ভারত্তা শান্নপোৎ শাবা হেনগৎহন্নবা অমসুং মালেমদা ভারতকী শান্নপোৎ শীজিন্নবা হেনগৎহন্নবা লম্বীশিং খন্ননবা সেনিয়র মিনিস্তরশিং অমসুং ওফিসিএলশিংগা লোয়ন্না ঙসি প্রধান মন্ত্রী শ্রী নরেন্দ্র মোদীনা মীফম অমা পাংথোকখ্রে।

প্রধান মন্ত্রীনা হায়খি ভারত অসি শান্নপোৎ কয়া শাফমনি অমসুং চহি নৌরিবা অঙাংশিংগী মরক্তা লৌশিং কয়া অমসুং লেং-ওৎপগী লৌশিং কয়া শেমগৎপদা মতেং পাংবা চৎনবীগা মরী লৈনবা মশাগী ওইবা শান্নপোৎশিং খুৎহৈবা লিশিং কয়ানা পুথোক্লি। অসিগুম্বা শান্নপোৎশিং পুথোক্লিবা মফমশিং অনৌবা অমসুং অফবা পাম্বৈশিংগী খুৎথাংদা য়োকখৎকদবনি।

প্রধান মন্ত্রীনা হায়খি ভারতকী শান্নপোৎকী কৈথেলগী খুদোংচাবা কয়া মরাংকাইনা লৈরি অমসুং অত্মানির্ভর ভারত খোঙজংগী মখাদা ‘ভোকেল ফোর লোকেল’ য়োকখৎতুনা ইন্দস্ত্রি অসিদা অচৌবা অহোংবা অমা পুরকপা য়াগনি। মালেমগী থাকশিং য়ৌবা ঙম্বা মগুন লৈবা পোৎথোকশিং শানবা তেক্নোলোজি অমসুং ইন্নোবেসন শীজিন্ননবা মিৎয়েং চঙগদবনি।

অঙাংশিংগী লেং-ওৎপা অমসুং ৱাখল খনবা ঙম্বগী লৌশিং হেনগৎহনবদা শান্নপোৎনা পীরিবা কান্নবশিং অমসুং লৈবাক অসিগী তুংগী মীরোলশিং শেমগৎপা মতেং পাংনবা কমদৌনা শান্নপোৎনা খুন্নাইগী অওনবা অমা পুরক্নবা পাম্বৈ অমা ওইবা য়াগনি হায়বগী মতাংদসু মীফম অদুদা খন্নখি।

অঙাং অমগী ৱাখল শেমগৎপদা শান্নপোৎশিংগী মরুওইবা পল্লদুনা প্রধান মন্ত্রীনা হায়খি হিরম খুদিংমক্তা অঙাংশিং চাউখৎহন্নবা অঙ্গনৱাদি সেন্তরশিং অমসুং স্কুলশিং শীনবা  থুংনা ভারতকী চৎনবী অমসুং ৱাখল্লোনশিংগা চুনবা শান্নপোৎশিং লাইরিক তাকপী-তম্বীনবা খুৎলায়শিং ওইনা শীজিন্নগদবনি। শান্নপোৎশিং অনৌবা দিজাইনশিং পুথোক্নবা নহারোলশিং শীজিন্নগদবনি অমসুং মসিনা লৈবাক্কী পান্দমশিং ফংবা অমসুং মাইপাকপা পুরকপগী চাউথোকচবা অমা ফাওহনগনি।

প্রধান মন্ত্রীনা হায়খি মখা তানা ‘এক ভারত, শ্রেস্থা ভারত’কী ৱাখল্লোন শন্দোক্নবা শান্নপোৎশিং অফবা খুৎলায় অমা ওইনা শীজিন্নবা য়াগনি অমসুং শান্নপোৎশিং অদু ভারতকী গুন অমসুং চৎনবীশিংদা য়ুম্ফম ওইবা অকোয়বগী ফিবম শোকহল্লোইদবা ওইগদবনি। খুৎনা শাবা শান্নপোৎশিংগী মমিং চৎলিবা লমদমশিংদা ভারতকী কলচর য়োকখৎনবা তুরিজম অসি খুৎলায় অমা ওইনা শীজিন্নগদবনি।

প্রধান মন্ত্রীনা হায়খি ভারতকী চৎনবীশিং অমসুং গুনশিং মমি তাবা ওনলাইন গেমশিং য়াওনা শান্নপোৎকী অনৌবা তেক্নোলোজি অমসুং দিজাইনগী মতাংদা হেক্কাথোনশিং পাংথোকপা দরকার ওইরে। ভারতকী চৎনবীশিং অমসুং ফুঙ্গা ৱারিশিংনা ইথিল পীবা গেমশিং শেমগৎতুনা দিজিতেল গেমগী লমদা লৈরিবা য়াম্লবা খুদোংচাবশিং ভারতনা লৌগদবনি।

******