প্রধান মন্ত্রী শ্রী নরেন্দ্র মোদীনা য়ু.পি.গী ঝান্সীদা লৈবা রানী লক্ষ্মী বাই সেন্ত্রেল এগ্রিকলচরেল য়ুনিভর্সিতীগী কলেজ অমসুং এদমিনিস্ত্রেসন বিল্দিং ঙসি ভিদিও কনফরেন্সিংগী খুত্থাংদা শঙ্গাখ্রে। মহাক্না য়ুনিভর্সিতী অসিগী মহৈরোয়শিংগা লোয়ননা ৱারী শাখ্রে।

পি.এম.না মীপুম খুদিংমকপু থাগৎখি অমসুং য়ুনিভর্সিতী অসিদগী তম্বা লোয়খ্রবা মতুংদা মহৈরোয়শিংনা লৈবাক অসিগী লৌউ-শিংউগী লম খুমাং চাউশিনহনবদা চাউনা মতেং পাংগনি হায়না মহাক্না থাজবা থম্বা অদু ফোঙদোকখি। মহাক্না হায় অনৌবা বিল্দিংশিং অসিনা পীগদৌরিবা অনৌবা খুদোংচাবশিং অসুবা মহৈরোয়শিংবু হেন্না কন্না হোৎনবদা থৌগৎকনি অমসুং ইথিল পীগনি হায়না থাজবা থম্লি।

রানী লক্ষ্মী বাইনা হায়রম্বা “ঐহাক্না ঝান্সী অসি পীথোক্লোই” অদু পল্লদুনা, প্রধান মন্ত্রীনা “মেরী ঝান্সী – মেরা বুন্দেলখন্দ”গী অপাম্বা ফোঙদোকখি অমসুং ঝান্সী অমদি বুন্দেলখন্দগী মীয়াম্না আত্মনির্ভর ভারত অভিয়ান অসি মায় পাকহন্নবা হায়খি।

প্রধান মন্ত্রীনা ‘মেরী ঝান্সী – মেরা বুন্দেলখন্দ’ আত্মনির্ভর ভারত অভিয়ান অসিদা লৌউ-শিংউনা অচৌবা থৌদাং অমা লৌরি হায়না থমখি। লৌউ-শিংউদা মীপাম তাংদবনা লৌমীশিংবু প্রদ্যুসরশিং লোয়ননা ওন্ত্রপ্রিনরশিং অনিমক ওইহন্নবা পান্দম থম্লি। মসিগী থৌনা লিংজেলগী মতাংদা পি.এম.না হায়খি ইতিহাসিক ওইরবা অহোংবা কয়া লৌউ-শিংউগী লমদা পুরকখ্রে। অতোপ্পা ইন্দস্ত্রীগুম্না হৌজিক লৌমীশিংনা মখোয়না পুথোক্লিবা অদু মতিক চাবা মমলশিংদা লৈবাক অসিগী মফম অমা হেক্তদা য়োনবা ফংলগনি। ক্লস্তর বেজ এপ্রোচ অমদা অহেনবা খুদোংচাবশিং ফংহন্নবা অমসুং ইন্দস্ত্রীশিং খুমাং চাউশিলহন্নবা লুপা কোতি লাখ ১গী অখন্নবা দেদিকেতেদ ফন্দ পীথখ্রে হায়না মহাক্না হায়খি।

