মহারাস্ত্রগী মুখ্য মন্ত্রী শ্রী উধব থাকরে জী, মহারাস্ত্রাগী হান্নগী মুখ্য মন্ত্রী শ্রী দেবেন্দ্র ফদনাবিস জী, শ্রী চন্দ্রকান্ত পাতিল জী, শ্রী রাধাকৃষ্ণ পাতিল জী, শ্রী সুজয় ৱিখে পাতিল জী, থৌরম অসিদা তিনবীরিবা মীয়ামগী অতোপ্পা মীহুৎশিং, ঐহাক্কী লৌউবা মরূপশিং, ইবুংঙো অমসুং ইবেমাশিং, ছত্রপতি শিবাজী মাহারাজ অমসুং বীর- ঐহাক্না বীরঙ্গনা অমসুং কর্ময়োগীশিংগী লমদম মহারাস্ত্রাবু ইকায় খুম্নবা উৎচরী।

ঐহাক্না রাধাকৃষ্ণ ৱিখে পাতিলজী, মহাক্কী ইমুং-মনুং অমসুং অহমদনগরগী মরূপশিং খুদিংদা ঐহাকপু য়াইফরবা থৌরম অসিদা শরুক য়াবীনবা হায়বীরকপগীদমক্তা থাগৎপা ফোঙদোক্লি। ঐহাক মফম অসিদা লাকপা হায়না থৌরাং তৌরম্বনি। মীয়াম খুদিংনা থৌরম অসিদা য়াওগনি হায়না লেপ্নরম্বনি অদুবু কোরোনাগী মতম ওইবনা ঙসিগী থৌরম অসি বর্চুএলগী খুত্থাংদা ওইনা পাঙথোক্লে।

মরূপশিং, দাঃ বালাসাহেব ৱিখে পাতিলগী মশানা ইজবা পুন্সি ৱারী অসি ঙসি ফোঙলবসু মহারাস্ত্রাগী মফম খুদিংদা মহাক্কী পুন্সি ৱারী ফংগনি। ঐহাক্না বালাসাহেব ৱিখে পাতিলনা দাঃ ভিত্থলরাও ৱিখে পাতিলগী থৌওংশিংগী মতুং ইন্দুনা মহারাস্ত্রা চাউখৎপগী হীরমদা মপুন্সি কত্থোকপা অসি ঐহাক্না য়াম্না নক্না উবা ফংলে। খুঙ্গং, লায়রবশিং অমসুং লৌউবশিংগী পুন্সিবু নুংঙাইহনবা, মখোয়গী অৱা-অনাশিংবু হন্থহনবা অসিনা ৱিখে পাতিলজীগী পুন্সিগী পান্দম ওইদুনা লাক্লি। মহাক্কী মশাগী ৱারী অসিদসু মহাক্না অসুম্না ইরী, “রাজনীতি তৌবা মতমদা ঐহাক্না খুন্নাইগী খুদোংচাদবশিংগী ৱারোইশিন পুরকপগী মতাংদা মতম পুম্বদা খন্দুনা লাক্লি”। মহাক্না শক্তি অমসুং রাজনীতিগী খুত্থাংদা খুন্নাইগী য়াইফবা পুরক্নবা মতম পুম্বদা হোৎনরি।

মহাক্না রাজনীতি অসিবু খুন্নাইদা মশক থোকপা অহোংবা অমা পুরক্নবা অমসুং খুঙ্গংগী লায়রবশিংগী শিংনবশিংবু লোইশিন্নবা পাম্বৈ অমা ওইহন্নবা মিৎয়েং চঙদুনা লাকখি। বালাসাহেব ৱিখে পাতিলগী ৱাখল খনবগী মওং অসিনা মহাকপু অতোপ্পশিংদগী তোঙানহল্লি। মসিগী মরম অসিনা ঙসি ফাওবদা মহাক অসিবু পার্তী খুদিংনা ইকায় খুম্নরি। খুঙ্গংগী লায়রবশিংগী চাউখৎপা, মহৈ-মশিং তম্বা ফংহনবা অমসুং কো-ওপরেতিবকী থৌওংবু মাই-পাকহনবদা মহাক্না তেংবাংলিবা অসি তুংগী চারোন-খুদিংমক্না নীংশিংহৌরগনি। মরম অদুনা বালাসাহেব ৱিখে পাতিলগী পুন্সি ৱারীগী লাইরিক অসি ঐখোয় পুম্নমক্কী ওইনা য়াম্না মরু ওইবনি।

