প্রধানমন্ত্রীগী লোইশঙ

অনৌবা পর্লিয়মেন্তকী বিল্দিংগী উরেপ-উয়ুং তম্বদা পীখিবা প্রধান মন্ত্রীগী ৱারোল

Posted On: 10 DEC 2020 4:57PM by PIB Imphal

লোকসভাগী স্পীকর শ্রীমান ওম বীরলাজী, রাজ্যসভাগী ভাইস চিয়রমেন শ্রীমান হরিবংশজী, কেন্দ্রগী মন্ত্রীপরিশদকী ঐগী খোংলোই শ্রী প্রহলাদ জোশীজী, শ্রী হরদীপ সিংহ পুরীজী, অতৈ রাজনীতি দলশিংগী মীহুৎশিং, ভর্চুএলগী থোংদা শরুক য়াবীরিবা লৈবাক কয়াগী পর্লিয়মেন্তকী স্পীকরশিং, মফম অসিদা লেংসিনবীরিবা লৈবাক য়াগী এম্বেসেদরশিং, ইন্তর-পর্লিয়েন্তরী য়ুনিয়নগী মীহুৎশিং, অতৈ শক্নাইরবশিং অমসুং ঐগী নুংশিরবা ইরৈবাকচাশিং, ঙসিগী নুমিৎ অসি য়াম্নমক পুৱারী ওই। ভারত মচাশিংনা, ভারতকী ৱাখল্লোনগা ইতিন্নদুনা, ভারতকী সংসদ ভবন শাবগী য়াইফরবা থৌরম অসি ঐখোয়গী দিমোক্রেসীগী চৎনবীগী খ্বাইদগী মরুওইবা খোংথাংশিংগী মনুংদা অমনি। ঐখোয় ভারত মচাশিংনা পুন্না ঐখোয়গী অনৌবা বিল্দিং অসি শাগনি।

মরূপশা,  ভারতনা ঐখোয়গী নীং খা তম্বগী চহি ৭৫ শুবা থৌরম পাংথোকপদা, থৌরম অদুদগী ইথিল লৌজদুনা, ঐখোয়গী সংসদকী অনৌবা য়ুম্ফম শাগৎপা অসিদগী হেন্না ফজবা করি অমুক ওইগনি, মসিদগী হেন্না শেংবা করি অমুক লৈগনি। ঙসি করোর ১৩০দগী ভারত মচাশিংগী য়াম্না লাইবক ফবা নুমিৎনি, চাউথোকচনীংঙাইগী নুমিৎনি ঙসি ঐখোয় পুৱারী ওইরবা মিৎকুপ অসিগী শাখি ওইরি।

মরূপশা, অনৌবা পর্লিয়মেন্ত বিল্দিং শাবা অসি, অনৌবা অমসুং অরিবগী অপুনবা খুদম অমনি। মসি মতম অমসুং মথৌ তাবা মতুং ইননা মশানা অহোংবা পুরক্নবগী হোৎনবা অদুনি। ঐনা 2014দা অহানবা ওইনা এম.পি. অমা ওইনা সংসদ ভবন্দা লাকচবগী খুদোংচাবা ফংজখিবা মিৎকুপ অদু ঐগী পুন্সিদা অমুক হন্না কাওবা ঙম্লরোই। মদম অদুদা দিমোক্রেসীগী লাইশঙ অসিদা খোং থাংজিন্দ্রিঙৈগী মমাংদা, ঐনা কোক নোঞ্জদুনা, লাইবক কৎচদুনা দিমোক্রেসীগী লাইশঙ অসিবু খুরুমজখি। ঐখোয়গী হৌজিক্কী পর্লিয়মেন্ত হাউস অসিনা নীং তম্বগী খোংজং অমসুং নীং তম্লবা ভারতপু শেমগৎপদা চাউরবা থৌদাং লৌখি। নীং তম্লবা ভারতকী অহানবা সরকারসু মসিদা শেমখি অমসুং অহানবা মীফমসু মসিদা ফমখি। পর্লিয়মেন্ত হাউস অসিদা ঐখোয়গী সংবিধানসু শেমখি, ঐখোয়গী দিমোক্রেসী অমুক হন্না লিংখৎখি। বাব সাহেব অম্বেদকর অমসুং অতৈ সেনিয়রশিংনা সেন্ত্রেল হোলদা কুপ্না খন্ন-নৈনরবা মতুংদা ঐখোয়দা ঐখোয়গী সমবিধান পীবীখি। পর্লিয়মেন্তকী ওইরিবা বিল্দিং, নীং তম্বা ভারতকী অকা-অকুম খিবিক, ঐখোয়গী শিংনবশিং, ঐখোয়গী পাম্বৈশিং, ঐখোয়গী আশাশিং, অনীংবা-অপাম্বশিং, ঐখোয় মায় পাকপখি খুদম ওইরি। হাউস অসিদা কাংলোন খুদিংমক, কাংলোনশিং অদু শেম্বা মতমদা পর্লিয়মেন্ত হাউস্তা হায়খিবা অচেৎপা ৱাফম কয়া, পুম্নমক অদু ঐখোয়গী দিমোক্রেসীগী লন্নি।

