కోవిడ్ -19పై ప్రభుత్వం ఏర్పాటు చేసిన ఉన్నత స్థాయి మంత్రుల బృందం 15వ సమావేశం శుక్రవారం కేంద్ర ఆరోగ్య మరియు కుటుంబ సంక్షేమ శాఖ మంత్రి  డాక్టర్ హర్షవర్ధన్ అధ్యక్షతన నిర్మాణ్ భవన్ లో జరిగింది.   సమావేశానికి పౌర విమానయాన శాఖ మంత్రి శ్రీ హర్దీప్ ఎస్. పూరి, విదేశీ వ్యవహారాల శాఖ మంత్రి డాక్టర్ ఎస్. జయశంకర్,  హోమ్ శాఖ  సహాయ మంత్రి శ్రీ  నిత్యానంద రాయ్, నౌకానిర్మాణం & రసాయనాలు మరియు ఎరువుల శాఖ సహాయ మంత్రి శ్రీ మనసుఖ్ లాల్ మాండవీయ, ఆరోగ్య  కుటుంబ సంక్షేమ శాఖ సహాయ మంత్రి శ్రీ అశ్వినీ కుమార్ చౌబే  హాజరయ్యారు.   వారితో పాటు  రక్షణ సిబ్బంది ప్రధానాధికారి శ్రీ బిపిన్ రావత్  కూడా పాల్గొన్నారు.    

ప్రపంచవ్యాప్తంగా,  మన  దేశంలో  కోవిడ్ -19 ప్రస్తుత పరిస్థితిని గురించి  మంత్రుల బృందానికి సవివరంగా తెలియజేయడం జరిగింది. ప్రపంచవ్యాప్తంగా  కోవిడ్ -19  కేసుల సంఖ్య ప్రస్తుతం  42,48,389 ఉండగా   2,94,046  మంత్రి మరణించారు. మరణాల రేటు 6.92% ఉంది.  ఇండియాలో మొత్తం కోవిడ్ -19 పాజిటివ్ కేసుల సంఖుయ 81,970 ఉండగా 2,649 మరణాలు సంభవించాయి.  మరణాల రేటు 3.23% ఉంది.    ఇప్పటి వరకు  మొత్తం 27,920 మందికి  నయమైంది.   గత 24 గంటల్లో 1,685 మందికి స్వస్థత చేకూరింది.  తద్వారా  ఇండియాలో స్వస్థత రేటు 34.06 శాతానికి పెరిగింది.   రోగుల సంఖ్య రెట్టింపు కావడం బాగా నెమ్మదించిందని,   లాక్ డౌన్ కు ముందు  3.4 రోజుల్లో రోగుల సంఖ్య రెట్టింపు అవుతుండగా గత వారం నాటికి  అది బాగా తగ్గి 12.9 రోజులకు పెరిగిందని తెలిపారు. లాక్ డౌన్ కు ముందు 3.2 శాతం ఉన్న కేసు మరణాల రేటు గత వారంలో  2.1 శాతానికి తగ్గింది.  

ఆ  తరువాత ఈ మహమ్మారిని అదుపు చేయడానికి అనుసరించవలసిన వ్యూహాన్ని గురించి,  కేంద్రం, వివిధ రాష్ట్రాలు తీసుకుంటున్న చర్యల గురించి  మంత్రుల బృందం కూలంకషంగా చర్చించింది.   దేశంలో ఎక్కువగా   అంటే దాదాపు 79% కేసులు 30 మునిసిపల్ ప్రాంతాలలో ఉన్నాయని తెలిపారు.   కోవిడ్ -19 మహమ్మారిని అదుపు చేసే వ్యూహంలో ప్రధానంగా ఎక్కువ సంఖ్యలో కేసులు,  మరణాలు ఎక్కువగా  ఉన్న రాష్ట్రాలపై మరియు  రోగుల చికిత్స, కేసు మరణాల అదుపుపై  దృష్టి పెట్టాలని,  ఇందుకోసం వైరస్ సోకిన వారిని గుర్తించడం మరియు  సంక్రమితుల జాడతీయడమే ఉత్తమ మార్గమని మంత్రివర్గం అభిప్రాయపడింది.  వలస కూలీలు మరియు ప్రవాసులు తిరిగి రావడం వల్ల రాష్ట్రాలు/కేంద్రపాలిత ప్రాంతాలు ఎదుర్కొంటున్న సవాళ్ళను గురించి కూడా మంత్రుల బృందం చర్చించింది.  

వివిధ జోన్లలో మహమ్మారిని అదుపు చేయడానికి భారత ప్రభుత్వం చేసిన సిఫార్సుల ఆధారంగా  సమర్ధవంతంగా  చర్యలు చేపట్టడానికి రాష్ట్రాలు / కేంద్రపాలిత ప్రాంతాలకు కేంద్ర ఆరోగ్య మరియు కుటుంబ సంక్షేమ మంత్రిత్వ శాఖ పంపిన మార్గదర్శకాలను మంత్రుల బృందానికి తెలియజేయడం జరిగింది.  

దేశంలో ఇప్పుడు కోవిడ్ -19 చికిత్సకు  8,694  సౌకర్యాలు/కేంద్రాలు ఏర్పాటయ్యాయని వాటిలో 919  కోవిడ్ ప్రత్యేక ఆసుపత్రులు  ,  2,036 కోవిడ్ ఆరోగ్య కేంద్రాలు , 5,739 కోవిడ్ సంరక్షణ కేంద్రాలు అన్నింటిలో కలిపి సీరియస్  కేసుల కోసం  2,77,429 పడకలు,  29,701 ఐ సి యు పడకలు,  సంరక్షణ కేంద్రాలలో  5,12,250 వేరుగా ఉంచే పడకలు అందుబాటులో ఉన్నాయి.  దేశంలో కోవిడ్ -19ను ఎదుర్కోవడానికి ప్రస్తుతం 18,855 వెంటిలేటర్లు అందుబాటులో ఉన్నాయి.   అంతేకాక కేంద్ర ప్రభుత్వం  రాష్ట్రాలు / కేంద్రపాలిత ప్రాంతాలు/ కేంద్ర సంస్థలకు  84.22 లక్షల ఎన్95  మాస్కులు మరియు  47.98 లక్షల వ్యక్తిగత సంరక్షణ సాధనాలు (పి పి ఈలు)  సమకూర్చింది.  ప్రస్తుతం దేశంలో  మాస్కులు,  పి పి ఈల ఉత్పత్తి  సామర్ధ్యం బాగా పెరిగిందని,   సమీప భవిష్యత్తులో దేశ అవసరాలను తీర్చే విధంగా  రోజుకు 3 లక్షల వ్యక్తిగత సంరక్షణ సాధనాలు (పి పి ఈలు), 3 లక్షల ఎన్95  మాస్కుల ఉత్పత్తి జరుగుతోందని మంత్రుల బృందానికి తెలియజేశారు.   దానికి తోడు దేశీయ తయారీదారులు వెంటిలేటర్లను కూడా ఉత్పత్తి చేస్తున్నారని,   వారికి ఆర్డర్లు  కూడా ఇవ్వడం జరిగిందని తెలియజేశారు.