লৌমীদা অনৌবা তেক্নোলোজী ফংহন্নবা লেপ্তনা হোৎনরি হায়না হায়রদুনা প্রধান মন্ত্রীনা হায়খি রিসর্চ ইন্সতিত্যুসন্স এন্দ এগ্রিকলচরেল য়ুনিভর্সিতীশিংনা মরু ওইবা থৌদাং অমা লৌরি। লৈবাক অসিদা চহি ৬কী মমাংদা সেন্ত্রেল য়ুনিভর্সিতী অমা খক লৈরম্বদগী হৌজিক সেন্ত্রেল এগ্রিকলচরেল য়ুনিভর্সিতী অহুম লৈরে হায়না মহাক্না ফোঙদোকখি। মসিগী মথক্তা, নেস্নেল ইন্সতিত্যুসন অহুম মদুদি আই.এ.আর.আই. ঝার্খন্দ, আই.এ.আর.আই. অসম অমসুং মোতিহারী, বিহারগী মহাত্মা গান্ধী ইন্সতিত্যুৎ ফোর ইন্তিগ্রেতেদ ফারমিং অসি লিংখৎখ্রে। মহাক্না হায় ইন্সতিত্যুৎশিং অসিনা মহৈরোয়শিংদা অনৌবা খুদোংচাবশিং পীরি অদুবু মফম অদুগী লৌমীশিংদা তেক্নোলোজীগী কান্নবশিং ফংহন্নবা মখোয়গী হৈজরিবা-খঙজরিবা অদু হেনগৎপদা মতেং পাংগনি।

বুন্দেলখন্দদা কৌজেংনা শোকহনখিবা অদুগী মতাংদা প্রধান মন্ত্রীনা হায় সরকারনা শোকহল্লিবা অদু হন্থহন্নবা অমসুং অমাং অতা থোকপা হন্থহন্নবা কন্না হোৎনরি। তোঙান তোঙানবা শহরশিংদা কন্ত্রোল রুম কয়া হাংদোকখ্রে, লৌমীশিংদা মাংজৌননা খঙহনবা, স্প্রে কাপ্নবা দ্রোনশিং, মোদর্ন স্প্রে মেছিন কয়া শীজিন্নদুনা কৌজেংশিং হাৎনবা প্রোক্যুর তৌদুনা লৌমীশিংদা ফংহনখ্রে।

পি.এম.না হায় হৌখিবা চহি তরুক অসিদা, খুঙ্গংশিংদা সরকার অসিনা রিসর্চ অমসুং লৌউ-শিংউগী মরক্তা মরী অমা থম্নবা  অমসুং লৌমীশিংদা বিজ্ঞানগী ওইবা পাউতাকশিং ফংহন্নবা হোৎনরি। কেম্পস্তগী লৌবুক ফাওবদা য়ুনিভর্সিতীশিং অসিনা মতেং পাংন্দুনা লৌশিং অমসুং থবক হেনগৎহন্দুনা ইকোসিস্তেম শেমগনি।

লৌউ-শিংউগা মরী লৈনবা লৌশিং হৈজিনবা অমসুং মখোয় অসি স্কুলগী থাক্তা প্রেক্তিকেল এপ্লিকেসন মথৌ তাবগী মতাংদা, প্রধান মন্ত্রীনা হায় এগ্রিকলচর অসি সবজেক্ত অমা ওইনা মিদল স্কুলগী থাক্তা খুঙ্গংশিংদা লৈহন্নবা হোৎনরি। মসিনা কান্নবা অনি ফংহনগনি – অহানবদা, মসিনা মহৈরোয়শিংদা লৌউ-শিংউগা মরী লৈনবা লৌশিং লৈহনবা অমসুং অনিশুবদা, মসিনা মহৈরোয়শিংদা লৌউ-শিংউগী মরমদা, অনৌবা লৌ উবগী পাম্বৈশিং অমসুং কৈথেলদা য়োনবগী পাম্বৈগী মতাংদা মখোয়গী ইমুং মনুংদা খঙহনবা ঙমগনি। লৈবাক অসিদা মসিনা এগ্রো-ওন্ত্রপ্রিনরশিপ খুমাং চাউশিনহল্লগনি।