মরূপশা, পর্লিয়মেন্তকী পাঙ্গল্লবা পুৱারীগা লোইননা অচুম্বা অদুসু য়াজবা অসি অদুক্কী মতিক মরুওই। বিল্দিং অসি হৌজিক চহি চাম্মা শুগদৌরে। হৌখিবা চহি তরাগী খুজিং কয়াদা মতম অদুগী তঙাইফদবা অদু য়েংদুনা অপগ্রেদ তোইনা তৌখি। মদুদা ফক্লাংশিং কয়ারক হন্না থুগাইখি। করিগুম্বদা অনৌবা সাউন্দ সিস্তেম, করিগুম্বদা ফায়র সেফতী সিস্তেম, করিগুম্বদা আই.তি. সিস্তেম। লোকসভাদা ফম্ফম চাউথোকহন্নবগীদমক্তা ফকলাংশিংসু লৌথোকখি। কয়া অসি তৌরবা মতুংদা হৌজিক পর্লিয়মেন্তকী হাউস অসিনা পোৎথাগে হায়রক্লে। হৌজিক লোকসভাগী স্পীকরজীনসু হায়বীখ্রে মদুদি মতম কয়াদগী মতৌ করম্না অৱাবা ফিভমদা লৈরক্লি, মতম কয়াদগী অনৌবা পর্লিয়মেন্ত হাউসকী তঙাইফদবা পোক্লকখি। মতাং অসিদা, ২১শুবা চহি চাদা ভারতনা অনৌবা পর্লিয়মেন্ত হাউস অমা ফংবা হায়বসি ঐখোয় পুম্নমক্কী থৌদাংনি। মসিগীদমক ঙসি য়াইফরবা থৌরম অসি হৌদোক্লি। অমসুং মরম অসিনা, ঙসি ঐখোয় ময়াম্না অনৌবা পর্লিয়মেন্ত হাউস শাবগী থবক হৌরি, অদুনা হৌজিক্কী পর্লিয়মেন্তকী চাইগোন্নুংগী পু্ন্সিদা অনৌবা চহি অমসু হাপচিল্লরি।

মরূপশা, অনৌবা পর্লিয়মেন্ত হাউস্তা অনৌবা পোৎশক কয়া হাপকদৌরি মদুনা এম.পি.শিংগী ইফিসিএন্সী হেনগৎহল্লগনি, মখোয়গী ৱর্ক কলচরদা অনৌবা মওং পুরক্লগনি। হৌজিক মখোয়গী এম.পি.শিংগা উনবা মাগী মাগী কন্সতিত্যুসনগী মীওইশিংনা লাকপা মতমদা হৌজিক্কী পর্লিয়মেন্ত হাউস অসিদদি য়াম্না অৱবা ওই। মীচম মীয়াম্না অৱাবা মায়োক্নৈ। তুংলমচৎতদি এম.পি. পুম্নমক্কী মফমদা মসিগী চাউরবা হাউস অসিগী চাইগোন্নুংদা মাগী মাগী মীওইশিংগা মকা লাম্না অৱা নুংঙাই ৱারী শানবা ফংৱগনি।

