৬সুবা ইন্দিয়া ইন্তরনেসনেল সাইন্স ফেস্তিবেল(আই আই এস এফ) হৌদোক্নবা কাউন্তদাউন হৌরে। চহি অসিগী অচৌবা সাইন্স ফেস্তিবেল অসি দিশেম্বর ২২দগী প্রধান মন্ত্রী নরেন্দ্র মোদীনা হৌদোক্কনি। আই.আই.এস.এফ অসি ২০১৫দগী হৌখিবনি। ঙসি নিউ দিল্লিদা সাইন্স অমসুং তেক্নোলোজি, আর্থ সাইন্সেস অমসুং হেল্থ অমসুং ফেমিলি ৱেলিফয়ারগী য়ুনিয়ন মিনিস্তর দোক্তর হর্স ভর্ধন্না হায়খি কোবিদ-১৯ লাইচৎনা মরম ওইদুনা আই.আই.এস.এফ-২০২০ ওনলাইন্দা পাংথোক্লগনি অমসুং ভর্চুএল ওইনা পাংথোকপা খ্বাইদগী চাউবা সাইন্স ফেস্তিবেল ওইরগনি। আই.আই.এস.এফ-২০২০কী মতাংদা পাংথোকপা পাউমীশিংগা উনবা অমদা মহাক্না হায়খি ফেস্তিবেল অসি প্রধান মন্ত্রী শ্রী নরেন্দ্র মোদীনা হৌদোক্কনি অমসুং দিশেম্বর ২৫দা পাংথোক্কদবা ফেস্তিবেল লোইশিনবা থৌরমদা উপ-রাস্ত্রপতি শ্রী এম.ভেনকিয়া নাইদুনা ৱা ঙাংগনি।

মিনিস্তরনা মখা তানা হায়খি শিংনবা অমা হেক্তা থেংন্নবা সাইন্স অমসুং সাইন্তিস্তশিংনা থৌরাং তৌদুনা লৈরি। কোবিদ-১৯ লাইচৎ লাকপদা ভারতকী সাইন্তিস্তশিংনা অতেনবা মতমগী মনুংদা সেনিতাইজরশিং, মাক্সশিং, পি.পি.ই কিৎশিং, ভেন্তিলেতরশিং পুথোকখি অমসুং অনৌবা হিদাক-লাংথকশিং, তিকা অমসুং কোবিদ-১৯ ভাইরসকী জিনোম সিক্বেন্স পুথোক্নবা থবকশিং পায়খৎলে।

মহাক্না হায়খি লৈবাক অসিদা সাইন্স শিংথাবা য়ানা খুমাঙচাউশিল্লে অমসুং ঐখোয়গী লৈবাক অসিনা সাইন্সকী লমদা চাউখৎলক্লিবা অমসুং মাইপাকপশিং মীয়াম্না খঙগদবনি অমসুং চাউথোকচগদবনি। ভারতকী সাইন্স অমসুং সাইন্তিস্তশিং মীয়ামদা খঙহন্নবা চহি খুদিংগী ইন্দিয়া ইন্তরনেসনেল সাইন্স ফেস্তিবেল পাংথোক্নবা ২০১৫দা ৱারেপ লৌখিবনি।

কোবিদ-১৯ ভাইরসকী অনৌবা স্ত্রেনশিংগী মতাংদা মিনিস্তরনা হায়খি সাইন্তিস্তশিংনা উৎখ্রে অমসুং অনৌবা শিংনবা অমা হেক্তা মখোয়না মায়োক্নবা ঙমগনি হায়না মখোয়না অমুক হন্না উৎকনি। হকশেলগী ৱাফম অসি হৌজিক মীয়ামগী খোঙজং অমা ওইরে অমসুং অসিগুম্বা ফিবমশিং অসিদা চুনবা লিচৎ-শাজৎশিং অমসুং চুনবা চেকশিন-থৌরাংশিংনা মখোয় মশামক ঙাকথোকচবা ঙমগনি হায়না ভারতমচাশিংনা খঙলে।

