অমুক হন্না সাইক্লোন্না ভারতকী সমুদ্র খোংবান্দা, মরু ওইনা অৱাং থংবা লমদমদা শোকহল্লে অমসুং মসিদসু খ্বাইদগী হেন্না নোংচুপ বঙ্গালগী ঐখোয়গী ইচিল-ইনাওশিংনা,  নোংচুপ বঙ্গালগী মীয়াম, মফম অসিগী মাল-চাং অমাং অতা থোক্লি।

সাইক্লোন্না ওইহল্লকপা য়াবশিংদগী হৌরগা মসিগা মরী লৈনবা মীওইশিংগা ঐহাক লেপ্তনা পাউ ফাওনদুনা লাক্লি। ভারত সরকারনা রাজ্য সরকারগা হকথেংননা পাউ ফাওনখি। সাইক্লোন্না খ্বাইদগী তানা শোকহনবা ওইননবগীদমক মথৌ তাবা লৌখৎপা য়াবা থৌরাং খুদিংমক  রাজ্য সরকার অমসুং কেন্দ্র সরকারনা পুন্না অঙম্বা থাক্তা হোৎনখি। অদুবু মসি ওইজদুনসু চাউরাক্না মীওই ৮০রোমগী থৱাই ঐখোয়না কনবা ঙমখিদ্রে, মসিগীদমক ঐখোয় পুম্নমক য়াম্না নুংঙাইজদে। মখোয়গী মরী-মতা মাংজরিবা ইমুংশিংগী মফমদা কেন্দ্র সরকার, রাজ্য সরকার অমসুং ঐখোয় পুম্নমক্না অৱাবা ফোংদোকচরি অমসুং অৱাবগী পুংফম অসিদা ঐখোয় মখোয়গীদমক্তা লেপ্লি।

মাল-চাংসু ফজনা মাং তাক্লে – এগ্রিকলচরবু ওইরো, পাৱর সেক্তরবু ওইরো, তেলিকম্যুনিকেসনবু ওইরো , য়ুম-কৈ থুদেকখিববু ওইরো, মখল কয়াগী ইনফ্রাস্ত্রকচরবু ওইরো, বিজিনেসকী লমদবু ওইরো, লৌউ-শিংউগী লমদবু ওইরো, পুম্নমক্না মাংজরি।
ঙসি ঐনা নোংথক্তগী শোকহল্লবা মফমশিং অসিবু মুখ্যমন্ত্রীজীগা লোইননা, গবর্নরগা লোইননা কুপ্না য়েংশিল্লে। হৌজিক রাজ্য সরকারনা অমসুং মুখ্যমন্ত্রীজীনা ঐগী মাংদা মরু ওইবা য়েংশিনফম থোকপশিং অদু য়েংশিনখ্রে। ঐখোয়না লেপ্লে মদুদি হেক ঙম্লিমখৈ থুনা দিতেলদা সর্ভে তৌগদনি। লৌউ-শিংউগীবু ওইরো, পাৱর সেক্তরবু ওইরো, তেলিকম্যুনিকেসনবু ওইরো, য়ুমশিংগী ফিভম্বু ওইরো, ইনফ্রাস্ত্রকচরগী ফিভম্বু ওইরো য়াম্না থুনা য়েংশিনগদবনি।

কেন্দ্র সরকারগী মাইকৈদগীসু খুদক্তা তীম অমা লাক্লগনি অমসুং তীম অদুনা মফম পুম্নমক অসিদা সর্ভে তৌগনি অমসুং ঐখোয় পুন্না রিহেব্লিতেসনবু ওইরো, রিস্তোরেসনবু ওইরো, রিকন্সত্রক্সনবু ওইরো, মসিগী পাক চাউনা থৌরাং য়াৎতুনা বঙ্গালগী অৱাবগী পুংফম অসিদা ঐখোয়না মপুং ফানা মতেং পাংগনি, তেংবাং পীগনি অমসুং অথুবা মতমদা বঙ্গাল অমুক হন্না লেপ্ননবা, বঙ্গাল অথুবা মতমদা মাংদা চখৎপা ঙম্ননবগীদমক ভারত সরকারনা থোং মান্না থবক তৌগনি অমসুং মথৌ তাবা পুম্নমক মপুং ফাহন্নবগীদমক ভারত সরকারনা শেম্বা কাংলোনশিং অদু মপুং ফানা শিজিন্নদুনা ঐখোয় নোংচুপ বঙ্গালগী মতেং পাংগনি।

হৌজিক খুদক্কী ওইনা খুদোং থিবগী পুংফম অসিদা রাজ্য সরকারনা  অৱাবা মায়োক্নদনবা এদভান্স এসিস্তেন্স ওইনা লুপা করো লিশিং অমা ভারত সরকারগী মাইকৈদগী থৌরাং তৌরগনি।  লোইননা মখোয়গী মীওই লৈখিদবা ইমুং-মনুংশিংদা প্রধান মন্ত্রী রিলিফ ফন্দদগী লুপা লাখ অনি অমসুং ইঞ্জ্যুরী ওইবশিংনা লুপা লিশিং ৫০ ফাওবগী তেংবাং পীনবসু ঐখোয় প্রধান মন্ত্রী রিলিফ ফন্দদগী শিজিন্নগনি।

