প্রধানমন্ত্রীগী লোইশঙ

এফ.সি.সি.আই.আই.গী ৯৩শুবা চহীগী জেনেরেল মীফমদা পি.এম.না হৌদোকপগী ৱারোল পীখ্রে

মপাঙ্গল কনবা অমদি ফীরেপ চেৎপা লৈঙাক অমনা স্তেকহোল্দর পুম্নমকপু মখোয়গী মতিং ফুদোকপা ঙমহন্নবা মতেং পাংই: পি.এম.

ঐখোয়গী ইন্দস্ত্রীশিংনা মথৌ তারিবসি থোংনি ফক্লাঙ নত্তে: পি.এম.

নিতি অমসুং নিয়তকী খুত্থাঙদা লৌমীশিংগী য়াইফনবগীদমক লৈঙাক অসিনা মপুং ফানা লেপ্লি: পি.এম.

ইন্দস্ত্রী লুচিংবশিংবু খুঙ্গঙশিং অমদি অপীকপা ময়োল্লমশিংদা শেল থাদনবা ৱাফম থম্লি

Posted On: 12 DEC 2020 1:39PM by PIB Imphal

ঙসি পাঙথোকপা এফ.সি.সি.আই.আই.গী ৯৩শুবা চহীগী জেনেরেল মীফম অমদি চহীগী কনভেন্সনদা প্রধান মন্ত্রী শ্রী নরেন্দ্র মোদীনা হৌদোকপগী ৱারোল ভিদিও কন্ফরেন্সিংগী খুত্থাঙদা পীখ্রে‍। প্রধান মন্ত্রীনা ভারতকী প্রাইভেত সেক্তরবু লমদমসিগী মথৌ তাবশিংদু ফংহনবখক্তা নত্তনা মালেমগী ওইনা মপাঙ্গল কনবা ব্রান্দ ভারত শেম্নবা মতিং হেনগৎহনবগীদমক্তা থাগৎখি‍। মীপুম খুদিংমক্না আত্মনিরভর ভারতকী মায়কৈদা খোঙফম চেৎনা লেপ্লিবা অসি লৈবাকসিনা প্রাইভেত সেক্তরদা থাজবা থম্বা অসিগী খুদম্নি, হায়না মহাক্না হায়খি‍।

প্রধান মন্ত্রীনা হায়খিবদা পুন্সি অমদি লৈঙাক্লোনদা মশান মশাবু থাজবা মীওই অমনা অতোপ্পশিংগী মফম পীবদা কৈদৌঙৈদসু নিংহন্নদে‍। য়াম্লবা মীয়ামগী ঙাক্লৌ লৈবা মপাঙ্গল কনবা লৈঙাক অমনা হায়রিবা থাজবা অমদি পিরেপ অদু উৎলি‍। ফিরেপ চেৎপা লৈঙাক অমনা মতম পুম্নক্তা অতোপ্পশিংগী খোঙলৌ পল্লৌগদবশিং লৌথোক্নবা হোৎনৈ অমদি লৈবাকসিগী খুন্নাইসিগীদমক মতম পুম্নমক্তা থৌদাং য়ানবা হোৎনৈ‍। অসিগুম্বা লৈঙাক অমনা কন্ত্রোল অমসুং ইনিসিএতিবকী থবক্তা করাম চাউবা মতৌ উত্তে‍। লৈঙাক্না সেক্তর খুদিংমক্তা চঙশিন্দুনা অসিগুমবা থৌওংসিনা শেন্মিৎলোন্দা মাঙ তাকহনখিবা মতম মহাক্না নীংশিংখি‍। নাকল অমরোমদা মীৎয়েঙ শানবা অমদি ফিরেপ চেৎপা লৈঙাক অমনা স্তেকহোল্দর পুম্নমকপু মখোয়গী মতিং ফুদোকহন্নবা পুক্নিং থৌগৎলি‍। শ্রী মোদীনা ফোঙদোকখিবদা হৌখিবা চহী তরুকসিদা লৈঙাক অসিনা সেক্তর খুদিংমক্তা লৈরিবা স্তেকহোল্দর পুম্নমকপু পুক্নিং থৌগত্তুনা লাক্লি‍। ফীভম অসি মেনুফেকচরিংদগী হৌরগা এম.এস.এম.ই. ফাওবা; লৌউ-শিংউদগী হৌরগা মচাক মথুম ফাওবা; তেক ইন্দস্ত্রীদগী হৌরগা তেক্সেসন ফাওবা অমদি রিএল এস্তেত্তগী হৌরগা রিগুলেতরী লায়থোকহনবা ফাওবদা লৈরিবা সেক্তর খুদিংমক্তা মায়কৈ শুনা অওনবা পুরক্নলিবা অসিদা মমি তারি হায়না মহাক্না মখা তাখি‍।

