কেন্দ্ৰীয় গৃহ মন্ত্ৰালয়ে আজি ক’ভিড-১৯ৰ বিৰুদ্ধে মোকাবিলা কৰাৰ বাবে আৰু নিয়ন্ত্ৰিত এলেকাৰ বাহিৰৰ অঞ্চলসমূহত পৰ্যায়ক্ৰমে গতিবিধিসমূহৰ পুনৰ মুকলি কৰাৰ বাবে নতুন নিৰ্দেশনাৱলী জাৰি কৰিছে৷ এই নিৰ্দেশনাৱলী ১ জুন ২০২০ তাৰিখৰ পৰা ৩০ জুন ২০২০ তাৰিখলৈ কাৰ্যকৰী হ’ব৷ পুনৰ মুকলিৰ এই পৰ্যায়ক আনলক ১ বুলি কোৱা হৈছে আৰু ইয়াত অৰ্থনৈতিক গুৰুত্ব প্ৰদান কৰা হ’ব৷ এই নিৰ্দেশনাৱলী ৰাজ্য আৰু কেন্দ্ৰীয়শাসিত প্ৰদেশৰ লগত আলোচনামৰ্মে প্ৰস্তুত কৰা হৈছেl

নতুন নিৰ্দেশনাৱলীৰ মুখ্য বৈশিষ্টসমূহ

লকডাউন নিয়ন্ত্ৰিত এলেকাসমূহৰ বাবে সম্পূৰ্ণভাৱে বলৱৎ থাকিব৷ ৰাজ্য/কেন্দ্ৰীয়শাসিত প্ৰদেশসমূহে ইয়াক স্বাস্থ্য মন্ত্ৰালয়ৰ নিৰ্দেশনা অনুসৰি পালন কৰিব লাগিব৷  নিয়ন্ত্ৰিত এলেকাৰ বাহিৰৰ স্থানসমূহত থকা পূৰ্বৰ নিষেধাজ্ঞা বাতিল কৰা হ’ব৷  এই সংক্ৰান্তত স্বাস্থ্য মন্ত্ৰালয়ে এক মানসম্পন্ন কাৰ্যকৰী প্ৰক্ৰিয়া (এছঅ’পি) মুকলি কৰিছে৷

পৰ্যায় ১ (৮ জুন ২০২০ৰ পৰা মুকলি কৰাৰ অনুমতি দিয়া হৈছে)

• ধৰ্মীয় প্ৰতিষ্ঠান আৰু ৰাজহুৱা উপাসনাস্থল;
• হোটেল, ৰেষ্টুৰেণ্ট আৰু অন্যান্য আতিথ্য সেৱা
• শ্ব’পিং ম’ল

স্বাস্থ্য মন্ত্ৰালয়ে ওপৰোক্ত কাৰ্যকলাপসমূহৰ বাবে কেন্দ্ৰীয় মন্ত্ৰালয়/বিভাগসমূহৰ সৈতে আলোচনাৰ ভিত্তিত এছঅ’পি জাৰি কৰিব৷

পৰ্যায় ২

বিদ্যালয়, মহাবিদ্যালয়, শৈক্ষিক প্ৰতিষ্ঠানসমূহ ৰাজ্য আৰু কেন্দ্ৰীয়শাসিত প্ৰদেশসমূহৰ সৈতে হোৱা আলোচনাৰ ভিত্তিত মুকলি কৰা হ’ব৷ ষ্টেকহ’ল্ডাৰসকলৰ পৰা গ্ৰহণ কৰা প্ৰতিক্ৰিয়াসমূহৰ ভিত্তিত এই প্ৰতিষ্ঠানসমূহ জুলাই, ২০২০ত পুনৰ মুকলি কৰাৰ সিদ্ধান্ত গ্ৰহণ কৰা হ’ব৷ এই প্ৰতিষ্ঠানসমূহৰ বাবে স্বাস্থ্য মন্ত্ৰালয়ে এছঅ’পি প্ৰস্তুত কৰিব৷

সমগ্ৰ দেশতে কিছুমান সীমিত সংখ্যক গতিবিধিত নিষেধাজ্ঞা বাহাল থাকিব

• আন্তৰ্জাতিক বিমান যাত্ৰা
• মেট্ৰ’ ৰেল
• চিনেমা হ’ল, জিমনেছিয়াম, ছুইমিং পুল, মনোৰঞ্জন উদ্যান, থিয়েটাৰ, বাৰ আৰু প্ৰেক্ষাগৃহ, সন্মিলন কক্ষ
• সামাজিক/ৰাজনৈতিক/ক্ৰীড়া/মনোৰঞ্জন/শৈক্ষিক/সাংস্কৃতিক/ধৰ্মীয় কাৰ্যসূচী
• ওপৰোক্ত গতিবিধিসমূহৰ মুকলিৰ তাৰিখ পৰ্যায় ৩ত সিদ্ধান্ত গ্ৰহণ কৰা হ’ব৷

ব্যক্তি আৰু সামগ্ৰীৰ নিষেধাজ্ঞাবিহীন চলাচল

• আন্তঃৰাজ্যিক আৰু ৰাজ্যৰ বাহিৰত ব্যক্তি আৰু সামগ্ৰীৰ চলাচল৷ এনে চলাচলৰ বাবে কোনো পৃথক অনুমতিৰ প্ৰয়োজন নাই৷
• কিন্তু কোনো ৰাজ্য/কেন্দ্ৰীয়শাসিত প্ৰদেশে যদি পৰিস্থিতি সাপেক্ষে চলাচল নিয়ন্ত্ৰণ কৰিবলৈ বিচাৰে তেন্তে এই জাননী আগতীয়াকৈ প্ৰকাশ কৰা হ’ব৷

নিশা ৯ বজাৰ পৰা পুৱা ৫ বজালৈ সান্ধ্য আইন বাহাল থাকিব৷

ক’ভিড-১৯ ব্যৱস্থাপনাৰ বাবে ৰাষ্ট্ৰীয় নিৰ্দেশাৱলী বাহাল থাকিব৷

নিয়ন্ত্ৰিত এলেকাৰ বাহিৰৰ গতিবিধিসমূহ ৰাজ্যই পৰিস্থিতি সাপেক্ষে সিদ্ধান্ত গ্ৰহণ কৰিব৷

৬৫ বছৰ বয়সৰ ঊৰ্ধৰ ব্যক্তি, গৰ্ভৱতী মহিলা আৰু ১০ বছৰৰ তলৰ শিশুসকলক ঘৰতে থকাৰ পৰামৰ্শ প্ৰদান কৰা হৈছে৷

ভাৰত চৰকাৰে মুকলি কৰা আৰোগ্য সেতু এপ ব্যৱহাৰৰ বাবে বিভিন্ন প্ৰাধিকৰণক উৎসাহিত কৰিবলৈ পৰামৰ্শ দিয়া হৈছে৷

গৃহ মন্ত্ৰালয়ৰ নিৰ্দেশনা চাবলৈ ইয়াত ক্লিক কৰক

*****

VG/SNC/VM/MANN