ইন্তর্নেস্নেল নর্স দেগী থৌরম অসি ফ্লোরেন্স নাইতিঙ্গলগী চহী ২০০সুবা মপোক কুমওন্নি, দা. হর্শ বর্ধন, কেন্দ্রগী হকশেল অমসুং য়াইফ-য়ুম্বালগী মন্ত্রীনা ভিদিও কনফরেন্সকী খুত্থাংদা ঙসি পাংথোকখিবা থৌরম অসিদা থৌরম মপু ওইখি। হন্দক্কী চহি অসি য়াম্না মরু ওই মরমদি ৱার্লদ হেল্থ ওর্গনাইজেসন (দবল্যু.ঐচ.ও.)না ‘ইয়র ওফ দ নর্স এন্দ মিদৱাইফ’ হায়না লাওথোকখ্রে। হায়রিবা থৌরম অসিগীদমক্তা নর্স লাখ কয়া অমা ওনলাইনদা পাউ ফাওনখি।

নর্সিং প্রোফেস্নেলশিংগী থবক অমসুং মশাগী ওইজবা থাদোক্তুনা খৎথোক্লিবা অসিবু থাগৎপা ফোংদোক্লদুনা অমসুং মখোয়বু অকনবা অমসুং হেল্থকেয়র দেলিবরী সীস্তেম অসিগী মরু ওইবা য়ুম্বীরেলশিং হায়না কৌখি, দা. হর্শ বর্ধন্না হায়খি, “অদোমগী থবক অমসুং পুকচেল শেংবগী চাং অদু মতিক চানা ফোংদোকপা ঙম্লোই, মসিনি অদোম্না কৎথোকপগী চাং। অদোমগী থৌজাল-হৈবা, কৎথোকপা অমসুং মীবু নাবা ফহল্লিবা  অমসুং য়াম্না ৱাবা নুমিৎ ওইরসু মতম চুপ্পদা পেসেন্ত শিংবু মরু ওইনা লৌবগীদমক্তা অদোম্বু থাগৎচরি।”লাইচৎ অসিগী মনুংদা মখোয়না লেপ্পা লৈতনা থবক তৌবগীদমক্তা তৌবীমল খঙবা উৎখি। “নর্সশিং অমসুং অতোপ্পা হেল্থ ৱার্করশিং য়াওদনা লাইচৎ অসি শন্দোরকপগী ময়োক্তা লন্থেংনবদা ঐখোয়না মাইপাকপা ঙমলোই; ঐখোয়না সস্তেন্নেবল দিবেলপমেন্তকী পান্দমশিং অমসুং য়ুনিভর্সেল হেল্থ কভরেজ ফংবা ঙম্লোই,” হায়না মহাক্না হায়খি।

কোবিদকী নুমিৎশিং অসিদা শিংনবা কয়াগা মায়োক্নরিবা নর্সশিংগী পাঙ্গল অদুবু দা. হর্শ বর্ধন্না থাগৎখি। মহাক্না হায়খি, “ঐবু থৌনা ফরবীশিং অদুবু নৌহৌননা ঙসি অমুক নীংশিংহল্লি খুদম ওইনা শ্রীমতী জ্যোতী ৱিথল রক্সা, স্তাফ নর্স, পুনে; শ্রীমতী অনিতা গোবিন্দরাও রাথোর, এসিস্তেন্ত মেত্রোন, পুনে; সুকুমারী মার্গরেৎ, নর্সিং ওফিসর, ই.এস.আই. হোসপিতাল, ঝিলমিল, মখোয়শিং অসি হন্দক্তা ঐখোয়বু থাদোক্লম্লগা লৈখিদ্রবশিং অদুনি। ঐনা মখোয়গী ইমুং-মনুংদা থমোয় শোক্না নুংঙাইতবা ফোংদোক্লি। ঐসু অদোমগী নরক্তা খোংফম চেৎনা  লেপ্তুনা লাইনা অসিগা  লান্থেংনখিগনি, ঐখোয়গী থৌনা-লিংজেল ৱাংনা থমদুনা অমসুং মথৌ তাবা চেকশিন থৌরাংশিং অমসুং প্রোতোকোলশিং নীংথিনা ইন্দুনা ইশানা ইশাবু ঙাকথোকচনবা ত্রেনিংশিং লৌগদবনি।”

