প্রধান মন্ত্রী শ্রী নরেন্দ্র মোদীনা ঙসি নই দিল্লীগী জে.এন.য়ু. কেম্পস্তা, ভিদিও কনফরেন্সকী থোংদা স্বামী বিবেকানন্দগী মীতম মায়খুম হাংদোকখ্রে।

জে.এন.য়ু.গী মহৈরোইশিং অমসুং লৈবাক অসিগী নহারোলদা ৱা ঙাংলদুনা প্রধান মন্ত্রীনা ৱাখল্লোনবু লৈবাক্কী কান্নবদগী হেন্না ৱাংনা থম্বগী অমাংবশিংগী মতাংদা মহাক্কী মিৎয়েং ফোংদোকখ্রে। মহাক্না হায়খি মদুদি অসিগুম্বা অমখক্না লৈবাক অসিগী দিমোক্রেসীগী সিস্তেম অসি অমাংবা থোকহল্লি। মহাক্না হায়খি, “ঐগী ৱাখল্লোন্না মসি হায়রি, মরম অসিনা লৈবাক্কী কান্নবগী মতাংদসু ঐনা ৱাখল্লোন অসিদা খনগনি, মসিগী অকোইবগী মনুং অসিদা থবক তৌগনি হায়বসি, অরানবনি।” মহাক্না হায়খি মদুদি পুম্নমক্না মশাগী ৱাখল্লোন্দা চাউথোকচরি। মসি মশানসু তাবনি। অদুম ওইনমক, ঐখোয়গী ৱাখল্লোন অদু লৈবাক্কী কান্নবগী মতাংদা, লৈবাক অসিগা লোইননা উগদবনি, লৈবাক অসিগী মায়োক্তা নত্তে।

প্রধান মন্ত্রীনা মহৈরোইশিংদা হায়খি মদুদি  লৈবাক অসিগী পুৱারীদা, লৈবাক অসিদা অৱাবা মতম হেক হেক লাকপা মতমদা, ৱাখল্লোন খুদিংমক, ৱাখল্লোন খুদিংমক্কী মীয়াম্না লৈবাক্কী কান্ননবগীদমক অমত্তা ওইনা পুনশিল্লি। নীং তম্বগী লানফমদা মহাত্মা গান্ধীগী লুচিং মখাদা ৱাখল্লোন খুদিংমক্কী মীয়াম্না অমত্তা ওইনা লাকখি। মখোয়না লৈবাক্কীদমক্তা অমত্তা ওইনা লান্থেংনখি। ইমর্জেন্সীগী মতমদসু লৈবাক অসিনা অসিগুম্বা অমত্তা ওইবা অসি উখি।

ইমর্জেন্সীগী মায়োক্তা অদুগুম্বা আন্দোলন অদুদা কংগ্রেসকী হান্নগী লুচিংবশিং অমসুং থৌমীশিংসু য়াওখি। আর.এস.এস.কী স্বয়ংসেবক অমসুং জন সংঘগী মীওইসু য়াওখি। সমাজৱাদীগী মীওইসু য়াওখি। কম্যুনিস্তসু য়াওখি।

প্রধান মন্ত্রী মোদীনা হায়খি মদুদি অমত্তা ওইবা অসিদা, লানফম অসিদসু কনা অমত্তনা মখোয়গী ৱাখল্লোনগা য়াশিন্নবা অমত্তা তৌখিদে। পান্দম অদু অমত্তা ওইখি - লৈবাক্কী কান্নবা। মরম অসিনা মরূপশা, লৈবাক অসিগী অপুনবা অমত্তা ওইবগী ৱাফম লাকপদা অদোমগী ৱাখল্লোনগী পোৎলুম মখাদা লৈদুনা ৱারেপ লৌরবদি, লৈবাক্কী অমাংবতমক ওই।

প্রধান মন্ত্রীনা ময়েক শেংনা ফোংদোকখি মদুদি আইদিয়া শিয়রিং তৌবা, অনৌবা ৱাখল্লোনগী ইচেল অসুম্মক শন্দোকহনগদবনি। ঐখোয়গী লৈবাক অসি তোঙান তোঙানবা খঙ-হৈরবা ৱাখল্লোন কয়াগী অনৌবা ময়োন চোংদুনতা লৈবা লমদম্নি অমসুং মপালসু শাৎলি। চৎনবী অসিবু মপাঙ্গল কলহনবা অসি নহাশিংগী মথৌ তাবনি। চৎনবী অসিগী মরমদগী ভারত মালেমগী খ্বাইদগী চাউবা ভাইব্রেন্ত দিমোক্রেসী ওইরিবনি।

