ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଗତ 12 ତାରିଖ ଦିନ 20 ଲକ୍ଷ କୋଟି ଟଙ୍କାର ଏକ ସ୍ଵତନ୍ତ୍ର ଆର୍ଥିକ ଏବଂ ଦୀର୍ଘମିଆଦି ପ୍ୟାକେଜର ଘୋଷଣା କରିଛନ୍ତି, ଯାହାକି ଦେଶର ସାମଗ୍ରିକ ଉତ୍ପାଦନ (ଜିଡିପି)ର ଶତକଡା 10 ଭାଗ । ସେ ଏକ ଆତ୍ମନିର୍ଭରଶୀଳ ଭାରତ ଗଠନ ଅଭିଯାନ ପାଇଁ ଆହ୍ଵାନ ଦେଇଛନ୍ତି । ସେ ମଧ୍ୟ ଆତ୍ମନିର୍ଭର ଭାରତ ପାଇଁ 5ଟି ବିଷୟ ଉପରେ ଗୁରୁତ୍ଵାରୋପ କରିଛନ୍ତି । ସେଗୁଡିକ ହେଲା ଅର୍ଥନୀତି, ଭିତ୍ତିଭୂମି, ବ୍ୟବସ୍ଥା, ଉତ୍ସାହୀ ଜନସଂଖ୍ୟା ଏବଂ ଚାହିଦା ।

ଆତ୍ମନିର୍ଭର ଭାରତ ଅଭିଯାନ ଅଧୀନରେ କୋଭିଡ-19ର ମୁକାବିଲା ପାଇଁ କେନ୍ଦ୍ର ଅର୍ଥମନ୍ତ୍ରୀ ଶ୍ରୀମତୀ ନିର୍ମଳା ସୀତାରମଣ ତାଙ୍କର ପଞ୍ଚମ ସାମ୍ବାଦିକ ସମ୍ମିଳନୀରେ ଆଜି ପ୍ରଧାନମନ୍ତ୍ରୀଙ୍କ ଗତ 12 ତାରିଖରେ ଦେଇଥିବା ଘୋଷଣାକୁ ଦୋହରାଇଛନ୍ତି । ସେ କହିଛନ୍ତି ଯେ, କୋଭିଡ-19 ବୈଶ୍ଵିକ ମହାମାରୀ ଯୋଗୁଁ ଦେଶ ଏକ ଘଡିସନ୍ଧି ମୁହୂର୍ତ୍ତରେ ଉପନୀତ ହେଲେ ମଧ୍ୟ ଏହା ଆମକୁ କେତେକ ଦିଗଦର୍ଶନ ଓ ସୁଯୋଗ ଦେଇଛି । ସେ ଦୃଷ୍ଟିରୁ ଆମକୁ ଏକ ଆତ୍ମନିର୍ଭର ଭାରତ ଗଠନ କରିବାକୁ ହେବ ।  

ଶ୍ରୀମତୀ ସୀତାରମଣ କହିଛନ୍ତି ଯେ, ଆତ୍ମନିର୍ଭର ଭାରତ ଅଭିଯାନକୁ ଫଳପ୍ରଦ କରିବା ପାଇଁ ଭୂମି, ଶ୍ରମ, ଅର୍ଥ ଏବଂ ଆଇନ ଉପରେ ଆତ୍ମନିର୍ଭର ଭାରତ ପ୍ୟାକେଜରେ ଗୁରୁତ୍ଵାରୋପ କରାଯାଇଛି । ବର୍ତ୍ତମାନର ଜଟିଳ ପରିସ୍ଥିତି ଆମକୁ ଏକ ଆତ୍ମନିର୍ଭରଶୀଳ ଭାରତ ଗଠନ ପାଇଁ ସୁଯୋଗ ପ୍ରଦାନ କରିଛି ।

