জয় জগন্নাথ !

ওরিশাগী মুখ্যমন্ত্রী, ঐগী অহল ওইরবা মরূপ শ্রীমান নবীন পতনায়কজী, কেন্দ্রগী মন্ত্রীমন্দলগী ঐগী খোঙলোই রবিশঙ্কর প্রসাদজী, ওরিশা লমদম অসিমক্কী মপারী অমসুং মন্ত্রী মন্দলদা ঐগী খোঙলোই শ্রীমান ধর্মেন্দ্রজী, ইনকম তেক্স এপিলেৎ ত্রিব্যুনেলগী প্রসিদেন্ত ওনরেবল জস্তিস পি.পি. ভত্তজী, ওরিশাগী এম.পি.শিং, এম.এল.এ.শিং, থৌরম অসিদা লেংবীরক্লিবা অতৈ শক্নাইরবশিং অমসুং মরূপশিং,

ভগবান জগন্নাথকী থৌজালগা লোইননা ইনকম তেক্স এপিলেৎ ত্রিব্যুনেল হায়বদি আই.তি.এ.তি.গী কতক বেঞ্চ অসি ঙসি অনৌবা শঙ্গাইদা হোংজিল্লগনি। মতম কুইনা ভারাগী বিল্দিংদা থবক তৌরম্লবা মতুংদা, ইশাগী য়ুমদা চংবা কয়াম্না নুংঙাইবগে হায়বা অদু অদোম পুম্নমক্কী ফুদোংলবা মাইথোং উবদা ঐনা খঙজবা ঙম্মি। নুংঙাইরবা মিৎকুপ অসিদা অদোমগা লোইনদুনা, ঐনা আই.তি. এপিলেৎ ত্রিব্যুনেলগী ওফিসর পুম্নমক – শিন্মী খুদিংমক্তা হন্না হন্না নুংঙাইবা ফোংদোকচরি, য়াইফ-মঙ্গল পীজরি। কত্তক্কী বেঞ্চ অসিনা হৌজিক ওরিশা খক্তা নত্তনা, নোংপোক অমসুং অৱাং ভারতকী তেক্স থিরিবা লাখ কয়াদা খুদোংচাবা পীরগনি। অনৌবা খুদোংচাবশিংগী মতুংদা বেঞ্চ অসিনা কোলকতা জোনগী অনিশুবা বেঞ্চকীসু পেন্দিং অপীলশিং লোইশিনবা ঙমলগনি। মরম অসিনা অনৌবা শঙ্গাই অসিদগী খুদোংচাবা ফংগদৌরিবা, খোংজেল য়াংনা হিয়রিংগী লম্বী ফংগদৌরিবা অদুগুম্বা তেক্স থিরিবা পুম্নমকপুসু হন্না হন্না নুংঙাইবা ফোংদোকচরি।

মরূপশা,

ঙসিগী নুমিৎ অসি শেংলবা থৱাই অমগীসু নীংশিংজবা নুমিৎনি, মহাক্না হোৎনবীখিবশিং য়াওদনা আই.তি. এপিলেৎ ত্রিব্যুনেল কতক বেঞ্চ অসি ওইথোক্লম্লোই। ওরিশাগীদমক্তা, ওরিশাগী মীয়ামগী সেবাগীদমক্তা কৎথোকপীখিবা, বীজু পতনায়কজী, বীজু বাবুগী মফমদসু ঐনা শ্রদ্ধাঞ্জলি কৎচরি।

মরূপশা,

ইনকম তেক্স এপিলেৎ ত্রিব্যুনেলগী ফাওরবা পুৱারী অমা লৈজৈ। ঐনা লৈরিবা তীম অসিদা নুংঙাইবা ফোংদোকচরি, মখোয়না লৈবাক শিনবা থুংবদা অনৌবা ইনফ্রাস্ত্রকচর শেম শানবা মতম পুম্নমক্তা হোৎনবীরি। ঐঙোন্দা তম্বীখি মদুদি কতক্তগী হান্না বেঙ্গলুরু অমসুং জয়পুরদা হান্ননা অদোমগী ইশাগী কম্প্লেক্স শেম শাখ্রে। অদুগা অতোপ্পা শহরশিংদসু অনৌবা কম্প্লেক্স শানবা নত্ত্রগা অরিবশিংবু নৌথোকহন্নবগী থবক অদোম্না খোংজেল য়াংনা পায়খৎলি।