প্রধান মন্ত্রীনা মহাক্কী সরকারগী রিফোর্ম এজেন্দাগী ফ্রেমৱার্ক মহৈরোইশিংগী মাংদা থমখি। মহাক্না হায়খি মদুদি আত্মনির্ভর ভারতকী ৱাখল অসি ১৩০দগী হেনবা ভারত মচাশিংগী কল্লেক্তিব কন্সিয়সনেসকী, ঐখোয়গী এস্পিরেসন্সগী শরুক অমা ওইখ্রে। ভারত্তা পায়খৎলিবা রিফোর্মশিংগী মতাংদা মখা তারদুনা, প্রধান মন্ত্রীনা জে.এন.য়ু.গী মহৈরোইশিংদা গুদ রিফোর্মশিংবু বেদ পোলিতিক্স ওইনা লৌনরম্বদগী গুদ রিফোর্মশিং করম্না গুদ পোলিতিক্স ওইরখিবগে হায়বদু থিদোক্নবা খঙহনখি। মহাক্না হায়খি, ঙসি রিফোর্মশিংগী মরুমদা ভারত অসি হেন্না ফহন্নবা ৱারেপ অমা য়াওরি। মহাক্না মসিসু পনখি মদুদি ঙসি তৌরিবা রিফোর্মশিংগা লোইননা পান্দম অমসুং পুকচেল অদু তরু তরুবনি। ঙসি রিফোর্ম তৌরিবশিং অসি, মসিগী মমাংদা ঙাক-শেলগী চুঙ্গোয় অমা হান্ননা শেম্লি। চুঙ্গোয় অসিগী খ্বাইদগী চাউবা য়ুম্ফমদি থাজবনি।

প্রধান মন্ত্রীনা হায়খি মদুদি মতম কুইনদগী লাইরবা অসি শুপ্নগী স্লোগান খক্তদা হাপ্পা ওইখিদে। অদুবু লৈবাক অসিগী লাইরববু কৈদৌনুংদসু সিস্তেমগা পুনশিন্ননবা খক হোৎনখিদে। মহাক্না হায়খি মদুদি খ্বাইদগী য়াম্না নেগলেক্ত তৌখিবা অদু, লাইরবশিংনি। খ্বাইদগী য়াম্না অনকনেক্তেদ অদু, লাইরবশিংনি। খ্বাইদগী য়াম্না ফাইনান্সিএল এক্সক্লুদেদ অদু, লাইরবশিংনি। মহাক্না হায়খি, হৌজিক লাইরবশিংগী পক্কাগী য়ুম, তোয়লেৎ, ইলেক্ত্রিক, গ্যাস, থক্নবা অফবা ঈশিং, দিজিতেল বেংকিং, অহোংবা মোবাইল কনেক্তিবিতী অমসুং খোংজেল য়াংবা ইন্তর্নেত কনেক্সনগী খুদোংচাবা ফংলি। মখোয়সি লাইরবগী অকোইবদা য়ুংলিবা ঙাক-শেলগী চুঙ্গোই অদুনি, মদু মখোয়গী অনীংবা-অপাম্বা অদুনা মনীং তম্না পাইজনবগীদমক মথৌ তাই।

প্রধান মন্ত্রী অপাম্বা ফোংদোক্তুনা হায়খি মদুদি জে.এন.য়ু.গী কেম্পস্তা স্বামী বিবেকানন্দগী মীতম অসিনা পুম্নমক্তা ইথিল পীবীবা ওইরসনু। স্বামী বিবেকানন্দনসু পুম্নমক অমত্তা ওইনা উবা পামখি। মহাক্না হায়খি মদুদি মীতম অসিনা ঐখোয়দা লৈবাক অসিগী মায়কৈদা মপুং ফানা কৎথোকপগী ৱাখল্লোন তম্বীগনি, লৈবাক অসিগীদমক্তা করিগুম্বা মখলগী ৱাফম অমত্তা থমদনা নুংশিবগী ৱাখল্লোন পোকহনগনি অমসুং মসি স্বামীজীগী পুন্সিগী খ্বাইদগী অথোইবা পাউজেলনি। মহাক্না থাজবা থমখি মদুদি মীতম অসিনা পুম্নমক্কী পুক্নীংদা লৈবাক্কী ওইবা ৱাখল্লোন পোকহনগনি অমসুং লৈবাক অসিবু নহানা লুচিংবা চাউখৎ-থৌরাংগী মায়কৈদা পুগনি। স্বামীজীনা লৈবাক অসিদগী থাজবা অসিমক থমখি। মহাক্না ফোংদোকখি মদুদি মীতম অসিনা পুম্নমকপু স্বামীজীগী অচেৎপা অমসুং চাউখৎপা ভারত অমা শেমগৎপগী মঙলান অদু মপুং ফাহন্নবগীদমক ইথিন পীনবীদুনা লৈরগনি। 

***