ଅର୍ଥମନ୍ତ୍ରୀ କହିଛନ୍ତି ଯେ, ଆଜିର ଘୋଷଣା କେତେକ ଧାରାବାହିକ ସଂସ୍କାରର ଅଂଶବିଶେଷ । ଠିକ ଲକଡାଉନର ଘୋଷଣା ପରେ ଆମେ ପ୍ରଧାନମନ୍ତ୍ରୀ ଗରିବ କଲ୍ୟାଣ ପ୍ୟାକେଜ (ପିଏମଜିକେପି) ଘୋଷଣା କରିଥିଲୁ । 1 ଲକ୍ଷ 70 ହଜାର କୋଟି ଟଙ୍କାର ଏହି ପ୍ୟାକେଜରେ ସରକାର ମାଗଣା ଖାଦ୍ୟ ଶସ୍ୟ ବିତରଣ, ମହିଳା, ଗରିବ ବରିଷ୍ଠ ନାଗରିକ ଏବଂ ଚାଷୀମାନଙ୍କୁ ନଗଦ ଅର୍ଥ ପ୍ରଦାନ ନିମନ୍ତେ ଘୋଷଣା କରିଥିଲେ । ଏହି ପ୍ୟାକେଜର ଦ୍ରୁତ ତ୍ଵରାନ୍ଵିତ ପ୍ରକ୍ରିୟାକୁ ସରକାର ନୀରବଚ୍ଛିନ୍ନ ଭାବେ ଅନୁଧ୍ୟାନ କରୁଛନ୍ତି । ପ୍ରାୟ 41 କୋଟି ଗରିବ ଲୋକଙ୍କୁ 52,608 କୋଟି ଟଙ୍କାର ସହାୟତା ପ୍ରଧାନମନ୍ତ୍ରୀ ଗରିବ କଲ୍ୟାଣ ପ୍ୟାକେଜ ଅଧୀନରେ ପ୍ରଦାନ କରାଯାଇଛି । ବୈଷୟିକ ଜ୍ଞାନର ଉପଯୋଗ କରି ପ୍ରତ୍ୟକ୍ଷ ଅର୍ଥ ହସ୍ତାନ୍ତରଣ (ଡିବିଟି) ଜରିଆରେ ଲୋକମାନଙ୍କ ପାଖରେ ସହାୟତା ପହଞ୍ଚା ଯାଇପାରିଛି । ଗତ କିଛି ବର୍ଷ ଧରି ନିଆଯାଇଥିବା ପଦକ୍ଷେପ ଯୋଗୁଁ ଏହା ସମ୍ଭବ ହୋଇଛି ବୋଲି ଶ୍ରୀମତୀ ସୀତାରମଣ କହିଛନ୍ତି ।

ଏଥିସହ ରାଜ୍ୟଗୁଡିକ 84 ଲକ୍ଷ ଟନ ଖାଦ୍ୟ ଶସ୍ୟ ଉଠାଇବା ସହ ବିଭିନ୍ନ ରାଜ୍ୟକୁ 3.50 ଲକ୍ଷ ଟନ ଡାଲି ଜାତୀୟ ସାମଗ୍ରୀ ମଧ୍ୟ ପଠାଯାଇଛି । ଏଥିପାଇଁ ଶ୍ରୀମତୀ ସୀତାରମଣ ବିଭିନ୍ନ ରାଜ୍ୟ, ଭାରତୀୟ ଖାଦ୍ୟ ନିଗମ (ଏଫସିଆଇ) ଓ ନାଫେଡ଼ ପ୍ରଭୃତି ସଂସ୍ଥାର ସମନ୍ଵିତ ପଦକ୍ଷେପର ଉଚ୍ଚ ପ୍ରଶଂସା କରିଛନ୍ତି ।

ସରକାରୀ ସଂସ୍କାର ପାଇଁ ପଞ୍ଚମ ତଥା ଶେଷ ପର୍ଯ୍ୟାୟ ପ୍ୟାକେଜଗୁଡ଼ିକ ଘୋଷଣା କରି ଶ୍ରୀମତୀ ସୀତାରମଣ ରୋଜଗାର, ବ୍ୟବସାୟିକ ସହାୟତା, ବ୍ୟବସାୟିକ ସୁଗମତା (ଇଜ ଅଫ ଡୁଇଂ ବିଜିନେସ), ରାଜ୍ୟ ସରକାର ଏବଂ ଶିକ୍ଷା ଓ ସ୍ୱାସ୍ଥ୍ୟ କ୍ଷେତ୍ରଭଳି 7ଟି ବିଷୟ ଉପରେ ଗୁରୁତ୍ଵାରୋପ କରିଛନ୍ତି ।

1. ରୋଜଗାରକୁ ପ୍ରୋତ୍ସାହିତ କରିବା ପାଇଁ ମନରେଗାରେ 40 ହଜାର କୋଟି ଟଙ୍କାର ଅଧିକ ବ୍ୟୟବରାଦ 

ସରକାର ବର୍ତ୍ତମାନ ମନରେଗା ପାଇଁ ଅତିରିକ୍ତ 40 ହଜାର କୋଟି ଟଙ୍କା ପ୍ରଦାନ କରିବେ । ଏହା 300 କୋଟି ଶ୍ରମଦିବସ ସୃଷ୍ଟି କରିବା ସହ ବିଭିନ୍ନ ରାଜ୍ୟରୁ ନିଜ ରାଜ୍ୟକୁ ଫେରୁଥିବା ଦାଦନ ଶ୍ରମିକଙ୍କୁ ମୌସୁମୀ ଋତୁରେ ସହାୟକ ହେବ । ସ୍ଥାୟୀ ଓ ଜୀବିକା ନିର୍ବାହକାରୀ ତଥା ଜଳ ସଂରକ୍ଷଣ ଯୋଗୁଁ ଉତ୍ପାଦନ ଅଧିକା ହେବା ସହ ଗ୍ରାମ୍ୟ ଅର୍ଥନୀତିରେ ମଧ୍ୟ ବିକାଶ ଘଟିବ ।