মরূপশিং, দাঃ বালাসাহেব ৱিখে পাতিলনা খুঙ্গং, লায়রবা অমসুং লৌউবশিংগী অৱা-অনাশিংবু নক্ননা থেংনদুনা নীংথিনা খঙখি। মরম অদুনা মহাক্না লৌউবশিংবু খুৎশম্নবগী থৌওংগী মতেংনা অমত্তা ওইনা পুরক্তুনা পুলহনখি। মহাক্কী থৌওং অসিনা লায়রবনা লাকহত্তুনা লৈরম্বা মফমশিংগী ফিভমদা অহোংবা লাকহল্লিবনি। কো-ওপরেতিবকী মরু ওইবগী মতাংদা মহাক্না খুৎশম্নবা কো-ওপরেতিব হায়বসিনা খ্বাইদগী অচুম্বা মওংনি হায়না ইরমখি। তি কুথাল্যা জয়েৎচি কিন্বা ধর্মাচি বাতিক নহি। আতা পর্য়তা সগল্য সমাজালা, জাতি নহি। প্রতিনিধিত্ব দিলে আহে। মসিনা হায়বদি কো-ওপরেতিবকী থৌওং অসিনা তসেংনা মীচঙ-মীখায় নায়দে। মসিনা কাস্ত অমসুং ক্রীদকা করি অমত্তা মরী লৈনদে। মসিনা খুন্নাইগী মীপুম খুদিংগী মহুৎ শিল্লি। মহাক্কী ওইনদি খুৎশম্ননা চৎপা অসিনা মীয়ামগী য়াইফবা পুরক্নবা লম্বী অমনি। মহারাস্ত্রাদতা নত্তনা মহাক্না অতলজীগী সরকারদা মন্ত্রী ওইরিঙৈদা লৈবাক্কী তোঙান তোঙানবা মফমশিংদা খুৎশম্নবগী থৌওংবু খুমাং চাউখৎহন্নবা থৌওং কয়া অমা পাঙথোকখি। অসিগুম্বা তাঞ্জা অসিদা ‘দেহ ভেচাবা কাউসি’ অসিনা মহাক্কী ‘আত্মাচরিত্র’গা মরী লৈনবা অসি য়াম্না চানবনি। মসিগী সাধু তুকারামজী মাহারাজকী ৱাফম অসিদা বালাসাহেব ৱিখে পাতিলগী পুন্সিগী মগুন য়াওরি।

