প্রধানমন্ত্রীগী লোইশঙ
পি.এম.না ভারতকী অহানবা দ্রাইভর য়াওদবা ত্রেন ওপরেসন দিল্লী মেত্রোগী মেজেন্তা লাইন্দা শঙ্গাখ্রে
অর্বানাইজেসনবু শিংনবা অমা ওইনা উরোইদবনি অদুবু লৈবাকসিদা হেন্না ফবা মচাক মথুম শেমগৎনবা অমদি হিংবদা কোম্নবা ফীভম পুরক্নবা তাঞ্জা অমা ওইনা উগদবনি: পি.এম
.
মেত্রো মখল কয়াদা – আর.আর.তি.এস., মেত্রোলাইত, মেত্রোনিও অমসুং ৱাতর মেত্রোদা থবক পায়খৎলি: পি.এম.
তোঙান তোঙানবা হীরমশিংদা সর্ভিসশিং পুনশিনবগী পায়খৎলিবা থবকশিং পনখি
ভারতনা দ্রাইভর য়াওদবা মেত্রো রেল লৈবা মশিং য়ামদবা লৈবাকশিংগী মনুংদা চল্লে: পি.এম.
চত্থোক চৎশিন তৌরিবশিংনা মখোয়না চৎনিংবা মফমদা পব্লিক ত্রান্সপোর্ত অমা হেক্তদা চৎপদা কম্মন মোবিলিতী কার্দনা পুনশিল্লবা এক্সেস পীগনি: পি.এম.
Posted On:
28 DEC 2020 12:26PM by PIB Imphal
প্রধান মন্ত্রী শ্রী নরেন্দ্র মোদীনা ঙসি ভিদিও কন্ফরেন্সিংগী খুত্থাঙদা ভারতকী অহানবা দ্রাইভর য়াওদবা ত্রেন ওপরেসন দিল্লী মেত্রোগী মেজেন্তা লাইন্দা শঙ্গাখ্রে। মমাঙ চহীদা অহমেদবাদতা হৌদোকখিবা নেসনেল কম্মন মোবিলিতী কার্দ ঙিস দিল্লী মেত্রোগী এয়রপোর্ত এক্সপ্রেস লাইন্দসু চৎনহনখ্রে। কেন্দ্র মন্ত্রী শ্রী হরদীপ পুরি অমসুং দিল্লীগী মুখ্য মন্ত্রী শ্রী অর্বিন্দ কেজ্রিৱালনা থৌরমদুদা শরুক য়াখি।
থৌরমদুদা ৱা ঙাঙলদুনা প্রধান মন্ত্রীনা ঙসিগী থৌরমদুবু ময়োল্লম চাউখৎ থৌরাংবু তুংগীদমক শেম শাদুনা থম্নবগী হোৎনবা অমনি হায়না হায়খি। লৈবাক অসিবু তুংগীদমক শেম শাদুনা থমবা হায়বসি লৈঙাক্লোনগী থৌদাংনি। চহী তরা খরগী মমাঙদা অর্বানাইজেসনগী মথৌ তারকখিবা মতমদা তুংগী মথৌ তারক্কদবশিংগী মতাঙদ পুক্নিং থোইদোক্না চঙখিদে হিংজোং কায়জোং থবক খরা তৌরম্মী অমদি চমম্নবা পোকহনখি। মদুগী ওন্ন তৈনবদা অনৌবা ৱাখল্লোনশিংনা হায়রিবদি অর্বানাইজেসন অসি শিংনবা অমা ওইনা উরোইদবনি অদুবু মসি হিংবদা কোমবা ফীভম পুরক্নবা লৈবাকসিদা হেন্না ফবা মচাক মথুম শেমগৎনবা খুদোংচাবা অমা ওইনা লৌগদবনি হায়বসিনি। হায়রিবা খেন্নবা ৱাখল্লোনশিং অসি হৌজিক্তি অর্বানাইজেসনগী মায়কৈ খুদিংদা উবা ফংলে। মহাক্না মখা তাখিবদা ২০১৪দা ময়োল্লম ৫ খক্তদা মেত্রো রেল লৈরম্মী অদুগা ঙসিদি মেত্রো রেল ময়োল্লম ১৮দা লৈরে। ২০২৫ ফাওবদদি ঐখোয়না মসি ময়োল্লম ২৫ হেনবদা পুরক্কনি। ২০১৪দা লৈবাকসিদা মেত্রো লাইন কিলোমিতর ২৪৮ খক্তমক মথৌ তৌরম্মী অদুগা ঙসিদি মসিগী শরুক অহুম হেন্না, কিলোমিতর ৭০০ হেন্না মথৌ তৌরে। ২০২৫ ফাওবদদি ঐখোয়না মসি কিলোমিতর ১৭০০তা শন্দোক্নবা হোৎনরি। মসি শুপ্নতগী মশিং নত্তে, মখোয়সি ভারত মচা করোর কয়াগী হিংবদা নুংঙাইহনবগী খুদম চাংদম্নি। হায়রিবা মচাক মথুমশিং অসি চেক অমদি নুং, কনক্রিৎ অমদি য়োৎ খক্তনা শাবা নত্তে লৈবাকসিগী মীয়ামগী, মিদল ক্লাস মীয়ামগী অনিংবা অপামবদু থুংহনবগী খুদম্নি।
