‍ ଡିଷ୍ଟିଲାରୀ ସ୍ଥାପନ ବା ଏଭଳି ଡିଷ୍ଟିଲାରୀର ସଂପ୍ରସାରଣ ପାଇଁ ସୁବିଧା ମିଳିବ ।

(ଘ) ବର୍ତ୍ତମାନର ମୋଲାସେସ୍‍ ଭିତ୍ତିକ ଡିଷ୍ଟିଲାରୀର ପରିବର୍ତ୍ତନ କରି ଏହାକୁ ଡୁଆଲ ଫିଡ୍‍ରେ ପରିଣତ କରିବା ପାଇଁ ମଧ୍ୟ ଏହି ସରକାରୀ ସୁବିଧା ଯୋଗାଣ ପ୍ରଯୁଜ୍ୟ ହେବ । ଡୁଆଲ ଫିଡ୍‍ର ଅର୍ଥ ହେଲା ଉଭୟ ମୋଲାସେସ ଓ ଶସ୍ୟକୁ ବ୍ୟବହାର କରି   ସେଥିରୁ ଇଥାନଲ ଉତ୍ପାଦନ କରିବା ।

(ଙ) ଜୱାର, ବାଜରା, ସୁଗାରବିଟ୍‍ ଓ ଅନ୍ୟାନ୍ୟ ଶସ୍ୟକୁ ବ୍ୟବହାର କରି ନୂଆ ଡିଷ୍ଟିଲାରୀ ସ୍ଥାପନ ପାଇଁ ମଧ୍ୟ ଏହି ରିଆତି ବ୍ୟବସ୍ଥା ମିଳିବ । ଏହାଛଡା ଯେଉଁ ଡିଷ୍ଟିଲାରୀ ଏମ୍‍ଏସ୍‍ଡିଏଚ୍‍ ବ୍ୟବହାର କରି ରେକ୍ଟିଫାଏଡ ସ୍ପିରିଟକୁ ଇଥାନଲରେ ପରିବର୍ତ୍ତନ କରିବାକୁ ଚାହିଁବେ ସେମାନଙ୍କୁ  ମଧ୍ୟ ଏହି ଯୋଜନାରେ ସୁଧଛାଡ ମିଳିବ ।

(2) ସରକାର ଏ କ୍ଷେତ୍ରରେ ଋଣଛାଡ ଜନିତ ଖର୍ଚ୍ଚ 5ବର୍ଷ ପର୍ଯ୍ୟନ୍ତ ବହନ କରିବେ । ସେହିଭଳି ଋଣଗ୍ରହୀତାଙ୍କ ପାଇଁ 1 ବର୍ଷର ସ୍ଥଗନାଦେଶ ସୁବିଧା ରହିଛି; ଯଦ୍ଦ୍ୱାରା ସେମାନଙ୍କୁ ତତ୍କାଳ ଋଣ ଶୁଝିବାକୁ ପଡିବ ନାହିଁ ।

(3) ଯେଉଁସବୁ ଉଦ୍ୟୋଗ ବା ସଂସ୍ଥା ଅତିରିକ୍ତ ଡିଷ୍ଟିଲେସନ ଦକ୍ଷତାର ଉପଯୋଗ କରି  75 ଶତାଂଶ ଇଥାନଲ ଉତ୍ପାଦନ କରୁଥିବେ କେବଳ ସେହି ସଂସ୍ଥାମାନେ ଋଣଛାଡ ସୁବିଧା ପାଇବେ ।