তিল্লিবা মীয়ামদুদা প্রধান মন্ত্রীনা হায়খিবদা ঐখোয়গী ইন্দস্ত্রীশিংনা মথৌ তারিবসি থোংনি ফক্লাঙ নত্তে‍। শেন্মিৎলোনগী তোঙান তোঙানবা সেক্তরশিংবু তোখায়হল্লিবা ফক্লাঙশিং লৌথোকপনা মীপুম খুদিংমক্কী, মরুওইনা অনৌবা ওপসন কয়া ফংগদৌরিবা লৌমীশিংগীদমক অনৌবা খুদোংচাবা কয়া লৈগনি‍। তেক্নোলোজী, কোল্দ স্তোরেজ অমসুং এগ্রি সেক্তরদা শেল থাদবনা লৌমীশিংদা কান্নবা ফংহনগনি‍। খোঙচৎ অসিদা এফ.সি.সি.আই.আই.গুম্বা লূপশিংনা থোং অমসুং পুক্নিং থৌগৎনিংঙাই ওইবা য়াগনি‍। ঐখোয়না লমদমসিগী মমল অমদি সপ্লাই চেন মপাঙ্গল কনখৎহন্নবা পান্দমগা লোয়ননা মালেমগী সপ্লাই চেনদা ভারতকী থৌদাং কমদৌনা পাকথোক চাউথোকহনগদগে হায়বসিদা থবক তৌগদবনি‍। “ভারত্তা কৈথেল, মেনপৱার অমদি মিসন মোদতা থবক তৌবা ঙম্বগী মতিংসু লৈ”, হায়না শ্রী মোদীনা হায়খি‍।

জে-এ-এম (জনধন, আধার অমসুং মোবাইল) অহুমগী খুত্থাঙদা মায় পাক্না পায়খৎপা ফাইনান্সিএল ইনক্লুজনবু লৈঙাক অসিগী মখাদা থৌরাং নীংথিনা য়াত্তুনা পুম্নমক কোনশিন্দুনা অওনবা পুরক্নবা পায়খৎপা খ্বাইদগী ফবা খুদম অমা ওইনা প্রধান মন্ত্রীনা পনখি‍। মালেমগী খ্বাইদগী চাউবা দাইরেক্ত বিনিফিত ত্রান্সফর সিস্তেম অসি লৈবাকসিনা লাইচৎ মনুংদা বত্তন অমখক নম্লগা মীওই করোর কয়াগী একাউন্ততা শেল থাজিনবা য়াহনখিবগীদমক থাগৎনরি‍।

প্রধান মন্ত্রীনা লৌমীশিংদা অমদি এগ্রি-সেক্তরদা মতেং পাংনবা পায়খৎলিবা খোঙথাংশিংগী মতাঙদা ৱা ঙাঙখি‍। শ্রী মোদীনা হায়খিবদা, “থৌরাং অমসুং পান্দমগী খুত্থাঙদা লৈঙাক অসিনা লৌমীশিংগী য়াইফনবগীদমক খোঙফম চেৎনা লেপ্লি‍। লৌউ-শিংউ সেক্তরদা মচু মমেন থোকপা হেনগৎলক্লিবা হায়রদুনা শ্রী মোদীনা লৌমীশিংনা মন্দিগী ৱাংমদা মখোয়গী পোত্থোকশিং য়োনবা য়োনবগী লম্বী অমা ফংলিবা, মন্দিশিং মতমগা চুনহল্লিবা অমদি ইলেক্ত্রোনিক ফম্পাকশিংদা মখোয়গী পোত্থোকশিং য়োন্নবা তাঞ্জা ফংলিবা কয়াগী মরমদা ৱা ঙাঙখি‍। পুম্নমক অসি নুংঙাই-য়াইফবা লৌমী হায়বসি নুংঙাই-য়াইফবা লৈবাক্নি হায়বা ৱাখল্লোনসিদা লৌমীশিংবু নুংঙাই য়াইফহন্নবনি হায়না মহাক্না হায়খি‍।

