শিপ্পিংগীদমক্তা কেন্দ্রগী রাজ্য মন্ত্রী (আই./সি.) ওইরিবা শ্রী মন্সুখ মান্দৱিয়ানা শিপ লাইনরশিং, শিপ্পিং কমপনীশিং, মেরিতাইম এসোসিয়েশনশিং, সিফেয়র্স য়ুনিয়নশিংগা ভিদিও কনফরেন্সকী খুথাংদা ভারতকী হিথাংফমশিংদা ক্রু শিন্দোকপগী মতাংদা ৱারী শানখ্রে অমসুং মালেমগী অতোপ্পা মফমশিংগী সমুদ্রগী লম্বিদা থবক তৌরিবা অমসুং পন্দুনা লৈরিবা সমুদ্রগী খোংচৎ চৎলিবা ভারত মচাশিংগী ফিভম কুপ্না য়েংশিনহনখ্রে।

শ্রী মান্দৱিয়ানা সমুদ্রগী খোংচৎতা মপান লমদা পন্দুনা লৈরিবা ভারত মচাশিং অদু তুংদা লৌরুবা য়ানবগীদমক্তা  মখোয়গী অকুপ্পা মরোলশিং অদু পীননবা খঙহল্লকখ্রে। শ্রী মান্দৱিয়ানা ফিভম অসি হেক ফগৎলকপগা সমুদ্রগী খোংচৎতা পন্দুনা লৈরিবা ভারত মচাশিং অদু অথুবা মতমদা লৌথোক্নবগীদমক্তা সিফেয়র্স এসোসিয়েশনদা থাজবা পীরকখ্রে। শ্রী মান্দৱিয়ানা সপ্লাই চেন মুবমেন্ততা অথিংবা অপনবা লৈতনবগীদমক্তা সমুদ্রগী খোংচৎ চৎলিবশিং অসিগী মরু ওইবসু মহাক্না ফজনা খঙই। শ্রী মান্দৱিয়ানা সমুদ্রগী খোংচৎ চৎলিবশিংনা থেংনরিবা শিংননীংঙাই ওইবা অথিংবা অপনবশিং অদুসু খঙই অমসুং য়াম্না লুরবা অমসুং চাংয়েংগী মতম অসিদা মখোয়না তৌরিবা থবকশিং অদুগী থাগৎপা ফোংদোরক্লি।

শ্রী মান্দৱিয়ানা শিপ্পিং মন্ত্রালয়গী ওফিসিয়েলশিংদা ভারতকী হিথাংফমশিংদা সমুদ্রগী খোংচৎ চৎলিবশিংনা সাইন ওন অমসুং সাইন ওফ তৌবগী থৌওংদা কোমথোকহন্নবগীদমক্তা খঙহল্লকখ্রে।

ভিদিও কনফরেন্স অদুদা শরুক য়ারিবশিং অদুদা য়াওখিবা এসোসিয়েশনগী মীহুৎশিং অদুদি ইন্দিয়ন নেস্নেল শিপ ওনর্স এসোসিয়েশন (আই.এন.এস.এ.), মেরিতাইম এসোসিয়েশন ওফ নেস্নেলৱাইদ শিপ্পিং এজেন্সিজ – ইন্দিয়া (এম.এ.এন.এস.এ.), নেস্নেল য়ুনিয়ন ওফ সিফেয়র্স ওফ ইন্দিয়া (এন.য়ু.এস.আই.), দ ইন্দিয়ন মেরিতাইম ফাউন্দেশন (আই.এম.এফ.), দ মেরিতাইম য়ুনিয়ন ওফ ইন্দিয়া (এম.য়ু.আই.), দ মেরিতাইম এসোসিয়েশন ওফ শিপ ওনর্শিপ মেনেজর্স এনদ এজেন্তস (এম.এ.এস.এস.এ.) অসিনচিংবনি।

****