প্রধান মন্ত্রীনা পনখিবদা লৈঙা্ অসিনা অহানবা ওইনা মেত্রো রেল পোলিসী শেমদুনা পুম্নমক কোনশিনবা থৌরাংগী মখাদা পায়খৎখি। লোকেল দিমান্দগী মতুং ইন্না থবক পায়খৎপা, লোকেল স্তেন্দর্দ য়োকখৎপা, মেক ইন ইন্দিয়া পাকথোক চাউথোকহনবা অমদি অনৌবা তেক্নোলোজীশিং শিজিন্নবদা অহেনবা মীৎয়েঙ থমখি। মেত্রো, অনৌবা মতমগী চত্থোক চৎশিনগী পাম্বৈ পাকথোক চাউথোকহনবদা ময়োল্লম অদুগী মীয়ামগী মথৌ তাবা অমদি মফমদুগী প্রোফেসনেল ওইবা পুন্সি মহিংগী মতুং ইন্না পায়খৎনবা ৱাফমদা মীৎয়েঙ থমখি হায়না মহাক্না হায়খি। মসিননি তোঙান তোঙানবা ময়োল্লমশিংদা খেন্নবা মখলগী মেত্রো রেলশিংগী থবক পায়খৎলিবসি।
প্রধান মন্ত্রীনা হৌজিক হৌজিক থবক পায়খৎলিবা খেন্নবা মখলগী মেত্রো রেলগী থবকশিং পনখি। দিল্লী অমসুং মীরুতকী মরক্তা পায়খৎলিবা রিজনেল রেপিদ ত্রাঞ্জিৎ সিস্তেম (আর.আর.তি.এস.)কী মতাঙদা প্রধান মন্ত্রীনা হায়খিবদা মসিনা দিল্লী অমসুং মীরুতকী মরক্তা চত্থোক চৎশিন তৌবগী মতম পুং অমা ফাদনা চঙহল্লগনি। পেসেঞ্জর মশিং য়ামদবা ময়োল্লমশিংদা মেত্রো লাইত ভর্জনগী থবকশিং পায়খৎলি হায়না মহাক্না ফোঙদোকখি। মেত্রো লাইত ভর্জনশিং নোর্মেল মেত্রোগী চঙবা শেন্ফমগী চাদা ৪০গী চাংদা চঙহন্দুনা পায়খৎকনি। তোংবা মী য়ামদবা ময়োল্লমশিংদা মেত্রো নিওগী থবক পায়খৎলি। মসি নোর্মেল মেত্রোগী শেন্ফমগী চাদা ২৫গী চাংদা চঙহন্দুনা শেমগৎকদবনি। মতৌ অসুম্না ৱাতর মেত্রো অসি হান্না লৈনরমদবা মখলগী ৱাখল্লোন ওইগদৌরিবনি। ঈশিংগী শরুক চাউনা লৈবা ময়োল্লমশিংদা হায়রিবা ৱাতর মেত্রোগী থবকশিং অসি পায়খৎলি। মসিনা ঈথৎ ময়াদা লৈরিবা মীওইশিংদা লাস্ত মাইল কন্নেক্তিভিতী ফংহনগনি।
প্রধান মন্ত্রীনা ফোঙদোকখিবদা ঙসিদি মেত্রো অসি শুপ্নতগী পব্লিক ত্রান্সপোর্তকী মেদিয়ম অমখক ওইবতা নত্তনা পোলুসন হন্থহন্নবা কান্নরবা পাম্বৈ অমসু ওইরি। মেত্রো নেতৱর্কনা মরম ওইরগা হান্না পোলুসন অমদি জাম থোকহল্লমবা লম্বীদা চৎপা গারী মশিং লিংশিংলোমদা হন্থরে।
মেত্রো সর্ভিস পাকথোক চাউথোকহন্নবগীদমক মেক ইন ইন্দিয়া অসি মরুওই হায়না প্রধান মন্ত্রীনা হায়খি। মেক ইন ইন্দিয়ানা মমল হন্থহল্লি, ফোরেন এক্সচেঞ্জ তৌহন্দে অমদি লৈবাকসিদগী মী মশিং হেন্না থবক পী। রোলিং স্তোক স্তেন্দর্দ ওইহনবনা কোচ খুদিংমক্কী মমল করোর ১২দগী করোর ৮দা হন্থরে। ঙসিদি লৈবাকসিদা অচৌবা কম্পেনী মরিনা মেত্রো কোচশিং শারি অমদি কম্বেনী দজন কয়ানা মেত্রোগী মচাকশিং শারি। মসিনা মেক ইন ইন্দিয়া অমদি মরোমদোম লেপচবা ভারতকী কেম্পেন্দা মতেং পাংলি।
