প্রধান মন্ত্রী শ্রী নরেন্দ্র মোদীনা ঙসি স্পিক মেকেগী মালেমগী ওইবা কনভেন্সন্দা ভিদিও কনফরেন্সকী খুত্থাংদা ৱা ঙাংখ্রে।

অসিগুম্লবা লুরবা মতম অসিদা ঈশৈ নোংমাইগী মীওইশিংনা ৱাখল নীংহন্নদনা লৈববু প্রধান মন্ত্রীনা থাগৎপা ফোংদোক্লি অমসুং কনভেন্সন অসিগী মপুং ওইবা পান্দমদি কোবিদ-১৯না নহাশিংদা ৱাহল্লিবা অসি খরদা ওইরবসু কোক্নবনি।

পুৱারিদা লান অমসুং অৱা-অনা তাবা মতমদা ঈশৈ নোংমাইনা পুক্নিং ইথিল হাপখিবা অমসুং মীয়াম্বু পুন্সিনখিবশিংবু নৌহৌননা মহাক্না মীয়ামদা নীংশিংহনখি।

কবি, শৈশকপা অমসুং আর্তিস্তশিংনা অসিগুম্বা মতমসিদা মীয়ামদা থৌনা হাপ্নবা ঈশৈ অমসুং শৈরেং কয়া ইখি হায়না মহাক্না হায়খি।

মালেম অসিনা মীৎনা উবা ঙমদবা য়েক্নবা অমগা লান্থেংনরিবা অসিদা শৈশকপশিং, শৈরেংবশিংনা ঈশৈ কয়া ইদুনা মীয়ামগী থাজবা হেনগৎহল্লি হায়না প্রধান মন্ত্রীনা হায়খ্রে।

লৈবাক অসিনা লায়চৎ অসিবু লান্থেংনবা অসিদা ইথিল হাপ্নবা মীয়াম কোতি ১৩০না পুল্লপ পুন্দুনা খুবাক খুখিবা, কাংশি খিংখিবা অমসুং মোইবুং খোঙখিববু প্রধান মন্ত্রীনা মীয়ামদা নৌহৌননা নীংশিংহনখি।

করিগুম্বা মীয়াম কোতি ১৩০না পুল্লপ পুন্দুনা মান্নবা ৱাখল অমগা লোয়ননা থোক্লকপা মতমদা ঈশৈ ওল্লি হায়না মহাক্না হায়খি।

ঈশৈ নোংমাইদা তান চান্নবা অমসুং থকশি খাসিগী তঙাই ফদবা লৈবগুম্না লায়চৎ অসি থেংনবদসু মসিগা চপ মান্ননা লৈবাক মীয়াম্না থকশি খাসি নায়বসিসু তঙাই ফদে হায়না মহাক্না হায়খি।

হন্দক্কী চহীসিগী স্পিক মেকে কনভেন্সন্সিদা য়াওরিবা নেচর ৱাল্ক, হেরিতেজ ৱাল্ক, খোরিলোল অমসুং অশেংবা চিঞ্জাক্কা লোয়ননা য়োগ অমসুং নাদ য়োগগী মচলশিংবু মহাক্না থাগৎখি।

নাদ য়োগগী মতাংদা শন্দোক্না তাক্লদুনা মহাক্না ভারত্তা নাদ হায়বসি ঈশৈ নোংমাই অমসুং পাঙ্গলগী হৌরকফম্নি হায়না মহাক্না হায়খি।

নাদনা মসিগী খ্বাইদগী অৱাংবা থাক নত্ত্রগা ব্রহমান্দ অসি ঐখোয়না য়োগ অমসুং ঈশৈ নোংমাইগী খুত্থাংদা ঐখোয়গী নুংগী ওইবা পাঙ্গল শক্তি চাং নায়হনবা মতমদা য়ৌই হায়না মহাক্না হায়খি।

মরম অসিনা ঈশৈ নোংমাই অমসুং য়োগদা মেদিতেসন অমসুং ৱাখলগী ইথিল পীবা ঙম্বগী মতিক য়াওরিবনি অমসুং অনিমকসি পাঙ্গলগী অচৌবা হৌরকফম অমনি হায়না প্রধান মন্ত্রীনা মখা তাখি।

প্রধান মন্ত্রীনা হায়খিবদা ঈশৈ নোংমাই অসি হরাওবগী হৌরকফম ওইবতা নত্তনা মীওইবগী সেবা অমসুং অরানবা তৌখিবগী চুম্থোক্নবা পাম্বৈ অমসু ওই।

ঐখোয়গী লৈবাকসিদা মীওইবা খুন্নাইগী তেংবাংবদা মপুন্সি কত্থোকখিবা ঈশৈ নোংমাই তৌবা মীওই কয়া অমসু লৈখ্রে হায়না মহাক্না হায়খি।

অরিবা কলা অমসুং ঈশৈ নোংমাইগা হৌজিক্কী মতমগী তেক্নোলোজীগা পুন্সিনবা অসিসু মতম অসিদা য়াম্না পাম্নরক্লি হায়না মহাক্না হায়খি।

লম অমসুং লোনগী পলবু কান্থোক্তুনা ঙসিদি ঈশৈ নোংমাইনা ‘এক ভারত শ্রেষ্ঠা ভারত’কী ৱাখল্লোনবু হেন্না চেৎশিনহল্লে হায়না মহাক্না হায়খি।

মীওই কয়া অমনা মখোইগী হৈজবীগী খুত্থাংদা সোসিএল মিদীয়াদা অনৌবা ৱারোল কয়া পীদুনা কোরোনাগা লান্থেংনরিবসিদা ইনোৎ হাপ্পগীদমক প্রধান মন্ত্রীনা থাগৎপা ফোংদোরক্লি।

কনভেন্সন অসিনা ঐখোয়না কোরোনা ভাইরস্কা লান্থেংনরিবা অসিদা অনৌবা লম্বী অমা পীরগনি হায়না প্রধান মন্ত্রীনা হায়খি।

***