কোবিদ-১৯না মরম ওইদুনা য়ূমদা লৈরিবা মহৈরোইশিংবু মখোইগী মমা মপাশিং অমসুং ওজাশিঙ্গি মতেংগা লোইননা মহৈ তম্বিবগী থৌওং কয়াগী খুত্থাংদা মরম চানা শরুক য়াহন্নবা হায়দুনা এম.ঐচ.আর.দি.গী য়াথংগী মতুং ইন্না এন.সি.ই.আর.তি.না মহুৎ শিনবা য়াবা একাদমিক কেলেন্দর অমা শেমখ্রে। মসিগী মহুৎ শিনবা য়াবা একাদমিক কেলেন্দর অসি কেন্দ্রগী হ্যুমেন রিসোর্স দিবেলপমেন্ত মন্ত্রী শ্রী রমেশ পোখ্রিয়াল ‘নিশাঙ্ক’না ঙসি নই-দিল্লীদা ফোংখিবনী।

থৌরম অসিদা মন্ত্রীনা অসুম্না হায়খী মদুদি কেলেন্দর অসিনা ওজাশিংদা তোঙান তোঙানবা তেক্নোলোজি অমসুং সোসিএল মিদিয়াগী খুৎলাই লৈরিবা কয়া অসি শিজিন্নদুনা মহৈরোইশিংদা য়ূমদা লৈনা লৈনা য়াম্না নুংঙাইবা অমসুং পুক্নিং চিংশিনবা মওংদা মহৈ তম্বিবগী থৌওং পাংথোকহনবা ঙমগনী। অদুম ওইনমক মোবাইল, রেদিও, তেলিবিজন, এস.এম.এস. অমসুং তোঙান তোঙানবা সোসিএল মিদিয়াগী খুৎলাইশিং শিজিন্নবা ঙম্বগী খেৎনবা থাক কয়া অমসু খন্নবদা য়াওরী। মোবাইলদা ইন্তর্নেত্তা য়াওদবা অমসুং ৱাৎশএপ, ফেসবুক, ত্বিত্তর, গুগলনচিংবা সোসিএল মিদিয়াগী খুৎলাই কয়া শিজিন্নবা ফংদবা মীওই কয়া অমা লৈরিবা অসি খংবগী মতুং ইন্না অসিগুম্বা মহৈরোইশিং অমসুং মখোইগী মমা মপাশিংগী ওইনদি কেলেন্দর অসিনা মোবাইলদা এস.এম.এস. থাবা অমসুং মোবাইলদা ফোন তৌবগী খুত্থাংদা তাকপী তম্বীনবা হায়বা পাওতাক কয়া অমা ওজাশিংদা পীরি। মমা মপা ওইবশিংনশু মখোইগী ইলিমেন্তরি থাক্তা তম্লিবা মহৈরোইশিংদা কেলেন্দর অসি শিজিন্নহনগনি হায়বগী থাজবশু থম্মি।  

মন্ত্রীনা হায়বগী মতুং ইন্না ক্লাস ১-১২ অমসুং মসিদা তম্লিবা হীরমশিং অসি কেলেন্দর অসিগী মনুং চনগনী। কেলেন্দর অসিনা দিব্যাং (ময়ামদগী হেন্না য়েংশিনবিবা মথৌ তাবা অঙাংশিং) অঙাংশিং য়াওনা মহৈরোইশিংনা শিজিন্নদবা য়াদবা ওদিও লাইরিক্কী লিঙ্ক, রেদিওগী থৌরমশিং, বিদিওগী থৌরমশিংশু ফংহন্নবা হোৎনগনী। 

