କରୋନା ନିରୋଧୀ ଟିକା ଓ ଔଷଧ ଆଦି ବାହାର କରିବାକୁ ଗଠିତ ଟାସ୍କଫୋର୍ସର କାର୍ଯ୍ୟ ସମୀକ୍ଷା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଏଥିରେ ଟିକାର ବିକାଶ, ଔଷଧପତ୍ର ଉଦ୍ଭାବନ, ନିଦାନ ଓ ପରୀକ୍ଷା ବ୍ୟବସ୍ଥା ଆଦିର ସବିଶେଷ ସମୀକ୍ଷା କରାଯାଇଛି । ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ଏସବୁ କାର୍ଯ୍ୟର ଅଗ୍ରଗତି ସମ୍ପର୍କରେ ସମୀକ୍ଷା ହୋଇଛି ।

ଭାରତୀୟ ଟିକା ପ୍ରସ୍ତୁତକାରୀ କମ୍ପାନୀଗୁଡିକ ଉନ୍ନତମାନର ଟିକା, ଇଞ୍ଜେକସନ ତିଆରି କରିବା ସହ ସେମାନଙ୍କ ଦକ୍ଷତା ପାଇଁ ବିଶ୍ୱବ୍ୟାପୀ ପରିଚିତ । ଏସବୁ କମ୍ପାନୀର ଉପସ୍ଥିତି ପୃଥିବୀର ବିଭିନ୍ନ ପ୍ରାନ୍ତରେ ରହିଛି । ଏବେ ଏହି କମ୍ପାନୀମାନେ କରୋନା ନିରୋଧୀ ଟିକା ବିକଶିତ କରିବାର ପ୍ରାରମ୍ଭିକ ପର୍ଯ୍ୟାୟରେ ଉପନୀତ ହୋଇଛନ୍ତି । ସେଥିପାଇଁ ଗବେଷଣା ଓ ଉନ୍ନୟନ କାର୍ଯ୍ୟ ଜୋରସୋର ଚାଲିଛି । ଭାରତୀୟ ଏକାଡେମୀଆ (ଶୈକ୍ଷିକ ସଂସ୍ଥାନ) ଓ ଷ୍ଟାର୍ଟଅପମାନ ମଧ୍ୟ ଏ କ୍ଷେତ୍ରରେ ଯଥେଷ୍ଟ ପ୍ରତିଷ୍ଠା ଓ ବ୍ୟୁତ୍ପତ୍ତି ଲାଭ କରିଛନ୍ତି । ଏବେ କରୋନା ନିରୋଧୀ ଟିକା ବିକାଶ ପାଇଁ 30 ପ୍ରକାର ଟିକା ବିକାଶର ବିଭିନ୍ନ ପର୍ଯ୍ୟାୟରେ ରହିଛି । ସେଥି ମଧ୍ୟରୁ କେତେକ ପରୀକ୍ଷାସ୍ତରରେ ପହଞ୍ଚିଲାଣି ।

ସେହିଭଳି ନୂଆ ଔଷଧ ତିଆରି କରିବା ପାଇଁ ତିନି ପ୍ରକାର ପଦକ୍ଷେପ ଗ୍ରହଣ କରାଯାଇଛି । ସେଗୁଡିକ ମଧ୍ୟରୁ ପ୍ରଥମଟି ହେଲା ବର୍ତ୍ତମାନ ଉପଲବ୍ଧ ହେଉଥିବା ଔଷଧର ଉନ୍ନତିକରଣ । ଏହି ପର୍ଯ୍ୟାୟରେ ଅତି କମରେ ଚାରିଟି ଔଷଧର ବିକାଶ କରାଯାଇ ସେସବୁର ସମନ୍ୱୟ ଓ ପରୀକ୍ଷା ଚାଲିଛି ।