মরূপশা,

ঙসি ঐখোয় তোক্নোলোজীগী অদুগুম্বা খোংজেল অমদা চেন্থরিবা অসিদা, সিস্তেম অপুনবা অপগ্রেদেশন তৌবা অসি তশেংনা মরু ওই। মরুওইনা ঐখোয়গী জুদিসিয়রীদা অনৌবা, তেকোনোলোজী অদুক্কী মতিক য়াম্না শিজিন্নবনা লৈবাক অসিগী মীয়ামদা অনৌবা খুদোংচাবা পীবা হৌরবনি। মিচং মীখাই নাইদবা অচুম্বা ৱায়েলগী অদুগুম্লবা ফিদম অদুবু পুদুনা অদোম্না চৎপীরিবা অদু, অনৌবা খুদোংচাবশিং অমসুং তেক্নিকেলগী পাম্বৈশিংনা অমুক্কা হেন্না চেৎশিলহনবা ঙমগনি। মসি পেন্দীংগী ৱাফম্নি মদুদি আই.তি. অপিলেৎ ত্রিব্যুনেল অসি লৈবাক অপুনবগী মশাগী বেঞ্চশিংবু ভর্চুএল হিয়রিংগীদমক্তসু অপগ্রেদসু তৌরি অমসুং হৌজিক শ্রীমান পি.পি. ভত্তনা হায়বীখিবগুম্লদনা অসুক য়াম্লবা থবক অসি, কোরোনাগী মতম অসিদসু পাংথোক্লি, ভর্চুএল তৌরি অমসুং রবিশঙ্করজীনদি লৈবাক অপুনবগী পাউদম অমবু পীবীরি।

মরূপশা,

মীনাই ওইরিঙৈগী শাংলবা মতম্না, তেক্স থিবা অমসুং তেক্স লৌবা, অনিগী মরী অসি তুহৎপীরবা অমদি তুহৎলিবা ওইহনখি। লাইবক থিবদি নীং তম্লবা মতুংদা ঐখোয়গী তেক্সকী লৈরিবা থৌওং অসিগী মশক হোংদোক্নবা তৌফম থোকপশিং অদু, তৌবীখিদে। অদুম ওইনমক ভারত্তা মমাংঙৈদগী তেক্সগী মগুন অমসুং পীথোক-পীশিনগী মতাংদা য়াম্না অচেৎপা চৎনবী অমা লৈরক্লি। গোস্বামী তুলসীদাসনা হায়বীরমই -

বরসত হরসত সব লখেং, করসত লখে ন কোয়

তুলসী প্রজা সুভাগসে, ভুপ ভানু সো হোয়’

মসিগী ৱাহন্তোক্তি নোং চুরবদি, মসিগী কান্নবা ঐখোয় পুম্নমক্না উবা ফংই। অদুবু মদু নোংদুম ওনখিবদা, নুমিৎনা ঈশিং অদু চুপশিনখিবদা, মদুনা কনাবুসু অৱাবা পীদে। মতৌ অসুম্না লৈঙাক অসিসু ওইগদবনি। মীচমদগী তেক্স লৌরবদি কনাসু ৱাহল্লোইদবনি, অদুবু লৈবাক্কী পৈসা অদুমক মীয়ামদা য়ৌহল্লবদি, মীয়ামদা মদু শিজিন্নবগী মতৌ অদু মখোয়গী পুন্সিদা ফাওহনগদবনি। হৌখিবা চহি কয়াদগী সরকারনা মিৎয়েং অসিবু পুদুনা মাংদা চখৎলি।

মরূপশা,

ঙসিগী তেক্সপেয়র অসি তেক্সকী থৌরাং অপুনবদা চাউনা অহোংবা অমদি নুং-পান উবা ফংলে। মহাক্না রিফন্দগীদমক্তা থা কয়া ঙাইনদ্রবা, চয়োল খরগী মনুংদা মহাক্না রিফন্দ ফংলবা, মহাক্না নুং-পান উবগী ৱাখল ফাওরকই। দিপার্তমেন্ত মশানা অরিবা চয়েৎনবা অদু লোইশিনখিবা উবদা, নুং-পান উবগী ৱাখল ফাওরকই। মহাক্না ফেসলেস অপীলগী খুদোংচাবা ফংবদা, তেক্স ত্রান্সপরেন্সী হেন্না ফাওরকই। মহাক্না ইনকম তেক্স হন্থরকপা উরবা, মহাক্না তেক্স ত্রান্সপরেন্সীগী ৱাখল ফাওরকই।

