কোবিদ-১৯গী লাইচৎ শন্দোক্লকপনা মরম ওইদুনা লৈবাক শিনবা থুংনা ২০২০গী মে ৩ ফাওবা লোকদাউন চত্থরিবা অসিগী চৈচৎ অসিদা ঐচ.আর.দি. মন্ত্রালয়না এ.আই.সি.তি.ই.দা মহৈরোইশিংগী অফবা ওইবা খোঙথাং কয়া অমা লৌনবা হায়দুনা পাউতাক কয়া অমা পীখ্রে। পাউতাক অসিগী মতুং ইন্না এ.আই.সি.তি.ই.নশু কোলেজ/ইন্সতিত্যুত খরদশু মখা তাবা ৱারোল কয়া হায়খিবতা নত্তনা হৌজিক ওইরিবা লৈবাক অসিগী ফিভম অসিদা কোবিদ-১৯গী লাইচৎ অসিদগী ঙাকথোক্নবা থবক কয়া অমা লৌখৎপা হায়বসি ভারতকীনাগ্রীক অমা ওইনা তৌফম থোকপা থৌদাং অমনি হায়নশু ফোংদোকখ্রে। মসিগা মান্ননা ইন্সতিত্যুতশিংগী মকোক ওইরিবা মীওইশিংনশু মখোইগী কোলেজ/ইন্সতিত্যুতশিংগা মরী লৈনরিবা কয়াশিংগী হকশেল অমসুং নুংঙাই য়াইফনবা হোৎনবা অসিসু মখোইগী তৌফম থোকপা মথৌ অমনি হায়না হায়খ্রে। মথক্তা পল্লিবশিং অসি য়েংলদুনা কোলেজ/ইন্সতিত্যুত খুদিংমক্না ইনগদবা চৎন কাংলোনশিং খরা মখাদা পীরিঃ

ক) ফী পীবাঃ লোকদাউনগী মনুংদা মরন্নাই ওইনা চলাইবা ইন্সতিত্যুসন খরনা মখোইগী মহৈরোইশিংদা মীং চনবগী ফী য়াওনা থাগী ফী পীদবা য়াদে হায়না হায়বগী থৌদোক খরা থোকপগী পাউ এ.আই.সি.তি.ই.না তাবা ফংলে। মসিনা মরম ওইদুনা কোলেজ/ইন্সতিত্যুসনশিং অমত্তনা লোকদাউন চত্থরিবা মনুং অমসুং মহৌশাগী পুন্সিদা হঞ্জিল্লক্ত্রিবফাওবা ফী থৌবা য়ারোই হায়খ্রে। মসিগী মতুং ইন্না, কোলেজ/ইন্সতিত্যুসনশিংনা মখোইগী ৱেবসাইত্তা ৱারোল অমা থোক্তুনা অমসুং মহৈরোই খুদিংদা ই-মেলদা পাউ ফাওনবা হায়খ্রে।

খ) ফেকলতি মীওইশিংগী তোলোব পীথোকপাঃ লোকদাউন মনুংসিগী ওইনা ইন্সতিত্যুসন কয়া অমদি মদুদা থবক তৌরিবা মীওইশিংগী তোলোব পীবিদ্রে হায়বা তারে। লোইননা ইন্সতিত্যুসন খরদি মখোইগী অকক্নবা থবক তৌবা স্তাফ/ফেকলতি খরা থবক্তগী লৌথোক্লে হায়বশু খংলে। মরম অদুনা ফেকলতি/স্তাফশিংগী পীফম থোকপা শেনফম অমসুং তোলোবশিং অদু পীথোক্লনি অমসুং লোকদাউন মনুংদা থবক্তগী লৌথোকখিবশিং, করিগুম্বা লৌথোকখিবা য়াওরগশু, অদুশু অমুক হঞ্জিল্লগনি হায়না ফোংদোকখ্রে। হায়রিবা অসি য়াম্না হকথেংননা ইনগদবনি। মসিগা মরী লৈননা রাজ্য/য়ু.তি.শিংগী চিফ সেক্রেতরিশিংদা চিঠি অমা পীখ্রে অমসুং মদুদা কোলেজ/ইন্সতিত্যুসনশিংনা লৌখিবা ফীশিংশু হন্দোকহন্নবগী মতাংদা য়াওই।