ଦ୍ୱିତୀୟରେ ନୂଆ ପ୍ରକାରର ଔଷଧ ପ୍ରସ୍ତୁତି ଚାଲିଛି ଓ ଏହାର ସୂକ୍ଷ୍ମ ଦ୍ରବ୍ୟଗୁଣ (ମଲିକ୍ୟୁଲ)ର ଦକ୍ଷତା ବୃଦ୍ଧି ପାଇଁ ପରୀକ୍ଷା ନିରୀକ୍ଷା ଅବ୍ୟାହତ ରହିଛି । ତୃତୀୟରେ ବୃକ୍ଷ ଲତା ଓ ଗୁଳ୍ମ ଜାତ ପଦାର୍ଥର ସଂକ୍ରମଣ ନିରୋଧୀ ଗୁଣ ଓ ଶକ୍ତିର ପରୀକ୍ଷା ନିରୀକ୍ଷା କରାଯାଇ ସେଥିରୁ ନୂଆ ଔଷଧ ତିଆରି କରିବାକୁ ଉଦ୍ୟମ ହେଉଛି ।

ନିଦାନ ଓ ପରୀକ୍ଷଣ (ଡାଏଗ୍ନୋସିସ ଆଣ୍ଡ ଟେଷ୍ଟିଂ) କ୍ଷେତ୍ରରେ ବିଭିନ୍ନ ଶୈକ୍ଷିକ ପ୍ରତିଷ୍ଠାନ, ଗବେଷଣା ପ୍ରତିଷ୍ଠାନ ତଥା ଷ୍ଟାର୍ଟଅପ ଉଦ୍ୟମ ଜାରି ରଖିଛନ୍ତି । ସେମାନେ ରୋଗ ପ୍ରତିଷେଧ ଶକ୍ତି ବର୍ଦ୍ଧନକାରୀ ତତ୍ୱ ଠାବ ଓ ଆରଟି-ପିସିଆର କ୍ଷେତ୍ରରେ କେତେକ ନୂଆ ଉତ୍ସାହଜନକ ସଫଳତା ହାସଲ କରିଛନ୍ତି । ଦେଶର ପ୍ରାୟ ସମସ୍ତ ପ୍ରମୁଖ ପରୀକ୍ଷାଗାରକୁ ସଂଯୁକ୍ତ କରାଯାଇ ଏଭଳି ପରୀକ୍ଷା ନିରୀକ୍ଷା ଦକ୍ଷତାକୁ ବୃଦ୍ଧି କରିବାର ବ୍ୟବସ୍ଥା ହୋଇଛି । କରୋନା ପରୀକ୍ଷା ପାଇଁ ଦେଶରେ ଏବେ ଟେଷ୍ଟ କିଟର ଯେଉଁ ଅଭାବ ରହିଛି ତାହାକୁ ପୂରଣ କରିବା ପାଇଁ ବିଦେଶରୁ ସେସବୁକୁ ଆମଦାନୀ କରାଯାଉଛି । ଏହି ସମସ୍ୟାର ସମାଧାନ ପାଇଁ  ଏବେ ଭାରତୀୟ ଉଦ୍ୟୋଗ ଓ ଷ୍ଟାର୍ଟଅପ ସମର୍ଥ ହେଲେଣି । ଏହି କିଟ ଉତ୍ପାଦନ ବ୍ୟବସ୍ଥାକୁ ବ୍ୟାପକ ଓ ଦୀର୍ଘମାଆଦୀ କରିବାକୁ ଉଦ୍ୟମ ଆରମ୍ଭ ହୋଇଛି ।

ଏଭଳି ଏକ ଆହ୍ୱାନମୂଳକ ପରିସ୍ଥିତିରେ ଦେଶର ଶୈକ୍ଷିକ କ୍ଷେତ୍ର, ଉଦ୍ୟୋଗ ଜଗତ ଓ ସରକାର ଏକାଠି ହୋଇ ମିଳିତ ଭାବେ କାମ କରୁଥିବାରୁ ସମୀକ୍ଷା ବୈଠକରେ ଏନେଇ ସନ୍ତୋଷ ପ୍ରକାଶ ପାଇଛି । ଏହି କ୍ଷେତ୍ରରେ ନିୟନ୍ତ୍ରକ ପ୍ରକ୍ରିୟାର ତ୍ୱରିତ ଓ ଦକ୍ଷ ପ୍ରାୟାସ ମଧ୍ୟ ପ୍ରଶଂସିତ ହୋଇଛି । ଏଭଳି  ସମନ୍ୱୟ ଓ ବେଗର ସମ୍ମିଶ୍ରଣରେ ଏକ ମାନକ କ୍ରିୟାନୁଷ୍ଠାନ ପ୍ରକ୍ରିୟା (SOP) ପ୍ରସ୍ତୁତ କରିବାକୁ ପ୍ରଧାନମନ୍ତ୍ରୀ ଆଗ୍ରହ ପ୍ରକାଶ କରିଛନ୍ତି । ସଙ୍କଟକାଳରେ ଯାହା କରିବା ସମ୍ଭବ ହେଉଛି ତାହା ଆମର ଧରାବନ୍ଧା ବୈଜ୍ଞାନିକ କାର୍ଯ୍ୟର ଏକ ଅଂଶ ବିଶେଷ ହେବା ଉଚିତ ବୋଲି ପ୍ରଧାନମନ୍ତ୍ରୀ କହିଛନ୍ତି ।