মরূপশা, অরিবা সংসদ ভবন্না নীং খা তম্লবা মতুংগী ভারত্তা মায়কৈ তাকপীবা ওইরবদি অনৌবা ভবন অসিনা আত্মনির্ভর ভারত শেমগৎপগী শাখি ওইরগনি। অরিবা সংসদ ভবন্দা লৈবাক্কী মথৌ তাবশিং ফংহন্নবগীদমক থবক তৌখি, অনৌবা ভবন্দা ২১শুবা চহি চাগী ভারতগী অনীংবা অপাম্বশিং মপুং ফাহনগনি।

মরূপশা, পর্লিয়মেন্তকী পাঙ্গল অসিগী হৌরকফম, মসিগী থৌনাগী হৌরকফম, ঐখোয়গী দিমোক্রেসীনি। নীং খা তম্বগী মতমদা মতৌ করম্না দিমোক্রেসী ওইবা লৈবাক অমা ওইনা ভারতকী শক্তমদা চিংনবা উৎখিবা, মসি পুৱারীগী শরুক অমনি। মহৈ-মশিং হৈতবা, লাইরবা, খুন্নাইগী খেন্নবা অমসুং খঙবা ৱাৎপা অসিনচিংবা কয়াগা লোইননা ভারতকী দিমোক্রেসী অসি মায়থিগনি হায়না লাইফাও ফাওনবসু য়াওখি। ঙসি ঐখোয় চাউথোকচনা হায়বা ঙম্লি মদুদি লৈবাক অসিনা চিংনব,সিং অদুবু শুপ্নগী লালহনবতা নত্তনা ২১শুবা চহি চাগী মালেম্না ভারতপু মরু ওইবা দিমোক্রেসীগী পাঙ্গল অমা ওইনা মাংদা চখৎপসু উরি।

মরূপশা, দিমোক্রেসী অসি ভারত্তা করিগী মায় পাক্লিবনো অমসুং কৈদৌনুংদসু দিমেক্রেসীদা মীংচৎ থিবা অমত্তা থোক্ত্রিবনো, ৱাফম অসি ঐখোয়গী মীরোলশিংনসু খঙবা অসি য়াম্না মথৌ তাই। ঐখোয়না তারি উরি, মালেমদা ১৩শুবা চহি চাদা লেংখিবা মেগনা কার্তাগী মরমদা য়াম্না ঙাংনরি, অখঙ-অহৈ খরনা দেমোক্রেসীগী য়ুম্ফমনি হায়নসু তাকপীরি। অদুবু ৱাফম অসিসু অদুক্কী মতি চুম্মি মদুদি মেগনা কার্তাদগীসু হান্না ১২শুবা চহি চামক্তদা ভারত্তা ভগবান বসৱেশ্বরগী ‘অনুভব মন্তপম’ অসি থোরকখ্রে। ‘অনুভব মন্তপম’গী মশক্তা মহাক্না লোক সংসদ শেমগৎলম্বদা নত্তনা মদুবু চলাইবসু রৃহৌরম্মি। অমসুং ভগবান বসৱেশ্বরজীনা হায়বীরম্মি মদুদি য়ী অনুভবা মন্তপ জন সভা, নাদিনা মত্থু রাস্ত্রধা উন্নতিগে হাগু, অভিবৃধদিগে পুরকাবগী কেলসা মাদুত্থাদে! হায়বদি অনভব মন্তপম অসি, নিংথৌ অমসুং লৈবাক্কী কান্ননবা অমসুং মখোয়গী চাউখৎনবগীদমক্তা পুন্না অমত্তা ওইনা থবক তৌমিন্নবদা পুক্নীং থৌগৎনবা জনসভা (মীয়ামগী মীফম) অমনি। অনভব মন্তপম, দিমোক্রেসীমক্কী শক্তম অমনি।

