ଗ୍ରାମ୍ୟ ଉନ୍ନୟନ ମନ୍ତ୍ରଣାଳୟ

ପ୍ରଧାନମନ୍ତ୍ରୀ ଗରିବ କଲ୍ୟାଣ ରୋଜଗାର ଅଭିଯାନରେ ମୋଟ 32 କୋଟି କାର୍ଯ୍ୟଦିବସ ରୋଜଗାର ପ୍ରଦାନ

• ବର୍ତ୍ତମାନସୁଦ୍ଧା 31,500 କୋଟିରୁ ଅଧିକ ଖର୍ଚ୍ଚ
• ବ୍ୟାପକ ସଂଖ୍ୟାରେ ଭିତ୍ତିଭୂମି ନିର୍ମାଣ
• 2123 ଗ୍ରାମ ପଞ୍ଚାୟତକୁ ଇଣ୍ଟରନେଟ ସଂଯୋଗ
• 21,595 ବର୍ଜ୍ୟ ପରିଚାଳନା ପ୍ରକଳ୍ପ କାର୍ଯ୍ୟ ଆରମ୍ଭ
• 62,824 ପ୍ରାର୍ଥୀଙ୍କୁ ଦକ୍ଷତା ତାଲିମ

प्रविष्टि तिथि: 12 OCT 2020 4:44PM by PIB Bhubaneshwar

କୋଭିଡ-19 ମହାମାରୀ ବ୍ୟାପିବା କାରଣରୁ ରୋଜଗାର ହରାଇ ନିଜ ଗ୍ରାମକୁ ଫେରି ଆସିଥିବା ପ୍ରବାସୀ ଶ୍ରମିକ ଏବଂ ଗ୍ରାମାଞ୍ଚଳରେ ପ୍ରଭାବିତ ନାଗରିକମାନଙ୍କୁ ରୋଜଗାର ଓ ଜୀବିକା ସୁଯୋଗ ଯୋଗାଇ ଦେବାର ଲକ୍ଷ୍ୟ ନେଇ ଗରିବ କଲ୍ୟାଣ ରୋଜଗାର ଅଭିଯାନ (ଜିକେଆରଏ) ଆରମ୍ଭ କରାଯାଇଥିଲା । ଏହି ଅଭିଯାନ ଅନ୍ତର୍ଗତ 6ଟି ରାଜ୍ୟର ପ୍ରବାସୀ ଶ୍ରମିକମାନଙ୍କୁ ରୋଜଗାର ଉଦ୍ଦେଶ୍ୟରେ ମିଶନ ମୋଡରେ ପଦକ୍ଷେପ ଗ୍ରହଣ କରାଯାଇଥିଲା । ଏହି ଅଭିଯାନ ଏସବୁ ରାଜ୍ୟର 116ଟି ଜିଲ୍ଲାରେ ଗ୍ରାମବାସୀଙ୍କୁ ଜୀବିକା ସୁଯୋଗ ଦିଆଯାଇ ସେମାନଙ୍କ ସଶକ୍ତିକରଣରେ ସହାୟକ ହୋଇଛି ।

ଅଭିଯାନ ଆରମ୍ଭ ହେବାର 15ତମ ସପ୍ତାହ ସୁଦ୍ଧା ପାଖାପାଖି 32 କୋଟି ମାନବ ଦିବସ ରୋଜଗାର ଯୋଗାଇ ଦିଆଯାଇଥିବା ବେଳେ 31,577 କୋଟି ଟଙ୍କା ଖର୍ଚ୍ଚ କରାଯାଇସାରିଲାଣି । ବହୁସଂଖ୍ୟାରେ ଭିତ୍ତିଭୂମି ପ୍ରକଳ୍ପ ନିର୍ମାଣ କରାଯାଇଛି ଯାହା ମଧ୍ୟରେ ରହିଛି 1,32,146 ଜଳ ସଂରକ୍ଷଣ ପ୍ରକଳ୍ପ 4,12,214 ଗ୍ରାମୀଣ ଆବାସ, 35,529 ଗୋଶାଳା, 25,689 ଚାଷ ପୁଷ୍କରିଣୀ ଏବଂ 16,253 ଗୋଷ୍ଠୀ ଶୌଚାଳୟ ପରିସର । ଜିଲ୍ଲା ଖଣିଜ ପାଣ୍ଠି ଜରିଆରେ 7,340 କାର୍ଯ୍ୟ ଗ୍ରହଣ କରାଯାଇଥିବା ବେଳେ 2,123ଟି ପଞ୍ଚାୟତକୁ ଇଣ୍ଟରନେଟ ସଂଯୋଗ ଦିଆଯାଇଛି । ସେହିପରି 21,595ଟି କଠିନ ଓ ତରଳ ବର୍ଜ୍ୟ ପରିଚାଳନା ପ୍ରକଳ୍ପ କାର୍ଯ୍ୟ ହାତକୁ ନିଆଯାଇଥିବା ବେଳେ ଅଭିଯାନ ଅନ୍ତର୍ଗତ କୃଷି ବିଜ୍ଞାନ କେନ୍ଦ୍ର ଜରିଆରେ 62,824 ପ୍ରାର୍ଥୀଙ୍କୁ ଦକ୍ଷତା ପ୍ରଶିକ୍ଷଣ ଯୋଗାଇ ଦିଆଯାଇଛି ।

କେନ୍ଦ୍ର ସରକାରଙ୍କ 12ଟି ମନ୍ତ୍ରଣାଳୟ/ବିଭାଗ ଏବଂ ରାଜ୍ୟ ସରକାରଙ୍କ ମଧ୍ୟରେ ଉତ୍ତମ ସମନ୍ୱୟ ରହିବା କାରଣରୁ ଏହି ଅଭିଯାନ ବର୍ତ୍ତମାନ ସୁଦ୍ଧା ବ୍ୟାପକ ସଫଳତା ହାସଲ କରିଛି, ଯାହାକି ପ୍ରବାସୀ ଶ୍ରମିକ ଏବଂ ଗ୍ରାମୀଣ ସମୁଦାୟଙ୍କୁ ବିଶେଷ ଲାଭ ପହଞ୍ଚାଇ ପାରିଛି । ଯେଉଁମାନେ ନିଜ ଅଞ୍ଚଳରେ ରହିବାକୁ ଚାହାନ୍ତି ସେମାନଙ୍କୁ ଏହି ଅଭିଯାନ ଅଧୀନରେ ସ୍ଥାୟୀ ରୋଜଗାର ଓ ଜୀବିକା ଯୋଗାଇ ଦେବା ନିମନ୍ତେ ଦୀର୍ଘସ୍ଥାୟୀ ବ୍ୟବସ୍ଥା କରାଯାଇଛି ।

 

************

 


(रिलीज़ आईडी: 1663802) आगंतुक पटल : 198
इस विज्ञप्ति को इन भाषाओं में पढ़ें: English , Urdu , हिन्दी , Marathi , Bengali , Assamese , Manipuri , Punjabi , Tamil , Telugu , Malayalam