ନୂଆ ଔଷଧ ବାହାର କରିବାରେ ଆମର ବୈଜ୍ଞାନିକ ଲୋକଶକ୍ତି, କମ୍ପ୍ୟୁଟର ବିଜ୍ଞାନ, ରସାୟନ ବିଜ୍ଞାନ ଓ ଜୈବ ପ୍ରଯୁକ୍ତି ଏକତ୍ର ହୋଇଥିବାରୁ ପ୍ରଧାନମନ୍ତ୍ରୀ ଏହାକୁ ସ୍ୱାଗତ କରିବା ସହ ଏହି ବିଷୟ ଉପରେ ଏକ ହ୍ୟାକାଥନ ଆୟୋଜନ କରିବାକୁ ପ୍ରସ୍ତାବ ଦେଇଛନ୍ତି । ଏଥିରେ କମ୍ପ୍ୟୁଟର ବିଜ୍ଞାନକୁ ଲାବରେଟୋରୀ ଟେଷ୍ଟିଂ ଓ ସମନ୍ୱୟ ସହ ଯୋଡିବାକୁ ସେ କହିଛନ୍ତି ।

ପ୍ରଧାନମନ୍ତ୍ରୀ କହିଛନ୍ତି ଯେ ଏହି ହ୍ୟାକଥାନର ସଫଳ ପ୍ରାର୍ଥୀମାନଙ୍କୁ ଷ୍ଟାର୍ଟଅପ ନେଇ ଭେଷଜ ବିକାଶ ଏବଂ ଉନ୍ନୟନ କାର୍ଯ୍ୟକୁ ଅଧିକ ତ୍ୱରାନ୍ୱିତ କରିପାରିବେ ।

ସେ ଆହୁରି କହିଛନ୍ତି ଯେ ଉଦ୍ୟୋଗ ଜଗତ ସହ ମିଶି ଭାତୀୟ ବୈଜ୍ଞାନିକମାନେ ଯେଉଁ ନବସୃଜନ ଓ ମୌଳିକତା ସହିତ ବିଜ୍ଞାନକୁ ପ୍ରୟୋଗାତ୍ମକ ସ୍ତରରେ ଉଚ୍ଚ ସେମାନଙ୍କୁ ଉନ୍ନୀତ କରିଛନ୍ତି ତାହା ଅଭିନନ୍ଦନୀୟ । ଆମର ଭବିଷ୍ୟତର କର୍ମପନ୍ଥାରେ ଏହି ଗୌରବ, ମୌଳିକତା ଓ ଲକ୍ଷ୍ୟ ଗୁରୁତ୍ୱ ଲାଭ କରିବ ବୋଲି ସେ ଆଶା ପ୍ରକାଶ କରିଛନ୍ତି । ଏହି ବିଚାର ଅବ୍ୟାହତ ରହିଲେ ବିଜ୍ଞାନ କ୍ଷେତ୍ରରେ ଭାରତ ଅନ୍ୟର ଗୋଡାଣିଆ ନହୋଇ ଶ୍ରେଷ୍ଠ ରାଷ୍ଟ୍ରଙ୍କ ମଧ୍ୟରେ ରହିବ ବୋଲି ପ୍ରଧାନମନ୍ତ୍ରୀ ଶ୍ରୀ ମୋଦୀ କହିଛନ୍ତି ।

**************