১. ঙসি সাইন্স এন্দ তেক্নোলোজীগী কেন্দ্র মন্ত্রী দাঃ হর্স ভর্ধননা সি.এস.আই.আর.গী দি.জি. দাঃ সেখর সি. মন্দে অমসুং সি.এস.আই.আর.গী লেব দিরেক্তর পুম্নমক্কা ভুদিও কনফরেন্সগী খুত্থাঙদা সি.এস.আই.আর. অমদি মসিগী মশা লেব ৩৮না লৈবাকসিদা শন্দোরক্লিবা কোরোনা ভাইরস লাইচৎ অসিগু লাকশিন্নবগীদমক লৌখৎলিবা খোঙথাংশিংগী মতাংদা নৈন-মীফম অমা পাঙথোকখ্রে‍।

২. সি.এস.আই.আর.দা কোর স্ত্রেতজী গ্রুপ (সি.এস.জি.) শেম্লে অমদি কোভিদ-১৯গা মরী লৈনবা থবক থৌরমশিং পাঙথোক্নবা ভর্তিকেল মঙা শেম্লে‍ হায়না সি.এস.আই.আর. দি.জিও দাঃ সেখর সি. মন্দেনা পাউদমখি‍। মসিদা য়াওরিবশিংদিঃ দিজিতেল অমদি মোলিক্যুলর সর্ভিলেন্স; অথুবা অমদি শেন চঙদনা লায়না খঙদোক্নবা পাম্বৈ, অনৌবা হীদাক/হীদাক হন্না শীজিন্নবা অমসুং মরী লৈনবা পুথোকপগী থৌওং; হোস্পিতালদা মতেং ওইগদবা খুৎলায়শিং পি.পি.ই.; অমসুং, সপ্প্লাই চেন অমদি লোজিস্তিক সপ্পোর্ত সিস্তেমনি‍। লৈবাকসিদা লৈরিবা খুদোংথিরবা তানফম অসিদা সি.এস.আই.আর. লেব ১৫না লৈবাকসিগী অচৌবা ইন্দস্ত্রিশিং, পি.এস.য়ু.শিং, এম.এস.এম.ই.শিং অমসুং অতোপ্পা দিপার্তমেন্ত অমদি মিনিস্ত্রীশিংগা খুৎশম্ননা চৎলি‍।

৩. সি.এস.আই.আর. লেবশিংনা কোভিদ-১৯ থেংননবা পাম্বৈ অমা পুথোক্নবা হোৎনরিবা পুম্নমক্তু তারবা মতুংদা দাঃ হর্স বর্ধননা মখোয়না ভারত লৈঙাক্না কোভিদ-১৯ থেংননবা লৌখৎলিবা খোঙথাংশিংগী মতাংদা পাউদমখি‍।

৪. “ভারতনা মহাক্কী সাইন্তিফিক কাঙলুপতা চাউনা থাজবা থম্মী অমদি কাঙলুপ অসিনা তানফমসিদা লিৎখৎলক্তুনা হৌজিক লুরবা তানফমসিদা থাজবা অসি ঙাক্লক্কনি হায়না ঐনা থাজৈ‍,” হায়না সি.এস.আই.আর. সাইন্তিস্তশিংবু পুক্নীং থৌগৎলদুনা দাঃ হর্স ভর্ধননা হায়খি‍। সি.এস.আই.আর. লেবশিংনা কোভিদ নারবা মীওইশিংগী স্বাব সেম্পল চাংয়েং তৌবদা শরুক য়ারি অমদি মখোয় খরনা ভাইরস অসিগী জিনেতিক সিক্যুএন্সিং তৌদুনা লাক্কদৌরিবা চয়োল খরসিদা সিক্যুউএন্সিং ৫০০ তৌনবা পান্দম থম্লি হায়বা মহাক্না থাগৎপা ফোঙদোকখি‍। “লায়না অসিনা শোকহনবা য়াবা মীওইশিং অমসুং মহীক অসি পক্লবা মীওইশিংনা কমদৌনা রেসপোন্স তৌবগে হায়বদু খঙদোকপদা জিনেতিক সিক্যুএন্সিং অসি য়াম্না মরু ওই,” হায়না দাঃ হর্স ভর্ধননা হায়খি‍। মহাক্না হায়, “জিনেতিক সিক্যুএন্সিং অসিনা ঐবু চহী ২৭গী মমাঙগী পোলিও মুত্থৎপগী খোঙজং অদু নিংশিংহল্লি‍। খোঙজং অদুগী লোইশিল্লকপা মতমদুদা লৈবাকসিদা শাথিবা খোঙ-খুৎ চিংবগী ফীভম ময়োক্নরিবশিংবু খঙদোক্নবগী অকনবা য়েনশিন থৌরাং লৌখৎখি‍। মতম অদুদসু জিনেতিক সিক্যুএন্সিং শীজিন্নদুনা পোলিও ভাইরসগী খোঙচৎকী মরমদা থিদোক্তুনা পোলিও মুত্থৎপদা চাওনা কান্নবা পীখি‍।”