হান্নগী সরকারগী মতমদা তেক্স তেরোরিজমগী ৱাকৎ লাক্লম্মি। ঙসি লৈবাক অসিনা মদুবু তুংওইনরমদুনা তেক্স ত্রান্সপরেন্সীগী মায়কৈদা চংশিল্লি। তেক্স তেরোরিজমদগী তেক্স ত্রান্সপরেন্সীগী অহোংবা অসি মরম অসিদগী লাকপনি মদুদি ঐখোয়না রিফোর্ম, পর্ফোর্ম অমসুং ত্রান্সফোর্মগী এপ্রোচকা লোইননা মাংদা চখৎলি। 

ঐখোয় রুল্সতা, প্রোসিদ্যুর্সতা রিফোর্ম তৌরি অমসুং মসিদা তেক্নোলোজীগী মপুং ফানা মতেং ফংলি।  ঐখোয় পর্ফোর্ম তৌরি পুচেল শেংনা, ৱাখল তরুনা। অমসুং মসিগা লোইননা ঐখোয় তেক্স এদমিনিস্ত্রেসনগী মাইন্দসেৎসু ত্রান্সফোর্ম তৌরি। 

মরূপশা,

ঙসি লৈবাক অসিদা, লুপা লাখ ৫ ফাওবগী ইনকমদা, তেক্স জিরো ওইরে। মসিগী য়াম্না চাউনা কান্নবা ময়াই থংবা থাক্তা লৈবা ঐখোয়গী ঙসিগী নহারোলশিং অসিনা ফংলি। চহি অসিগী বজেত্তা ইনকম তেক্সকী অনৌবা ওপ্সন পীরিবা অসি অমুক্কা হেন্না লায়থোকহল্লে অমসুং তেক্স থিবশিংবু মথৌ তাদবা তেন্সন অমসুং চাদিংদগী কল্লে। মতৌ অসুম্না চাউখৎপগী খোংজেল য়াংশিলহন্নবগীদমক, ভারতপু অমুক্কা হেন্না ইভেস্তমেন্ত ফ্রেন্দলী ওইহন্নবগীদমক কোর্পোরেৎ তেক্সতা পুৱারী ওইনা ককথবসু তৌরে। লৈবাক অসিমক্তদা নহা লাখ কয়াবু থবক পীগদবা লৈরিবা কম্পনীশিংগীদমক্তা কোর্পোরেৎ তেক্স ককথখ্রে। লৈবাক অসিনা মেন্যুফেকচরিংদা আত্মনির্ভর ওইনবগীদমক্তা, অনৌবা দোমেস্তিক মেন্যুফেকচরিং কম্পনীশিংগীদমক্তা তেক্স রেৎ চাদা ১৫ ওইরে। ভারতকী ইক্বুইতী মার্কেত্তা ইনভেস্ত তৌবা হেনগৎহন্নবা দিবাইদেন্দ দিস্ত্রিব্যুসন তেক্সসু লৌথোকখ্রে। জি.এস.তি.দগীসু তেক্সকী লাং ময়াম অমা ওইরম্বদুসু হন্থহনখ্রে অমসুং অনম্বনা পোৎলমশিং অমসুং সর্বিসশিংদা তেক্সকী চাংসু য়াম্না হন্থহল্লে।  

মরূপশা,

ঙসিদগী চহি ৫-৬কী মমাংদা করিগুম্বা ইনকম তেক্স কমিস্নরনা তেক্স থিবশিংদা লুপা লাখ ৩ ফাওবগী রিলিফ পীরবদি, মদু আই.তি.এ.তি.দা চেলেঞ্জ তৌরম্বগী ফিভম অমা লৈরম্মি। লিমিৎ অসিবু ঐখোয়গী সরকারনা লাখ ৩দগী হেনগৎতুনা হৌজিক লাখ ৫০ ওইহনখ্রে। মতৌ অসুম্না সুপ্রীম কোর্ত্তা কেস অদু চৎপা তারবদি মদু য়ামদ্রবদা লুপা করোর ২গী অপীলগী মতাংদা ওইগদবনি। অসিগুম্বা হোৎনবশিং অসিদগী ইজ ওফ দোইং বিজিনেস হেনগৎহল্লি, ইন্সতিত্যুৎ কয়া মরুমদা চয়েৎনবা কেসশিংগী পোৎলুমসু হন্থহল্লি।

