কেন্দ্রগী হকশেল মন্ত্রালয়না অচৌবা স্তেত খরদা রেপিদ এন্তিজেন তেস্ততা নেগেতিব ওইবা লায়ওং উৎপা কেসশিং আর.তি.-পি.সি.আর.গী খুত্থাঙদা অমুক হন্না তেস্ত তৌবগী থৌওং ইন্দ্রে হায়বা ৱাফম ফোঙদোক্লি‍।

আই.সি.এম.আর. অমসুং কেন্দ্রগী হকশেল মন্ত্রালয়না পীবা চৎন-কাঙলোনদা মখাদা পীরিবা কাঙলুপ অনিগী মনুং চনবা মীওইশিংদি আর.তি.-পি.সি.আর.গী খুত্থাঙদা তঙায় ফদনা অমুক হন্নে তেস্ত তৌগদবি হায়না ময়েক শেংনা পল্লি‍।

১.       লায়ওং (লাইহৌ নৎত্রগা লোক খুবা নৎত্রগা নীংশা হোনবা নুংঙাইতবা) উৎপা রেপিদ এন্তিজেন তেস্ততা (আর.এ.তি.)দা নেগেতিব ওইবা কেসশিং

২.       লায়ওং উত্তবা আর.এ.তি.দা নেগেতিব লাকপা অদুবু তেস্ত তৌখ্রবা মতুং নুমিৎ ২দগী  ৩ ফাওবদা লায়ওং উৎপা হৌরকপা কেসশিং

মসিদা য়ুম্ফম ওইদুনা, কেন্দ্রগী হকশেল মন্ত্রালয় অমসুং আই.সি.এম.আর.না পুন্না স্তেত/য়ু.তি.শিংদা চে ইদুনা রেপিদ এন্তিজেন তেস্ততা নেগেতিব ওইবা লায়ওং উৎপা কেস খুদিংমক শুকশোয় শোয়দনা আর.তি.-পি.সি.আর.গী খুত্থাঙদা অমুক হন্না তেস্ত তৌনবা হায়খ্রে‍। অসিগুমবা লাইওং উৎপা নেগেতিব কেসশিং অসি তেস্ত তৌদনা থমবা অমদি মখোয়না মখা তানা মখোয়গী কন্তেক্তশিংদা শন্দোরকপগী ফীভম থোকহন্দনবা থৌওং অসি তঙাইফদে‍। মসিনা অসিগুম্বা লান্না নেগেতিব লাকপশিং ঙন্না খঙদোকহৌবা অমদি তোখাইনা থমবা/অনা লায়েঙশঙদা পুখৎপা ঙমহনগনি‍। পুন্না ইবা চে অদুদা আর.এ.তি. অসি ফীল্দদা তেস্ত তৌবগী খুদোংচাবা হেনগৎহন্নবা অমদি পাক শন্না ফংহন্নবা পাম্বৈ ওইজরবসু, আর.তি.-পি.সি.আর.না কোবিদ তেস্ত তৌবগী অথোইবা পাম্বৈ ওইরি‍।

কেন্দ্রগী হকশেল মন্ত্রালয়না স্তেত/য়ু.তি.শিংদা দিস্ত্রিক খুদিংমক্তা মোনিতরিংগী থৌওং অমা (অখন্ননা থবক শিন্নবা ওফিসর নৎত্রগা কাঙবু অমা) থম্ননবা অমদি অসিগুম্বা কেসশিং অসি স্তেতকী থাক্তা য়েংশিন্নবা হোৎনগদবনি হায়নসু পল্লি‍। হায়রিবা কাঙবুশিং অসিনা নুংতিগী তৌরিবা আর.এ.তি. দিস্ত্রিক অমসুং স্তেতকী থাক্তা নৈনগদবনি অমদি লাইওং উৎপা নেগেতিব কেস খুদিংমক পন্থদনা অমুক হন্না তেস্ত তৌনবা শীনগদবনি‍। পোজিতিব কেস ওইরমবা য়াবা কেস অমত্তা নান্থোকহন্দবা হায়বসিনা স্তেত/য়ু.তি.শিংগী পান্দম ওইগদবনি‍। মখোয়দা অমুক হন্না আর.তি.-পি.সি.আর.দা তেস্ত তৌবদা পোজিতিব মহৈ ফংলকপশিং য়েংশিন্নবা চাং নাইনা নৈননবা পাউতাকসু পীখি‍।

****