ସରକାରଙ୍କ ଏହିସବୁ ପ୍ରୋତ୍ସାହନ ଫଳରେ ଦେଶରେ 1ଜି ଇଥାନଲ ଉତ୍ପାଦନ ପରିମାଣ ବଢିବ ଏବଂ ସରକାର ଧାର୍ଯ୍ୟମତେ ପେଟ୍ରୋଲରେ ଇଥାନଲ ମିଶ୍ରଣ କାର୍ଯ୍ୟ ସୁରୁଖୁରୁରେ ସଂପନ୍ନ କରିପାରିବେ । ଏହାଦ୍ୱାରା ମଧ୍ୟ ଦେଶରେ ନିଜସ୍ୱ ଉତ୍ସରୁ ଇଥାନଲ ସଂଗୃହୀତ ହୋଇପାରିବ; ଯାହା ଏକ ଇନ୍ଧନ ହିସାବରେ ପ୍ରଦୂଷଣମୁକ୍ତ ଏବଂ ବାସ୍ତବରେ ଅସରନ୍ତି । ଏହାଦ୍ୱାରା ଆମ ପରିବେଶ ଉପରେ ଅନୁକୂଳ ପ୍ରଭାବ ପଡିବ ଏବଂ ସର୍ବୋପରି ଦେଶ ତୈଳ ଆମଦାନୀ ନିମନ୍ତେ ଯେଉଁ ବିପୁଳ ଅର୍ଥ ବ୍ୟୟ କରୁଛି ତାହା ହ୍ରାସ ପାଇବ । ଆହୁରି ମଧ୍ୟ ଏହାଦ୍ୱାରା ଚାଷୀମାନେ ଠିକ୍‍ ସମୟରେ ସେମାନଙ୍କର ପ୍ରାପ୍ୟ ପାଇବେ ।

6 ବର୍ଷ ମଧ୍ୟରେ ଡିଷ୍ଟିଲେସନ କ୍ଷମତା ବୃଦ୍ଧି ଓ ବ୍ଳେଣ୍ଡିଂରେ ସରକାରଙ୍କ ଉପଲବ୍‍ଧି

2022 ସୁଦ୍ଧା ସରକାର ମୋଟର ଇନ୍ଧନରେ 10 ଶତାଂଶ ଇଥାନଲ ମିଶାଇବାକୁ ଲକ୍ଷ୍ୟ ରଖିଛନ୍ତି । 2030 ସୁଦ୍ଧା ଏହାକୁ ଦ୍ୱିଗୁଣିତ କରିବାର ଲକ୍ଷ୍ୟ ରହିଛି । 2014 ପର୍ଯ୍ୟନ୍ତ ଦେଶରେ ମୋଲାସେସଭିତ୍ତିକ ଇଥାନଲ ଡିଷ୍ଟିଲେସନ କ୍ଷମତା 200 କୋଟି ଲିଟରରୁ କମ୍‍ ଥିଲା । ତେବେ ଗତ 6 ବର୍ଷ ମଧ୍ୟରେ ଏହିସବୁ ଡିଷ୍ଟିଲେସନର କ୍ଷମତା ଦ୍ୱିଗୁଣିତ ହୋଇ ବାର୍ଷିକ 426 କୋଟି ଲିଟରରେ ପହଞ୍ଚିଛି । 2024 ସୁଦ୍ଧା ଦେଶରେ ଡିଷ୍ଟିଲେସନ ଦକ୍ଷତାକୁ ଦ୍ୱିଗୁଣିତ କରିବା ପାଇଁ ସରକାର ସମ୍ମିଳିତ ଉଦ୍ୟମ ଆରମ୍ଭ କରିଛନ୍ତି ।