৫. মহাক্না সি.এস.আই.আর.বু এম.এস.এম.ই.শিং অচৌবা ইন্দস্ত্রিশিং, পি.এস.য়ু.শিংগা খুৎশম্নদুনা আর.তি.-পি.সি.আরো মেচিন পুথোকপগীদমক থাগৎপা ফোঙদোকখি‍। মহাক্না হায়, “প্লাজমাদা য়ুম্ফম ওইবা লায়েং পথাপ তানফমসিদা য়াম্নমক মরু ওই‍। মসিগীদমক্তা কোভিদ-১৯ নারুবদগী ফরক্লবা মীওইশিংদা মখোয়গী ঈ মতেং পাংনবা পুক্নীং থৌবা মথৌ তাই‍।”

৬. সিই.এস.আই.আর.-এন.এ.এল.না বি.ঐচ.ই.এল. অমসুং বি.ই.এল.গা পুন্না পায়খৎলিবা ভেন্তিলেতর, ওক্সিজেন ইনরিচমেন্ত দিভাইস শাবা অমদি ৩-দিদা নমবা মায়গী সিল্দ, মায়গী মাস্ক, শেৎনবা ফি অমসুং অতৈ ঙাকথোক্নবা খুৎলায়শিং শেমগৎপগী থবকশিংপু থাগৎপা ফোঙদোকখি‍। “হায়রিবা পোৎলম ময়াম অসিনা ঐখোয়বু মথংগী চয়োল খরগী মনুংদা কান্নবা পীগনি,” হায়না মহাক্না হায়খি‍।

৭. অদুম ওইনমক দাঃ হর্স ভর্ধননা সি.এস.আই.আর. সাইন্তিস্তশিংদা কোভিদ-১৯ লাকশিন্নবা পাম্বৈশিং অসি অকক্নবা মতম অমা পুক্নীংদা থমদুনা হোৎননবা চেকশিন-ৱা হায়খি‍। “হৌজিক লানগী মতমনি, সি.এস.আই.আর.গী সাইন্তিস্তশিংনা লান লোইদ্রিঙৈদা মায় পাক্নবা পাম্বৈ পুথোক্নবা হোৎনগদবনি, মখোয়না ফীভম অসিবু হান্ন-হান্নগী চত্থরকপা থিজিন থৌওং অমনি হায়না লৌরোইদবনি‍।” মহাক্না হায়, “কোভিদ-১৯ অসিনা মশক লোত্তুনা লাকপা খুদোংচাবা অমসু পীরে মদুদি মসিনা লৈবাকসিগী খাংবা ঙম্বগী থৌনা, মরোমদোম লেপচবা ঙমবা অমদি মরুওইবা অনা-লায়েংগী খুৎলায়শিং মশানা শেমগৎচবা ঙম্বগী মঙম হেনগৎহল্লগনি‍।” মহাক্না সি.এস.আই.আর. সাইন্তিস্তশিংনা ভিদিও কনফরেন্স শীজিন্নদুনা মখোয় মশেল কোক চুংশিন্নরিবা মতৌ অদুবু থাগৎপগা লোয়ননা কোভিদ-১৯ লানথেংননবা ভেক্সিন পুথোক্ত্রিবফাওবা খ্বাইদগী অফবা ভেক্সিনগী পাম্বৈ অনী ওইরিবা সোসেল দিস্তেন্সিং অমদি লোকদাউন অনি অসিবু ঙাক্তুনা চৎনবা ৱাফমশিংসু থমখ‍ি‍।

৮. কেন্দ্র মন্ত্রীগা পাঙথোকখিবা নৈন-মীফম অদুদা সি.এস.আই.আর. দি.জি. দাঃ সেখর সি. মন্দে, ইনস্তিত্যুৎ ওফ জিনোমিক্স এন্দ ইন্তিগ্রেতিভ বাইওলোজি (সি.এস.আই.আর.-আই.জি.আই.বি.) দিরেক্তর দাঃ অনুরাগ অগ্রৱাল, অমসুং ভিগ্যান প্রসার দিরেক্তর দাঃ নকুল পরাসর শরুক য়াখি‍। লেমহৌরিবা সি.এস.আই.আর.গী লেব ৩৮গী দিরেক্তরশিংসু ভিদিও কনফরেন্সকী খুত্থাঙদা পাঙথোকখিবা মীফম অদুদা শরুক য়াখি‍।

*****