নীতি আয়োগনা ঙসি হকশেল মন্ত্রী দাক্তর হর্শ বর্ধন অমসুং সরকারগী লুপ নত্তবশিং অমসুং মীয়ামগী সংস্থানশিংগা লাইব সেসন অমদা নিতী শাখ্রে। সেসন অসি সি.ই.ও. অমিতাব কান্তনা ৱাতেমখি।

নীতি আয়োগকী দর্পন পোর্তেলদা মীং চনবা এন.জি.ও. পুম্নমক্না শরুক য়াখি। মকোক ওইবশিংদি – হরী মেনন্না মহুৎ শিনবা বীল অমসুং মেলিন্দা গেৎস ফাওন্দেসন, মেথ্যু চেরিয়ন্না মহুৎ শিনবা হেলপ এজ ইন্দিয়া, ঐচ.এস.দি. শ্রীনিবাসনা মহুৎ শিনবা তাতা ত্রস্তস, অশ্বিন দেশমুখনা মহুৎ শিনবা পিরামল স্বাস্থ্য, জগাদানন্দনা মহুৎ শিনবা সি.ৱাই.এস.দি., অমোদ কান্থনা মহুৎ শিনবা প্রয়াস, য়াহিয়া অলিবীনা মহুৎ শিনবা রেদ ক্রোস, সায়া বৱাসরনা মহুৎ শিনবা এস.ই.দব্ল্যু.এ., প্রভাৎ সিনহানা মহুৎ শিনবা মান দেশী ফাওন্দেসন, ললিৎ কুমারনা মহুৎ শিনবা সুলভ ইন্তর্নেস্নেল, অর্বিন্দ লালনা মহুৎ শিনবা লাল পাথলেবস, কে. শ্রীনাথ রেদ্দীনা মহুৎ শিনবা পব্লিক হেলথ ফাওন্দেসন ওফ ইন্দিয়া, মনোজ গোপালকৃষ্ণন্না মহুৎ শিনবা কেয়র ইন্দিয়া, নন্দীনি অজাদনা মহুৎ শিনবা ৱর্কিং ৱুমেন্স ফোরম অমসুং বিজয় শর্মনা মহুৎ শিনবা অকশয় পাত্রনি।

এন.জি.ও.শিং/সি.এস.ও.শিংনা খুদোংচাদবা কয়া অমা পনখি – কোবিদ-১৯না নারবা অনাবশিং অমসুং মমাং থানা থবক তৌরিবা মীওইশিংদা তাথি তাওইনা তৌবা অমসুং অচান মীরাই খায়বা; খুঙ্গংগী লমশিংদা হিদাক লাংথক ৱাৎপা; ই.-পাসশিং লৌনবা মতেং; পি.পি.ই.শিং অমসুং এন.৯৫ মাস্ক মশিং হেনগৎহনবা; দেতাগী মতুং ইন্না ইরাং অসিবু থেংনবা; মাইগ্রেন্তশিংদা মতেং য়ৌহন্নবা মতেং পাংবা অমসুং দিজিতেল পেমেন্ত লায়হনবা; লোকদাউন অসি হাংদোক্লবা মতুংদা ইনফোর্মেল ওন্ত্রপ্রিনরশিংদা শেলগী অমসুং পোলিসীগী তেংবাং পীবা; লৈবাক্কী য়াম্না চংশিনবা মফমদা চংদ্রবা য়াদ্রবা পোৎ-চৈশিং য়ৌহনবা; গ্রীন জোন্দা শেল থোকপা য়াবা থবক থৌরমশিং হৌদোকপগী হায়জবা; খুঙ্গংগী মফমশিংদা হকশেলগী থৌমী হেনগৎহনবা; খুঙ্গংগী মফমশিংদা ভর্চুএল কেয়র চাউখৎহনবা; আর.তি.-পি.সি.আর. তেস্ত পুলিং তৌবা; মেদিকেল স্তাফকী কেপাসিতী-বিলদিং তৌবা; ক্বরেন্তাইন অমসুং ইন্তেন্সিব কেয়র ফেসিলিতীশিং হেনগৎহনবা অমসুং দিসেন্ত্রেলাইজ তৌরবা কম্যুনিতী সর্বিলেন্স মেকানিজম অমসুং কম্যুনিতী ন্যুত্রিসন সেন্ত্ররশিং হেনগৎপনচিংবা কয়া ময়াম অমগী মনুংদা পনখি।