মরূপশিং, লৈবাক অসিদা খুঙ্গংদা মহৈ তম্বগী চৎনবী অসি পাক-শন্দ্রিঙৈগী মতমদা মহাক্না খুঙ্গংগী নহাশিংবু প্রবারা এজুকেসন সোসাইতীগী খুত্থাংদা পুক্নীং থৌগৎপগী থৌওং পাঙথোকখি। মসিগী মহাক্কী সোসাইতী অসিগী খুত্থাংদা খুঙ্গংগী নহাশিংদা মহৈ-মশিং তম্নীংবা অমসুং স্কিল লৈনীংবগী ইথিল পীখিবগী থৌওংশিং অসিগী মতাংদা ঐখোয় পুম্নমক্না খঙলে। অসিগুম্বা তাঞ্জা অসিদা ঙসিদগী প্রাবারা রুরেল এজুকেসন সোসাইতীগী মিংগা মহাক্কী মমিংগা মরী লৈনহনবা অসি মতাং য়াম্না চাবনি। মহাক্না খুঙ্গংশিংগী লৌউশিংউবগী থৌওংশিংদা মহৈ-মশিং তম্বগী মরু ওইবা অসি নীংথিনা খঙলমখি। মহাক্কী পুন্সি ৱারী অসিদা মহাক্না অসুম্না ইখি, “শেতিছ কৌশল্য অসাল্যাশ্যভ, শুরক্সিৎ মনুশাহি সহাজা শেতি করু শক্তা নহি। খর তর শেতিলা ইন্তর্প্রাইস কা মেহনৎ নাহিতা”। মসিনা হায়বদি মীওই অমনা কয়া অমা মহৈ-মশিং হৈরবসু মহাক্না লৌউবগী লৌশিং লৈত্রবদি মহাক্না কৈদৌনুংদা লৌ-উরোই হায়বনি। মসিনা তসেংবা ফিভম ওইরক্লবা অসিদা, ঐখোয়না করিগীদমক্তা লৌউববু ইন্তর্প্রাইস অমনি হায়না খল্লোইদোইনো?

মরূপশিং, বালাসাহেব ৱিখে পাতিলগী ৱাখলদা ৱাহংশিং অসি ইরাই লাইনা হেক্তা লাকখিবা নত্তে।

মহাক্না দিকেদ কয়াদগী থেংনরকখিবশিং অদুদা য়ুম্ফম ওইদুনা মহাক্কী ৱাফমশিং অসি হায়রিবনি।

বালাসাহেব ৱিখে পাতিলগী ৱাহং অসিগী পাউখুমদি ঙসি উবা ফংলিবা পুৱারী ওইরবা লৌউ-শিংউগী মতাংদা শেমদোকপা অসিনি। ঙসিদি লৌউবশিং অসিগী থৌদাংশিং অসি চিঞ্জাক পীবখক্তদগী হেন্দোক্তুনা ঙসিদি মখোয়বু ওন্তোপ্রিনর ওইহন্নবা খুদোংচাবা কয়া অমসু পীরে। চিনিনা মহারাস্ত্রাদা অহোংবা ইহৌ অমা লাকহনখিবা, শঙ্গোম্না গুজরাত্তা, গেহুনা পঞ্জাবতা অহোংবা ইহৌ অমা লাকহনখিবগী মওং ওইবা লোকেলগী শেন্মিৎলোন অমসুং লোকেলগী ইন্তর্প্রাইসকী মওং অসিনা লৈবাক অসি তুংলমচৎকীদমক্তা মাঙদা পুদুনা চৎকনি।

মরূপশিং, লৈবাক অসিনা নিং-খা তম্বা ফংলবা মতুংদা চানবা চিঞ্জাক কোন্নখিদবা মতম অমা য়াওখি। মদুগী ফিভম অদুদা সরকারনা খ্বাইদগী মরু ওইবা মীৎয়েং চঙলিবা অদুদি লৈবাক্কী লৌরোক অসি মতৌ করম্না হেনগৎহনগদগে হায়বা অসিনি। মরম অদুনা মপুং ওইবা মিৎয়েং খুদিংমক লৌউবশিংনা করম্বা লৌরোক থাগদগে, মতৌ করম্না পুথোক্কদগে হায়বা হীরম অসিদা চঙখি। ঐখোয়গী লৌউবশিংসু হুমাং তাখি, থবক কন্না শুখি অমসুং লৌরোক হেন্না পুথোক্তুনা লৈবাক্কী তঙাই ফদবশিংবু পীবা ঙমখি। অদুবু অসিগী পোত্থোক পুথোকপা হেনগৎপা হীরম অসিগী মতাংদদি লৌউবশিংগীনি হায়না পায়খৎখিবা পোলিসীশিং অসিনা লৌউবশিংদা কান্নবদি ওইখিদে। মীয়াম্না লৌউবশিংগী শেন্থোক খঙবীখিদে। অদুবু হৌজিক্তি মীয়ামগী ৱাখল্লোন অসি অহানবা ওইনা হোংবা হৌরক্লে।

