য়ুথ এফিয়র্স অমসুং স্পোর্তসকী কেন্দ্রগী মন্ত্রী কিরেন রিজিজুনা ঙসি ভিদিও কনফরেন্সিংগী খুথাংদা রাজ্য অমসুং য়ুনিয়ন তেরিতোরী ১৮গী মন্ত্রীশিং অমসুং য়ুথ এফিয়র্স অমসুং স্পোর্তস বিভাগকী মকোক থোংবা ওফিসিএলশিংগা লোইননা মীফম অমা পাংথোকখ্রে। মীফম অদুনা রাজ্য অমসুং য়ুনিয়ন তেরিতোরীশিং পুম্নমক্না কোবিদ-১৯গী মতুংদা শান্ন-খোৎনবগী থবক মখা চত্থনবগী লম্বী য়াত্থোক্নবা অমসুং নেহরু য়ুব কেন্দ্র সংগথন (এন.ৱাই.কে.এস.) অমসুং নেসনেল সর্বিস স্কিম (এন.এস.এস.)কী ভোলুন্তীয়রশিংবু রাজ্যগী থাক্তা তোঙান-তোঙানবা থৌশিলশিং চাউখৎহন্নবা হোৎনবদা শরুক য়াহন্নবগী মতাংদা নুমিৎ নিনি পাংথোক্কদবা মীফমগী অহানবা শরুকনি।

মীফম অদুদা ৱা ঙাংলদুনা শ্রী রিজিজুনা হায়খি, "এন.ৱাই.কে.এস. অমসুং এন.এস.এস. ভোলুন্তীয়রশিং অসিনা কোবিদ-১৯গী মনুংদা সিবিল এদমিনিস্ত্রেসনগী মখাদা শিংথানিংঙাই ওইবা থবক কয়া অমা পায়খৎখ্রে। হৌজিক হৌজিক্কী ওইনা ভোলুন্তীয়র লাখ ৭৫ রোম লৈরি অমসুং অনলোক-২গী মতমদা ঐখোয়না মশীং অসি কোতি ১ য়ৌহন্নবা ৱারেপ লৌরে। প্রধান মন্ত্রীনা মাংজৌননা আত্মনির্ভর ভারত লাউথোকখ্রে। লৈবাক অসিনা অথিংবশিং লৌথোক্লকপনা, ঐখোয়গী ভোলুন্তীয়রশিংনা সমাজ অসিগী তোঙান-তোঙানবা কাংলুপশিং হায়বদি লৌমীশিং, অপীকপা করবারগী মপুশিং অমসুং অতোপ্পা মীওইশিংদা দাইরেক্ত বেনিফিৎকী মতাংদা মখোয় মশানা মরোমদোম লেপচদুনা কান্নবশিং ফংজনবগীদমক ৱাখল লৌশিং য়েন্থোক্কনি। ঐহাক্না রাজ্যশিংদা ভোলুন্তীয়রশিংবু থৌগৎপীনবা অমসুং মখোয়বু থবক হেন্না ফনা তৌনবগীদক মতেং পাংবীনবা পুক্নিং চিংশিনখি। মখোয়না দিস্ত্রিক্ত এদমিনিস্ত্রেসনগা লোইননা কেন্দ্র সরকারদগী খুৎ কয়া কন্না থিংজিন্দবা মওংদা হকথেংননা থবক পায়খৎকনি।"