2)     ସ୍ୱାସ୍ଥ୍ୟ ସଂସ୍କାର ଓ ପଦକ୍ଷେପ

ଉଭୟ ଗ୍ରାମ ଓ ସହରାଞ୍ଚଳରେ ତୃଣମୂଳସ୍ତରୀୟ ସ୍ୱାସ୍ଥ୍ୟ ପ୍ରତିଷ୍ଠାନ ଓ ସାମଗ୍ରିକ ସ୍ୱାସ୍ଥ୍ୟ କ୍ଷେତ୍ରରେ ଅଧିକ ବ୍ୟୟବରାଦ କରାଯାଇଛି । ସଂକ୍ରାମକ ରୋଗ ଦୂରୀକରଣ ପାଇଁ ନମୁନା ପରୀକ୍ଷା ଓ ପର୍ଯ୍ୟବେକ୍ଷଣକୁ ଅଧିକ ଶକ୍ତିଶାଳୀ କରିବା ପାଇଁ ସମସ୍ତ ଜିଲ୍ଲା ଓ ବ୍ଲକ ସ୍ତରରେ ସ୍ୱାସ୍ଥ୍ୟ ପରୀକ୍ଷାଗାରମାନ ନିର୍ମାଣ କରାଯିବ । ଏଥିଯୋଗୁଁ ତୃଣମୂଳ ସ୍ତରରେ ବୈଶ୍ଵିକ ମହାମାରୀକୁ ରୋକିବା ଦିଗରେ ସଫଳତା ମିଳିପାରିବ । ଭାରତ ଭେଷଜ ଗବେଷଣା ପରିଷଦ ଜାତୀୟ ସ୍ତରରେ ଅଧିକରୁ ଅଧିକ ଗବେଷଣାକୁ ପ୍ରୋତ୍ସାହିତ କରିବ । ଜାତୀୟ ସାଂକ୍ଷିକ ସ୍ୱାସ୍ଥ୍ୟ ମିଶନ ଅଧୀନରେ ଜାତୀୟ ସାଂକ୍ଷିକ ସ୍ୱାସ୍ଥ୍ୟ ବ୍ଲୁ ପ୍ରିଣ୍ଟକୁ ତ୍ୱରାନ୍ୱିତ କରାଯିବ ।

3)     କୋଭିଡ ପରେ ବୈଷୟିକ ଜ୍ଞାନଯୁକ୍ତ ଶିକ୍ଷା ବ୍ୟବସ୍ଥା   

ଅନଲାଇନ ଶିକ୍ଷାକୁ ପ୍ରାଧାନ୍ୟ ଦେବା ଉଦ୍ଦେଶ୍ୟରେ ଇ-ବିଦ୍ୟା କାର୍ଯ୍ୟକ୍ରମ ଖୁବ ଶୀଘ୍ର ଆରମ୍ଭ କରାଯିବ । ଛାତ୍ରଛାତ୍ରୀ, ଶିକ୍ଷକ ଓ ପରିବାରର ମାନସିକ ସ୍ୱାସ୍ଥ୍ୟ ଓ ବୌଦ୍ଧିକ ଉନ୍ନତିକୁ ଦୃଷ୍ଟିରେ ରଖି ମନଦର୍ପଣ କାର୍ଯ୍ୟକ୍ରମ ଖୁବ ଶୀଘ୍ର ଆରମ୍ଭ ହେବ । ବିଦ୍ୟାଳୟ, ଶିଶୁ ଏବଂ ଶିକ୍ଷକମାନଙ୍କ ପାଇଁ ନୂତନ ଜାତୀୟ ପାଠ୍ୟ ଖସଡା ଓ ଶିକ୍ଷାଗତ ଯୋଗ୍ୟତା କାର୍ଯ୍ୟକ୍ରମ ମଧ୍ୟ ଆରମ୍ଭ ହେବ । 2025 ସୁଦ୍ଧା ପଞ୍ଚମ ଶ୍ରେଣୀ ପର୍ଯ୍ୟନ୍ତ ଯେପରି ପ୍ରତ୍ୟେକ ଶିକ୍ଷା ଲାଭ କରନ୍ତି ସେଥିପାଇଁ ଜାତୀୟ ଭିତ୍ତିଭୂମି ସ୍ଵାକ୍ଷରତା ଓ ସାଂକ୍ଷିକ ମିଶନ ଚଳିତ ବର୍ଷ ଡିସେମ୍ବର ମାସ ସୁଦ୍ଧା ଆରମ୍ଭ କରାଯିବ ।