2013-14 ଇଥାନଲ ଯୋଗାଣ ବର୍ଷରେ ଦେଶର ତୈଳ ବିପଣନକାରୀ କଂପାନୀଗୁଡିକୁ 40 କୋଟି ଲିଟରରୁ କମ୍‍ ଇଥାନଲ ଯୋଗାଇ ଦିଆଯାଇଥିଲା । ଏହି ଇଥାନଲକୁ 1.53 ଶତାଂଶ ହାରରେ ପେଟ୍ରୋଲ ସହ ମିଶାଯାଉଥିଲା । ତେବେ ସେ ଯାହାହେଉ, କେନ୍ଦ୍ର ସରକାରଙ୍କ ସମନ୍ୱିତ ଉଦ୍ୟମ ଫଳରେ ଦେଶରେ ଉତ୍ତମ ଇନ୍ଧନମାନର ଇଥାନଲ ବୃଦ୍ଧି ପାଇଛି ଏବଂ ତୈଳ କଂପାନୀଗୁଡିକୁ ଏହାର ଯୋଗାଣ ଗତ 6 ବର୍ଷ ମଧ୍ୟରେ 4 ଗୁଣ ବଢିଛି । 2018-19 ଯୋଗାଣ ବର୍ଷରେ 189 କୋଟି ଲିଟର ଇଥାନଲ ଯୋଗାଇ ଦିଆଯାଇ 5 ଶତାଂଶ ବ୍ଳେଣ୍ଡିଂ କରାଯାଇଥିଲା । ତେବେ ମହାରାଷ୍ଟ୍ର ଏବଂ କର୍ଣ୍ଣାଟକରେ କେବଳ ମରୁଡି ଯୋଗୁଁ ଆଖୁ ଉତ୍ପାଦନ ହ୍ରାସ ପାଇବାରୁ 2019-20ରେ ଇଥାନଲ ଉତ୍ପାଦନ ଓ ସଂଗ୍ରହ କମ୍‍ ରହିଥିଲା । ସେହିବର୍ଷ ବିଭିନ୍ନ ଡିଷ୍ଟିଲାରୀ 172.50 କୋଟି ଲିଟର ଇଥାନଲ ଯୋଗାଇ ଦେଇଥିଲେ । ତଦନୁସାରେ 5 ଶତାଂଶ ବ୍ଲେଣ୍ଡିଂ ଲକ୍ଷ୍ୟ ସମ୍ଭବ ହୋଇଥିଲା । ଚଳିତ 2020-21 ଇଥାନଲ ଯୋଗାଣ ବର୍ଷରେ ବିଭିନ୍ନ ଡିଷ୍ଟିଲାରୀରୁ 325 କୋଟି ଲିଟର ଇଥାନଲ ତୈଳ କଂପାନୀମାନଙ୍କୁ ଯୋଗାଇ ଦିଆଯିବ । ଏହା ଫଳରେ ପେଟ୍ରୋଲରେ 8.5 ଶତାଂଶ ଇଥାନଲ ବ୍ଲେଣ୍ଡିଂ ଲକ୍ଷ୍ୟ ପୂରଣ ହୋଇପାରିବ । ଏବେ ଏ କ୍ଷେତ୍ରରେ ଆମେ ଯେଉଁ ବେଗରେ ଯାଉଛୁ ତଦ୍ଦ୍ୱାରା 2022 ସୁଦ୍ଧା ଏହି ବ୍ଲେଣ୍ଡିଂ ଲକ୍ଷ୍ୟ 10 ଶତାଂଶ ହ୍ରାସ କରିବାକୁ ସକ୍ଷମ ହୋଇପାରିବୁ ବୋଲି ଆଶା କରାଯାଏ । ବ୍ଲେଣ୍ଡିଂ ସ୍ତର ବଢୁଥିବାରୁ ବିଦେଶରୁ ଜୀବାସ୍ମ ଇନ୍ଧନ ହ୍ରାସ ପାଇବ ଏବଂ ଏହା ପରିବେଶ ପ୍ରଦୂଷଣ ମଧ୍ୟ କମିବ । ଡିଷ୍ଟିଲାରୀଗୁଡିକର ଦକ୍ଷତା ବୃଦ୍ଧି  ପାଇଁ ଅଧିକରୁ ଅଧିକ ନିବେଶ ହେଉଥିବାରୁ ଏବଂ ନୂଆ ଡିଷ୍ଟିଲାରୀ ସ୍ଥାପନ କରାଯାଉଥିବାରୁ ଗ୍ରାମାଞ୍ଚଳରେ ନିଯୁକ୍ତି ସୁବିଧା ସୃଷ୍ଟି ହେବ ଏବଂ ଏହା ଆତ୍ମନିର୍ଭର ଭାରତ ନିର୍ମାଣ ଲକ୍ଷ୍ୟ ପୂରଣ କରିବାରେ ସହାୟକ ହେବ ।

**********

DS/TM