প্রধান মন্ত্রীনা হায়খিবদা দ্রাইভর য়াওদবা মেত্রো রেল শীজিন্নদুনা ঐখোয়গী লৈবাক অসি অসিগুম্বা খুদোংচাবশিং ফংলবা মশিং য়ামদবা লৈবাকশিংগী মনুং চল্লে। ব্রেক ফাবা মতমদা শীজিন্নরিবা ইনর্জীগী চাদা ৫০ গ্রীদতা অমুক হলহনখিবা ব্রেকিং সিস্তেম অমা শীজিন্নরি। ঙসিদি মেগাৱাত ১৩০গী সোলার পৱার মেত্রো রেলদা শীজিন্নরি অমদি মসি মেগাৱাত ৬০০তা হেনগৎলগনি।
কম্মন মোবিলিতী কার্দকী মতাঙদা ৱা ঙাঙলদুনা প্রধান মন্ত্রীনা হায়খিবদা অসিগুম্বা স্তেন্দর্দ অমদি খুদোংচাবশিং ফংহনবা হায়বসি অনৌবা মতমগী য়াওলদা য়াম্না মরু ওই। লৈবাক্কী থাক্তা পায়খৎবা কম্মন মোবিলিতী কার্দ অসি মায়কৈ অসিদা অচৌবা খোঙথাঙ অমনি। মসিনা চত্থোক চৎশিন তৌরিবশিংদা মখোয়না চৎলিবা মফম খুদিংদা মখোয়না শীজিন্নবা পব্লিক ত্রান্সপোর্ত খুদিংদা পুম্নমক পুনশিল্লবা এক্সেস পীগনি।
কম্মন মোবিলিতী কার্দকী খুদম পীরদুনা প্রধান মন্ত্রীনা সিস্তেম খুদিংমক পুনশিনবগী থৌওংগী মতাঙদা মচা খায়না ৱা ঙাঙখি। সিস্তেমশিং পুনশিন্দুনা লৈবাকসিগী মপাঙ্গল হেন্না মপা চুমবা অমদি মতিং লৈবা মওংদা শেমগৎলি। “ৱন নেসন ৱন মোবিলিতী কার্দকুম্না ঐখোয়গী লৈঙাক্না হৌখিবা চহীশিংদা লৈবাকসিগী সিস্তেমশিং পুনশিন্নবা থৌরাং কয়া পায়খৎখ্রে,” হায়না শ্রী মোদীনা হায়খি।
ৱন নেসন, ৱন ফাস্তেগনা লৈবাক শিন্বা থুংনা হায়ৱেদা চত্থোক চৎশিন তৌবদা অপনবা লৈতবা ওইহল্লে। মসিনা চত্থোক চৎশিন তৌরিবশিংবু লম্বী চিনবা অমদি থেংথবদগী কোকহল্লে। ৱন নেসন, ৱন তেক্স হায়বদি জি.এস.তি.না তেক্স সিস্তেমগী খুদোংচাদবা ফীভমশিং লোইশিন্দনা ইন্দাইরেক্ত তেক্স সিস্তেমদা মান্নবা ফীভম পুরক্লে। ৱন নেসন, ৱন পৱার গ্রীদনা লৈবাকসিগী মফম খুদিংদা মৈ মরাং কায়না অমদি লেপ্পা নাইদনা ফংহন্নবা হোৎনরি। মৈ মাঙবগী চাং হন্থরে।
ৱন নেসন, ৱন গ্যাস গ্রীদনা গ্যাসতা য়ুম্ফম ওইবা পুন্সি অমদি শেন্মিৎলোনগী ফীভম মঙলান ওইরমবা মফমশিংদা অপনবা লৈতবা গ্যাস কন্নেক্তিভিতী ফংহল্লি। ৱন নেসন, ৱন হেল্থ ইন্সুরেন্স হায়বদি অয়ুস্মান ভারতকী খুত্থাঙদা ভারতকী মীশিং করোর কয়ানা লৈবাক্কী মফম অমা হেক্তদা কান্নবা লৌরি। ৱন নেসন, ৱন রেসন কার্দকী খুত্থাঙদা মফম অমদগী মফম অমদা হোংদুনা চৎপা মীয়ামদা অনৌবা রেসন কার্দ তান্নবগী খুদোংচাদবা ফীভম কোকহল্লে। মতৌ অসুম্না অনৌবা লৌউ শিংউগী লমদা পুরক্কদৌরিবা অওনবা অমদি ই-নামগুম্বা থৌরাংশিংনা লৈবাকসিনা ৱন নেসন, ৱন এগ্রিকলচর মার্কেতকী মায়কৈদা চঙশিল্লি।
***
(Release ID: 1684131)
Visitor Counter : 225
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam