প্রধান মন্ত্রী শ্রী নরেন্দ্র মোদীনা ঙসি ২০২০গী মে ৩ ফাওবা লোকদাউন শাংদোক্নবা লাওথোকখ্রে। মসিগী মমাংদা পাংথোকখিবা নুমিৎ ২১নিগী লোকদাউনগী মতম ২০২০গী এপ্রিল ১৪দা লোইরে।

কোরোনা ভাইরস শন্দোরকপা থিংনবা পান্দমদা লৈবাক মীয়ামদা ৱা ঙাংলদুনা প্রধান মন্ত্রীনা হায়খি মদুদি রাজ্য কয়া, এক্সপার্ত কয়া অমদি মীওই কয়াগী ৱাফমশিং পুক্নিংদা থমদুনা লোকদাউন শাংদোক্নবা ৱরেপ লৌরে।

মহাক্না প্রজাশিংবু লোকদাউন মনুংদা মিৎশিং নাশিংনা লৈনবা অমদি সোসিয়েল দিস্তেন্সিং ঙাক্না চৎনবা হায়খি।

প্রধান মন্ত্রীনা ৱাফম অসিমসু থমখি মদুদি রিস্ক নেম্বা মফমশিংদা ২০২০গী এপ্রিল ২০দগী অকক্নবা এক্তিবিতী খরা পাংথোকপদা অয়াবা পীরগনি।

প্রধান মন্ত্রীনা হায়খি, “এপ্রিল ২০ ফাওবা শহর খুদিংমক, পুলিস স্তেসন খুদিংমক, জিলা খুদিংমক, রাজ্য পুম্নমক মফম অদুদা লোকদাউন কয়াম্না ইনবগে হায়বদু চাংয়েং তৌগনি। মফম অদুনা কোরানদগী মশাবু কয়াম্না কঞ্জবা ঙম্বগে হায়বদু য়েংগনি। মসিগী চাংয়েংদা মায় পাক্লগদবা, হোৎ-স্পোৎ কেতেগোরীগী মনুং চন্দবা, অমদি হোৎ-স্পোৎ ওন্থোকপগী ওইথোকপা নেম্বা মফমশিংদা, এপ্রিল ২০দগী অখন্নবা দরকার লৈবা এক্তিবিতী খরগী অয়াবা পীরবা য়াই।”

“করিগুম্বা লোকদাউনগী নিয়ম থুগায়রবা অমদি কোরোনাভাইরস শন্দোরকপগী রিস্ক লৈরগদি পর্মিসন অসি খুদক্তা লৌথোক্কনি” হায়না মহাক্না চেকশিন ৱা ফোংদোকখি।

মসিগী মতাংদা হয়েং সরকারগী মাইকৈদগী মরিক চুম্বা গাইদলাইন অমা থাদোক্কনি।

মহাক্না হায়খি, “নুংতিগী তাল্লগা চাবশিংনা, নুংতিগী তান্দুনা মখোয়গী মথৌ তাবশিং মপুং ফাহল্লি, মখোয় ঐগী ইমুংনি। ঐগী মরু ওইবা থবকশিংগী মনুংদা অমদি, মখোয়গী পুন্সিদা লাকপা অৱাবশিং হন্থহনবনি। প্রধান মন্ত্রী গরীব কল্যান য়োজনাগী থোংদা সরকারনা মখোয়গী মতেং পাংনবা হোৎনবা য়াবা হোৎনরি। হৌজিক অনৌবা গাইদলাইন শেম্বা মতমদসু মখোয়গী কান্ননবা মপুং ফানা মিৎয়েং চংলে।”

ঙসি বাবা সাহেব অম্বেদকরগী মপোক কুমওন্দা মফমদা ইকায় খুম্নবা উৎলদুনা প্রধান মন্ত্রীনা হায়খি, “অদোম্না মায়োক্নরিবা খুদোংচাদবশিং অদু ঐহাক নীংথিজনা খঙই- খরনা চিঞ্জাক্কীদমক, খরনা মফম অমদগী মফম অমদা চত্থোক চৎশিন তৌবগীদমক, অমদি অতোপ্পশিংনা য়ুম অমদি ইমুং মনুংদগী তাম্না লৈবগীদমক। অদুম ওইনমক অদোমগী লৈবাক্কীদমক হৌন-লোনচৎ লৈবা লান্মী অমগুম অদোম্না অদোমগী থৌদাং পাংথোক্লি। ঐখোয়গী সংবিধান্দা হায়রিব ‘ৱি, দি পিপল ওফ ইন্দিয়া’গী শক্তি অদু মসিনি।”

কোবিদনা শোকল্লবা মালেমগী অচৌবা অমসুং শক্তি লৈরবা লৈবাকশিংগা চাংদম্নরদুনা মহাক্না হায়খি মদুদি ভারতনা ফিভম অসি য়াম্না নীংথিজনা মেনেজ তৌরি।