কোবিদ-১৯গা লান্থেংনবসিদা এন.জি.ও.শিং অমসুং সি.এস.ও.শিংনা মশাগী ওইজবা থিদনা নীংথিনা থবক তৌরিবা অসিবু থাগৎলদুনা হকশেলগী মন্ত্রীনা লোকদাউন মখা তানা চত্থরকপা মতমদসু মতেং লেপ্তনা পাংবীনবা হায়খি। মখোয়না ভারতকী মীয়ামশিংনা তেক্ত কাইদনা লৈনবা হোৎনরিবা অসিসু থাগৎখি।

চাইনাদা নোভেল কোরোনাভাইরস পাক্তক্ননা শন্দোরক্লে হেক তাবগা ভারতনা মসিদগী ঙাকথোক্নবা থবক কয়া খুদক্তা পাংথোকপা হৌখি হায়না দাক্তর হর্শ বর্ধন্না পনখি। কেন্দ্র সরকারনা খুদক্তুদা রাজ্য সরকারশিংদা চৎন কাংলোন কয়া খঙহনখি, খুন্নাইগী হকশেলগী ফিভম য়েংশিনবগী চাউরবা থবক পাইখৎখি অমসুং এয়রপোর্ত, ঙমখৈ অমসুং হিথাংফমশিংদা থর্মেল স্ক্রিনিং তৌবসু হৌখি। 

লান অসিবু থেংনবদা মাংজিল থাদুনা চৎলিবা থৌমীশিং অমসুং কোবিদ-১৯ পোজিতিব ওইরবা অনাবশিংদা তাথি তাওইনা তৌবীবগী নুংঙাইতবা থৌদোকশিং অসিগী মতাংদা মহাক্না কুপ্না পনখি। কোবিদ-১৯গী লাইচৎকুম্বা হকশেলগী ইরাংগী মরক্তা হকশেলগী থবক তৌরিবা মীওইশিংবু পামদবা থৌওং কয়াদগী ঙাকথোক্নবা হায়দুনা সরকারনা ইপিদেমীক দিজিজ এক্ত অসি ইনৌ নৌনা শেমদোকখ্রে। তৌবতবু খুদোংচাদবা খুদিংমক আইন্না থিংবা ঙম্লোই অদুনা তাথি তাওইনা তৌবগী ফত্ত্রবা থৌওংশিং অসিবু থেংনবা ঙম্নবা এন.জি.ও.শিং অমসুং সি.এস.ও.শিংগী মতেং চংই হায়না মহাক্না হায়খি। মাইগ্রেন্ত শিন্মীশিংবু মখোয়গী খুঙ্গংশিংদা নীংথিনা হলহন্নবা হোৎনবদা মখোয়সু মতেং পাংবা য়াওবীয়ু হায়না মহাক্না মখা তানা হায়খি।  মখোয়না ময়ুমদা হনবা মতমদা অয়েৎপা খরা থেংনবা য়াই অদুনা এন.জি.ও.শিংনা মতাং অসিদা মতেং পাংশিনবীরকউ হায়না মহাক্না হায়খি। হায়রিবা মীওইশিং অসি মপুং ফানা তেস্ত তৌরে অমসুং খঙফম থোকপশিং নীংথিনা তাকপীরে হায়বসি সোইহন্দনবা মখোয়বু খোমজিন্নবা হোৎনবদা খুন্নাইগী মতেং চংগনি হায়না মহাক্না হায়খি।  