গ) থৱাই ৱাহনবা অরানবা পাউঃ তোঙান তোঙানবা মীওইশিং/কাংলুপশিংনা সোসিএল মিদিয়া প্লেতফোর্মশিংদা অরানবা পাউ কয়া শন্দোক্তুনা চমম্নবা অমসুং তোকঙা কয়া পোকহল্লি। মীয়াম্না অসিগুম্বা অরানবা পাউ অসিবু থাজবিদবা অমসুং অসিগুম্বা পাউশিং অসি মরী লৈনবা মীওইশিংদা খংহনবা হায়বসি মীয়ামগী তৌফম থোকপা অমনি। অমসুং এম.ঐচ.আর.দি./য়ূ.জি.সি./এ.আই.সি.তি.ই.গী ৱেবশাইত্তা য়াওবা ই-পাউ খক্তমক অচুম্বা ওইগনি। মরম অদুনা ৱেবশাইতশিং অসি তোইনা য়েংবিদুনা অনৌ অনৌবা পাউ খংনবা তৌবিয়ূ। মতৌ অসুম্না অতোপ্পা সরকারগী ৱারোলশিংগী ওইনশু মরী লৈনবা মন্ত্রালয়/দিপার্তমেন্তশিংগী ৱেবশাইত্তা চংবিদুনা খংবা য়াগনি।

ঘ) প্রধান মন্ত্রীগী স্পেসিএল স্কোলার্শিপ স্কিমঃ হৌজিক চত্থরিবা লোকদাউন অমসুং ইন্তর্নেত শিজিন্নবদা অথিংবা খরা লৈবগী মরম ওইদুনা একাদমিক চহী ২০২০-২০২১গী পি.এম.এস.এস.এস.কী মরী লৈনবা থবকশিং খরা থিন্থরে। তৌইগুম্বশুং স্কিম অসি লোকদাউন হেক লোইবগা অমুক মখা তানা চত্থগনি। নৌনা তৌগদবা থবক থৌরমগী মতম য়াওবা কেলেন্দর অমা এ.আই.সি.তি.ই.গী ৱেবশাইত্তা মতমগী মতুং ইন্না ফংহনগনি।

ঙ) ওনলাইন ক্লাসশিং অমসুং সেমেস্তরগী পরিক্ষাঃ মখা চত্থরক্লিবা লোকদাউন অসিদা হৌজিক চত্থরিবা সেমেস্তরগী ওনলাইন ক্লাস মখা চত্থগনী। মখা তাবা ওইনা নৌনা শেম্লবা একাদমিক কেলেন্দর অমসু য়ু.জি.সি./এ.আই.সি.তি.ই.না ফোংলগনি। সেমেস্তরগী পরিক্ষাগী ওইনদি য়ু.জি.সি.না চৎন পথাপ শেম্নবা, মার্ক পীনবা অমসুং পরিক্ষা অসিদা মায় পাকপগী খল শেম্নবা কমিতি অমা শেম্লে। মসিগী মতাংদা ওইবা ৱারোলদি তোঙান্না থোক্কনি। য়ু.জি.সি./এ.আই.সি.তি.ই.গী ৱেবশাইত অসি তোইনা য়েংবিয়ু।

ছ) ইন্তর্নশিপঃ হৌজিক চত্থরিবা লোকদাউন অসিনা মরম ওইদুনা মহৈরোই খরদি মখোইগী সম্মর ইন্তর্নশিপ অসি তৌবা ঙম্নরোই হায়রি। মরম অদুনা মখোইদা য়ুমদগী ওইনা ইন্তর্নশিপ তৌনবা হায়বা পাউতাক পীরি। করিগুম্বা হায়রিবা অসি খুদোং চারোইদবা ওইরগদি, মসি ২০২০গী দিসেম্বর তৌবা য়াগনি।

জ) অতোপ্পা কোলেজ/ইন্সতিত্যুসনশিংগা ইন্তর্নেত বেনৱীথ শিজিন্নমিন্নবাঃ মহৈরোই খরনা ইন্তর্নেতকী সর্বিস ফংবা ঙমদবগী মরম অমা ওইবদগী কোলেজ/ইন্সতিত্যুসনশিংদা মখোইগী অনকপদা লৈবা অতোপ্পা কোলেজ/ইন্সতিত্যুসনশিংগী মহৈরোইশিংশু মখোইগী কোলেজ/ইন্সতিত্যুসনশিংগী ইন্তর্নেত সর্বিস অদু শিজিনহন্ননবা পাউতাক অমা পীরি অমসুং কোলেজ/ইন্সতিত্যুসনশিংনা পাউতাক অসিগী মতুং ইন্না কেম্পস অদুদা লৈরিবা ইন্তর্নেতকী খুদোংচাবা অদু হায়রিবা মহৈরোইশিংদশু শিজিন্নহনগদবনি। লোকদাউন লৈবা অমসুং খুঙ্গংগী মফম খরদা মতিক চাবা ইন্তর্নেত বেনৱীথ লৈতবা মরম্না এতেন্দেন্সকী চৎন পথাপশিংদশু খরা কোম্থোকপা লৈগদবনি। 

কোলেজ/ইন্সতিত্যুসনশিং অসিনা হায়রিবা চৎন কাংলোনশিং অসি নিংথিনা ইন্দুনা চৎকদবনি অমসুং করিগুম্বা ইন্দবা থোক্লগদি মতিক চাবা চৈরাক পীগনি।