এফ.আই.সি.সি.আই ফ্রেমসকী ২১সুবা ইদিসন্দা ইনফোর্মেসন অমসুং ব্রোদকাস্তিংগী য়ুনিয়ন মিনিস্তর প্রকাস জাবারেকরনা ঙসি হায়খি অনলোক মনুংদা ফিল্ম পুথোকপা অমুক হৌনবা সরকারনা অথুবদা স্তেন্দার্দ ওপেরেতিং প্রোসিদুরশিং লাউথোক্লগনি। কোবিদনা মরম ওইদুনা লেপলুরবা ফিল্ম পুথোকপগী থবক অমুক হৌনবা, তি ভি সেরিএলশিং, ফিল্ম, পুন্না পুথোকমিন্নবা, এনিমেসন, গেমিং পুথোকপগী থবকশিংদা মতেং পীনবা ঐখোয় খন্নরি।

কোবিদ-১৯ লাইচৎনা মরম ওইদুনা, চহিগী ওইবা মেদিয়া অমসুং ইন্তরতেনমেন্ত ইন্দস্ত্রিগী ২০২০গী থৌরম অদু মহৌশানা মুম্বাইগী পৱাই পাৎতা পাংথোকপা অদুগী মহুৎতা ভর্চুএল ওইনা পাংথোকখি।

মিনিস্তরনা হায়খি কোবিদ লাইচৎনা মরম ওইদুনা ভর্চুএল ওইনা পুনবা অসি অনৌবা নিয়ম অমা ওইরে। ভারতনা মমল হোংনা ফিল্ম অমসুং তি ভি সেরিএলশিং পুথোকপগী খুদোংচাবা ফংলি অমসুং ভারতনা পুথোকপশিং মালেমগী লৈবাক ১৫০ হেনবদা য়েংনরি। মেদিয়া অমসুং হরাও-কুম্মৈগী লমদা ভারতনা মাংজিল থানবা অমসুং মসিগী কান্নবা লৌনবা মরী লৈনবশিং পুন্না থবক তৌমিন্নগদবনি।

ফাইনান্সকী রাজ্য মন্ত্রী অনুরাগ থাকুরনা হায়খি ভারত অসি লৌশিংদা য়ুম্ফম ওইবা ইকোনোমি অমা শেমগৎপদা ক্রিয়েতিব ইন্দস্ত্রিনা মরুওইবা থৌদাং অমা লৌরি। মশিং য়াম্না পুথোকপদগী মগুন লৈবা পুথোক্নবা মাইকৈদা মিৎয়েং চঙগদবনি।

থৌরম অদুগী তেক্নিকেল সেসন্দা ইনফোর্মেসন অমসুং ব্রোদকাস্তিংগী সেক্রেতরি, অমিৎ খারেনা হায়খি ফিল্মদা সরকারগী থৌদাং অসি মতেং পাংবা অমা ওইগদবনি। তোঙান-তোঙানবা কাংলোনশিং অসি অমতা ওইনা পুনশিন্দুনা চৎন-কাংলোনশিং মশিং হন্থহনগদবনি। মেদিয়া অমসুং হরাও-কুম্মৈ ইন্দস্ত্রি অসি ইনফ্রাস্ত্রকচর অমা ওইনা শৌগৎনবা সরকারনা মপুংফানা মতেং পাংলি অমসুং দিফিনিসন খর শেমদোকপা দরকার ওইরি।

নিতি অয়োগকী সি.ই.ও অমিতাব কান্তনা হায়খি অৱাবা খুদিংমক খুদোংচাবা অমা ওন্থোকপা য়াই অমসুং তুংকোইনা চাউখৎনবা অমসুং থবক পীনবা মালেমগী মাংজিল থাবা অমা ওইনবা ভারতনা শেমগৎপা য়াবা সেক্তর ১২-১৩ মশক খঙদোক্কদবনি। মসিগী মনুংদা মেদিয়া অমসুং হরাও-কুম্মৈ ইন্দস্ত্রিসু অমনি।

স্তার অমসুং দিসনি ইন্দিয়াগী চেয়রমেন, উদয় সনকরনা হায়খি মেদিয়া অমসুং হরাও-কুম্মৈ ইন্দস্ত্রি অসি ক্রেয়েতিব ইকোনোমিগী মরুওইবা শরুক অমনি। মসিনা থবক অমসুং ললোন-ইতিক ফংহল্লি অমসুং মালেমদা ভারত মশক থোকহল্লি। অদুবু ভারতকী মেদিয়া ইন্দস্ত্রি মরুওইনা, প্রিন্ত, তি ভি অমসুং দিজিতেল অসি এদভরতাইজ তৌবদগী ফংলকপদা শেনগী মখা পোল্লি অমসুং কোবিদ লাইচৎনা মরম ওইদুনা মসিগী থবক অসিদা অচৌবা অকাইবা পীরে। করিগুম্বা ইন্দস্ত্রি অসি চাউখৎহনবা তারবদি, মসি এদভরতাইজ তৌবদগী ফংলকপদা শেনগী মখা পোল্লিবা অসিদগী কোকহনগদবনি।

গুগলগী সঞ্জয় গুপ্তনা হায়খি লৈবাক অসিগী মেদিয়া অমসুং হরাও-কুম্মৈগী ইন্দস্ত্রিদা কোবিদনা অকায়বা থোকহল্লে। ২০২০-২১দা সেক্তর অসিনা দোল্লর বিল্লিয়ন ২০দগী দোল্লর বিল্লিয়ন ১৫ ফাওবা মাঙবা য়াই অদুবু মসি হান্নগী ফিবমদা অমুক হল্লকপা ঙম্বগী থৌনা লৈরি। ইন্দস্ত্রি অসি মপুংফানা চাউখৎলক্নবা তেক্স লৌনবগী থবকশিং অমসুং চৎন-কাংলোনশিং কোমথোক্নবা মহাক্না খঙহনখি।

জুলাইগী ১১ ফাওবা পাংথোক্কদৌরিবা এফ.আই.সি.সি.আই ফ্রেমস ভর্চুএল সম্মিৎ অসিদা ইন্দস্ত্রি অসিগী মকোক থোংবা অখঙ-অহৈশিংনা মেদিয়া অমসুং হরাও-কুম্মৈ ইন্দস্ত্রিগী মতাংদা মখোয়গী ওইবা ৱাফমশিং ফোংদোক্কনি। এফ.আই.সি.সি.আই-ফ্রেমস ২০২০দা ইতালিনা ফোকস কন্ত্রি ওইরি।

***