প্রধান মন্ত্রী শ্রী নরেন্দ্র মোদীনা ঙসি বুদ্ধ পুর্নিমাদা শেংলবা ‘মালেমগী ওইনা পাংথোকপা থৌরম বেসক’কী মতাংদা ৱা ঙাংখ্রে । কলচর (আই.সি.)গী রাজ্য মন্ত্রী অমসুং তুরিজম (আই.সি.)গী রাজ্য মন্ত্রী, শ্রী প্রলহাদ পতেল অমদি য়ুথ এফেয়র্স অমসুং স্পোর্তস (আই.সি.) অমসুং মাইনোরিতী এফেয়র্সকী রাজ্য মন্ত্রী শ্রী কিরেন রিজিজুনা শেংনা পাংথোকখিবা থৌরম অদুদা শরুক য়াখি।

প্রধান মন্ত্রী শ্রী নরেন্দ্র মোদীনা মহাক্কী মরুওইবা ৱাফম ফোংদোকপদা ভগবান বুদ্ধগী পুন্সি, তম্বীরম্বশিং অমদি পাওজেলশিংনা মখা তানা মালেমসিগী মীশিংদা ইনোৎ হাপ্তুনা হেন্না অফবা ওইহল্লি হায়খি। মহাক্কী পাওজেল অসি থবক মরম অমখক্তদা নত্ত্রগা হীরম অমখক্তদা লোইবা নত্তে। 

মতম হোংলে, ফিভম হোংলে, খুন্নাইসিদা থক্লিবশিং হোংলে অদুবু ভগবান বুদ্ধগী পাউজেলদি লেপ্পা লৈতনা ঐখোয়গী পুন্সিদা চেন্থরি। বুদ্ধ হায়বসি শুপ্নতগী মিং অমখক নত্তে, তৌইগুম্বশুং মীওইবা খুদিংগী থম্মোইদা হোল্লিবা অমদি মীওইববু লমজিং-লমতাক্লিবা অশেংবা ৱাখল্লোন্নি।

মরুপশিং, ভগবান বুদ্ধগী ৱাহৈ খুদিংমক , ৱারী মশাং খুদিংমক্না ভারতনা মীওইববু সেবা তৌনবগী মশাগী ওইবা ৱাফমদা ইথিল পীদুনা কনখৎহল্লি হায়না প্রধান মন্ত্রীনা মখা তানা হায়খি। বুদ্ধ অসি ভারতনা মঙাল ফংলকখিবা অমদি ভারতমশক মশানা ওইজরকখিবগী সিম্বোলনি। মসিগী মশানা ওইরিবসি খংজরকপসিগা লোয়ননা ভারতনা মালেম পুম্বগী, মীওইবা পুম্নমক্কীদমক কান্নবা থবক তৌগনি। মতম পুম্নমক্তা ভারত চাওখৎপনা  মালেম পুম্বা চাওখৎপদা মতেং ওইগনি।

শ্রী নরেন্দ্র মোদীনা থমখিবা মপুং ফাবা ৱাফমগীদমক মখাগী লিঙ্ক অসিদা ক্লিক তৌবিয়ু। https://pib.gov.in/PressReleseDetailm.aspx?PRID=1621741

থৌরম অদুদা ৱা ঙাংলদুনা, কলচর(আই.সি.)গী রাজ্য মন্ত্রী অমসুং তুরিজমগী(আই.সি.)গী রাজ্য মন্ত্রী শ্রী প্রলহাদ পতেলনা মীপুম খুদিংবু বুদ্ধ পুর্নিমাগী নুংঙাইবা ফোংদোকখি অমসুং ২০১৫দা জাতীগী ওইনা থৌরম পাংথোকপা হৌদোকখিবগীদমক প্রধান মন্ত্রী শ্রী নরেন্দ্র মোদীবু থাগৎপা ফোংদোকখি।  বুদ্ধনা নুংশিবা অমদি হীংশা তৌদবগী শক্তি অদু ঐখোয়দা উহনবিখি হায়না শ্রী পতেলনা হায়খি। বুদ্ধনা মালেম পুম্বদা হীংশা তৌদবনা লৌশিং-জ্ঞানগী লোলনি হায়বা তম্বিখি। ভগবান বুদ্ধনা মালেমসিদা নুংশিবগী শক্তিবু তাকপিখি হায়খি। শ্রী প্রলহাদ পতেলনা মাগী ৱাফম ফোংদোকপা মতমদা ভগবান বুদ্ধনা লাইনিং-লাইশোনগী মতাংদা হায়বিরম্বশিংগী খুদমশিং ময়ামদা হায়খি। 