মরূপশা, মতম অদুদসু অমসুং হান্না হায়রগদি তমিলনাদুদা চেন্নৈদগী কিলোমীতর ৮০-৮৫ চৎলগা লৈবা উত্তরামেরুর কৌবা খুঙ্গংদা য়াম্না পুৱারী ওইরবা খুদম উবা ফংলি। খুঙ্গং অসিদা চোল সাম্রাজ্যগী মতমদা ১০শুবা চহি চাদা নুংদা তমিল লোন্দা ইরম্বা পঞ্চায়ৎকী থৌরাংগী ৱারোল লৈরি। অমসুং মদুদা খুঙ্গং পুম্নমকপু কুদুম্বুদা করম্না কেতেগোরাইজ তৌই হায়বদু পল্লি, মদুবু ঐখোয়না হৌজিক ৱর্দ হায়না খঙনরিবসিনি। হায়রিবা কুদুম্বুশিং অদুদগী মীহুৎ অমমম মহাসভাদা থাই, অমসুং মদুম্না হৌজিকসু চৎথরি। খুঙ্গং অসিদা চহি লিশিং কয়াগী মমাংদা মীফম পাংথোকখিবা অদুগুম্না ঙসিসু পাংথোক্লি।

মরূপশা, চহি লিশিং অমগগী মমাংদা শেম্লম্বা দিমোক্রেসীগী থৌরাং অসিদা ৱাফম অমা য়াম্না মরুওইরি। নুং অদুদা ইরিবা ৱারোল অদুদা পল্লি অমসুং মদুদা হায়রি মদুদি মীয়ামগী মীহুৎ অদু মীখল থেংননবগীদমক্তা লাইথুং পক্তে হায়না লাওথোকপগী থৌরাংসু লৈরম্মি মতম অদুদা, অমসুং কাংলোন্দি করিনো কাংলোন্দি মীহুৎ অদুনা মাগী লন-থুমগী মরমদা ফোংদোক্ত্রবদি, মহাক মশামক অমসুং মহাক্কী নক্নবা মরী-মতা অমত্তনা মীখল থেংনবা য়ারোই। চহি কয়াগী মমাংদনো খনবীয়ু, কয়াদা কুপ্না মতম অদুদা হিরম খুদিংমক খনখি, ৱাখল তাখি, ঐখোয়গী দিমোক্রেসীগী চৎনবীদা শরুক অমা ওইহনখি।

মরূপশা, দিমোক্রেসীগী ঐখোয়গী পুৱারী অসি লৈবাক্কী মফম খুদিংমক্তা উবা ফংই, কাচিন কোয়া খুদিংদা উবা ফংই। ৱাহৈ খরদি ঐখোয়না য়াম্না মুন্না খঙই – সভা, সমিতি, গনপতি, গনাধিপতি মসিগী ৱাহৈশিং অসি ঐখোয়গী কোক্তা মমাংঙৈদগী হৌনা তারক্লি। মমাংঙৈদগী হৌনা শাক্যা, মল্লম অমসুং বেজ্জী অসিনচিংবা গনতন্ত্র ওইরো, লিচ্ছবী, মল্লক মরক অমসুং কম্বোজ অসিনচিংবা গনরাজ্যবু ওইরো নত্ত্রগা মৌর্য়গী মতমদা কলিঙ্গ পুম্নমক্না দিমোক্রেসীমকপু লৈঙাক্কী য়ুম্ফম ওইনা শিজিন্নরম্মি। চহি লিশিং কয়াগী মমাংদা ইরম্বা ঐখোয়গী বেদশিংদগী ঋগবেদদা দিমোক্রেসীগী ৱাখল্লোন, অপুনবা লৌশিং হায়বদি অপুনবগা পাঙ্গল, কলেক্তিব কন্সিঅসনেস ওইনা উবা ফংলি।

