প্রধানমন্ত্রীগী লোইশঙ

প্রধান মন্ত্রীনা আই.বি.এম.গী সি.ই.ও. আর্বিন্দ কৃষ্ণগা ৱারী শানখ্রে

মালেমগী লৈবাকশিংগা চাংদম্নবদা নোপ্তনবা অমসুং লোকেল সপ্লাই চেন্দা অতৎ অখম লৈতনা মরোমদোম লেপচবা ঙম্বা ভারত অমগী মংলানগা লোইননা ঐখোয়না মাঙজিল থানা চৎলি

ভারত্তা শেল থাদবদা চপ চাবা মতম হায়বদু ওইরেঃ প্রধান মন্ত্রী

সরকার অসিনা তেক্নোলোজীদা মায় ওনশিন্দুনা 'য়ুমদগী থবক শুব'গী চৎনবী অসি লেপ্পা লৈতনা চৎনবগীদমক কন্না হোৎনরিঃ প্রধান মন্ত্রী

ভারতনা অপুনবা, তেক অমসুং দেতানা পুবা মমল হোংবা অমসুং চয়েৎনবা লৈতবা হেলথ কেয়র সিস্তেম অমা শাগৎনবা হোৎনরিঃ প্রধান মন্ত্রী

আই.বি.এম.গী সি.ই.ও.না আত্মনির্ভর ভারত্তা মহাক্কী থাজবা ফোংদোকখ্রে; আই.বি.এম.না ভারত্তা শেল থাদনবা লৈরিবা প্লানশিংগী মতাংদা প্রধান মন্ত্রীদা পাউদমখি

Posted On: 20 JUL 2020 5:42PM by PIB Imphal

প্রধান মন্ত্রী শ্রী নরেন্দ্র মোদীনা ঙসি ভিদিও কনফরেন্সকী খুথাংদা আই.বি.এম.গী সি.ই.ও. শ্রী আর্বিন্দ কৃষ্ণগা ৱারী শানখ্রে।

প্রধান মন্ত্রীনা আর্বিন্দ কৃষ্ণবু চহী অসিগী অঙনবদা আই.বি.এম.গী গ্লোবেল হেদ ওইরকপদা হরাউবা ফোংদোকখি। মহাক্না আই.বি.এম.গা ভারতকগী মরক্তা লৈনরক্লিবা শক্তি লৈরবা মরী অমসুং লৈবাক অসিদা কম্পেনী অসিনা শহর ২০ লোমদা মীওই লাখ অমা হেন্না থবক পীদুনা মশক থোক্না থবক তৌরিবসিগী মতাংদা পনখি।

লল্লোন ইতিক্কী হীরমদা কোবিদনা পীরিবা শাফু অসিগী মতাংদা ঙাংলদুনা প্রধান মন্ত্রীনা হায়খি, 'য়ুমদগী থবক শুবা' হায়বসি পাক শন্না চৎনরে অমসুং সরকার অসিনসু হোংলক্লিবা তেক্নোলোজীগী খোংচৎ অসি কায়দনবগীদমক ইনফ্রাস্ত্রকচর পীনবগীদমক লেপ্পা লৈতনা হোৎনরি। মহাক্না মরী লৈনবা তেক্নোলোজী অমসুং হন্দক আই.বি.এম.না লৌখিবা মখোয়গী শিন্মী ৭৫%না য়ুমদগী থবক শুহন্নবা লেপখিবা ৱারেপ অদুদা লাক্কদবা খুদোংচাদবশিংগী মতাংদা খন্নখি।