মালেম অপুনবা অসি খুদোংথিবা অমগা মায়োক্নরি। ভারতসু লেপ্তনা কোরোনা ভাইরসকী মায়োক্তা লান্থেংনরি। কোরোনা ভাইরসকী লানফমদা মাই পাক্ননবা মন্ত্র অমদি সাইক্লোন্দগী ঙাকথোকচনবগী মন্ত্র অনি অসি তশেংনা ওন্না তৈনৈ।

কোরোনা ভাইরসকা মায়োক্ননবা মন্ত্রদি – লৈরিবা মফম অদুদা অদুম্মক লৈয়ু, মথৌ তাদ্রিফাওবদি মপান্দা থোক্কনু অমসুং চৎলুবা মফম মফম খুদিংদা খুদুপ অনিগী অরাপ্পা থম্মু অসিনি, অদুবু সাইক্লোনগী মন্ত্রদি সাইক্লোন লাক্লে, অথুবা মতমদা শাফগদবা মফমদা হোংদোকহৌরো, মফম অদু য়ৌননবা হোৎনৌ, অদোমগী য়ুম হাংহল্লু, হায়বদি অনি অসি তোঙান তোঙানবা মখলগী লানফম অনি অমুক্তদা নোংচুপ বঙ্গালনা লান্থেংনবা তারি।  

অদুবু মসি ওইজরবসু মমতাজীগী লুচিং মখাদা রাজ্য সরকারনা হোৎনবা য়াবা হোৎনরি. ভারত সরকারনসু লেপ্তনা মখোয়গা লোইননা লৈদুনা খুদোংথিবগী পুংফম অসিদা হেক মথৌ তাবা নত্ত্রগা এদভান্স ওইনা তৌবা য়াবা থবকশিং, মতম অসিদা তৌবা য়াবশিং অমসুং মতুংদা তৌবগী তঙাইফদবা লৈবশিং অদুসু মপুং ফাহন্নবা ঐখোয় হোৎনগনি।

ঙসি লৈবাক অপুনবনা মহাক্কীদমক চাউথোকচরিবা, অদুগুম্বা রাজা রামমোহন রায়জীগী মপোক কুমওন্নি। অমসুং মতম অসিদা ঐনা নোংচুপ বঙ্গালগী শেংলবা লৈমাইদা লৈবা ফংজরিবা অসি ঐগী থমোইদা পাল্লিবা মিকুপ অমনি।  অদুবু খুদোংথিবগী পুংফম অসিগা ঐখোয় মায়োক্নরি, মতমসিদা ঐহাক মসিখক্তমক হায়জগে রাজা রামমোহন রায়জীনা ঐখোয় পুম্নমকপু থৌজালবীসনু, মতমগী মতুং ইন্না খুন্নাই অসিগী অওনবা পুরকপা হায়বা মহাক্কী মংলান অদু মপুং ফাহন্নবগীদমক ঐখোয় অমত্তা ওইনা পুন্সিন্দুনা, মঙাল নাইবা তুংলমচৎ অমগীদমক, তুংলমচৎকী মীরোলগী শেমগৎ-শাগৎনবগীদমক খুন্নাই শেমদোকপগী ঐখোয়গী থবকশিং  অসি লেপ্তনা মখা চৎথখিগনি অমসুং মসি রাজা রামমোহনজীদা কৎচবা খ্বাইদগী অথোইবা শ্রদ্ধাঞ্জলি ওইগনি।

ঐনা ঐগী নোংচুপ বঙ্গালগী ইচিল-ইনাও পুম্নমক্কী মফমদা থাজবা পীজরি মদুদি খুদোংথিবগী পুংফম অসিদা লৈবাক অপুনবা অসি অদোমগা লোইননা লেপ্লি। ভারত সরকারনা থোং মান্ননা অদোম্না তৌরক্কদৌরিবা থবক খুদিংদা শরুক য়াগনি। খুদোংথিবগী পুংফম অসিদা অদোম ময়ামগা উন্নবা লাকচরিবনি, অদুবু কোরোনা ভাইরসনা মরম ওইদুনা মীপুম খুদিংমক্কদি উন্নবা ফংজদ্রে, পুক্নীংদা নীংঙমদবা অমদি লৈহৌরগনি। মফম অসিদগী ঙসি ঐ ওরিশাদা চৎকনি অমসুং মফম অদুদা নোংথক্তগী য়েংশিনগনি, মফম অদুগী ইকাই খুম্নজরবা মুখ্য মন্ত্রীজীগা, রাজ্য সরকারগা ৱারী শানরুগনি।

ঐ অমুক হন্না নোংচুপ বঙ্গালগী অৱাবগী পুংফম অসিদা অদোমগা লোইননা লৈজরি। অথুবা মতমদা অদোম অৱাবা অসিদগী শোইদনা নান্থোক্লগনি, মসিগীদমক্তা ঐ মপুং ফানা অদোমগা লোইননা লৈজগনি।

হন্না হন্না থাগৎচরি।

*****