মরূপশা, অনম্বনা অতোপ্পা মফমশিংদা দিমোক্রেসীগী ৱারী-ৱাতাই তৌনৈ মীখলগী থৌওংশিং, লৈঙাক্কী মতাংদা ৱারী শানৈ। অসিগুম্বা মখলগী থৌওংদা হেন্না শাফু পীবা অসিমকপু মফম খরদা দিমোক্রেসী হায়না কৌনৈ। অদুবু ভারত্তা দিমোক্রেসী অসি লাইনীং লিৎ অমনি। ভারতকী দিমোক্রেসী পুন্সিগী মগুন অদুনি, পুন্সিগী খোংচৎনি, লৈবাক্কী থৱাইনি। ভারতকী দিমোক্রেসী, মতম কয়াগী খঙলু-উরুবশিং অদুদগী পোক্লকপা থৌরাংনি। ভারতকী দিমোক্রেসীদা, পুন্সিগী লাইৱাসু য়াওই, পুন্সিগী মশকসু য়াওই অমসুং লোইননা থৌরাংগী লাইৱাসু য়াওই। মতমগী মতুং ইন্না মসিদা থৌরাংশিং হোংদোকই অদুবু থৱাইদি দিমোক্রেসী অদুম্মক ওই। অমসুং অৱাবদি, ঙসি ভারতকী দিমোক্রেসী অসি ঐখোয়দা নোংচুপ লৈবাকশিংদগী তম্বীরি। ঐখোয়না থাজবগা লোইননা ঐখোয়গী দিমোক্রেসীগী পুৱারীগী মগুন শক-শোল্লবদি, নুমিৎ অদু কুইদ্রবনি মালেম অসিনা হায়গদবা – ইন্দিয়া ইজ দ মাদর ওফ দিমোক্রেসী।

মরূপশা, ভারতকী দিমোক্রেসীদা য়াওরিবা পাঙ্গল অসিমক্না লৈবাক্কী চাউখৎ-থৌরাংবু অনৌবা থৌনা হাপ্লি, লৈবাকমচাশিংদা অনৌবা থাজবা পীরি। ভারত্তা দিমোক্রেসী অসি নুংতিগী অহোংবা পুরক্লি। ভারত্তা ঐখোয়না মীখল খুদিংগা লোইননা ভোতর তর্নআউৎ অসি হেনগৎলকপা উরি। মসিদসু নুপীশিং অমসুং নহাশিংনা শরুক য়াবা লেপ্তনা হেনগৎলক্লি।

ভারত্তা দিমোক্রেসী অসি, মতম পুম্নমক্তা গভর্নেন্সকা লোইননা ৱাখল্লোন খেন্নবা লোইশিন্নবগী পাম্বৈসু ওইরক্লি। তোঙানবা ৱাখল্লোন, তোঙানবা মিৎয়েং, মসিনা ভাইব্রেন্ত দিমোক্রেসী অমবু মপাঙ্গল কলহল্লি। খেন্নবশিং অসিগীদমক মতম পুম্নমক্তা মফম লৈবা অদুবু দিসকনেক্ত কৈদৌঙৈদসু তৌদবা, পান্দম অসিদা ঐখোয়গী দিমোক্রেসী মাংদা চখৎলি। পোলিসীশিংদা খেন্নবা য়াই, পোলিতিক্সতা মান্নদবা য়াই, অদুবু পব্লিক্কী সেবাগীদমক্তদি, অরোইবা পান্দম অসিদদি খেন্নবা লৈহল্লোইদবনি। মরৈ-মরাং সংসদকী মনুংদবু ওইরো মপান্দবু ওইরো, লৈবাক্কী শেবাগী ৱাশক, লৈবাক্কী কান্ননবগী মায়কৈদা কৎথোকপা লেপ্তনা উহনগদবনি। ঐখোয়না নীংশিংগদবনি মদুদি সংসদ ভবনগী শক্তমগী য়ুম্ফম ওইরিবা দিমোক্রেসী অসিগী মায়কৈদা থাজবা হেনগৎহনবা অসি ঐখোয় পুম্নমক্কী থৌদাংনি। ঐখোয়না মসি মতম পুম্নমক্তা নীংশিংগদবনি মদুদি সংসদতা য়ৌরক্লবা মীহুৎ খুদিংমক পাউখুম পীবা ঙম্বা ওইগদবনি। মসিগী পাউখুম পীবা ঙম্বা অসি মীয়ামদসুনি অমসুং সংবিধান্দসুনি। ঐখোয়গী ৱারেপ খুদিংমক লৈবাক্কীদমক হান্না হায়বসিদা মরুওইবা ওইগদবনি, ঐখোয়গী ৱারেপ খুদিংমক লৈবাক্কী কান্নবদা মরুওইবা ওইগদবনি। লৈবাক্কী ৱাশকশিং মপুং ফাহন্নবগীদমক্তা ঐখোয়না অমত্তা ওইনা পুন্না লেপমিন্নবা অসি য়াম্না মরু ওই।