লৈবাক অসিদা অহানবা ওইনা লৌউবশিংগী শেন্থোক্কী মতাংদা খনবা হৌরবনি অমসুং মসিবু হেনগৎহন্নবা থবক পায়খৎপসু হৌরবনি। এম.এস.পি. চৎহনবা, মসিদা হেনগৎপা, য়ুরিয়াদা নীম কোতিং তৌবা, হান্নদগী হেন্না ফবা লৌরোক্কী ইন্স্যুরেন্স লৈহনবগী ৱারেপশিং অসিগী খুত্থাংদা সরকারনা লৌউবশিংগী খ্বাইদগী পীকপা খুদোংচাদবা ফাওবা লৌথোক্নবা হোৎনরি। প্রধান মন্ত্রী কিসান সম্মান নিধি য়োজনা লৌউবশিংনা অপীকপা শেনফমগীদমক্তা অতোপ্পা মীওইশিংদা চৎপগী থৌওং লোইশিনবীরে। স্কিম অসিগী মখাদা লৌউবশিংগী বেঙ্ক একাউন্তশিংদা লুপা করোর লাখ ১ হকথেংননা হাপখ্রবনি। মসিদা নত্তনা, মমাংদা অমুক্তা পাঙথোকখিদ্রিবা থবক কয়া কোল্দ চেন, মেগা ফুদ পার্ক অমসুং এগ্রো-প্রোসেসিং ইনফ্রাস্ত্রকচর চাউখৎনবা পায়খৎখ্রে। লৌউবশিংনা খুঙ্গংগী হাৎশিং অমসুং মন্দীশিং মতমগা চান্নবা ওইহনবা অসিদগীসু কান্নবা ফংবা হৌরবনি।

মরূপশিং, বালাসাহেব ৱিখে পাতিলনা হায়বা অমা লৈ –শেতি নিসগর্ধারিৎ কেলি জাৎ হোতি। হে গ্যান আজ সম্ভলু থেওলে পাহিচে। তসেচ ন্বয়া আনি জুন্যাচামেল তরি ঘাতলা পহিচে। মসিনা হায়বদি, মমাংদদি লৌউ-শিংউবা অসি মহৌশাগী ফিভম য়েংদুনা পাঙথোক্লম্মি। ঐখোয়না মসিগী লৌশিং অসি ঙাক-শেন্দুনা থমগদবনি। লৌউ-শিংউবদা অনৌবা অমসুং অরিবা থৌওংশিং পুন্সিনবা অসি য়াম্না মরু ওই। মসিগী থৌওং অসি অহমদনগর, পুনে অমসুং মনাক নকপদা লৈবা মফমশিংদনা হেন্না মরু ওই। হৌজিক্তি চুদগী চিনি অমসুং ইথানোল শুংনবা ইন্দস্ত্রী কয়া অমা লৈরে। হৌজিক ফাওবগী ওইনা মহারাস্ত্রাদা অসিগুম্বা ইন্দস্ত্রী ১০০ লৈরে অমসুং অনৌবা ইন্দস্ত্রী কয়া অমসু তঙাই ফদবা তেংবাং পীবগী অয়াবা ফংলে। পেত্রোলদা ইথানোল য়ানবগী চাং হেনগৎলকপা অসিনা থাউ লৈবদা চৎখিবা শেলশিং অসি লৌউবশিংগী ফুরিৎখাওদা চঙবা হৌরে।

