কেন্দ্রগী হকশেল অমসুং য়াইফ-য়ুম্বালগী মন্ত্রী, দা. হর্শ বর্ধন মফম অসিদা ঙসি ভিদিও কনফরেন্সকী খুত্থাংদা ৩২সুবা কমনৱেল্থ হেল্থ মিনিস্তরশিংগী মীফমদা শরুক য়াখি। মীফম অদুগী হীরম অদুদি- কোবিদ-১৯গী মায়োক্তা কমনৱেল্থনা লেংমান্ননা থবক তৌরমশিং পাইখৎমিন্নবা

কন্দ্রগী হকশেল মন্ত্রীনা মালেমগী মীফম অদুদা ইন্তর্ভেন্সন অদুগী শরুক অমা ওইনা হায়খিবা ৱাফম অদুদি:

“হৌদোরকপদা ‘কোবিদ-১৯গী মায়োক্তা কমনৱেল্থনা লেংমান্ননা থবক থৌরমশিং পাইখৎমিন্নবা’, কোবিদ-১৯না মরম ওইরগা পুন্সি মাংখিবশিংগী  খন্দুনা থমোয় শোক্না নুংঙাইতবা  ফোংদোকপা পাম্মি। মমল য়াম্লবা পুন্সি কয়া অমা কনবদা মমাঙথাদুনা থবক তৌরিবা হেল্থ সর্বিস প্রোভাইদরশিংগা লোইননা অতোপ্পা মীয়ামগী ওইবা সংস্থানশিংগী চাউরবা থৌদাংশিং অদুবু ঐখোয়না ময়েক শেংনা খঙঙি।

ঐখোয়গী ইকাইখুম্নরবা প্রধান মন্ত্রী শ্রী নরেন্দ্র মোদীজিনা অৱাংবা থাক্কী পোলিতিকেল কমিৎমেন্ত পীদুনা ভারতনা কোবিদ-১৯ লাকশিন্নবগী থবক পাইকৎখি, মহাক্কী লমজিং-লমতাক মখাদা কোবিদ-১৯গী মায়োক্তা লাকশিন্নবা, থোক্ত্রিঙৈদা অমসুং পোরম নাইনা থবক থৌরমশিং পাইখৎলি।

ভারতনা মথৌ তাবা খোংথাংশিং অদু মতম চানা লৌখৎপা ওইনা চংফমশিংদা সর্ভিলেন্স তৌবা য়াওনা, লৈবাক অসিগী মীওইশিং মপান লমদগী লৌথোকপা, দিজিজ সর্ভিলেন্স নেৎৱার্ক্কী খুত্থাংদা কম্যুনিতীদা সর্ভিলেন্স তৌবা, হেল্থ ইনফ্রস্ত্রকচরশিং কনখৎহনবা, হেল্থ স্তাফশিংগী ত্রেনিং অমসুং কেপাসিতী বিল্দিং তৌহনবা, রিস্ক কম্যুনিকেসন অমসুং মসি লাকশিন্নবা হোৎনরিবশিং অদুগী শরুক অমা ওইনা কম্যুনিতী য়াওহনবা।

লাইচৎ অসিবু থিংনবা হোৎনবদা মালেমগী খ্বাইদগী চাউবা লোকদাউনগী পাম্বৈ অসি শিজিন্নরিবা অসি, ঐখোয়না লাইনা অসি খঙচাউ চাউথোরকপদগী থিংদুনা অমসুং লাইনা অসিনা চাউথোরকপদা ঐখোয়গী হেল্থকেয়রগী সীস্তেম্না মসিবু মাইপাক্না থেংনবা ঙমদুনা মীয়ামগী পুন্সিবু কন্নবগী পান্দমদনি। মসিগা লোইননা মতম অসিমক্তদা ঐখোয়না মীয়ামগী পুন্সিবু কনবদা নত্তনা মখোয়গী হিংনবগী লম্বীগী মতাংদসু খল্লি অমসুং মসিনা মরম ওইদুনা তঙাইফদনা চংবা সর্বিসশিং অদুবু লোকদাউন অসিগী ওইরিবা ফিভমশিং অসিদা য়াওহন্দ্রিবনি।