অশুপ্পা হীরমদা য়াওরিবা ৱাফমশিং খন্নরদুনা, রাজ্যশিংগী মশীং য়াম্লবা মীহুৎশিংনা রাজ্য খুদিংদা মখোংদগী হৌবা অমসুং ওলিপীক থাক্কী স্পোর্তস ত্রেনিং চাউখৎনবগীদমক মন্ত্রালয় অসিনা লৌখৎলক্লিবা খোংথাংশিংবু থাগৎনখি। রাজ্য খুদিংদা খেলো ইন্দিয়া স্তেৎ সেন্তর এক্সিলেন্স (কে.আই.এস.সি.ই.) অমমম লিংখৎনবা অমসুং রাজ্য অমা মশান্না অমগী থৌসিল অসি মন্ত্রীশিং অমসুং ওফিসিএলশিংনা রাজ্যশিং অসিনা মশাগী ওইনা মৈহৌরোলদগী শান্নদুনা লাক্লবা মশান্না অমবু লৌখৎচবদা অপাম্বা ফোংদোক্লদুনা রাজ্যশিংনা পাম্নবা উৎনখি। শ্রী রিজিজুনা হায়খি, "ঐখোয়গী মন্ত্রালয় অসিনা রাজ্যশিংদা মশান্না অমা নত্ত্রগা অনীদা মীথোইবা ওইনবগীদমক মতেং পাংগনি অমসুং শেল থাদগনি। কে.আই.এস.সি.ই.না ওলেম্পিক য়ৌনা মালেমগী থাক্তা চাংদম্নবা য়ারবা শান্নরোই পুথোক্নবগীদমক শেম্নবা অখন্নবা মশান্না অসিগী নোদাল সেন্তর ওইগনি। রাজ্যশিংনা অতোপ্পা মশান্নদা, মৈহৌরোলগী মশান্না য়াওনা শান্নরোই পুথোক্নবগীদমক খনবা য়াগনি অদুবু পান্দমদি দিসিপ্লিন অমা নত্ত্রগা অনীদা থমগদবনি।" রাজ্যশিংগী মীহুৎশিংনা হায়খি মদুদি লৈবাক অসিদা লৈরিবা জিল্লা খুদিংদা খেলো ইন্দিয়া সেন্তর ১০০০ লিংখৎপনা লমদম অসিগী হৈথোই শিংথোইবা পুথোকপদা নত্তনা লৈবাক অসিদা শান্ন-খোৎনবগী চৎন-লোনচৎ অমা শেমগৎপা ঙম্লগনি। তোঙান-তোঙানবা রাজ্যশিংনা মখোংদগী হৌনা শেমগৎনবা হোৎনবদা মখোয়গী ওইবা মাই পাকপগী ৱারীশিং পাউদম্নখি।

মন্ত্রীনা মখা তানা হায়খি মদুদি ফিৎ ইন্দিয়া স্কুলদা মহৈলোইশঙ লাখ ২.৫ হেন্না মিং চল্লকপনা ফিৎ ইন্দিয়া মুবমেন্তকী থবক থৌরমশিংদা রাজ্যশিংনা শরুক য়াবগী মওং মতৌ অসি পুক্নিং থৌগৎনিংঙাই ওই। মন্ত্রীনা হায়খ, "হকচাং ফবা হায়বসিনা লৈবাক অসিগী নহাশিংগী পুন্সিগী লম্বী অমা ওইনবগীদমক রাজ্য অমসুং য়ূনিয়ন তেরিতোরী খুদিংমক্তা মখোয়গী রাজ্য অমসুং য়ুনিয়ন তেরিতোরীদা লৈরিবা মহৈলোইশঙ খুদিংমক্না ফিৎ ইন্দিয়া স্কুলগী থবক থৌরমশিংদা মতিং লৈনবা শরুক য়াবীনবা ঐহাক্না হায়জরি।"

রাজ্যগী মীহুৎশিংগা ৱারী শান্নরবা মতুংদা শ্রী রিজিজুনা হায়খি, "মীফম অদু য়াম্না কান্নবা মীফম অমা ওইখ্রে। মন্ত্রী অমসুং ওফিসরশিংনা শান্ন-খোৎনবা অমসুং য়ুথ এফিয়রগা মরী লৈনবা খুদোংচাদবা কয়াগী মতাংদা ফজবা ৱাফম কয়া ফোংদোকখি। মখোয়না ঐগী ইফমদা কোবিদকী মতুংদা শান্ন-খোৎনবা অমসুং এথলেৎশিংগী ত্রেনিং হৌনবগী শেম শারিবশিংগী মতাংদা কুপ্না পাউদমখি। রজায়শিং অসিনা অফবা থবক থৌরম কয়া পায়খৎলি অমসুং মন্ত্রালয় অসিনা য়াম্না নক্না মখোয়দা মতেং পাংলি। মীফম অসিনা লোইরকপদা ঐখোয়না মমাং থানা চৎপা য়ানবা লম্বী অমা শোইদনা পুথোক্লক্কনি হায়বসি ঐহাক্না চেৎনা থাজৈ।"

অহানবা নুমিত্তা, অন্ধ্র প্রদেশ, অসম, ছতিসগর, গুজরাৎ, হরিয়ানা, হিমাচল প্রদেশ, জম্মু অমসুং কাশ্মির, করনাতাকা, কেরলা লদ্দাখ, মহারাস্ত্রা, ওরিশা, পঞ্জাব, রাজস্থান, তমিল নাদু, তেলঙ্গানা, উত্তরাখন্দ, অমসুং নোংচুপ বেঙ্গালনা শরুক য়াখি। অতোপ্পা রাজ্য/য়ু.তি.শিংনা জুলাই ১৫, ২০২০গী মীফমদা শরুক য়াগনি।

***