কোবিদ-১৯গী মতমসিদা মালেম পুম্বদগী মীওইশিংনা বুদ্ধ পুক্নিমাগী থৌরম পাংথোক্নবা ইমুং  অমগুম শেংনা পুল্লবসিদা ঐ য়াম্না নুংঙাইবা ফাওই। মহাক্না বসুধাইবাকুতুম্বকম হায়বসি মালেম অসি ইমুং অমনি হায়বগী ৱাহন্থোক্নি হায়বসি থাজৈ য়ুথ এফেয়র্স অমসুং স্পোর্তস(আই.সি.) অমসুং মাইনোরিতী এফেয়র্সকী রাজ্য মন্ত্রী শ্রী কিরেন রিজিজুনা হায়খি।

ভারত সরকারগী কলচরগী মন্ত্রীনা ইন্তর্নেস্নেল বুদ্ধিস্ত কনফিদরেসন(আই.বি.সি.)গা খুৎশম্নদুনা মালেমগী ওইনা অপুনবা মওংদা ফাংতোকখিবা অশেংবা লাইশোন-তিনশোনগী থৌরম অমা মালেম অসিগী বুদ্ধিস্তকী সংঘগী মকোকশিংনা শরুক য়াদুনা পাংথোকখ্রে। বুদ্ধ পুর্নিমাগী পাংথোকপা থৌরম অসি মালেম শিন-থুংনা থোক্লিবা কোবিদ-১৯না পীরিবা চৈথেং অসি খংনা শেংনা মী তিন্দুনা পাংথোকখি। মসি কোবিদ-১৯না শোকহল্লবা অমদি মমাং থানা লান্থেংনরিবশিংবু ইকাই খুম্নদুনা  মালেমগী ওইবা লাইশোন-তিনশোন তৌবগী চয়োল ওইনা কত্থোকখি।

থৌরম অদুদা লাইশোন-তিনশোন পাংথোকপা অদু বোদ্ধগয়াগী মহাবোদ্ধি লাইশং, সর্নাথকী মুলগন্ধা কুতী বিহারা, কুশিনগরগী পরিনির্বানা স্তুপ, নেপালগী শেংলগা লৈকোল লুম্বিনি, শ্রী লঙ্কাগী শেংলবা অমদি হিস্তরিক ওইরবা অনুরাধাপুর স্তুপ্তকী রুৱানৱেলী মহা সেয়াদগী লাইশোন শোনবা, নেপালগী বোদ্ধনাথ, স্বয়ম্ভু, নমো স্তুপ্তা নত্তনা অতৈ বুদ্ধিস্তশিংগী মফমশিংদগী লাইব ওইনা থাখি।

থৌরম অসি ফেসবুক লাইব, আই.বি.সি. সোসিএল মেদিয়ানা পায়বা য়ুত্যুবকা লোয়ন-লোয়ননা মন্দালা মোবাইল এপ্তা লাইব ওইনা থাখি।

তীল্লিবা মীয়ামশিং অদুগী মরক্তগী ভারত, অস্ত্রেসিয়া, বঙ্গলাদেশ, ভুতান, কম্বোদিয়া, চেক রিপব্লিক, ফ্রাঞ্চ, জর্মন, ইন্দোনেসিয়া, জপান, খা-থংবা কোরিয়া, ম্যান্মার, মঙ্গোলিয়া, মলয়েসিয়া, নেপাল, রুসিয়া, শ্রী লঙ্কা, সিঙ্গাপুর, তাইৱান, ভিএতনামদগী য়াম্লবা মীয়াম্না মদু য়েংখি।

বেসক-বুদ্ধ পুর্নিমা অসি তথাগত গৌতম বুদ্ধনা পোকপগী, মঙাল ফংখিবগী অমদি মহা পরিনির্বানাগী অপুনবা থৌজাল অহুমগীদমক পাংথোকপনি হায়না লৌনৈ।

****