সি.বি.এস.ই.গা খুৎশম্নদুনা ভারতকী মহৈলোইশঙ ২০০দা এ.আই. করিক্যুলম হৌদোক্নবা হোৎনবদা আই.বি.এম.না লৌরিবা থৌদাংশিংবু শিংথাখি। মহাক্না হায়খি মদুদি সরকার অসিনা মহৈরোইশিংদা এ.আই., মেচিন লর্নিং অসিনচিংবগী মতাংদা চহী ঙল্লিঙৈদগী হৌনা খঙহন্দুনা লৈবাক অসিদা তেক্নোলোজীগী ইহৌ অমা শাগৎনবা হোৎনরি। আই.বি.এম.গী সি.ই.ও.না হায়খি মদুদি তেক্নোলোজী অমসুং দেতাগী মতাংদা তাকপীবসি অলজিব্রাগুম্বা তঙাইফদবা স্কিলশিংগী মনুংদা চলহনগদবনি, মসি য়াম্না নুংঙাইবা মওং অমদা অমসুং ঙল্লিঙৈদগী হৌনা হৌদোকপীগদবনি।

প্রধান মন্ত্রীনা মতম অসি ভারত্তা শেল থাদবদা খ্বাইদগী চপ চাবা মতম্নি হায়না ফোংদোকখি। মহাক্না হায়খি মদুদি লৈবাক অসিনা তেক্কী সেক্তরদা শেল থাদবদা তরাম্না ওক্লি অমসুং মতেং পাংগনি হায়খি। মালেমগী লৈবাক কয়ানা খোংজেল তপথরকপা মতমদা ভারত্তদি এফ.দি.আই. লাকপগী চাং হেনগৎলক্লি হায়না মহাক্না মখা তাখি। মহাক্না হায়খি মদুদি মালেমগী লৈবাকশিংগা চাংদম্নবদা নোপতনবা অমসুং লোকেল সপ্লাই চেন্দা অতৎ অখম লৈতনা মরোমদোম লেপচবা ঙম্বা ভারত অমগী মংলানগা লোইননা ঐখোয়না মাঙজিল থানা চৎলি। আই.বি.এম.গী সি.ই.ও.না আই.বি.এম.না ভারত্তা চাউনা শেল থাদনবা লৈরিবা প্লানশিংগী মতাংদা প্রধান মন্ত্রীদা পাউদমখি অমসুং আত্মনির্ভর ভারত্তা মহাক্কী থাজবা ফোংদোকখি।

প্রধান মন্ত্রীনা হৌখিবা চহী তরুক অসিদা মীপুম খুদিংমক্তা খ্বাইদগী ফরবা হেলথ কেয়র সিস্তেম অমা পীনবা হোৎনরিবা হকশেল ফনবগীদমক সরকারনা হোৎনরিবশিংগী মতাংদা ফোংদোকখি। মহাক্না হকশেলগী হীরমদা শীজিন্ননবা ভারতকী ওইবা তোপ-তোপ্পা এ.আই. তুল অমা পুথোকপা য়াবগী ওইথোকপগী মতাংদা অমসুং লাইনাশিং মাঙজৌননা খঙদোক্নবা অমসুং লৈনবা য়ানবগী মতাংদা ফোংদোকখি। ভারতনা অপুনবা, তেক অমসুং দেতানা পুবা মমল হোংবা অমসুং চয়েৎনবা লৈতবা হেলথ কেয়র সিস্তেম অমা শাগৎনবা হোৎনরি হায়না মহাক্না ফোংদোকখি। আই.বি.এম.না হকশেলগী ওইবা মংলান অমা শাগৎপদা অচৌবা থৌদাং লৌবা ঙমগনি হায়না মহাক্না ফোংদোকখি। আই.বি.এম.গী সি.ই.ও.না প্রধান মন্ত্রীগী আয়ুশ্মন ভারতকী মংলানবু শিংথাখি অমসুং লাইনা খঙদোক্নবা হোৎনবদা তেক্নোলোজী শীজিন্নবগী মতাংদসু ৱারী শানখি।

খন্ন-নৈনখিবদুদা য়াওবা অতোপ্পা হীরমশিংদি দেতা সেক্যুরিতী, সাইবর এতেক, প্রাইবেসিগী মতাংদা, অমসুং য়োগানা হকচাংদা পীবা কান্নবশিংগী মতাংশিংনি।

***



(Release ID: 1639982) Visitor Counter : 94