ঙসি ভিদিও কনফরেন্সকী খুৎথাংদা প্রধান মন্ত্রী নরেন্দ্র মোদীনা মশিং য়াম্না কোবিদ-১৯ তেস্ত তৌবা ঙমগদবা লেবোরেতোরি অহুম হাংদোকখ্রে। হায়রিবা লেবোরেতোরিশিং অদু কোলকাতা, নোইদা অমসুং মুম্বাইদা লৈবা ইন্দিয়ান কাউন্সিল ওফ মেদিকেল রিছর্সকী নেসনেল ইন্সতিতুৎশিংদা হাংদোকপনি ।

প্রধান মন্ত্রীনা হায়খি হায়রিবা অফব মখলগী তেস্ত তৌনবা লেবোরেতোরিশিং অসিনা সহর অহুম অসিদা নোংমদা সহর অমমমদা তেস্ত ১০,০০০ তৌবা ঙমগনি।  মশিং য়াম্না চাংয়েং তৌবা অসিনা ঙন্না খঙদোকপা অমসুং লায়েংবদা মতেং পাংদুনা ভাইরস অসি শন্দোরকপা থিংবদা মতেং পাংগনি।হায়রিবা লেবোরেতোরিশিং অসিনা কোবিদ খক চাংয়েং তৌনবা ওইরোই, তুংদা, মসি হেপাতাইতিস বি অমসুং সি, ঐচ.আই.ভি, দেঙ্গু অমসুং অতোপ্পা লায়না কয়া তেস্ত তৌবা ঙমগনি।

মতম চানা ৱারেপশিং লৌবা

প্রধান মন্ত্রীনা হায়খী সরকারনা মতম চানা ৱারেপশিং লৌবদগী, কোবিদনা মরম ওইদুনা মী শিবগী চাং য়েংনবদা অতোপ্পা লৈবাকশিংদগী ভারতনা হেন্না ফরি। অনাবা ফগৎলকপগী চাংসু অতোপ্পা লৈবাকশিংদগী হেন্না ফিবম ফরি অমসুং নোংম-নোংমগী ওইনা ফগৎলক্লি। ভাইরস অসিদগী অনাবা ফগৎলক্লবা অপুনবা মীশিং চাউরাক্না লাখ ১০ য়ৌরে।

কোরোনা খক্তগী হকশেলগী মচাক-মথুমশিং

প্রধান মন্ত্রীনা হায়খি কোরোনা খক্তগী ওইবা হকশেলগী মচাক-মথুমশিং য়াংনা শেমগৎপা অসি লৈবাক অসিদা মরুওইবনি। মসিগী লানফম অসি হৌরকপদা, সরকারনা লুপা করোর ১৫,০০০গী পেকেজ অমা লাউথোকখ্রে। হৌজিক লৈবাক অসিদা কোবিদ লায়েংফম ১১,০০০ হেন্না লৈরে অমসুং আইসোলেসন বেদ লাখ ১১ হেন্না লৈরে।

জনৱারীদা লৈবাক অসিদা তেস্ত তৌনবা সেন্তর অসি শুপ্নতংগী অমখক্তমক লৈরম্বা অদু হৌজিক্তি লৈবাক অসি লেব ১৩০০রোম্না মথৌ পাংথোক্লি। ঙসি ভারত্তা নোংমদা তেস্ত লাক্ষ ৫দগী হেন্না মথৌ তৌরি অমসুং লাক্কদৌরিবা চয়োলশিংসিদা নোংমদা লাক্ষ ১০ তেস্ত তৌনবা হোৎনরি।
মহাক্না হায়খি লৈবাক অসি পি.পি.ই কিৎ মশিং য়াম্না পুথোকপা অনিশুবা লৈবাক ওইরে। থা ৬খক্কী মমাংদা লৈবাক অসিদা পি.পি.ই. কিৎ অমফাওবা শারমদে। ঙসিদি নোংমদা শানবা মফম ১২০০দগী হেনবনা পি.পি.ই.কিৎ লাক্ষ ৫দগী হেন্না শারে। মপান্দগী পুশিল্লকপগী মখা পোল্লম্বা অদু, হৌজিক ভারত্তা নোংমদা এন.-৯৫ মাস্ক লাক্ষ ৩দগী হেন্না শারে অমসুং চহি অমদা ভেন্তিলেতর পুথোকপা ঙম্বগী থাক লাখ ৩ য়ৌরে অমসুং মেদিকেল ওক্সিজেন সিলিন্দরশিং পুথোকপা ঙম্বসু শিংথানিঙাই ওইনা হেনগৎলে। মসিনা থৱায় কনবা খক নত্তনা ভারত অসি মপান্দগী লৈরম্বদগী মপান্দা থাদোকপা লৈবাক অমা ওইরে।

খুঙ্গংশিংদা লায়না শন্দোরকপা লাকশিন্নবা পায়খৎলিবা থবকশিংগী মতাংদা প্রধান মন্ত্রীনা হায়খি হকশেলগী অনৌবা মচাক-মথুমশিং শেমগৎপা অমসুং খুঙ্গংশিংদা হান্নদগী লৈরক্লবা হকশেলগী মচাক-মথুমশিং ফগৎহন্নবা দরকার ওইরে।

