প্রধান মন্ত্রী শ্রী নরেন্দ্র মোদীনা ঙসি মহাক্কী মন কী বাত্তা ৱা ঙাংবদা কোবিদকী ইরাং মনুংদা লৈবাক অসিগী লৌমীশিংনা নীংহন্নদবগী থৌওং কয়া অমা উৎখি হায়না হায়খ্রে।

প্রধান মন্ত্রীনা হায়খিবদা করিগুম্বা লৌউ-শিংউগী সেক্তর অসিনা কল্লবদি আত্মনির্ভর ভারতকী য়ুম্ফম অসি অসুম্মক চেৎনা লৈগনি হায়খি। মহাক্না পনখিবদা হৌখিবা মতম খরদা মসিগী সেক্তর অসিনা হান্না লৈরম্বা অকক্নবা কয়াদগী নীং-তম্বা ফংলে অমসুং অতোপ্পা লান্না থাজবা কয়াদগী নান্থোক্নবা হোৎনদুনা লাক্লি হায়খি। হরিয়ানাগীগী লৌমী, শ্রী কনৱর চৌহানগী খুদম ওইনা পীরদুনা হায়খিবদা মহাক্না মন্দীগী ৱাংমদা মহাক্কী উহৈ-ৱাহৈ অমসুং মনা-মশিং য়োনবদা খুদোংচাদবা কয়া থেংনখি অদুবু ইং ২০১৪দা উহৈ-ৱাহৈ অমসুং মনা-মশিং অসি এ.পি.এম.সি. এক্তকী মনুংদগী লৌথোকখ্রে অমসুং মসিনা মঙোন্দা য়াম্না কান্নবা ওইখি হায়না প্রধান মন্ত্রীনা হায়খি। মহাক্না মীয়ামদা পাউদমখিবদা মহাক্কী খুঙ্গংগী লৌউবশিংগী পোত্থোক পুথোকপগী লুপ অমসুং লৌমীশিংনা হৌজিক স্বীৎ কোর্ন অমসুং বেবী কোর্ন থারি অমসুং পোত্থোকশিং অসি দিল্লীগী অজাদপুর মন্দী, অচৌবা পোৎ য়োনফমশিং অমসুং ফাইব স্তার হোতেলশিংদা হকথেংননা থারি অমসুং মসিনা মখোয়গী চাগা য়াম্না হেনগৎহল্লে হায়খি। প্রধান মন্ত্রীনা হায়খিবদা হায়রিবা লৌমীশিং অসিনা মখোয়গী উহৈ-ৱাহৈ অমসুং মনা-মশিং অসি মফম অমসুং মীওই কয়া অমদা য়োনবগী মতিক লৈরে অমসুং থৌওং অসিনা মখোয়গী চাউখৎপগী য়ুম্ফম ওইরিবনি অমসুং হৌজিক্তি মসিগী মান্নবা মতিক অসি লৈবাক অসিগী লৌমী খুদিংদা মখোয়গী পোত্থোক খুদিংগী ওইনা লৈহল্লবনি হায়খি।

প্রধান মন্ত্রীনা উহৈ-ৱাহৈ অমসুং মনা-মশিংবু এ.পি.এম.সি. এক্তকী মনুং চলহন্দবদগী অহেনবা কান্নবা কয়া অমা ফংহল্লিবা অসিগী মতাংদা পল্লদুনা মহারাস্ত্রদা লৈবা লৌউবগী পোত্থোক পুথোকপগী লুপ – শ্রী স্বামী সমর্থ ফার্ম প্রোদ্যুসর কম্পনী লিমিতেদকী খুদম পীখি। মহাক্না হায়খিবদা পুনে অমসুং মুম্বাইগী লৌমীশিংনা মখোয় মশাগী চয়োলগী ওইনা ফম্বা কৈথেল ফমদুনা মরক্তা লৈবা মীওই য়াওদনা মশানা মশাগী পোত্থোক কয়া য়োঞ্জরি হায়খি। মহাক্না লৌমী কয়া পুল্লগা শেম্বা তমিল নাদু বনানা ফার্মর প্রোদ্যুস কম্পনীগী মতাংদা পল্লদুনা মখোয়না লোকদাউন মনুংদা অনকপা খুঙ্গংশিংদগী মনা-মশিং, উহৈ-ৱাহৈ অমসুং লফোয় মেত্রিক তোন চাম্মা চাম্মা লৈশিন্দুনা পোত্থোকশিং অসিগী পুংবা শেমদুনা চেন্নৈদা য়োনবগী থৌওং পাংথোকপগী মতাংদা হায়খি। ‘ইরাদা ফার্মর প্রোদ্যুসর’ কৌবা লখনৌগী কাঙবু অমনা লোকদাউনগী মনুংদা লৌমীশিংগী লৌফমদগী উহৈ-ৱাহৈ অমসুং মনা-মশিং হকথেংননা লৈদুনা লখনৌগী কৈথেলদা মরক্তা লৈবা মীওই য়াওদনা য়োনবগী থৌওংগী মতাংদসু পনখি।

প্রধান মন্ত্রীনা হায়খিবদা অনৌবা থৌওং পাঙথোকপা অমসুং অনৌবা তেক্নিক শিজিন্নদুনা লৌউ-শিংউবগী থৌওং অসি হেন্না চাউখৎপা য়াই হায়খি। মহাক্না ইমুং মনুংনা পুক্নীং হন্থহল্লবসু লৌউবগী শিনফম পায়খৎখিবা গুজরাতকী লৌমী, ইস্মাইল ভাইগী খুদম পীখি। মহাক্না দ্রিপ ইরিগেসন তেক্নোলোজী শিজিন্নদুনা আলু থাখি অমসুং মহাক্কী মশক থোকপা মহৈ ওইরবা মহাক্কী মগুন লৈরবা আলুশিং অসি মরক্তা লৈবা মীওই য়াওদনা অচৌবা কম্পনীশিংদা হকথেংননা য়োন্দুনা শেন্দোং চাউনা ফংলি। প্রধান মন্ত্রীনা থম্বাল মরাদগী লং পুথোকপগী স্তার্ত-অপ হৌদোকখিবা মনিপুরগী মিস বিজয়া শান্তিগী খুদমসু পীখি অমসুং মহাক্না অনৌবা থৌওং শিজিন্নদুনা হোৎনরিবা অসিনা থম্বাল থাবা অমসুং তেক্সতাইলগী হীরমদা অনৌবা থোঙ কয়া অমা হাংলে হায়না প্রধান মন্ত্রীনা মখা তানা হায়খি।

*****