মহাক্না হায়খি, “থা অমা, থা অমা মখায়গী মমাংদা, লৈবাক কয়া অমা কোরোনা ইনফেক্সনগী মতাংদা অমরোমদা ভারতকা মান্ননা লৈরম্মি। অদুবু ঙসিদি, লৈবাকশিং অদু ভারতকা য়েংনবদা কোরোনাগী কেস শরুক ২৫-৩০ ফাওবা হেন্না লৈরে। লৈবাকশিং অদুদা মীওই লিশিং কয়া য়াম্না ৱানা শিখ্রে। ভারতনা হোলিস্তিক এপ্রোচ শিজিন্নরমদ্রবদি, ইন্তিগ্রেতেদ এপ্রোচ শিজিন্নরমদ্রবদি, অথুবা ৱারেপ লৌরমদ্রবদি ঙসি ভারতকী ফিভম অসি অতোপ্পা অমা ওইরমগনি।”

প্রধান মন্ত্রীনা হায়খি মদুদি ভারতনা লোকদাউনদগী কান্নবা ফংলি। মহাক্না হায়খি, “শেনমিৎলোনগী মিৎয়েংদা  হৌজিক মসি অৱাবা অমনি অদুবু ভারত মচাশিংগী তুংগী পুন্সিদা, মসিগা চাংদম্ননীংঙাই অমত্তা লৈতে। ঐখোয়গী অকক্নবা রিসোর্সশিংগী মনুংদা ভারতনা চৎলিবা লম্বী অসি ঙসিদি মালেম পুম্বদা খন্ননীংঙাই ৱাফম অমা ওইরে।”

মহাক্না লৈবাক মীয়ামদা থাজবা পীখি মদুদি হিদাক-লাংথক, চিঞ্জক অমদি অতোপ্পা দরকার ওইবা পোৎলমশিং মরাং কাইনা লৈরি। হেল্থ ইনফ্রাস্ত্রকচরদসু ঐখোয় খুমাং চাউশিল্লি হায়নসু প্রধান মন্ত্রীনা থাজবা পীখি।

মহাক্না হায়খি, “জনুৱারীদা কোরোনাভাইরসকীদমক তেস্তিং লেব অমা খক্তা লৈরম্বা অদু হৌজিক ঐখোয় মথৌ তৌরিবা লেব ২২০ হেন্না লৈরে। গ্লোবেল এক্সপরিয়েন্সনা উৎলি মদুদি অনাবা ১০০০০ খুদিংগী বেদ ১৫০০-১৬০০ দরকার ওইরি। ভারত্তা ঙসি ঐখোয় অহেনবা ফমুং লাখ অমদগী হেন্না থৌরাং তৌরে। মসিদা নত্তনা, 600তগী হেনবা অসিগুম্বা হোস্পিতালনা, শুপ্নগী কোবিদ লাইয়েংনবগীদমক থবক তৌরি। খুদোংচাবশিং অসি খোংজেল য়াংনা হেনগৎহল্লি।”

প্রধান মন্ত্রীনা নাগরিকশিংদা লাইচৎ অসিগী মায়োক্তা মখোয়গী লান্দা ৱাফম তরেৎ ঙাক্না চৎনবা অকনবা ৱাফম থমখি।

অহানবা, য়ুমদা লৈবা অহলশিংগী থোইদোক্না সেবা তৌবীয়ু, মরু ওইনা অরিবা অনাবা লোইনরিবা মীওইশিং।

অনিশুবা, লোকদাউন অমসুং সোসিয়েল দিস্তেন্সিংগী লক্ষমন রেখা মপুং ফানা ঙাকপীয়ু, য়ুমদা শেম্বা ফেসকভর নত্ত্রগা মাস্ক শোইদনা শিজিন্নবীয়ু।

অহুমশুবা, অদোমগী ইম্যুনিতী হেনগৎহনবীনবগীদমক, আয়ুশ মন্ত্রালয়না পীবা গাইদলাইনশিং ইনবীয়ু।

মরিশুবা, কোরোনা ভাইরস শন্দোকপা থিংবদা মতেং পাংনবগীদমক আরোগ্য সেতু মোবাইল এপ দাউনলোদ তৌবীয়ু। অতোপ্পবসু এপ অসি দাউলোদ তৌহন্নবা থৌগৎপীয়ু।

মঙাশুবা, হেক ঙমলিমখৈ লাইরবা ইমুংশিংগী মতেং পাংবীয়ু, মখোয়গী চান-থক্নবগী মথৌ তাবশিং থুংহনবীয়ু।

তরেৎশুবা, লৈবাক অসিগী কোরোনাগী লাল্লোইশিং, ঐখোয়গী দোক্তর-নর্সিং, সফাই কর্মী-পুলিস কর্মীবু মপুং ফানা ইকাই খুম্নবীয়ু।