মরূপশিং, দাঃ বালাসাহেব ৱিখে পাতিলনা মতম পুম্বদা মহারাস্ত্রাগী খুঙ্গংশিংগী খুদোংচাদবা অমগী ৱারোইশিন পুরক্নবা মতম পুম্বদা হোৎনদুনা লাক্লি। মদুগী খুদোংচাদবা অদুদি থক্নবা ঈশিং অমসুং ইরিগেসনগী শিংনবা অসিনি। মহারাস্ত্রাগী ঈশিংগী কাউন্সিলগী খুত্থাংদা মহাক্না হীরম অসিগী মতাংদা মীয়ামগী ইহৌ অমা শাগৎনবা হোৎনরম্মি। ঙসিদি অসিগুম্বা হোৎনখিবশিং অসি ইং ২০১৪গী মতুংদগীদি থাজরুদ্রবা মাই-পাকপা ফংলে হায়না চাউথোক্না হায়বা ঙম্লে অমসুং মসিগী ঈশিংগী থবক অসিগী মতেংনা দেবেন্দ্রজীগী সরকার অসি খুঙ্গং খুদিংনা শক খঙলে। প্রধান মন্ত্রী কৃশি সিঞ্চাই য়োজনাগী মখাদা মহারাস্ত্রাদা চহি কয়াদগী পন্দুনা লাক্লবা প্রোজেক্ত ২৬পু অথুবা মতমদা লোইশিন্নবা থবক পাঙথোক্লি। মসিগী মনুংদগী স্কিম ৯দি হৌজিক ফাওবগী মনুংদা লোইশিনবা ঙম্লে। মসিগী স্কিমশিং অসি লোইশিল্লকপগা লোয়ননা হেক্ত্যার লাখ ৫মুক পাক চাউবা লমশিংদা ইরিগেসনগী খুদোংচাবশিং ফংগনি। মসিগা মান্নবা ওইনা ইং ২০১৮দা মহারাস্ত্রাদা অচৌবা অমসুং অপিকপা ইরিগেসনগী থবক ৯০দা পায়খৎপা হৌখি। মসিগী থবকশিং অসিনা মথংগী চহি ২-৩দা লোইশিনলকপা মতমদা হেক্ত্যার লাখ ৪ হেনবা লমশিংদা ইরিগেসনগী খুদোংচাবশিং ফংগনি। লৈনুংগী ঈশিংগী চাং য়াম্না নেম্না লৈবা জিলা ১৩ লৈরি। হায়রিবা জিলাশিং অসিদা অতল গ্রাউন্দ ৱাতর স্কিমশিং অসি থবক ওইনা পায়খৎপা হৌরে।

মরূপশিং, ইরিগেসনগী থবকশিংতা নত্তনা মহারাস্ত্রাগী মনুংদা লৈবা খুঙ্গং খুদিংগী ইমুংদা থক্নবা ঈশিং ফংহন্নবা থবকশিংসু চত্থরি। জল জীবন মীসনগী মখাদা মমাংগী চহি ১গী মনুংদা ইমুং লাখ ১৯দা থক্নবা ঈশিং ফংহনখি। মসিগী মনুংদগী লায়রবা ইমুং লাখ ১৩ হেনবদা কোরোনাগী মনুংদা থক্নবা ঈশিং ফংহনখি। য়ুম্থোং খুদিংদা অমাংশঙ শাবদগী ইচে-ইচলশিংগী ইকায় খুম্নবা হেনগৎহনখিবগুম্না মসিগী থৌওং অসিনসু মান্নবা মওং ফংহন্দুনা অমসুং ঈশিং কলহনবসু ঙমহল্লে।

খুঙ্গংগী শেন্মিৎলোন অমসুং খুন্নাইগী পথাপ্তা মাইক্রো ফাইনান্সনা অখন্নবা থৌদাং লৌরি।

মুদ্রাগুম্বা স্কিম্না খুঙ্গংগী মীওইশিংদা মশানা মশাবু থবক পীজবগী খুদোংচাবা পীরি।

মসিদা নত্তনা, হৌখিবা চহি ৭তা লৈবাক অসিগী সেল্ফ-হেল্প গ্রুপশিংগা মরী লৈনবা ইচে-ইচল করোর ৭মুক্তা লুপা করোর লাখ ৩ শেনফম হেনবগী লোন পীথখ্রে। লৌউবশিং, য়েন-ঙানু লোয়বা অমসুং ঙা-য়োকপা মীওই কাঙলুপ অহুম অসিদা বেঙ্কতগী লোন লাইনা লৌবা য়াহন্নবা কিসান ক্রেদিৎ কার্দকী খুদোংচাবা পীরি। কিসান কার্দ ফংহৌদ্রবা অপিকপা লৌয়বা করোর ২গা মখায়দসু কেম্পেন অমা পাঙথোক্তুনা হৌজিক্তি কিসান কার্দ অসি ফংহনখ্রে।

