রাজ্যশিংনা মথৌ তাবগী মতুং ইন্না শ্রমিক স্পিসিএল ত্রেন্দগী ইন্দিয়ন রেলৱেজনা মখা তানা মাইগ্রেন্তশিং নুংঙাইবা অমসুং অশোই-অঙাম য়াওদনা পুদুনা চৎনবা ত্রেনশিং পীনবগী অচেৎপা ৱাফম থমখ্রে।

হৌজিক ফাওবদা ইন্দিয়ন রেলৱেজনা মীওই চাওরাক্না মীওই লাক্ষ ৬০ রোম মখোয়-মখোয়গী পন্থুংফম রাজ্যশিং তান্না পুদুনা স্পিসিএল ত্রেন ৪৩৪৭ হেন্না চেলহনখ্রে। শ্রমিক ত্রেনশিং অসি মে ১, ২০২০দগী চেনবা হৌরকখিবনি।

ইন্দিয়ন রেলৱেজনা রাজ্যশিংদগী ফংহন্নবা তাল্লকপগী মতুং ইন্না শ্রমিক স্পিসিএল ত্রেনশিং মখা তানা পুং ২৪গী মনুংদা রাজ্যশিংদা পীরগনি হায়না রাজ্য সরকারদা হায়খ্রে। রেলৱে মন্ত্রলয়না রাজ্য সরকারশিংদা শ্রমিক ত্রেনশিংগী মতাংদা মখোয়গী মথৌ তাবশিং অদু খংহল্লক্নবা অমসুং তাল্লক্লিবা মীশিং অদু ত্রেন্দা পুগদৌরিবা অদু নিংথিজনা য়েংশিল্লব্রা অমদি লেপ্পব্রা হায়বদু য়েংনবা হায়খ্রে।

রেলৱে বোর্দকী চেয়রমেননা মে ২৯ অমসুং জুন ৩দা রাজ্যশিংদা হীরমসিগী মতাংদা ইখ্রে অমসুং “হায়রকপগী মতুং ইন্না ইন্দিয়ন রেলৱেজনা খুদক্তা পুং ২৪গী মনুংদা শ্রমিক ত্রেনশিং পীগনি” হায়বা ৱাফম ফোংদোকখ্রে। ঙসি রাজ্যশিংগী চীফ সেক্রতরীশিংদা চপ মান্নবা ৱারোলশিং অসি পল্লদুনা চিথী অমা ইখ্রে।

মতুংদসু মথৌ তারকপা অমা হেক লৈবদা অহেনবা শ্রমিক স্পিসিএল ত্রেনশিং পীগনি হায়না ইন্দিয়ন রেলৱেজনা হায়খ্রে। অতেনবা নোতিস অমদা পীবগী মথক্তা হেনগৎলকপা মতমদা অহেনবা অমা পীনবগী তাল্লকপশিং অদুসু ফংহনগনি।

ভারতকী ইকাই খুম্নরবা সুপ্রীম কোর্তনা, মেগী তাং ২৮, ২০২০দা থোরকপা ওর্দর অমদা মাইগ্রেন্ত ৱার্করশিংনা মাগী-মাগী মরমদা হন্নিংবশিংগীদমক্তা লমজিং-লমতাক্কী ওইবা ৱারোল অমা থোকখ্রে। ইন্দিয়ন রেলৱেজনা ওর্দর অদু ঙাকপগী মখা তাবা মরু ওইবা খোংথাংশিং পায়খৎকনি।

*****