ঙসি ইকোনোমিক পেকেজ লাওথোকখিবগীদমক য়ুনিয়ন য়ুমল-কৈরৈ মন্ত্রী অমিৎ শাহনা প্রধান মন্ত্রী নরেন্দ্র মোদী অমসুং শেল-থুম মন্ত্রী নিরমালা সিতারমন থাগৎলি। মহাক্না হায়খি মোদী সরকারনা ঙসি লাউথোক্লিবশিং অসিনা অত্মানির্ভর ভারতকী ৱাখল্লোনশিং থবক ওইনা পাংথোকপা ঙমহল্লগনি। হায়রিবা থবকশিং অসিনা লায়রবা মীওই করোর কয়াদা থবক ফংহন্দুনা হকশেল, লাইরিক তম্বা অমসুং ললোন-ইতিক্কী হিরমশিংদা অচৌবা অওনবা অমা ওইরগনি।

ভারতকী খুঙ্গংগী চাকথুংগী মতাংদা শাহনা হায়খি, এম.জি.এন.আর.জি.ই.এসকী মখাদা মোদী সরকারনা লুপা করোর ৪০,০০০গী অহেনবা শেনফম কাইথোক্লিবা অসিনা লায়রবশিং অমসুং কোইচৎ চৎলগা থবক থিরিবা শিন্মীশিং থবক ফংহনবদা মতেং পাংবতা নৎতনা মসিনা তুংকোইনা লৈহৌগদবা হিংনবা লম্বীশিং শেমগৎপদা মতেং পাংগনি। মসিনা ঐখোয়গী খুঙ্গংগী শেল-থুম অমসুং ইনফ্রাস্ত্রকচর চাউনা ফগৎহনগনি হায়না মহাক্না মখা তাখি।

কোবিদ-১০ থেংনবদা পি.এম. মোদীগী লমজিং থাগৎলদুনা য়ুমল-কৈরৈ মন্ত্রীনা হায়খি ভারতনা পায়খৎলিবা থবকশিং অসিনা চাউখৎলবা লৈবাকশিংদগী হেল্লে। ভারতকী হকশেলগী থবকশিং মপাঙ্গল কনখৎহন্দুনা তুংদা অসিগুম্বা লাইচৎ লাকপা মতমদা ভারতনা থৌরাং তৌনবা প্রধান মন্ত্রীনা ৱারেপ লৌরে। জিলা খুদিংমক্ত লৌনগনবা লায়নাশিংগী হোস্পিতালশিং লিংখৎনবা, লেব নেতৱার্ক অমসুং সর্ভিলেন্স কনখৎহন্নবা অমসুং রিছর্স পুক্নিং থৌগৎনবা ভারতনা হকশেলগী লমদা চাদিং তৌবা হেনগৎহন্নবা মোদী সরকারনা ৱারেপ লৌরে। মসিগী থবক অসিনা মেদিকেল সেক্তরদা ভারতনা মাংজিল থাগনি হায়না ঐনা থাজবা থম্লি হায়না মহাক্না মখা তাখি।

পব্লিক সেক্তর ইন্তরপ্রাইজ পোলিসি নৌনা শেমদোকপা, আই.বি.সি.গা মরী লৈনবা থবকশিংগী মখাদা ললোন-ইতিক পাংথোকপা মখা তানা লাইহন্নবা, কম্পেনি এক্তকী প্রোবিজনশিং দিক্রিমিনেল্লাইজেসন তৌবগী মতাংদা অমিৎ শাহনা হায়খি অসিগুম্বা ৱারেপশিং অসিদা মশা—রোমদোম লেপচবা ভারত অমা শেমগৎনবা পি.এম. মোদীগী তুংগী মীৎয়েং অমসুং থাজবশিং অদু মমি তারি।

য়ুমল-কৈরৈ মন্ত্রীনা হায়খি, রাজ্যশিংনা শেন পুবা য়াবগী চাং হেনগৎহন্দুনা মখোয়দা লুপা করোর ৪.২৮গী অহেনবা ফংহন্নবা মোদী সরকারনা ৱারেপ লৌরে। এপ্রিল থাদা তেক্সশিংদগী ফংলকপা শেনফমদগী কেন্দ্রনা রাজ্যশিংদা লুপা করোর ৪৬,০৩৮ ; রেভিন্যু দিফিসিৎ গ্রান্তকী লুপা করোর ১২,৩৯০ অমসুং লুপা করোর ১১,০০০গী এস.দি.আর.এফ ফন্দশিং পীখ্রে।

****