মরূপশিং, খুঙ্গংশিং অমসুং লায়রবশিংনা মশাদা থাজবা অসি হেনগৎলবা মতুংদা করিগুম্বা অমা পাঙথোক্কে হায়বগী ইথিলসু অদুমক কনখৎলকপনি। বালাসাহেব ৱিখে পাতিলনা মসিগী মরোমদোম লেপচবা ঙম্বগী ইথিল অসি খুঙ্গংগী মীওইশিংদা লৈহন্নিংলম্মি। মসিগীদমক্তা মহাক্না মতম পুম্বদা হোৎনদুনা লাকখি। মহাক্কী ৱারী অসিবু পাবা মীওই খুদিংনা অনৌবা ৱাখল্লোন অমা লাক্কনি হায়বগী ঐহাক্না থাজবা থম্মি। অমুক্কা হন্না ঐহাক্না বালাসাহেব ৱিখে পাতিলদা ইকায় খুম্নদুনা কোক-নোল্লদুনা অদোম খুদিংদা য়াইফ পাউজেল পীরি।

ঐহাক্কী ৱারোল অসি লোইশিন্দ্রিঙৈদা ঐহাক্না মহারাস্ত্রাগী মীয়ামদা পুকচেল শেংনা অমসুং মপুং ওইনা করিগুম্বা হরা হায়নীঙই। কোরোনাগী খুদোংথীবা অসি লৈরি। মহারাস্ত্রাদনা খরা হেন্না ৱানীংঙাই ওইরি, মরম অদুনা ঐহাক্না লমদমসিগী ইচিল-ইনাওশিংদা মাস্ক উপ্পীনবা, তোয়না খুৎ-শা হাম্বা অমসুং হাইজিন ঙাক্তুনা চৎপীনবা অমসুং ফীৎ তরুক্কী অরাপ্পা লৈবীনবা অমসুং হায়রিবা কাঙলোনশিং অসিবু থৌশাদবা তৌবীদনবা হায়জরি। ঐখোয়না মতম খুদিংদা নীংশিংগদবদি মসিগী হিদাক লৈত্রিবা ফাওবদি লাইথোকপা য়াদে। ঐখোয়না মসিগী লান অসি ঙমগনি, ঐখোয় পুম্নমক্না লান অসি শোইদনা ঙমগনি।

ঐহাক্না বালাসাহেবকী ইমুং মনুংবু অমুক্কা হন্না ইকায় খুম্না উৎচরী মরমদি মখোয়গী চারোন শুরোন মরিনা মীয়ামগী অমসুং খুন্নাইগী থবক তৌদুনা লাক্লি। মসি অপিকপা থবক্ত নত্তে অমসুং চারোন শুরোন খুদিংমক্না অফবা থবক কয়া অমা পাঙথোক্তুনা লাক্লিবা অসিসু য়াম্না নুংঙাইবা ৱাফম্নি। ঐখোয়না মখা তারকপা চারোন শুরোনশিং কয়া অমা থৱাই য়াওবা হন্থরকপগী ফিভম কয়া উবা থেংনরে। অদুবু মহাক্কী চারোন শুরোনশিং, উত্তরা রোত্তর, অসিনা অহেনবা শক্তি অমসুং শেল-থুম লৈদুনা মীয়ামগী থবক্তা থৱাই য়াওরি অমসুং মসিগী তাঞ্জা অসি লৌদুনা ঐহাক্না মখোয়গী মফমদা ইকায় খুম্নবা উৎলি।

মীয়াম্বু থাগৎচরি।

থাগৎচরি।

*****