কেন্দ্রগী কেবিনেৎ সেক্রেতরী শ্রী রাজিব গৌবানা ঙসি নেস্নেল ক্রাইসিস মেনেজমেন্ত কম্মিতি (এন.সি.এম.সি.)গী মীফমদা ময়াই তাংবল লৌদুনা অন্ধ্র প্রদেশ, তামিল নাদু অমসুং পুদুচেরীগী চীফ সেক্রেতরীশিংগা লোইননা ভিদিও কনফরেন্সিংগী খুত্থাংদা থোরক্কদবা সাইক্লোনগী লৈরিবা ফীভমগী মতাংদা য়েংশিনখ্রে।

অন্ধ্র প্রদেশ, তামিল নাদু অমসুং পুদুচেরীগী চীফ সেক্রেতরীশিংনা এন.সি.এম.সি.দা মখোয়না শেম-শারিবগী মতাংদা খঙহনখি অমসুং ওথোরিতীশিংনা থোরকপা খুদিংমক থেংননবা মপুং ফানা শেম-শাদুনা লৈরে হায়না ফোঙদোকখি। মখোয়না এন.দি.আর.এফ. অমসুং অতোপ্পা এজেন্সীশিংগী লোইননা খুদোংথিবা মায়োক্ননবা খুৎশম্নদুনা হোৎন্নবা শেম শাদুনা লৈরে হায়নসু ফোঙদোকখি।

ইন্দিয়া মেতিওরোলোজিকেল দিপার্তমেন্তগী দি.জি.না হৌজিক লৈরিবা স্তেতস অসিগী প্রজেন্তেসন উৎখি অমসুং স্তেতস অসি মরী লৈনবা রাজ্য সরকারশিংদা খঙহনখ্রে হায়না ফোঙদোকখি। মহাক্না হায় থোরক্কদবা সাইক্লোন অসিনা অন্ধ্র প্রদেশ, তামিল নাদু অমসুং পুদুচেরীগী সমুদ্র মপালগী মফমশিংদা ২০২০গী নবেম্বর ২৪দগী ২৬ ফাওবগী মরক্তা শোকহল্লগনি হায়না ফোঙদোকখি।

কেবিনেৎ সেক্রেতরীনা হায়খি ঐখোয় পুম্নমক্না পুন্সি অমত্তা মাংদনবা অমসুং শোকহল্লবা মফমশিংদা মহৌশাগী ফীভমদা অথুবদা হঞ্জিনহন্নবা পান্দম থম্লি। মহাক্না হায় ঙামীশিংদা সমুদ্রদা ঙা ফাবা চত্তনবা য়াথংশিং থোক্তুনা অকনবা মওংদা ইমপ্লিমেন্ত তৌগদবনি। ‘কতচা’গী য়ুমশিংদা লৈরিবা মীওইশিং ফীভমগী মতুং ইন্না হোংদোক হোংজিন তৌগদবনি হায়না মহাক্না মখা তাখি।

গৃহ, পাৱর, তেলিকম্ম্যুনিকেসন, সিবিল এবিএসন, শিপ্পিং, হকশেল মন্ত্রালয়গী সেক্রেতরীশিং, রেলৱে বোর্দকী চিয়রমেন, এন.দি.এম.এ.গী মেম্বর সেক্রেতরী, এন.দি.আর.এফ.কী দি.জি. অমসুং ঙাকশেল মন্ত্রালয়গী মীহুৎশিংনা এন.সি.এম.সি.দা মরী লৈনবা রাজ্যশিংগী শিল-লাংলিবশিং অমসুং তেংবাংশিংগী মতাংদা এন.সি.এম.সি.দা খঙহনখি।

***********