মরূপশা, ঐখোয়গী অসিদা লাইশঙ শাবা মতমদা হৌরকপদা মদুগী য়ুম্ফম অদু চেক-নুং খক্তনা থোল্লি। আর্তিসিয়ন, ক্রাফমেন পুম্নমক্না হোৎনবদগী শঙ অদু শাবা মপুং ফাই, অদুবু শঙ অদুদা থৱাই হাপ্লবতদা লাইশঙ ওইরকই। থৱাই হাপ্ত্রিফাওবদি মদু শঙ অমখক ওইনা লৈ। 

মরূপশা, ২১শুবা চহি চা অসি ভারতকী চহি চা ওইহনবা, মসি মহাপুরুশশিং অমসুং অফাওবা নুপীশিংগী মঙলান ওইদুনা লাক্লি। মতম কুইনদগী মসিগী মতাংদা ঐখোয়না ঙাংনবা তারক্লি। ২১শুবা চহি চা অসি ভারতকী মীপুম খুদিংমক্না মখোয়গী ভারতপু খ্বাইদগী অথোইবা ওইহন্নবা মখোয়গী থৌদাং য়ারবতদা ভারতকী চহি চা ওইবা ঙমগনি। হোংলক্লিবা মালেম অসিদা ভারতকীদমক্তা তাঞ্জা হেনগৎলক্লি। খুদোংচাবগী ইহৌ লাক্লিবা অসিদা করিগুম্বদা খল্লকই। তাঞ্জা অসিবু ঐখোয়না ফিভম অমত্তদা, নান্থোকহল্লোইদবনি। হৌখিবা চহি-চাদা খঙলু-উরুবশিং অদুনা ঐখোয়দা য়াম্না তম্বীরে। অদুগুম্বশিং অদুনা ঐখোয়দা হন্না হন্না নীংশিংহল্লি মদুদি হৌজিক ঐখোয় মতম মাংহল্লরোই, মসম অসি শিজিন্নরগনি।

মরুপশা, য়াম্না লিরবা অমসুং মরুওইবা ৱাফম অমা ঐ পঞ্জগে। কুমজা ১৮৯৭দা স্বামী বিবেকানন্দজীনা লৈবাক্কী মীয়াম মাংদা, মথংগী চহি ৫০গীদমক্তা খঙহনখি। অমসুং স্বামীজীনা হায়কি মদুদি লাক্কদৌরিবা চহি ৫০ ফাওবা ভারত ইমাবু নীংজবা অসিনা মরুওইবা ওইহনগদবনি। লৈবাক মীয়ামগীদমক্তা মহাক্কী থবক অসিখক্তনি মদুদি ভারত ইমাবু নীংজবা। অমসুং ঐখোয়না উরি মহাপুরুশ অসিগী ৱাহৈগী পাঙ্গল, মদুগী হেক চহি ৫০গী মতুংদা, ১৮৪৭দা ভারতকী নীং তম্বা ফংখি। ঙসি পর্লিয়মেন্তকী অনৌবা হাউসকী উরেপ-উয়ুং তম্বা অসিদা, লৈবাক অসিনা অনৌবা ৱাশক অমগীসু উরেপ-উয়ুং তমগদবনি।