মরূপশা,

তেক্সতা হন্থবা অমসুং থৌওংশিংদা লাইথোকহনবগা লোইননা খ্বাইদগী চাউনা শেমদোকখিবা অসি পুকচেল শেংবা তেক্সপেয়রগী মতাংদনি, মখোয়গী অৱাবশিং কোকহনবগা মরী লৈনননি। ঙসি ভারত অসি তেক্সপেয়রশিংগী হক অমসুং থৌদাং অনিমকপু কোদিফাই তৌরিবা অদুগুম্বা অখন্নবা লৈবাকশিংগী মনুংদা অমা ওইরে, মসিদা আইনগী অয়াবা পীরে। তেক্সপেয়র অমসুং তেক্স কলেক্ত তৌরিবগী মরক্তা থাজবা লৈহন্নবা, নুং-পান উহন্নবা, মসি য়াম্না চাউবা খোংথাংনি। মশাগী হোৎনবা, মশাগী হুমাং মমলনা, লৈবাক অসিগী চাউখৎনবা হোৎনরিবা, ইরৈবাকচা কয়াদা থবক পীরিবা, মখোয় অদু মতম পুম্নমক্তা ইকাই খুম্নবা মতিক চারবনি অমসুং ঐনা ওগ্স্ত তরামঙাদা লাল কিলাদগীসু য়াম্না নোল্লুক্না অমদি ইকাই খুম্নজবগা লোইননা ৱাফম অসি পনজখি মদুদি, লৈবাক অসিগী ৱেল্থ ক্রিয়েতরগী অৱাবা হন্থরবা, মহাক শোইদ-ঙামদবা ওইরবা, লৈবাক অসিগী থৌরাংদা মহাক্কী থাজবা হেনগৎলকই। হেনগৎলক্লিবা থাজবা অসিগী মরম্ননি হৌজিক খোংলোই ময়াম অমনা লৈবাক অসিগী থাজবগীদমক্তা তেক্সকী থৌরাংগা লোইননবা মাংদা থোরক্লিবা। সরকারনা মতৌ করম্না তেক্সপেয়রশিংদা থাজবা থমদুনা চৎলিবগে হায়বসিগী খুদম অমগা ঐ ঙসি অদোমদা পীজগে।

মরূপশা,

মমাংদদি লৈবাক অসিদা মীয়াম অমসুং ললোন ইতিক তৌবশিংনা রিতর্ন ফাইল তৌবা মতমদা মখোয়শিংদুগী মনুংদা অয়াম্বনা ইনকম তেক্স দিপার্তমেন্তকী স্ক্রুতনী মায়োক্নবা তারম্মি। অদুবু হৌজিক্তি মদুম্না তৌদ্রে। হৌজিক সরকারগী ৱাখল্লোন্দি ইনকম তেক্স রিতর্ন ফাইল তৌরিবা অসিদা, মপুং ফানা হান্না থাজবা থমখো অসিনি। মসিগী মরম্ননি ঙসি লৈবাক অসিদা তৌরিবা রিতর্ন ফাইলশিং অসিদা, চাদা 99.75 অয়েৎপা অমত্তা য়াওদনা লৌশিল্লি। শুপ্নগী কেস চাদা ০.২৫ খক্তমক্তা স্ক্রুতনী তৌরি। মসি লৈবাক অসিগী তেক্স সিস্তেমদা লাক্লিবা য়াম্না চাউবা অহোংবনি।

মরূপশা,

কোরোনাগী মতম অসিদসু ঐখোয় পুম্নমক্না খঙলে মদুদি ভিদিও কনফরেন্সিংগী খুত্থাংদসু থবক পুম্নমক অদুক্কী মতি নুং-পান উহন্দুনা অমসুং কান্নবা মওংদা পাংথোকপা য়াই। ঙসি অদোম পুম্নমক্কী বেঞ্চশিংদা অনৌবা খুদোংচাবশিং য়াওরবা শঙ্গাইশিং শাগৎলিবা অসিদা মসিগী রিফোর্মশিং অসি অদোমগীদমক্তদি অরুবা নত্তে। মসিদগী তেক্সপেয়রগী মতম, লন অমসুং ইনর্জী কনগনি। চয়েৎনবশিংগী পোৎলোইসু খোংজেল য়াংনা পুরকপা ঙমগনি।