শ্রী পোখ্রিয়ালনা মখা তানা হায়খী মদুদি মরি লৈনবা সিলেবস নত্রগা লাইরিকশিংদা য়াওরিবা হীরম/পরাদা য়ুম্ফম ওইবা পুক্নিং চিংশিনগদবা অমসুং নুংঙাইগদবা থবক থৌরম কয়া অমসুং চয়োলগী ওইনা চত্থনবা থৌরাং কয়া অমা ওইনা য়াওই। খ্বাইদগী মরু ওইবদি মসিনা তমগদৌরিবা অদুগা পীরিবা হীরমশিং অদুগশু চান্নহল্লী। তমগদৌরিবা অদুগা হীরমশিংগা চান্নহনবগী পান্দমদি ওজাশিং/মমা মপাশিংদা অঙাংশিংগী খংবগী চাং ওন্ননবা অমসুং লাইরিক্তা য়াওরিবা কয়া অদুগী ৱাংমদশু খংবা হেন্নবনি। 

আর্ত ইজুকেসন, হকচাং শাজেল তৌবা, য়োগা, প্রি-বোকেস্নেল স্কিলনচিংবা হকথেংননা শরুক য়াবা য়াবা থৌওং অমসু কেলেন্দর অসিগী মনুং চল্লি হায়না মন্ত্রীনা ফোংদোকখী। কেলেন্দর অসিদা ক্লাস অমসুং সবজেক্তকী মতুং ইনন্না পাংথোক্কদবা থৌওং কয়া অমসু তেব্যুলার ওইবা মওংদা য়াওরী। কেলেন্দর অসিদা হিন্দি, ইংলিশ, উর্দু অমসুং সংস্কৃতকী লোলশিং অসিগা মরী লৈনবা থৌওং কয়া অমসু সবজেক্তকী হীরম ওইনা য়াওই। কেলেন্দর অসিদা ওজাশিং অমসুং মমা মপা ওইবশিং অমসুং মহৈরোইশিংদশু ৱাখল ৱাবা হন্থনবগী চেকশিন থৌরাং কয়া অমসু য়াওই।  কেলেন্দর অসিদা ই-পাথশালা, এন.আর.ও.ই.আর. অমসুং ভারত সরকারগী পোর্তেল দি.আই.কে.এস.ঐচ.এ.দা য়াওরিবা ই-কন্তেন্ত অসিগা চান্নবা পরাশিংগী লিঙ্কশু য়াওই।  

পীরিবা থৌদাংশিং অসি তৌদবা য়াদে হায়বগী মহুত্তা তৌবা য়াবা ওইনা তাকই অমসুং মথং মনাও ওইনা ইন্দবা য়াদে হায়না হায়বশু লৈতে হায়না মন্ত্রীনা মখা তানা হায়খী। ওজাশিং অমসুং মমা মপাশিংনা পীরিবশিং অসিগী মথং মনাও ইন্দনা মহৈরোইশিংনা তৌনিংবা ফাওবা হীরমশিং অদুতমক ওইনা পাংথোকহনবগী থৌওং খনবগী অয়াবশু লৈ।

কেলেন্দর অসি দি.তি.ঐচ.কী চেনেলশিংদা শন্দোক্কনি অমসুং এস.সি.ই.আর.তি.শিং, ইদুকেসনগী দাইরেক্তরেৎশিং, এস.সি.ই.আর.তি.শিং, কেন্দ্রিয় বিদ্যালয় সঙ্গথন, নবোদয়া বিদ্যালয় সমিতি, সি.বি.এস.ই., রাজ্যগী স্কুল ইদুকেসন বোর্দশিংগশু বিদিও কনফরেন্স তৌদুনা পাংথোক্কনি।

মসিগী থৌরাং অসিনা ঐখোইগী মহৈরোইশিং, ওজাশিং, মহৈলোইশঙ্গি প্রিন্সিপালশিং অমসুং মমা মপা ওইবশিংদা কোবিদ-১৯বু কান্ননিংঙাই ওইবা ওন-লাইন্দা তাকপী তম্বিবগী পাম্বৈ কয়া শিজিন্নবা অমসুং য়ুমদা মহৈ তম্বা ফংদুনা মহৈ মশিং হেন্না খংবা হেনগৎপগী মওংদা থেংননবা পুক্নিং থৌগৎকনি।