থবক তৌগদবা মী মশিং হেনগৎহনবা

প্রধান মন্ত্রীনা হায়খি মচাক-মথুমশিং শেমগৎপগী মথক্তা, লৈবাক অসিনা লাইচৎ শন্দোরকপা থিংবদা অচৌবা থৌদাং অমা লৌরিবা পেরামেদিক্সশিং, অসা ৱার্করশিং, অঙ্গনৱাদিশিং য়াওনা থবক তৌনবা মীওই কয়া শেমগৎনবা লৈবাক অসিনা য়াংনা থবক পায়খৎলি। ঐখোয়গী কোরোনা লান্মীশিং চোকথবদগী ঙাকথোক্নবা হকশেলগী অনৌবা মীওইশিং হাপ্পা অমসুং থবক্তগী পোথাখ্রবা হকশেলগী মীওইশিং মখা তানা থবক তৌহনবা দরকার ওইরে।

কুম্মৈশিং মনুংদা অশোই-অঙাম থোকহন্দবা

মহাক্না হায়খি কুম্মৈশিং পাংথোকপা মতমদা ভাইরস অসিদগী ঙাকথোক্নবা চেকশিন-থৌরাংশিং মীয়াম্না লৌখৎকদবনি। প্রধান মন্ত্রী গরীব কলয়ান অন্ন য়োজনাগী কান্নবশিং লায়রবশিংদা মতম চানা য়ৌহনগদবনি। তিকা পুথোক্ত্রি ফাওবা, দো গজ দুরি, মাক্স উপ্পা অমসুং খুৎ তোইনা হাম্বা অসিনা মীয়াম অশোই-অঙাম থোক্তনবা খুৎলায়শিংনি।

য়ুনিয়ন মিনিস্তর দোক্তর হর্স ভরধন্না হায়খি হৌজিক লৈবাক শীনবা থুংনা কোবিদ তেস্ত তৌনবা লেবশিং লৈরে। লৈবাক্কী কোনুংদা ভাইরস অসি শন্দোরকপা লাকশিন্নবা য়ুনিয়ন হোম মিনিস্তরনা দিল্লিগী চীফ মিনিস্তরগা লোয়ননা থবক তৌমিন্নরি।

চীফ মিনিস্তরশিং ৱা ঙাংখি

তেস্ত তৌনবা লেবোরেতোরিশিং হাংদোকপগীদমক চীফ মিনিস্তরশিংনা প্রধান মন্ত্রী থাগৎখি। অরুবা ফিবম অসিদা প্রধান মন্ত্রীগী লমজিংবা অসিগীদমক মহারাস্ত্রাগী চীফ মিনিস্তর উধব থাক্কেরেনা থাগৎখি। মহাক্না হায়খি মুম্বাইদা ‘ভাইরস তান্নবগী’ থবক পায়খৎলে অমসুং ইনফেক্সন হোস্পতালশিং লিংখৎনবা খন্নরি।

রাজ্যশিংদা মতেং পাংলিবা প্রধান মন্ত্রীগী থবকশিং নোংচুপ বেঙ্গালগী চীফ মিনিস্তর মামাতা বেনরজিনা থাগৎখি অমসুং রাজ্য অদুদা কেসশিং খোঙ্গুল লিবগী থবকশিং, তেলি-মেদিসিন শীজিন্নবা অমসুং হৌজিক লৈরিবা লেবশিংগী খুদোংচাবশিং হেনগৎহন্নবগী দরকার ওইবশিং ফোংদোকখি।

ভাইরস অসি লাকশিন্নবা মহাক্না চোকথবা নাইদনা পাংথোক্লিবা থবকশিং অসিগীদমক উত্তর প্রদেসকী চীফ মিনিস্তর য়োগী অদিত্যনাথনা প্রধান মন্ত্রী থাগৎখি। মহাক্না হায়খি ঙসি হাংদোকলিবা লেবশিং অসিনা তেস্ত তৌবদা চঙবা মতম অঙকপা ফংনা হন্থরগনি। রাজ্য অসিদা তেস্ত তৌনবগী খুদোংচাবশিং হেনগৎহন্নবা থবক পায়খৎলে অমসুং নোংমদা এন্তিজেন তেস্ত মশিং হেনগৎহন্নবা থৌরাং তৌরে।

নুঙগীৱারোল

মশিং য়াম্না তেস্ত তৌবা ঙম্বা লেব অহুম অসি য়াম্না মরুওইবা আই.সি.এম.আর-নেসনেল ইন্সতিতুৎ ওফ কেন্সর প্রিভেন্সন এন্দ রিছর্স, নোইদা; আই.সি.এম.আর-নেসনেল ইন্সতিতুৎ ফোর রিছর্স ইন রিপ্রদকতিপ হেল্থ, মুম্বাই; অমসুং আই.সি.এম.আর-নেসনেল ইন্সতিতুৎ ওফ ক্লোলেরা এন্দ ইন্ত্রেরিক দিদিজেস,কোলকাতাদা লিংখৎলে অমসুং নোংমদা সেম্পল ১০,০০০ হেন্না চাংয়েং তৌগনি। হায়রিবা লেবশিং অসিনা তেস্ত তৌবদা চঙবা মতম হন্থহনগনি অমসুং লেবকী মীওইশিং ক্লিনিক্কী পোৎ-চৈশিংগা শম্নবা হন্থহগনি। লেবশিং অসিনা কোবিদ নত্তবা অতোপ্পা লায়নাশিং তেস্ত তৌবসু য়াগনি অমসুং লাইচৎ অসিগী মতুংদা, হেপাতাইতিস সি অমসুং বি, ঐচ.আই.ভি, তি.বি, সাইতোমেগালোভাইরস, ক্লামেদিয়া, নৈসেরিয়া, দেঙ্গু অসিনচিংবা চাংয়েং তৌবা য়াগনি।

***