কোরোনাভাইরসকী লায়চৎ অসিগী মনুংদা মীয়াম্না মায়োক্নরিবা অৱাবশিং অসি হন্থহন্নবা খোঙথাংশিং লৌখৎলিবা অসিগী মতাংদা ৱা ঙাংলদুনা প্রধান মন্ত্রীনা হায় উত্তর প্রদেশকী লায়রবা অমসুং খুঙ্গংগী ইমুং কোতি কয়াদা লেম্না রসনশিং ফংহনখ্রে। মতম অসিগী মনুংদা বুন্দেলখন্দগী লায়রবা নুপী লাখ ১০রোমদা চাকথোং গ্যাস লেম্না ফংহনখি। গরীব কল্যান রোজগার অভিয়ানগী মখাদা হৌজিক ফাওবদা য়ু.পি.দা লুপা কোতি ৭০০ হেন্না থাদুনা মসিগী মখাদা শিন্মী লাখ কয়াদা থবক পীখি।

প্রধান মন্ত্রীনা হায়, অথুবা মতমদা য়ুমথোং খুদিংদা থক্নবা ঈশিং ফংহন্নবা কেম্পেনদা মমাংদা থাজবা পীখিবগী মতুং ইন্না মফম অসিদা ঈশিংগা মরী লৈনবা প্রোজেক্ত ৫০০গী লুপা কোতি ১০,০০০ হেন্না কায়থনবা অয়াবা পীখ্রে। মসিগী মনুংদা হৌখিবা থা অনি অসিদা লুপা কোতি ৩০০০রোমগী ওইগদবা প্রোজেক্তশিংগী থবক পায়খৎপা হৌখ্রে। মসিনা বুন্দেলখন্দদা ইমুং লাখ কয়াদা হকথেংননা কান্নবা পীগনি। মহাক্না মখা তারদুনা হায়খি বুন্দেলখন্দগী গ্রাউন্দৱাতর লেবেল হেনগৎহন্নবা এতল গ্রাউন্দৱাতর স্কিমগী থবক চত্থরি। লুপা কোতি ৭০০ হেন্না চংবা ঝান্সী, মহোবা, বন্দা, হমিরপুর, চিত্রাকোৎ অমসুং লালিৎপুর লোয়ননা ৱেস্ত য়ু.পি.কী খুঙ্গং কয়াদা ঈশিংগী চাং হেনগৎহন্নবা প্রোজেক্তশিংগী থবক পায়খৎলি হায়না মহাক্না ফোঙদোকখি।

প্রধান মন্ত্রীনা হায় বুন্দেলখন্দ অসি বেৎৱা, কেন অমসুং য়ামুনা তুরেলশিংনা কোয়শিল্লবসু মফম পুম্নমক তুরেলশিং অসিদগী মপুংফানা কান্নবা ফংদে। মহাক্না হায় ফীভম অসি হোংদোক্নবা সরকারনা তপ্না তপ্না থবকশিং পায়খৎলি। কেন-বেৎৱা রিভর লিঙ্ক প্রোজেক্তনা মফম অসিগী অহোংবা পুরকপা ঙমগনি হায়না থমখি অমসুং হীরম অসিদা সরকারনা রাজ্য সরকারগা পুন্না চৎমিন্নদুনা থবক পাইখৎলি হায়না ফোঙদোকখি। বুন্দেলখন্দদা ঈশিং মরাং কায়না হেক ফংবগা মফম অদুগী পুন্সি মহিংদা চাউনা অহোংবা লাক্লগনি হায়না থাজবা থমখি। মহাক্না হায় বুন্দেলখন্দ এক্সপ্রেস ৱে, দিফেন্স কোরিদোরগুম্বা কোতি লিশিং কয়াগী প্রোজেক্তশিংনা অনৌবা থবক কয়া ফংহন্নবা খুদোংচাবশিং শেমগৎলগনি। মহাক্না হায় ‘জয় জৱান’ ‘জয় কিশান’ অমসুং ‘জয় বিজ্ঞান’গী মন্ত্রনা বুন্দেলখন্দগী মাইকৈ মরীদা নিল্লগনি। প্রধান মন্ত্রীনা কেন্দ্র সরকার অমসুং উত্তর প্রদেশ সরকারনা মালেমদা চাউথোকচনীংঙাই ওইরবা বুন্দেনখান্দগী অরীবা শক্তমশিং য়োকখৎপদা লৌরিবা থৌদাং অদু নৌহৌননা নীংশিংখি।

***