4)     ଆଇବିସି ସମ୍ପର୍କିତ ପଦକ୍ଷେପ ଦ୍ଵାରା ବ୍ୟବସାୟିକ ସୁଗମତାକୁ ପ୍ରାଧାନ୍ୟ

ଦେବାଳିଆ ସ୍ଥିତି ପାଇଁ ଉଦ୍ୟୋଗୀଙ୍କ ପୁଞ୍ଜି 1 ଲକ୍ଷରୁ 1 କୋଟିକୁ ବୃଦ୍ଧି କରାଯାଇଛି । ଏହା ସୂକ୍ଷ୍ମ, ଲଘୁ ଏବଂ ମଧ୍ୟମ ଉଦ୍ୟୋଗୀମାନଙ୍କୁ ସୁହାଇବ । ଖୁବ ଶୀଘ୍ର ଏମଏସଏମଇର ଧାରା 240ଏ ଅଧୀନରେ ବିଜ୍ଞପ୍ତି ପ୍ରକାଶ ପାଇବ । ବୈଶ୍ଵିକ ମହାମାରୀକୁ ଦୃଷ୍ଟିରେ ରଖି ଅନ୍ୟୁନ 1 ବର୍ଷ ପାଇଁ ଦେବାଳିଆ ସ୍ଥିତି ଉପରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ନାହିଁ । ଦେବାଳିଆ ଜନିତ ମାମଲାଗୁଡିକୁ କୋଭିଡ-19 ଦୃଷ୍ଟିରୁ ବକେୟା ପରିଗଣିତ ହେବ ନାହିଁ ।

5)     କମ୍ପାନୀ ଆଇନରେ ଅପରାଧମୁକ୍ତ ବ୍ୟବସ୍ଥା  

ନାମକୁ ମାତ୍ର ବୈଷୟିକ ଓ ପଦ୍ଧତିଗତ ତୃଟି ବିଚ୍ୟୁତି, ଏଜିଏମ ବୈଠକ ନଡାକିବା, ବୋର୍ଡ ରିପୋର୍ଟରେ ଅନିୟମତତା ଭଳି ବିଷୟଗୁଡ଼ିକୁ କମ୍ପାନୀ ଆଇନରେ ଅପରାଧମୂଳକ ବୋଲି ବିବେଚନା କରାଯିବ ନାହିଁ ।   

6)     ବାଣିଜ୍ୟିକ ଉଦ୍ୟୋଗରେ ବ୍ୟବସାୟିକ ସୁଗମତା

• ଅନୁମତିପ୍ରାପ୍ତ ବିଦେଶୀ ପରିସୀମା ମଧ୍ୟରେ ଭାରତୀୟ କମ୍ପାନୀଗୁଡିକ ଦ୍ୱାରା ସୁରକ୍ଷା ଜମା ତାଲିକାଭୁକ୍ତ ହେବ ।
• ଘରୋଇ କମ୍ପାନୀ ଯେଉଁଗୁଡିକ ଷ୍ଟକ ଏକ୍ସଚେଞ୍ଜରେ ଏନସିଡି ତାଲିକାଭୁକ୍ତ ହୋଇଥିବ ସେଗୁଡିକ ତାଲିକାଭୁକ୍ତ କମ୍ପାନୀ ଭାବରେ ମାନ୍ୟତା ପାଇବେ ନାହିଁ  ।
• କମ୍ପାନୀ ଆଇନ 1956 ଅଧିନସ୍ଥ IXA କମ୍ପାନୀ ଆଇନ 2013ର ପୃଷ୍ଠଭୁକ୍ତ ହେବ ।
• ଏନସିଏଲଏଟି ପାଇଁ ଅତିରିକ୍ତ ଓ ସ୍ଵତନ୍ତ୍ର ବେଞ୍ଚ  ପ୍ରତିଷ୍ଠା କ୍ଷମତା ।
• ଏକକ, ଉତ୍ପାଦକ କମ୍ପାନୀ ଏବଂ ଷ୍ଟାର୍ଟ ଅପ୍ସ ଭଳି ଛୋଟ କମ୍ପାନୀଗୁଡ଼ିକର ସବୁ ପ୍ରକାର ଭୁଲ ପାଇଁ କମ ଜୋରିମାନା ।

