ভারতনা নাবা ফবগী চাং য়াম্না ৱাংখৎলকপা অমসুং এক্তিব কেসকী চাদা ওইবা চাং লেপ্তনা হন্থরকপগী ফিভম ওইরক্লি। মসিনা মরম ওইদুনা লায়না শন্দোকপা অসিগী দব্লিং রেৎ অসি য়াম্না ফগৎলক্লি। হৌজিক্তি মসি চাউরাক্না নুমিৎ ৭৩ (নুমিৎ ৭২.৮) ওইরে। মসিনা তাকপদি নোঙমদা লাকপা অনৌবা কেসকী মশিং হন্থরে অমসুং অপুনবা কেসকী শরুক অনি ওইরকপদা চঙগদবা মতম অসি য়াম্না য়ামখৎলে হায়বনি।

ওগস্ত ময়ায়দা দব্লিং রেৎ অসি নুমিৎ ২৫.৫ ওইরম্বা অদুদগী হৌজিক্না চাউরাক্না নুমিৎ ৭৩দা লৈদুনা য়াম্না ফগৎলে। মসিগী মহৈ অসি কেন্দ্র সরকারনা পীবা পাক-শনবা পাউতাকশিংবু রাজ্য/য়ু.তি.শিংনা নীংথিজনা ইনবা, লৈবাক শিনবা থুংবদা তেস্ত তৌবগী চাং হেনগৎপা, খুদক্তা সর্বেলিএন্স অমসুং ত্রেক্কিং তৌবা, অনাবশিংবু অথুবা মতমদা হোস্পিতালদা পুখৎপা অমসুং কেন্দ্র সরকারনা পীবা স্তেন্দর্দ ত্রীৎমেন্ত প্রোতোকোল ইনবগী থৌওংশিং পাঙথোকপদগীনি। মসিগী মহৈ অসি দাক্তরশিং, পেরামেদিক্স, ফ্রন্তলাইনগী থৌমীশিং অমসুং অতোপ্পা কোবিদ-১৯গী লান্মীশিংনা মশাগী ওইজবী থাদোক্তুনা থৱাই য়াওনা হোৎনবগী থৌওংশিংনসু তেংবাংবনি।

কোবিদকা চুনবা লিচৎ-শাজৎশিং ইনবগী মতাংদা লৈবাক শিনবা থুংনা খঙবা হেনগৎলক্লিবা অসিনসু লায়চৎ অসিবু শন্দোকপদা থিংবা ঙমহনবগা লোয়ননা মতম চানা লায়েংহনবদসু তেংবাংলি।

হৌখিবা পুং ২৪দা অনৌবা মীওই ৮১,৫১৪ নাবা ফখি। মসিগা লোয়ননা নাবা ফবগী অপুনবা মশিং অসি চাউরাক্না লাখ ৬৪ (৬৩,৮৩,৪৪১) য়ৌখ্রে। নোঙমদা নাবা ফবগী মশিং হেনগৎপা অসিসু ৮৭%গী চাংদগী হেন্দুনা ঙসিনা ৮৭.৩৬% য়ৌরবা লৈবাক্কী ওইবা নাবা ফবগী চাং হেনগৎলক্লিবা অসিদা উবা ফঙই।

অনৌবা নাবা ফবশিং অসিগী ৭৯%দি রাজ্য/য়ু.তি. ১০দগীনি। মহারাস্ত্রাদা নোঙমদা নাবা ফবা মীওই ১৯০০০ লাক্লি অমসুং করনাতকানা ৮০০০ ওইদুনা তুং ইল্লি।

হৌজিক্কী ওইনা অপুনবা পোজিতিব কেস মশিংগী ১১.১২% অসিনা এক্তিব কেসকী মশিং (৮,১২,৩৯০) ওইরি। মসিগী মশিং অসি চয়োল অমদগী লাখ ৯গী মখাদা লৈরক্লি।

হৌখিবা পুং ২৪দা লৈবাক অসিদা অনৌবা কনফর্ম ওইবা কেস ৬৭,৭০৮ লাকখি।

অনৌবা কেসশিং অসিদগী ৭৭%তি রাজ্য/য়ু.তি. ১০দগীনি। মহারাস্ত্রানা কেস ১০০০০ হেন্দুনা খ্বাইদগী মকোক্তা লৈরি অমসুং করনাতকানা ৯০০০ হেন্না লৈদুনা তুং ইন্নরি।

হৌখিবা পুং ২৪দা মীওই ৬৮০ লৈখিদবগী পাউ লাকখি। নুমিৎ ১২নিদগী মশিগী মশিং অসি ১০০০গী মখাদা লৈরক্লি।

মসিগী মনুংদগী চাউরাক্না ৮০%দি রাজ্য/য়ু.তি. ১০দগীনি।

মসিগী মনুংদগী ২৩% হেনবদি (১৫৮) মহারাস্ত্রাদগীনি।

****