প্রধান মন্ত্রী শ্রী নরেন্দ্র মোদীনা দিসেম্বর ২৯, ২০২০গী অয়ুক্কী পুং ১১দা ইস্তর্ন দেদিকেতেদ ফ্রাইৎ কোরিদোর (ই.দি.এফ.সি.)গী ‘ন্যু ভৌপুর-ন্যু খুর্জা সেক্সন’ অসি ভিদিও কনফরেন্সিংগী খুত্থাংদা শঙ্গারগনি। থৌরম অসিগী মনুংদা, প্রধান মন্ত্রীনা প্রয়াগরাজদা ই.দি.এফ.সি.গী ওপরেসন কন্ত্রোল সেন্তর (ও.সি.সি.)সু শঙ্গাগনি। উত্তর প্রদেশকী রাজ্যপাল, শ্রীমতি অনন্দিবেন পতেল, উত্তর প্রদেশকী মুখ্য মন্ত্রী, শ্রী য়োগী অদিত্যনাথ অমসুং কেন্দ্রগী মন্ত্রী শ্রী পিয়ুশ গোয়লসু থৌরম অসিদা শরুক য়াগনি।

ই.দি.এফ.সি.গী কিলোমীতর ৩৫১ শাংবা ‘ন্যু ভৌপুর-ন্যু খুর্জা’ সেক্সন অসি উত্তর প্রদেশকী মনুংদা লৈবনি অমসুং মসি লুপা করোর ৫৭৫০ চঙদুনা শাবনি। সেক্সন অসিনা এলুমিনিয়ম, ইন্দস্ত্রী (কানপুর দেহাৎ জিলাগী পুখ্রয়ানগী মফমশিং), দাইরী সেক্তর (ঔরাইয়া জিলা), তেক্সতাইল প্রদক্সন/ব্লোক প্রিন্তিং (ইতাৱা জিলা), চফু শাবগী পোত্থোকশিং (বুলন্দশহর জিলাগী খুর্জা), গ্লাসৱেয়র ইন্দস্ত্রী (ইতাৱা জিলা), অসাফোতিদা নত্ত্রগা ‘হিং’ পুথোকপা (হথ্রাস জিলা) অমসুং শো অমসুং হার্দৱেয়র (অলিগর জিলা)গুম্বা মফম অসিগী ইন্দস্ত্রীশিংদা অনৌবা খুদোংচাবা কয়া অমা পীরগনি। সেক্সন অসিনা হৌজিক লৈরিবা কানপুর-দিল্লীগী মরু ওইবা লম্বী অসিবু কোমহন্দুনা ইন্দিয়ন রেলৱেজপু অয়াঙবা ত্রেন চেলহনবসু ঙমগনি।

প্রয়াগরাজতা লৈবা মতমগা চান্নবা ওপরেসন কন্ত্রোল সেন্তর (ও.সি.সি.) অসিনা ই.দি.এফ.সি.গী লম্বী পরিং অপুনবা অসিগী কম্মান্দ সেন্তর ওইনা মথৌ তৌগনি। ও.সি.সি. অসি মসিগী মখল অসিগী ওইনা মালেমগী খ্বাইদগী চাউবা ওইগনি অমসুং মসিদা মতমগা চান্নবা ইন্তেরিয়র, ইর্গোনোমিক দিজাইন অমসুং খ্বাইদগী ফবা একৌস্তিক্সশিং য়াওগনি। মসিগী বিলদিং অসিসু গ্রিহা৪গী গ্রীন ব্লদিংগী থাক্কী মতুং ইনবা অকোয়বগা চান্নবা ওইগনি অমসুং মসিবু ‘সুগময়া ভারত অভিয়ান’গী কাঙলোনগী মতুং ইন্না শাবনি।

ইস্তর্ন দেদিকেতেদ ফ্রাইৎ কোরিদোরগী মরমদা ৱাফম খরা

ই.দি.এফ.সি. (কিলোমীতর ১৮৫৬ শাংবা লম্বী) অসি লুধিয়ানা (পঞ্জাব)গী মনাক্তা লৈবা সহনেৱালদগী হৌদুনা পঞ্জাব, হরয়ানা, উত্তর প্রদেশ, বিহার অমসুং ঝারখন্দ ফাওরগা চৎলগা নোংচুপ বেঙ্গোলগী দাঙ্কুনিদা লোইশিল্লি। মসি অখন্নবা থৌওং পাংথোক্নবা গারি অমা ওইনা শেমদুনা দেদিকেতেদ ফ্রাইৎ কোরিদোর শানবা অমসুং চলায়নবগীদমক্তা শেমখিবা দেদিকেতেদ ফ্রাইৎ কোরিদোর কোর্পোরেসন ওফ ইন্দিয়া লিমিতেদ (দি.এফ.সি.সি.আই.এল.)না শাবনি। দি.এফ.সি.সি.আই.এল. অসিনা উত্তর প্রদেশকী দাদ্রি অমসুং মুম্বাইগী জৱাহরলাল নেহরু হিথাংফম শম্নরিবা ৱেস্তর্ন দেদিকেতেদ ফ্রাইৎ কোরিদোর ( কিলোমীতর ১৫০৪ শাংবা)সু  শারিবনি অমসুং মসিনা য়ু.পি., হরয়ানা, রাজস্থান, গুজরাৎ অমসুং মহারাস্ত্রা রাজ্যগী মফমশিংদা ফাউদুনা চৎকনি।

***