ক’ভিড-১৯ প্ৰতিৰোধৰ লক্ষ্যৰে ঘোষণা কৰা লকডাইনৰ সময়ত ভাৰতীয় ৰে’লৱেই যাত্ৰীৰ স্বাৰ্থ সুৰক্ষা আৰু সকলো বাণিজ্যিক উপভোক্তাৰ তত্বাৱধান লোৱাৰ লগতে দেশৰ যোগান শৃংখলা সুনিশ্চিত কৰাৰ বাবে ৩৬০ ডিগ্ৰী পদক্ষেপ গ্ৰহণ কৰিছে৷ ক’ভিড-১৯ৰ সংক্ৰমণ ৰোধ কৰাৰ বাবে ভাৰতীয় ৰে’লৱেই লকডাউনৰ সময়ত যাত্ৰীবাহী ৰে’লৰ চলাচল বন্ধ কৰে যদিও গ্ৰাহক আৰু সাধাৰণ লোকৰ প্ৰতি সেৱা আগবঢ়াই আহিছে৷ সেই উপলক্ষে ক’ভিডৰ সময়ত জনসাধাৰণৰ কথা শুনাৰ লগতে ইয়াৰ প্ৰতি সঁহাৰি জনাবলৈ এক ৰে’লৱে জৰুৰীকালীন কোষ গঠন কৰে৷  

ক’ভিডৰ বাবে গঠিত ৰে’লৱেৰ জৰুৰীকালীন কোষ হৈছে ৰে’লৱেৰ বোৰ্ড ডিভিজনৰ প্ৰায় ৪০০ বিষয়া-কৰ্মচাৰীৰে গঠিত এক দেশজোৰা গোট৷ লকডাউনৰ সময়ত প্ৰতিদিনে এই কোষে ৫টা যোগাযোগ আৰু ফিডেবেক প্লেটফৰ্ম- হেল্পলাইন ১৩৯ আৰু ১৩৮, টুইটাৰ, ই-মেইল(railmadad@rb.railnet.gov.in), আৰু চিপিজিআৰএএমএছৰ জৰিয়তে দৈনিক ক’ভিড সম্পৰ্কীয় ১৩,০০০ প্ৰশ্ন, অনুৰোধ আৰু পৰামৰ্শৰ প্ৰতি সঁহাৰি জনাই আহিছে৷ ইয়াৰে প্ৰায় ৯০% প্ৰশ্নৰ উত্তৰ স্থানীয় ভাষাত দিয়া হৈছে৷ ২৪ ঘণ্টাই ৰে’লৱেৰ গ্ৰাহক আৰু সাধাৰণ ৰাইজ, সকলোৰে অভিযোগ অতি সুন্দৰভাৱে নিষ্পত্তি কৰা এই জৰুৰীকালীন কোষে ইতিমধ্যে দেশজুৰি বিভিন্নজনৰ প্ৰশংসা বুটলিবলৈ সক্ষম হৈছে৷

লকডাউনৰ প্ৰথম চাৰি সপ্তাহত আইভিআৰএছ সুবিধাৰ উপৰি ৰে’লমদদ হেল্পলাইন ১৩৯ৰ জৰিয়তে ২,৩০,০০০, আৰু ১৩৮ৰ জৰিয়তে ১,১০,০০০তকৈ অধিক প্ৰশ্নৰ উত্তৰ দিয়া হৈছে৷  ইফালে, ১৩৮ আৰু ১৩৯ যোগে সোধা প্ৰশ্নৰ ভিতৰত অধিকাংশ ৰে’ল পুনৰ আৰম্ভ কৰা আৰু ৰেহাই সুবিধা প্ৰদান সম্পৰ্কীয়৷ ছ’চিয়েল মিডিয়াতো ৰে’ল বিভাগৰ এই প্ৰচেষ্টাৰ শলাগ লৈছে অসংখ্য শুভাকাংক্ষীয়ে৷

ইফালে, লকডাউনৰ সময়ত যাতে কোনো খাদ্য সামগ্ৰী, চিকিৎসা সঁজুলি আৰু অন্যান্য পাৰ্চেলৰ যোগান সুনিশ্চিত হয়, তাৰ বাবে ৰে’লবিভাগে যৎপৰোনাস্তি কৰিছে৷ তদুপৰি, জীৱনদায়িনী ঔষধৰ যোগান ধৰিও বহু লোকৰ প্ৰশংসাৰ পাত্ৰ হৈছে ভাৰতীয় ৰে’লৱে৷ উদাহৰণস্বৰূপে, ৱেষ্টাৰ্ণ ৰে’লৱেই এটি শিশুৰ যকৃৎ সংৰোপণৰ পাছত প্ৰয়োজন হোৱা অত্যাৱশ্যকীয় সামগ্ৰী আহমেদাবাদৰ পৰা ৰাটলামলৈ পৰিবহণ কৰে৷ ইয়াৰ পাছতে শিশুগৰাকীয়ে হাতেৰে লিখি টুইটাৰযোগে পোষ্ট কৰি ভাৰতীয় ৰে’লৱেক প্ৰশংসা কৰে৷ একেদৰে, উত্তৰ পশ্চিম ৰে’লৱেই অ’টিজিমত আক্ৰান্ত মুম্বাইৰ এগৰাকী ৩ বছৰীয়া শিশুৰ বাবে যোধপুৰৰ পৰা ২০লিটাৰ উটৰ গাখীৰ সৰবৰাহ কৰি সংকটৰ সময়ত সহায়ৰ হাত আগবঢ়োৱা বিষয়টো ছ’চিয়েল মিডিয়া আলোচনা কৰাৰ লগতে বিভিন্ন ভাৰতীয় ৰে’লৱেৰ প্ৰসংশা কৰিছে৷

****

DJN/MKV/DB