7)     ଆତ୍ମନିର୍ଭରଶୀଳ ଓ ନୂତନ ଭାରତ ଗଠନ ପାଇଁ ସରକାରୀ ନୀତି

• ସରକାର ଏକ ନୂତନ ନୀତି ଘୋଷଣା କରିବେ ଯାହାଫଳରେ କି ଜନସ୍ଵାର୍ଥ ପାଇଁ ଉଦ୍ଦିଷ୍ଟ ସରକାରୀ ଉଦ୍ୟୋଗଗୁଡିକର ବିଜ୍ଞପ୍ତି ପ୍ରକାଶ ପାଇବ ।
• ଗୁରୁତ୍ୱପୂର୍ଣ୍ଣ କ୍ଷେତ୍ରରେ ଗୋଟିଏ ସରକାରୀ ଉଦ୍ୟୋଗ ରହୁଥିବା ବେଳେ ଘରୋଇ କ୍ଷେତ୍ରକୁ ମଧ୍ୟ ଅନୁମତି ପ୍ରଦାନ କରାଯିବ ।
• କେତେକ କ୍ଷେତ୍ରରେ ସରକାରୀ ଉଦ୍ୟୋଗଗୁଡିକର ଘରୋଇକରଣ ହେବ ।
• ଅଯଥା ପ୍ରଶାସନିକ ଖର୍ଚ୍ଚକୁ ହ୍ରାସ କରିବା ପାଇଁ କେତେକ ଗୁରୁତ୍ୱପୂର୍ଣ୍ଣ କ୍ଷେତ୍ରରେ ଗୋଟିଏରୁ ଚାରୋଟି ପର୍ଯ୍ୟନ୍ତ ଉଦ୍ୟୋଗ ରହିବ । ଅନ୍ୟଗୁଡ଼ିକର ଘରୋଇକରଣ ବା ମିଶ୍ରଣ କରାଯିବ ।

8)     ରାଜ୍ୟ ସରକାରଗୁଡିକୁ ସହାୟତା

କେବଳ 2020-21 ଆର୍ଥିକ ବର୍ଷ ନିମନ୍ତେ ରାଜ୍ୟ ସରକାରଗୁଡିକର କରଜ ସୀମା ଶତକଡା 3 ରୁ 5 ଭାଗକୁ ବୃଦ୍ଧି କରିବା ପାଇଁ କେନ୍ଦ୍ର ସରକାର ନିଷ୍ପତ୍ତି ନେଇଛନ୍ତି । ଏହାଫଳରେ ରାଜ୍ୟଗୁଡିକୁ 4.28 ଲକ୍ଷ କୋଟି ଟଙ୍କାର ଅତିରିକ୍ତ ସମ୍ବଳ ମିଳିପାରିବ । କରଜର କିଛି ଅଂଶ ଅର୍ଥ କମିଶନଙ୍କ ସୁପାରିଶ ଅନୁସାରେ ନିର୍ଦ୍ଦିଷ୍ଟ ସଂସ୍କାର ପାଇଁ ବ୍ୟୟ କରାଯିବ । ସଂସ୍କାରଗୁଡିକ 4ଟି କ୍ଷେତ୍ରରେ ରହିବ । ସେଗୁଡିକ ହେଲା – ଗୋଟିଏ ଦେଶ ଗୋଟିଏ କାର୍ଡର ସାର୍ବଜନୀନକରଣ, ବ୍ୟବସାୟିକ ସୁଗମତା, ଶକ୍ତି ପରିବଣ୍ଟନ, ସ୍ୱାୟତ୍ତଶାସନ ସଂସ୍ଥା ରାଜସ୍ୱ । ଏସଂକ୍ରାନ୍ତରେ ନିର୍ଦ୍ଦିଷ୍ଟ ଯୋଜନା ଖର୍ଚ୍ଚ ବିଭାଗ ଦ୍ଵାରା ବିଜ୍ଞପିତ ହେବ । ଆତ୍ମନିର୍ଭର ଭାରତ ପାଇଁ ଏହିସବୁ ପଦକ୍ଷେପ ଗ୍ରହଣ କରାଯାଇଥିବା ଅର୍ଥ ମନ୍ତ୍ରୀ ଶ୍ରୀମତୀ ସୀତାରମଣ ପରିଶେଷର ପରିପ୍ରକାଶ କରିଛନ୍ତି ।

**********