ಮಾರ್ಚ್, 2020 ರ ವೇತನ ತಿಂಗಳ ಎಲೆಕ್ಟ್ರಾನಿಕ್ ಚಲನ್ ಕಮ್ ರಿಟರ್ನ್ (ಇಸಿಆರ್) ಸಲ್ಲಿಸುವ ದಿನಾಂಕ 15.04.2020 ರಿಂದ 15.05.2020 ರವರೆಗೆ ವಿಸ್ತರಣೆ

ಇದರಿಂದ ಲಾಕ್ ಡೌನ್ ಅವಧಿಯಲ್ಲಿ ಸಂಬಳ ಪಾವತಿಗಾಗಿ ಸುಮಾರು 6 ಲಕ್ಷ ಸಂಸ್ಥೆಗಳಿಗೆ ಪ್ರೋತ್ಸಾಹ

ಕೋವಿಡ್ -19 ಸೃಷ್ಟಿಸಿರುವ ಪರಿಸ್ಥಿತಿ ಮತ್ತು ಕೋವಿಡ್ -19 ಹರಡುವುದನ್ನು ತಡೆಗಟ್ಟಲು ಕೇಂದ್ರ ಸರ್ಕಾರವು 24.03.2020 ರ ಮಧ್ಯರಾತ್ರಿಯಿಂದ ಘೋಷಿಸಿರುವ ಲಾಕ್‌ಡೌನ್ ಅನ್ನು ಪರಿಗಣಿಸಿ, ಮಾರ್ಚ್‌ನಲ್ಲಿ ತಮ್ಮ ಉದ್ಯೋಗಿಗಳಿಗೆ ವೇತನ ಪಾವತಿಸಿದ ಉದ್ಯೋಗದಾತರಿಗೆ 2020 ರ ಮಾರ್ಚ್ ತಿಂಗಳಿಗೆ ಎಲೆಕ್ಟ್ರಾನಿಕ್ ಚಲನ್ ಕಮ್ ರಿಟರ್ನ್ (ಇಸಿಆರ್) ಸಲ್ಲಿಸುವ ದಿನಾಂಕ ವನ್ನು 15.05.2020 ರವರೆಗೆ ವಿಸ್ತರಿಸಲಾಗಿದೆ.

ಮಾರ್ಚ್, 2020 ರ ಅಂತಿಮ ದಿನಾಂಕವು ಸಾಮಾನ್ಯವಾಗಿ 15.04.2020 ಆಗಿರುತ್ತದೆ, ಆದ್ದರಿಂದ ಇಪಿಎಫ್ ಮತ್ತು ಎಂಪಿ ಆಕ್ಟ್, 1952 ರ ವ್ಯಾಪ್ತಿಗೆ ಬರುವ ಸಂಸ್ಥೆಗಳಿಗೆ ಮಾರ್ಚ್, 2020 ಕ್ಕೆ ನೀಡಬೇಕಾದ ಕೊಡುಗೆಗಳು ಮತ್ತು ಆಡಳಿತಾತ್ಮಕ ಶುಲ್ಕಗಳನ್ನು ಪಾವತಿಸಲು ಮೂವತ್ತು ದಿನಗಳ ಹೆಚ್ಚುವರಿ ಅವಧಿ ನೀಡಲಾಗಿದೆ.

ಕಾರ್ಮಿಕ ಮತ್ತು ಉದ್ಯೋಗ ಸಚಿವಾಲಯದ ಈ ನಿರ್ಧಾರವು 2020 ರ ಮಾರ್ಚ್‌ನಲ್ಲಿ ತನ್ನ ಉದ್ಯೋಗಿಗಳಿಗೆ ವೇತನವನ್ನು ವಿತರಿಸಿದ ಸಂಸ್ಥೆಗಳ ಉದ್ಯೋಗದಾತರಿಗೆ ಬೆಂಬಲ ಮತ್ತು ಪರಿಹಾರ ನೀಡುವುದು ಮತ್ತು ಕೋವಿಡ್-19 ಸಾಂಕ್ರಾಮಿಕದ ಸಮಯದಲ್ಲಿ ನೌಕರರಿಗೆ ವೇತನ ಪಾವತಿಸಲು ಉದ್ಯೋಗದಾತರಿಗೆ ಪ್ರೋತ್ಸಾಹ ನೀಡುತ್ತದೆ. ಉದ್ಯೋಗ ಕಡಿತವನ್ನು ತಡೆಗಟ್ಟಲು ಮತ್ತು ಸಾಂಕ್ರಾಮಿಕ ರೋಗದ ವಿರುದ್ಧ ಹೋರಾಡಲು ನೌಕರರ ಗಳಿಕೆಯನ್ನು ಖಚಿತಪಡಿಸಿಕೊಳ್ಳಲು ಪ್ರಧಾನ ಮಂತ್ರಿ ಗರೀಬ್ ಕಲ್ಯಾಣ್ ಯೋಜನೆಯ ಉದ್ದೇಶಕ್ಕನುಗುಣವಾಗಿ ಈ ಕ್ರಮ ಕೈಗೊಳ್ಳಲಾಗಿದೆ.

ಸುಮಾರು 5 ಕೋಟಿ ಉದ್ಯೋಗಿಗಳಿಗೆ ವೇತನ ಪಾವತಿಸುವ ಸುಮಾರು 6 ಲಕ್ಷ ಸಂಸ್ಥೆಗಳು ಯಾವುದೇ ದಂಡವಿಲ್ಲದೇ ಇಸಿಆರ್ ಸಲ್ಲಿಸಲು ಈ ಪರಿಹಾರ ಪ್ರಯೋಜನವಾಗಲಿದೆ.

ಉದ್ಯೋಗದಾತರು 2020 ರ ಮಾರ್ಚ್ ವೇತನ ವಿತರಣೆಯ ದಿನಾಂಕವನ್ನು ಮಾರ್ಚ್, 2020 ರ ಇಸಿಆರ್ ನಲ್ಲಿ ಘೋಷಿಸಬೇಕು.

ಈ ಘೋಷಣೆಯೊಂದಿಗೆ ಮಾರ್ಚ್, 2020 ರ ಕೊಡುಗೆಗಳು ಮತ್ತು ಆಡಳಿತಾತ್ಮಕ ಶುಲ್ಕಗಳನ್ನು ಈಗ 15.05.2020 ರವರೆಗೆ ಪಾವತಿ ಮಾಡಬಹುದಾಗಿದೆ.

ಮಾರ್ಚ್, 2020 ರ ವೇತನವನ್ನು ವಿತರಿಸುವ ಉದ್ಯೋಗದಾತರು 2020 ರ ಮಾರ್ಚ್‌ನಲ್ಲಿ ಇಪಿಎಫ್ ಬಾಕಿ ಪಾವತಿಸಲು ನಿಗದಿತ ದಿನಾಂಕದ ವಿಸ್ತರಣೆಯ ಪರಿಹಾರವನ್ನು ಪಡೆಯುವುದಲ್ಲದೆ, 15.05.2020 ರಂದು ಅಥವಾ ಅದಕ್ಕೂ ಮೊದಲು ಪಾವತಿಸಿದರೆ ಬಡ್ಡಿ ಮತ್ತು ದಂಡವನ್ನು ತಪ್ಪಿಸಿಕೊಳ್ಳುತ್ತಾರೆ.

***