ওগস্ত ২০১৯দা লোঞ্চ তৌখিবদগী থা ৭কী মনুংদা জল জীবন মিসন্না ২০১৯-২০দা খুঙ্গংগী ইমুং মনুং লাখ ৮৫দা তোতি ঈশিং পীখ্রে। মখা তাবা ওইনা কোবিদ-১৯গী ইরাং মনুংদশু, অনলোক ১ হৌবদগী, ২০১৯-২০গী চহী মনুংদশু তোতি ঈশিং লাখ ৫৫ পীখি। মসিনা হায়বদি নোংমদা চাউরাক্না ইমুং লাখ ১ তোতি ঈশিং ফংহল্লি হায়বনি।

ঙসি ফাওবগী মনুংদা রাজ্য ৭, বিহার, তেলঙ্গানা, মহারাস্ত্রা, গুজরাত, হিমাচল প্রদেশ অমসুং মিজোরমনা মশানা থমজখিবা ইমুং মনুংশিংদা তোতি ঈশিং য়ৌহনবগী পান্দমগী ১০% হেনবদি ফংবা ঙম্নখ্রে। তমিল নাদু, করনাতকা, ওরিশা অমসুং মনিপুরনা হায়রিবা মতমশিং অসিদা থবক নিংথিজনা তৌনখি। জল জীবন মিসন হায়রিবা ফ্লেগশিপ প্রোগ্রাম অসিগী মখাদা খুঙ্গংগী মফমশিংদা লৈরিবা মীওইশিংদা চংদবা য়াদবা শেবা পুম্নমক ফংহনগনি হায়বগী হীরমদা রাজ্যশিংনা থৱাই য়াওনা থবক পায়খৎলি অমসুং ইমুং খুদিংদা তোতি ঈশিং ফংহনবগী থবকশু খোংজেল য়াংনা অমসুং পাক শন্না পাংথোক্লি হায়বা তাক্লি।

লৈবাক অসিদা লৈরিবা খুঙ্গংগী ইমুং কোতি ১৮.৯৩গী মনুংদা কোতি ৪.৬০ (২৪.৩০%)দি হান্ননা তোতি ঈশিং পীখ্রবনি। মখা তাবা পান্দমদি তোতি পুশিনবগী খুদোংচাবা খুদিংমক ফংহন্দুনা লেমহৌরিবা ইমুং কোতি ১৪.৩৩ অসিদা অকক্নবা মতমগী মনুংদা তোতি ঈশিং য়ৌহনবা অসিনি। মসিগী পান্দম অসিবু নিংশিংলদুনা রাজ্য/য়ু.তি.শিংনা নোংমদা ইমুং লাখ ১ হেন্না তোতি পুশিলহল্লি।

ইং ২০২০-২১দা জে.জে.এম. থবক ওইনা পাংথোক্নবগীদমক্তা লুপা কোতি ২৩,৫০০গী শেনফম কায়থখ্রবনি। মখা তাবা ওইনা ১৫শুবা ফাইনান্স কম্মিসনগী রুরেল লোকেল বোদিশিংদা পীথবা শেন্থংগী ৫০%, লুপা কোতি ৩০,৩৭৫ অসিশু ঈশিং পীনবা অমসুং সেনিতেসনগীদমক্তা শিজিন্ননবা লৈখ্রবনি। মসিগী শেনফম অসিগী ৫০%দি রাজ্যশিংদা হায়রিবা অসিবু থবক ওইনা পাংথোকপদা, শেন্নবদা অমসুং খুঙ্গংগী মীওইশিংদা মতম চানা অমসুং তুং কোয়না থক্নবা ঈশিং পীনবা পথাপ শেম্বা অমসুং চলায়বদা তেংবাংনবা হায়দুনা হান্ননা থাদোকখ্রবনি।

জল শক্তি মন্ত্রালয়না জল জীবন মিসন (জে.জে.এম.) অসি ইং ২০২৪ ফাওবগী মনুংদা খুঙ্গংগী ইমুংশিংদা মতিক চাবা চাংদা মতম চানা অমসুং তুং কোয়না থক্নবা ঈশিং ফংহন্নবা হায়দুনা রাজ্যশিংগা খুৎশম্নদুনা পাংথোকপনি। জল শক্তি মন্ত্রালয়গী মখাদা লৈবা লৈবাক্কী মিসন অসিনা হায়রিবা অসিবু থবক ওইনা পাংথোক্নবা হায়দুনা রাজ্য/য়ু.তি.শিংবু শেন্নদুনা কন্না হোৎনদুনা লাক্লি। মীসন অসিগী থবক ওইনা পাংথোকপগী ফিভম অসি নুমিৎ খুদিংগী য়েংশিল্লি।

রাজ্য/য়ু.তি. কয়ানা মিসন অসিগী পান্দম অসি ২০২৪গী মমাংদা ফংনবা হায়দুনা কন্না হোৎনরি। ইং ২০২১দা বিহার, গোৱা , পুদুচেরী অমসুং তেলঙ্গানানা মিসন অসিগী থবক পুম্নমক লোইশিন্নবা থৌরাং য়াৎলি। মসিগা মান্ননা ইং ২০২২দা গুজরাত, হরয়ানা, হিমাচল প্রদেশ, জম্মু অমসুং কশ্মির, লদাখ, মেঘালয়, পঞ্জাব, সিক্কিম অমসুং উত্তর প্রদেসনা মখোয়গী মফমশিংগী চাদা ১০০% কোনবা ঙম্নবা হোৎনরি। অরুনাচল প্রদেশ, ছতিসগর, করনাতকা, মধ্য প্রদেশ, মনিপুর, মিজোরম, নাগালেন্দ অমসুং ত্রিপুরানা ইং ২০২৩ ফাওবগী মনুংদা থবক পুম্বা লোইশিন্নবা অমসুং আন্ধ্র প্রদেশ, অসম, ঝারখন্দ, কেরলা, মহারাস্ত্রা, ওরিশা, রাজস্থান, তমিল নাদু, উত্তরাখন্দ অমসুং নোংচুপ বেঙ্গোলনা ইং ২০২৪ ফাওবগী মনুংদা লোইশিন্নবা থৌরাং য়াৎলি।

প্রধান মন্ত্রী শ্রী নরেন্দ্র মোদীনা খুঙ্গংগী মফমশিংদা লৈবা মীওইশিংগী “পুন্সি মহিংদা নুংঙাইবা ওইহনবা” হায়বগী মংলান অসিগী মতুং ইন্না শেলগী তেংবাং পীবা য়াওনা য়ুম, লম্বী-শোরোক, ক্লিন ফুএল, ইলেক্ত্রিসিতী অমসুং অফবা অমাংশংগী খুদোংচাবা ফংহনবা হায়বসিগা মরী লৈননা জল জীবন মিসন্না খুঙ্গংগী ইমুং খুদিংদা থক্নবা ঈশিং ফংহন্দুনা মখোয়গী পুন্সি মহিং ফগৎহনবতা নত্তনা, মরু ওইনা নুপী অমসুং নুপীমচাশিংগী, ঈশিংদগী থোক্কনবা লায়না কয়াদগীশু ঙাকথোক্লি। 

*******