মরূপশা, স্বামী বিবেকানন্দজীনদি চহি ৫০গী ৱাফম পল্লম্বনি। ঐখোয়গী মাংদা চহি ২৫-২৬কী মতুংদা লাক্কদৌরিবা ভারতকী ১০০শুবা নীং খা তম্বগী কুমওন তারি। লৈবাক অসিনা ২০৪৭তা মসিগী নীং খা তম্বগী ১০০শুবা চহিদা খোং থাংজিল্লকপদা, ঐখোয়গী লৈবাক অসি করম্না ওইবা, ঐখোয়না লৈবাক অসিবু কদাই ফাওবা পুগনি, মসিগী চহি ২৫-২৬ অসি করম্না হৌহনখিনি, মসিগীদমক্তা ঐখোয়না ঙসি ৱাশক লৌদুনা থবক হৌগদবনি। ঙসি ঐখোয়না ৱাশক লৌদুনা লৈবাক্কী কান্নবদা মরুওইবা লৌদুনা থবক তৌরগদি লৈবাক্কী ওইরিবা ফিভম অসিদা নত্তনা লৈবাক্কী তুংলমচৎসু হেন্না ফবা ওইগনি। আত্মনির্ভর ভারত শেমগৎপা, ৱাৎত-পাদবা ভারত শেমগৎপা, হৌজিক লেপ্লরোই, কনা অমত্তনসু লেপহনবা ঙম্লোই।

মরূপশা, ঐখোয় ভারতকী মীয়াম্না, ৱাশক অসি লৌরসি – ঐখোয়গীদমক্তা লৈবাক অসিগী সংবিধানগী ইকাই খুম্নবা অমসুং মসিগী অনীংবা-অপাম্বশিং মপুং ফাহনবা অসি পুন্সিগী খ্বাইদগী চাউবা পান্দম ওইগনি। ঐখোয় ভারতকী মীয়াম্না, ৱাশক অসি লৌরসি – ঐখোয়গীদমক্তা লৈবাক্কী কান্নবা অসিদগী হেন্না অচৌবা কান্নবা অমমুক লৈরোই। ঐখোয় ভারতকী মীয়াম্না, ৱাশক অসি লৌরসি – ঐখোয়গীদমক্তা লৈবাক্কী ৱাখলনা, ঐখোয়গী ইশাগী ৱাখলদগী হেন্না লুম্মি। ঐখোয় ভারতকী মীয়াম্না, ৱাশক অসি লৌরসি – ঐখোয়গীদমক্তা লৈবাক্কী অপুনবা, মখল-মখাদগী হেনবা অতৈ অমমুক লৈরোই। ঐখোয়না গুরু রবিন্দ্র নাথ তেগোরগী ৱাখল্লোন অসি নীংসিংগদবনি। অমসুং গুরুদেব রবিন্দ্রনাথ তেগোরগী ৱাখল্লোন অদু করিনো, গুরু দেবনা হায়বীরম্মি – একোতা উৎসাহো ধোরো, জাতিয়ো, উন্নোতি কোরো, ঘুশুক ভুবোনে শোবে ভারোতের জোয়! হায়বদি অপুনবগী থৌনা কাইহন্দনা থমগদবনি। মীপুম খুদিংমক্না চাউখৎনবা, মালেম অপুনবদা ভারতপু থাগৎনবা!

ঐনা থাজৈ মদুদি, ঐখোয়গী পর্লিয়মেন্তকী অনৌবা বিল্দিং অসিনা, ঐখোয় পুম্নমক্তা অনৌবা ফিদম অমা পুথোক্নবগী ইথিন পীনবীগনি। ঐখোয়গী দিমোক্রেসীগী ইন্সতিত্যুসনশিংগী থাজবা মতম পু্নমক্তা মপাঙ্গল কন্দুনা লৈরগনি। মসিগা লোইননা ঐগী ৱাহৈ লোইশিঞ্জরি। অমসুং ২০৪৭কী ৱাশক্কা লোইননা লৈবাক মচা পুম্নমক্না চৎপীনবা ফোংদোকচরি।

অদোম পুম্নমকপু হন্না হন্না থাগৎচরি!!

***



(Release ID: 1680045) Visitor Counter : 119