মিনিস্তরনা হায়খি আই.আই.এস.এফ অসি চহি খুদিংগী পাংথোকপা থৌরম অমনি। মসি দি.এস.তি, দি.বি.তি, এম.ও.ই.এফ, এম.ও.ঐচ.দব্লিউ.এফ অমসুং সি.এস.আই.আরনা বিঞ্জান ভারতীগা লোয়ন্না শীনবনি। মালেমগী মমিং লৈরবা ভারতমচা মেথেমেতিসিয়ান শ্রীনিভাস রামানুজাগী মপোক নুমিৎ, দিশেম্বর ২২, ২০২০দা ফেস্তিবেল হৌদোক্কনি অমসুং ঐখোয়গী হান্নগী প্রধান মন্ত্রী শ্রী অতল বিহারি বাজপায়িগী মপোক নুমিৎ দিশেম্বর ২৫, ২০২০দা লোইশিনগনি। মসিগী সাইন্স ফেস্তিবেল অসি সাইন্সগী ইহৌ অমা ওইরে, লৈবাক অসিগী মীয়াম অমসুং নহারোলশিংদা সাইন্সকী মরমদা খঙহন্নবা অমসুং সাইন্সকী ৱাখল্লোন লৈহন্নবা মীয়ামগী ইহৌ অমা ওইরে। চহি অসিগী ফেস্তিবেলগী পান্দমদি ‘মশাগী ওক্নবা পুথোক্নবা ভারত শেমগৎনবা অমসুং মালেমগী য়াইফনবা সাইন্স’ হায়বনি।

মিনিস্তরনা হায়খি অচৌবা সাইন্স ফেস্তিবেল অসি ভারত অমসুং মপান লৈবাকশিংগী মীয়াম্না শরুক য়ানবা ভর্চুএল প্লেতফোর্ম হাংদোক্লে। মীয়াম শরুক য়াবা অমসুং অনৌবা থৌরমশিং হাপচিনবদা আই.আই.এস.এফ-২০২০ অসি অনৌবা রেকোর্দ কয়া থম্লগনি অমসুং তুংদা পাংথোক্কদবা আই.আই.এস.এফশিংদা ভর্চুএল প্লেতফোর্মশিং হাপচিন্নবা ঐখোয়না খন্নরি। ২০২০ অসি সাইন্স অমসুং সাইন্তিস্তশিংগী চহি কৌবদা হেন্না চুনগনি।

সি.এস.আই.আরগী দিরেক্তর জেনেরেল অমসুং দি.এস.আই.আরগী সেক্রেতরি দোক্তর সেখর সি. মান্দেনা হায়খি মসিগী অচৌবা সাইন্স ফেস্তিবেল অসিদা শরুক য়ানবা মিংচনবা মশিং লাখ ১ হেল্লে। মীওই মশিং য়াম্না শরুক য়াবা অসিদা ঐখোয় পুক্নিং থৌগৎলে অমসুং মীয়াম্না সাইন্স ফেস্তিবেল অসি পাম্নরে হায়বা উৎলে অমসুং খুন্নাইদা সাইন্স য়ৌহনবদা আই.আই.এস.এফ অসি মরুওইবা প্লেতফোর্ম অমা ওইরক্লে।

চীফ কোওর্দিনেতর অমসুং নোদেল ইন্সতিতুৎকী দিরেক্তর, দোক্তর রঞ্জনা অগরৱালনা হায়খি লৈবাক অসিগী মনুং হুঞ্জিনবা মফমশিংদা লৈবা মীওইশিং ফাওবা শরুক য়াবদা ভর্চুএল প্লেতফোর্মনা মতেং পাংগনি। ফেস্তিবেল অসি খুন্নাইগা সাইন্সকা শম্নহনবা অঙকপা ফেস্তিবেল অমনি। অনৌবা থৌরম ১৩ হাপচিন্দুনা ফেস্তিবেল অসিদা তোঙান-তোঙানবা থৌরম ৪১ লৈগনি। কাংলুপ মঙাদা জিনেস ৱার্ল্দ রেকোর্দশিং থম্নবা আই.আই.এস.এফনা হোৎনরি। আই.আই.এস.এফ-২০২০ অসি কাংলুপ ৯ থোক্নবা হায়বদি : মীয়ামগীদমক সাইন্স, মহৈরোয়শিংগী সাইন্স, অনৌবা থবকশিং, ইন্দস্ত্রি অমসুং এম.এস.এম.ই, লৌউ-শিংউ অমসুং খুঙ্গং চাউখৎহন্নবা সাইন্স, পুন্না চাউখৎমিন্নবা, সাইন্স অমসুং মীওইবা, নেসনেল অমসুং ইন্তরনেসনেলগী মরীশিং অমসুং তুংকোইনা চৎনগদবা চাউখৎপা অসিনি।

