ৰাজ্যিক কৰ্তৃপক্ষক ক’ভিড কেয়াৰ চেণ্টাৰ প্ৰদানৰ প্ৰস্তুতি ভাৰতীয় ৰে’লৱেৰ

ৰে’ল মন্ত্ৰালয়ে ইয়াৰ ৫,২৩১টা ডবা ক’ভিড কেয়াৰ চেণ্টাৰলৈ ৰূপান্তৰ কৰিলে৷ স্বাস্থ্য আৰু পৰিয়াল কল্যান মন্ত্ৰালয়ৰ নিৰ্দেশনা অনুসৰি এই কেন্দ্ৰসমূহ অতি কম প্ৰভাৱিত ঘটনাৰ বাবে ব্যৱহাৰ কৰিব পৰা যাব৷ এই ডবাসমূহ সেইবোৰ ৰাজ্যত ব্যৱহাৰ কৰা হ’ব, য’ত সুবিধা কম তথা ক’ভিডৰ সন্দেহজনক আৰু আক্ৰান্ত লোকক আইচ’লেচনত ৰখাৰ ক্ষমতা বৃদ্ধি কৰাৰ প্ৰয়োজনীয়তা আছে৷ ক’ভিড-১৯ বিৰোধী যুঁজত চৰকাৰক সকাহ দিয়াৰ লক্ষ্যৰে ভাৰতীয় ৰে’লৱেই বিভিন্ন পদক্ষেপ গ্ৰহণ কৰিছে৷ ইয়াৰ প্ৰতি লক্ষ্য ৰাখিয়েই ৫,২৩১টা ক’ভিড কেয়াৰ চেণ্টাৰ ৰাজ্যসমূহক প্ৰদানৰ প্ৰস্তুতি হাতত লয়৷ মাণ্ডলিক ৰে’লৱেই এই ডবাসমূহ কোৱাৰেণ্টাইন কেন্দ্ৰলৈ ৰূপান্তৰ কৰিছে৷

২১৫টা ষ্টেচনৰ ভিতৰত ৮৫টা ৰে’লৱেই চিকিৎসা সুবিধা প্ৰদান কৰাৰ বিপৰীতে ১৩০টা সংশ্লিষ্ট ৰাজ্যসমূহে নিজৰ চিকিৎসক আৰু চিকিসা সা-সঁজুলিৰ ব্যৱস্থা কৰাৰ বাবে সন্মত হ’লে ব্যৱহাৰ কৰিবলৈ দিয়া হ’ব৷ ইতিমধ্যে ১৫৮টা ষ্টেচনত স্থাপন কৰা ক’ভিড কেয়াৰ চেণ্টাৰত পানী আৰু চাৰ্জিঙৰ সা-সুবিধাৰ ব্যৱস্থা কৰা হৈছে৷

ইয়াৰ উপৰি ভাৰতীয় ৰে’লৱেই ক’ভিড-১৯ৰ প্ৰত্যাহ্বান মোকাবিলা কৰাৰ বাবে ২,৫০০ চিকিৎসক আৰু ৩৫,০০০ পেৰামেডিকেল ষ্টাফ নিয়োজিত কৰিছে৷ বিভিন্ন মণ্ডলত সাময়িকভাৱে চিকিৎসক আৰু পেৰামেডিকেল ষ্টাফ নিযুক্তি দিয়া হৈছে৷ যিকোনো পৰিস্থিতিত ব্যৱহাৰ কৰিব পৰাকৈ ক’ভিড-১৯ ৰোগীৰ চিকিৎসাৰ বাবে ৰে’লৱে ১৭খন সমৰ্পিত হাস্পতাল আৰু ৩৩ খন ব্লক হাস্পতালত ৫,০০০ বিছনা সাজু কৰা হৈছে৷

স্বাস্থ্য আৰু পৰিয়াল কল্যান মন্ত্ৰালয়ৰ নিৰ্দেশনা অনুসৰি ৰাজ্য চৰকাৰ সমূহে ৰে’লৱেক এই ডবা আৱণ্টন দিয়াৰ বাবে অনুৰোধ জনাব লাগিব৷ তাৰ ভিত্তিতে ৰে’লৱেই সেই ৰে’লখন সংশ্লিষ্ট ৰাজ্য বা কেন্দ্ৰীয় শাসিত অঞ্চলৰ নিৰ্দিষ্ট ষ্টেচনত স্থাপন কৰাৰ লগতে জিলা উপায়ুক্ত, দণ্ডাধীশ বা এগৰাকী কৰ্তৃত্বশীল ব্যক্তিক দায়িত্ব অৰ্পণ কৰিব৷ অৱশ্যে ৰে’লখন সংস্থাপন কৰাৰ পাছতে পানী, বিদ্যুৎ, মেৰামতি, ৰন্ধন ব্যৱস্থাপনা আৰু নিৰাপত্তা সম্পৰ্কীয় কামবোৰ তত্বাৱধান কৰিব ৰে’লৱেই৷

স্বাস্থ্য আৰু পৰিয়াল কল্যান মন্ত্ৰালয়ৰ নিৰ্দেশনাৰ লিংক

Link of Guidelines by Ministry of Health and Family Welfare:

পৰিশিষ্ট ক অনুসৰি ষ্টেচনৰ লিংক

Link of stations as Annexure A:

***

DJN/MKV/DB