মরূপশা,

অখঙ-অহৈশিংনা হায়বীরম্মি মদুদি - ন্যায়মুলং সুরাজ্যং স্যাৎ, সংঘমুলং মহাবলম॥

অচুম্বা ৱায়েল অসি অফবা লৈঙাক্কী মরুনি অমসুং ওর্গনাইজেসন্না সুপরপাৱরগী মরুনি। মরম অসিনা অচুম্বা ৱায়েল অমসুং ওর্গনাইজেসনগী পাঙ্গলবু আত্মনির্ভর ভারতকী থৌনা ওইহন্নবগীদমক্তা লেপ্তনা হোৎনরি। ভারত্তা রিফোর্মশিং মথং মথং পাংথোক্লি, রিফোর্মগী পরেং পাংথোক্লি, মসিগী মরুমদসু ইথিল অসি য়াওরি। ঐনা মপুং ফানা থাজৈ মদুদি ঐখোয় পুম্নমক্কী অপুনবা হোৎনবা অদুনা মায় পাকপা ঙমগনি। আই.তি. এপিলেৎ ত্রিব্যুনেলগা মরী লৈনরিবা মরূপ পুম্নমক্তা, ওরিশাগী মীয়াম পুম্নমক্তা অমুক্কা হন্না মসিগী অনৌবা শঙলেন অসিগীদমক্তা ঐনা হন্না হন্না নুংঙাইবা ফোংদোকচরি। অদোম পুম্নমক্কী মফমদা দীপাবলী য়াওনা লাক্কদৌরিবা কুম্মৈ পুম্নমক্কী য়াইফ-মঙ্গল পীজরি অমসুং ৱাফম অমা ঐনা হায়জরি মদুদি কোরোনা মতম অসিদা ঐখোয়না কোরোনা অসি লায়না লৌরোইদবনি। চেকশিন থৌরাং লৌখৎনবগীদমক্তা ৱাফম মচা মচাশিং মাস্ক উপ্পা, দিস্তেন্স থম্বা, সাপোন্না খুৎ-শা হাম্বা, ঐনা ওরিশাগী মীয়ামদা ৱাফম অসি হায়জরি মদুদি অমসুং ওরিশা অসি কলা-সংস্কৃতিগী য়াম্না চাউবা লমদম অমনি, লাইনীংগী মফম্নি। ঙসি ভোকেল ফোর লোকেলগী মন্ত্রনা নিল্লি, হিন্দুস্তানগী কাচিন কোয়া খুদিংদা, ঐগী ইরৈবাকচাশিংগী হুমাং য়াওরবা হিন্দুস্তানগী কাচিন খুদিংমক্কী পোৎ-চৈ, ঐখোয়না অদুগুম্বা পোৎশকশিং অদুদা মরুওইবা থমসি, লোকেল লৈবদা মরুওইনা লৌসি। হিন্দুস্তানগী লৈবাক লৈহাওদগী, হিন্দুস্তানগী হুমাংদগী শেমবা পোৎলমশিং লৈবদা মরুওইবা থমসি, ৱাফম অসি ঐ জগন্নাথজীগী লমদম অসিদগী ওরিশাদসু হায়জরি, ইরৈবাকচাশিংদসু হায়জরি ভোকেল ফোর লোকেল। লোকেলদা দিৱালী অমসুং দিৱালী খক্তা নত্তনা, ঐদি পাম্মি নুমিৎ ৩৬৫নি চুপ্পা দিৱালী পাংথোকপা অমসুং নুমিৎ ৩৬৫ লোকেল খক্তমক লৈবা। য়েংবীয়ু লৈবাক অসিগী শেন্মিৎলোন খোংজেল য়াংনা কাখৎলকপা হৌরক্কনি। ঐখোয়গী থবক কল্লবা মীয়ামগী হুমাংদা লৈবাক অসিবু অৱাংবা মতোন অদুদা পুখৎপা ঙম্বগী থৌনা লৈরি অমসুং থাজবা অসিগা লোইননা ঙসিগী অসিগুম্লবা য়াইফরবা তাঞ্জা অসিদা ঐগী মায়কৈদগী অদোম পুম্নমকপু হন্না হন্না য়াইফ-মঙ্গল পীজরি।  

হন্না হন্না থাগৎচরি!

*****