বিঞ্জান ভারতীগী নেসনেল ওর্গনাইজিং সেক্রেতরি শ্রী জয়ান্ত সাহাসরাবুধেনা হায়খি পুৱারি, ফিলোসোফি, কলা অমসুং ইজুকেসনগী লমদা সাইন্স অমসুং তেক্নোলোজিগী খুমাঙচাউশিনবশিং উৎনবা অনৌবা থৌরমশিং ফেস্তিবেল অসি য়াওরে। অসিগুম্বা থৌরমশিং  অসিনা ফেস্তিবেলগী মগুন হেনগৎহনগনি অমসুং বেদা অমসুং উপনিষদশিং য়াওনা ঐখোয়গী অরিবা লাইরিকশিংদা য়াওরিবা ভারতকী সাইন্সকী চৎনবীশিং উৎপা ঙম্লগনি। অসিগুম্বা থৌরমশিং অসিনা মমাঙঙৈগী ভারত্তা লৈখিবা অচৌবা সাইন্সনা পুথোকখিবশিং অমসুং তেক্নোলোজিগী মাইপাকপশিং মীয়ামদা খঙহনবা ঙমগনি।

পাউমীশিংগা উনবা থৌরম অদুদা এম.ও.ই.এসকী সেক্রেতরি, দোক্তর মধাবন এন.রাজিবন, দি.বি.তিগী সেক্রেতরি দোক্তর রেনু শ্বারুপ, দি.এস.তিগী সাইন্তিস্ত ‘জি’ দোক্তর সঞ্জিব ভার্সনি অমসুং অতোপ্পা সাইন্তিস্তশিং শরুক য়াখি।

আই.আই.এস.এফ-২০২০গী মতাংদা মীয়ামদা খঙহন্নবা লৈবাক শীনবা থুংনা পি.আই.বিনা পাংথোকলিবা থৌরমশিংগী মতাংদা প্রেস ইনফোর্মেসন বিউরোগী প্রিন্সিপাল দিরেক্তর জেনেরেল, শ্রী কুলদিব ধাতৱালিয়ানা পাউদমখি অমসুং আই.আই.এস.এফ-২০২০গী অকুপ্পা ই-পাউ পীনবা পি.আই.বি ৱেবসাইত্তা মাইক্রোসাইদ অমা শেম্লে হায়না ফোঙদোকখি।

ইন্দিয়া ইন্তরনেসনেল সাইন্স ফেস্তিবেল-২০২০ অসি দি.এস.তি, দি.বি.তি, এম.ও.ই.এফ, এম.ও.ঐচ.দব্লিউ.এফ অমসুং সি.এস.আই.আর, আই.সি.এম.আরনা বিঞ্জান ভারতীগা লোয়ন্না শীনবনি। চহি অসিগী সাইন্স ফেস্তিবেল অসিগী নোদেল ইন্সতিতুৎনা সি.এস.আই.আর-নেসনেল ইন্সতিতুৎ ওফ সাইন্স, তেক্নোলোজি এন্দ দিবলপমেন্ত স্তদিজ, নিউ দিল্লিনি।

ফেস্তিবেলগী অকুপ্পা মরোল ৱেবসাইত অসিদা ফংগনি: www.scienceindiafest.org

অমসুং পি.আই.বিগী ৱেবসাইত্তসু ফংগনি: pib.gov.in/iisf

*****