জিলা ১২৯দি হোৎস্পোৎ ওইনা মশক খঙদোক্লে, ২৯৭ মুক্না নন-হোৎস্পোৎ ওইরে অমসুং ৩০০ মুক্না কোরোনা চংদ্রি হায়না জিলাশিং খাইদোকপগী মতাংদসু মহাক্না হায়খি। “ঐখোইদা মখল অহুম লৈ – অঙাংবা মচু, কোম্লা মচু অমসুং অশংবা মচু। ঐখোইনা অঙাংবা মচুগী জোন অসি করিগুম্বা লাক্কদৌরিবা নুমিৎ ১৪নি অসিদা অনৌবা কেস অমত্তা লাক্ত্রবদি কোম্লা মচুগী জোন্দা থম্নবা হোৎনরি অমসুং মতৌ অসুম্না কোম্লা মচুগী জোনসু অশংবা মচুদা পুরক্নবা হোৎনরি। ঐখোইগী লৈবাক অসিদা য়েক্নবা অসি কদাইদা লৈবগে অমসুং করম্না মায়োক্নগদগে হায়বসি ঐখোইনা চপ চানা খঙই। ঐখোইগী অরৈবা শক্তিশিং অসি শিজিন্নরগা মাইথিবা পীগনি” হায়না মহাক্না হায়খি।

পি.পি.ই. অমসুং মাস্ককী মতাংদা মহাক্না অসুম্না হায়খি, “লৈবাক অসিদা পোত্থোক শাবা কাংবু ১০৮ মথৌ তৌবা হৌহল্লে অমসুং মখোয়না নোংমদা পি.পি.ই. লাখ ১দগী হেন্না পুথোকপা ঙম্লে। এন.৯৫ মাস্কসু হৌজিক নোংমদা লাখ অমদগী হেন্না পুথোক্লি। চংদ্রবা য়াদ্রবা পোৎ-চৈশিং মতিক চানা লৈরে অমসুং হায়রিবশিং অসি রাজ্য খুদিংদা য়েন্থোক্লি।”

আয়ুশ মন্ত্রালয়না মীওই অমগী ইম্ম্যুন সিস্তেম মহৌশা ওইনা ফগৎহন্নবা হায়খিবা কাংলোনশিংগী মতাংদসু মহাক্না পনখি।

মীয়াম্না আরোগ্য সেতু এপ দাউনলোদ তৌগদবনি হায়রদুনা মন্ত্রীনা এপ অসিনা কোবিদ-১৯গা লান্থেংনবদা লৌরিবা থৌদাং কয়া অমগী মতাংদা মীয়ামদা তাকখি। এপ অসিনা ঐখোইবু ঙাকথোক্তুনা থম্মি। সরকারনা ত্বিত্তর ইন্দিয়াগা খুৎশম্নদুনা  @কোবিদইন্দিয়াসেবা হৌদোকখ্রে অমসুং মসিগী খুত্থাংদা মীয়াম্না খুদোংচাদবা অমা হেক্তগী মরমদা নত্ত্রগা খুদোংচাদবা অমা করম্না কোকহনগদগে হায়বগী মতাংদা ঐখোইদা পাউ ফাওরকপা য়াগনি। মখোয়গী খুদোংচাদবশিং অদু খ্বাইদগী তেনবা মতমদা কোকহনগনি হায়না মহাক্না থাজবা পীরি হায়না মহাক্না হায়খি।

অরোইবা ওইনা দাক্তর হর্শ বর্ধন্না হায়খি, “খুৎ অমসুং মাই – মিৎ চাং নাইনা হাম্বা অমসুং মাস্ক উপ্পনা মতম পুম্বদা নহাক অমসুং নহাক্না নুংশিবা মীওইশিংবু লায়না অসিদগী ঙাকথোকপা ঙমগনি। মসি য়াম্না চম্বা চেকশিন থৌরাংনি। য়ুমদা লৈবা অহলশিংবু চেকশিন্না থম্বীয়ু মরমদি মখোয় অসি য়াম্না নাগনবা মীওইশিংনি। য়ুমদা লৈবীয়ু, য়ুমদগী থবক শুবীয়ু। ঐখোইনা ভেক্সিন অমা পুথোকপা ঙমদ্রিবা ফাওবদি সোসিয়েল দিস্তেনশিংনা মতেং পাংবা লৈবাক্কী লোকদাউন অসিনা ঐখোইগী খ্বাইদগী পোতেন্ত ওইবা ভেক্সিন্নি”।

****