লনাই সেক্তরনা লৌউ-শিংউবগী লমদা শেল থাদরিবা অসি য়ামবা ওইদ্রি হায়না শ্রী মোদীনা হায়খি‍। সপ্লাই চেন, কোল্দ স্তোরেজ অমসুং হারনচিংবা লমশিংদা লনাই সেক্তরগী ইন্তরেস্ত অমসুং শেল থাদবা মথৌ তারি‍। খুঙ্গঙগী লৌউ-শিংউদা য়ুম্ফম ওইবা ইন্দস্ত্রীশিংদা চাউরবা মীৎয়েঙ লৈরি অমদি মদুগীদমক্তা চুনবা থৌরাং য়াত্তুনা থক্লে হায়না শ্রী মোদীনা হায়খি‍।

খুঙ্গঙ, সেমি রুরেল অমদি তিয়র-২ অমসুং তিয়র-৩ ময়োল্লমশিংদা অফবা মায়কৈদা অহোংবা লাক্লিবশিং অসিগী মতাঙদা ৱাফম থম্লদুনা প্রধান মন্ত্রীনা মকোক থোংবা বিজিনেস অমদি ইন্দস্ত্রী লুচিংবশিংগী মফমদা হায়রিবা হীরমশিং অসিদা লৈরিবা খুদোংচাবশিং অসিগী কান্নবা লৌহৌনবা ৱাফম থমখি‍। ইন্তর্নেত শীজিন্নবা মীশিং খুঙ্গঙগী লমদা লৈবশিংনা ময়োল্লমশিংদা লৈবশিংদগী হেল্লে অমদি ভারতকী স্তার্ত-অপশিংগী তঙ্খায় হেনবদি তিয়র-২ অমসুং তিয়র-৩ ময়োল্লমশিংদগীনি হায়না মহাক্না পাউদমখি‍। পব্লিক ৱাই-ফাই ফংহন্নবগীদমক হন্দক্তা অয়াবা পীখিবা পি.এম.-দব্লিউ.এ.এন.আই.গী মতাঙদা পল্লদুনা ওন্ত্রপ্রিন্যুরশিংনা খুঙ্গঙগী লমদা কন্নেক্তিভিতীগী পায়খৎলিবা থৌরাংশিংগী খোঙবু ওইগদবনি হায়না মহাক্না হায়খি‍। “২১শুবা চহীচাসিদা খুঙ্গঙশিং, অপীকপা ময়োল্লমশিংনা থৌদুনা ভারত্তা চাওখৎপা পুরক্কদৌরিবনি অমদি অদোমগুমবা ওন্ত্রপ্রিন্যুরশিংনা খুঙ্গঙশিংদা অমদি অপীকপা ময়োল্লমশিংদা শেল থাদবগী খুদোংচাবা লৈরিবশিং অসি মাঙহল্লোইদবনি‍। অদোম্না শেল থাদবনা খুঙ্গঙগী লমদা অমদি লৌউ-শিংউগী লমদা লৈরিবা ঐখোয়গী ইচিল ইনাউশিংগীদমক অনৌবা থোঙ অমসিং থোঙনাউশিং হাংদোক্কদৌরিবনি,” হায়না প্রধান মন্ত্রীনা ফোঙদোকখি‍।

কোবিদনা অৱাবা তাহনখিবদগী চাউনা মনীং হল্লক্তুনা হান্নগী ফীভমদা লাকহন্নবা হোৎনবদা ইন্দস্ত্রিএলিস্তশিং অমসুং ওন্ত্রপ্রিন্যুরশিংনা লৌরিবা থৌদাংশিংগীদমক মখোয়বু প্রধান মন্ত্রীনা থাগৎখি‍। লাইচৎ মনুংদা লৈবাক অসিনা মীয়ামগী পুন্সিবু হেন্না লূম্না লৌখি অমদি মদুনা অফবা মহৈ পুরকখি হায়না মহাক্না ফোঙদোকখি‍। ওইরিবা ফীভম অসি হৌরকপা মতমদা থুনা কায়থরকখিবগুম থুনা খোঙজেল য়াঙনা ফগৎলকখি হায়না শ্রী মোদীনা হায়খি‍।

নীংতম ইহৌদা এফ.সি.সি.আই.আই.গী থৌদাং নীংশিংলদুনা মখোয়গী লাক্কদৌরিবা চহী চাম্মগী থৌরম কুইশিল্লক্ত্রবা মতমসিদা প্রধান মন্ত্রীনা লৈবাক শেমবদা লৌরিবা মখোয়গী থৌদাং পাকথোক চাউথোকহন্নবা ৱাফম থমখি‍।

*****



(Release ID: 1680261) Visitor Counter : 5