দা. হর্শ বর্ধন্না হায়খি সরকারগী মাইকৈদগী খ্বাইদগী ৱাংবা থাক্তা থাজবা পীবা, ইকাইখুম্নরবা প্রধান মন্ত্রী শ্রী নরেন্দ্র মোদীনা লুচিংদুনা কোবিদ-১৯গী মায়োক্তা সরকারনা থবক থৌরমশিং পাইখৎপা অদুবু লুচিংদুনা চৎলি। মহাক্না হায়খি মদুদি মামাং থংদুনা থবক তৌরিবা হেল্থকেয়র ৱার্করশিংবু ঙাক-শেন্নবা, হিংশাগী থবকশিংদগী হেল্থকেয়র পের্সোনেলশিংবু ঙাকথোক্ননবা ওর্দিনেন্স অমা থোকখ্রে। ওর্দিনেন্স অসিনা অসিগুম্বা হিংশাগী থৌওংশিং অসিবু কোনিজেবলী অমসুং নন-বেলেবল ওফেন্স ওইহনগনি অমসুং হেল্থকেয়র সর্বিস পর্সোনেল নত্ত্রগা অতেক-অকাই থোকহনবা নত্ত্রগা লাইচৎ অসিগা মরী লৈননা হেল্থকেয়র সর্বিস পর্সোনল অদুগী মরু ওইবা মাল-চাংশিংদা অমাং-অতা থোকহনবগীদমক্তা কমপেন্সেসন পীনবগী অয়াবসু পীরি। অসিগুম্বা হিংশাগী থৌওংশিংঅসি তৌহনবা নত্ত্রগা শৌগৎপদা মতেং পাংবা তারবদি দন্দি পীবা ওইনা  থা অহুমদগীনা চহি ৫ ফাওবগী কৈশুমশংদা ফাজিন্দুনা থমগনি অমসুং মসিগা লোইননা লুপা ৫০,০০০/-দগীনা লুপা ২,০০,০০০ ফাওবগী ফাইন থিহনগনি। করিগুম্বা য়াম শাথিনা শোকহনবা থোক্লবদি কৈশুমশংদা ফাজিনবা অদু থা তরুক্তগীনা চহি তরেৎ ফাওবগী ওইগনি অমসুং মসিগা লোইননা লুপা ১,০০,০০০/-দগীনা লুপা ৫,০০,০০০/- ফাওবগী ফাইন থিগনি। মসিগী মথক্তা মরাল লৈরবা মীশক অদুনা অশোক অপন নঙলবা মীওই অদুদা কমপেন্সেসন পীগনি অমসুং মাল-চাংদা অতেক-অকাই য়াওখিবা অদুগীদমক্তা মার্কেত্তা লৈরিবা মমল অদুগী শরুক অনি ওইগনি। মসিগী মথক্তা সরকারনা ‘প্রধান মন্ত্রী গরীব কলয়ান পেকেজ: কোবিদ-১৯গা লান্থেংনরিবা হেল্থ ৱারকর্শিংগীদমক্তা ওইবা ইন্সুরেন্স স্কিম’, মসিনা পুন্না লাখ ২২.১২ মুক ওইবা, হকথংননা শোক্না-শম্নরুবা অমসুং কোবিদ-১৯গী পেসেন্তশিংবু য়েংশিনবীরুবা  অমসুং মসিনা শোকহন্দুনা খুদোংথিনীংঙাই ওইরবা কম্যুনিতী হেল্থ ৱারকর্শিং য়াওনা পব্লিক হেলথকেয়র প্রোভাইদরশিংদা নুমিৎ মরিফুতরা  (৯০)গীদমক লুপা লাখ ৫০গী ইন্সুরেন্স কভর পীগনি।

মহাক্না মসিমসু হায়খি মদুদি ঙসিগী ওইরিবা ফিভম অসিদা, নর্সশিংনা প্রোতোকোলশিং, লাইনা অসিগী মরমদা ই-পাউশিং, ইনফেক্সন থোকহন্দনবা অমসুং কন্ত্রোলগী মতাংদা মখোয় মশামক মমুৎ তানা খঙবা মথৌ তাই , মসিনা মখোয় মশামকপু নীংথিজনা ঙাকথোকচবদা ঙম্বদা নত্তনা মীপুম খুদিংমক্তা খ্বাইদগী ফবা পাউতাকশিংসু পীবা ঙমগনি। মহাক্না এ.আই.আই.এম.এস., দিল্লী অমসুং ইন্দিয়ন নর্সিং কাউনসিলনা শিনবা ৱেবিনারশিংদগী খুদোংচাবশিং মপুং ফানা নর্সশিংনা লৌগদবনি হায়না খঙহল্লকখ্রে।

মসিগী থৌরম অসিদা সুকুমারী. প্রীতি সুদন, সেক্রেতরী, হকশেল অমসুং য়াইফ-য়ুম্বাল, শ্রী অরুন সিংঘল, স্পিসিয়েল সেক্রেতরী, শ্রী নিপুন বিনায়ক, জোইন্ত সেক্রেতরী, শ্রী তি. দিলীপ কুমার, প্রেসিদেন্ত, ইন্দিয়ন নর্সিং কাউন্সিল, নই দিল্লী, শ্রীমতী এন্নী কুমার, ভাইস প্রেসিদেন্ত- নোর্থ রিজন, ত্রেন্দ নর্সেস এসোসিয়েসন ওফ ইন্দিয়া, সুকুমারী গীতা রানী, এ. এন. এম., ওল ইন্দিয়া ফেদরেসন ওফ এ.এন.এম. এল.ঐচ.ভি.শিং, সুকুমারী থেরেশা হলদানী, প্রেসিদেন্ত, দিল্লী চেপ্তর, সোসাইতী ওফ মিদৱাইবস ওফ ইন্দিয়া, লেফতিনেন্ত কর্নেল সরবজীৎ কৌর, সেক্রেতরী, ইন্দিয়ন নরসিং কাউন্সিল, নই দিল্লীগা লোইননা নর্সিং ফেদরেসনশিং/এসোসিয়েসনশিং অমসুং হকশেল অমসুং য়াইফ-য়ুম্বালগী মন্ত্রলয়গী অতৈ ওফিসিয়েলশিংসু য়াওখি।

****