ঐখোয়গী প্রধান মন্ত্রীনা লৈবাক অসিগী য়াম্লবা মীশিং অসিগী খ্বাইদগী শোনবা শরুক্তা মতেং পাংনবা অমসুং মসিগা লোইনা লোইননা লৈবাক অসিগী ইকোনোমী অসি ফগৎহল্লক্নবা য়ু.এস. দোলর বিলিয়ন ২৬৫দগী  হেনবা ইকোনোমিক পেকেজ অমা লাউথোকখ্রে। ঐখোয়না তপ্না তপ্না অথিংবা থম্লিবশিং অসি মরু ওইনা লাইনা অসিবু নীংথিনা লাকশিল্লবা মফমশিংদা খরা খরা কোমথোকহল্লি।

তুংগীদমক্তা শেম-শাবা,  পাইখৎলিবা থবক থৌরমশিং অমসুং অখাং কন্নবগীদমক্তা চাউখৎলক্লিবা লৈবাকশিং মরু ওইনা খবাইদগী হেন্না চাউখত্তবা লৈবাকশিংগী কোর কেপাসিতীশিং শেমগৎপা অমসুং কনখৎহনবা অসি য়াম্না মরু ওই।

কোবিদ-১৯না শিংনরক্লিবা অসিগা লান্থেংননবা মালেমগী থাক্তা পুনশিন্নদুনা থবক পাইখৎমিন্ননবা হায়রকখিবা লৈবাক্তা ভারতনা অহানবনি। মার্চকী ময়ায় চনশিল্লকপদা ঐখোয়গী রিজন অসিদা লৈরিবা এস.এ.এ.আর.সি.গী লুচিংবশিংগী মীফম অমা পাংথোকখি, মসিদা “ময়াম পুনশিল্লকপা, তোখায়না তানদবা; খুৎশম্নননা থবক তৌবা, চয়েৎনবা লৈহন্দবা; শেম-শাবা, মীপাইবা পাখৎপা থোক্তবা” হায়রিবশিং অসি মরু ওইনা পনখি। হায়রিবশিং অসিনা চিরবা তঞ্জা অসিদা ভরতকী মাইকৈদগী খুমলকপাপাউখুমগী মশক তাক্লিবা মরু ওইবা ৱাফমশিংনি।

ভারতনা অসিগুম্বা চিরবা তঞ্জা অসিদা অপুনবগী শক্তম উৎপা ওইনা অমসুং মতেং পীবা ওইনা ময়ামদগী খরা হেন্না শোথহৌরবা লৈবাক চাউরাক্না ১০০দা আইদ্রোক্সী ক্লোরোক্বিনগুম্বা তঙাইফদনা চংবা ইদাক-লাংথকশিং পীখি।

লাইচৎ অসি থোরকখিবগী মতাংদা থবক তৌবা অমসুং হায়রিবা অসি শন্দোরকপদা শেন্নবা অমসুং মসি অমুক হন্না থোরক্তনবা অনৌবা দ্রগশিং অমসুং ভেক্সিনশিং পুথোকপা হায়বশি য়াম্না মরু ওই।

হৌজিক লৈরিবা অমসুং অনৌবা ওইবা, মেদিকেলগা মরী লৈনবা পোৎলমশিং অমসুং তেক্নোলোজীশিংদা ময়াম্না অমসুং কোম্না ফংবা য়াবগী খুদোংচাবা পীবা হায়বসি য়াম্না মরু ওই। হায়রিবশিং অসি কোবিদ-১৯গা মায়োক্নবা ঙম্নবা অচান-মীরাই খায়দনা অমসুং চপ মান্নবা মওংদা ফংহনগদবনি।

ভারতকী সাইনতিস্তশিংনা ভারত সরকারগী মতেংগা লোইননা ভেক্সিন, দ্রগশিং পুথোক্নবা থবক কন্না তৌরি, মসিগা লোইনা লোইননা মমলগা চানবা দাইগ্নোসতিক কিৎশিং অমসুং পুন্সি কন্নবগী ইক্যুইপমেন্ত পুথোক্নবা হোৎনরি।

ঐখোয়না ঐখোয় মশেল মতেং পাংনবা অমসুং ঐখোয়না লৌখৎলিবা থবক থৌরমশিং অদু পুন্না খঙমিন্নদুনা অমসুং কোবিদকী মতম অসি লোইখ্রবা মতুংদা লাক্কদৌরিবা অনৌবা খুদোংথিবশিং অমসুং শিংনবশিং অদুবু নীংথিনা মায়োক্নবা ঙম্নবা অনৌবা লম্বী কয়াসু য়েংশিনগদবনি।”

****